Mateyo 12

Ifyapakasuba ke Sabata

(Mk. 2.23-28; Luk. 6.1-5)

1Panshita njilya, pakasuba ke Sabata, Yesu akalangenye mumabala aku tiligu. Nomba abakusambila bakwe baumfwile insala. Elo batatikile ukukonaula imisonte yaku tiligu nokulya.#Deut. 23.25 2Ulo Abafalisi babwene mfi, basosele kuli Yesu ati, “Boneni! Abakusambila benu bakochita ichitasuminishiwa Mumafunde pakasuba ke Sabata!”

3Elo Yesu abasukile ati, “Napo tamwapendapo ifyo Davide achitile ulo ali nensala pamo nabo ali nabo? 4Ayinjile munanda yaku Lesa umo ye nabo ali nabo balile imifuba iyatulilwe kuli Lesa, icho batalingile kuchita, kuntu bachipupila benka.#Ukuf. 29.32-33; Ab.Lef. 24.5-9 5Napo tamwapendapo Mumafunde ifyo bachipupila bamunanda yaku Lesa pe Sabata batoba ifunde lyakasuba nka, nomba tabapelwapo umulandu? 6Echo nkomweba ati, epo ali mpano uuchilile pananda yaku Lesa. 7Nga mwayishibile ifyo amalembo aku Lesa ngalya aasosa ati, ‘Icho mfwaya ninkumbu, techipupopo iyowo,’ nga tamupelapo mulandu kubatakwetepo umulandu iyowo.#Hos. 6.6 8Pakuti Umwana wa Muntu Eshikulu nape Sabata.”

Yesu aposha uwakuboko ukwauminina

(Mk. 3.1-16; Luk. 6.6-11)

9Ulo Yesu afumineko nkulya, ayile kwinjila munanda yakulombelamo Lesa. 10Mwenka mulya mwali umwalalume uwali nokuboko ukwauminina. Elo abantu bafumbile Yesu ati, “Napo chalisuminishiwa mumafunde esu ukuposha umuntu pakasuba ke Sabata?” Bafumbile mfi ukuti basange apakumupelelapo umulandu.

11Elo Yesu abasukile ati, “Mba ninani mukati kenu, nga ali nembelele imo, nomba yawila muchilindi pakasuba ke Sabata uutangayifumyamo? 12Echo umuntu alichilapo ukwinekantu pambelele. Elo nefunde lilasuminisha ukuchita ichilungeme pakasuba ke Sabata.” 13Ulo Yesu ashilile ukusosa mfi, aebele umwalalume ati, “Tambulula ukuboko kobe.”

Alitambulwile, elo nokuboko kwakwe kwalipolele, kwalingana nokunakwe. 14Penkapo Abafalisi balifuminemo nokuya mukupangana umwakwipayila Yesu.

Yesu emubomfi waku Lesa Uwasalwa

15Ulo Yesu ayishibile ifyo balikupangana, alifumineko. Abantu abenji balikonkele, elo naye aliposeshe bonse abalwele. 16Nomba alibakenye ukuti bemufisululapo. 17Achitile nchi pakuti chifikilishiwe icho Lesa asosele ukupitila mumusoseshi Esaya ati,

18“Ngu emubomfi wanji uwo nasala

uwo natemwesha.

Elo muli ye ndasekelela.

Nakumupela Umupashi wanji,

elo naye akubilisha ifyabupingushi bwanji

kunko shonse.#Esa. 42.1-4

19Talokutalikapo nangula ukuwowauka,

talokubilikishapo pakulabila mumisebo.

20Takashilishepo itete ilyafwantika,

nangu ukushimya inyali iitakoyakishapo.

Alikumfwila abantu inkumbu,

ukufika ubulungami bwakwe bukachimfye.

21Nabenafyalo bakuchetekela.”

Yesu na Belesebule

(Mk. 3.20-30; Luk. 11.14-23; 12.10)

22Elo abantu baletele kuli Yesu umuntu uwali impofu nabuchibulu pantu ali nomupashi uubi. Elo Yesu alimuposeshe, naye atatikile ukusosa nokubona. 23Echo amabumba abantu alishimbilwe ukwinekantu nokufumba ati, “Napo ngu ewungaba Umwana wakwa Davide?”#2 Sam. 7.11-16; Esa. 11.1; Mat. 1.1

24Ulo Abafalisi baumfwile mfi, basosele ati, “Ni Belesebule, mukulu wamipashi iibi ewumupela ifiso ifyakutamfishako imipashi iibi.”

25Nomba Yesu alishibile ifyo balikulanguluka. Elo asosele kuli bo ati, “Ichalo chonse ichabanika mumabumba nokutatika ukuyilwisha ichine chenka tachikokolapo. Elo abantu bamumusumba umo, nangula ulupwa lumo lwabukilana lulapatukana. 26Kati Satana akotamfya Satana, ekwebati ayibukila enka. Napo ubufumu bwakwe bwingemakana shani? 27Elo nga ndatamfya imipashi iibi kufiso ifyakwa Belesebule, nga kanshi abakusambila benu bafitamfisha kufiso fyaku nani? Kanshi abakusambila benu benka ebakumushinisha. 28Nomba nga ndatamfya imipashi iibi kufiso ifya Mupashi waku Lesa, ekwebati Ubufumu bwaku Lesa bulifikile pali mwebo.

29“Takupo umuntu nangu umo uwingenjila munanda yamuntu uwafiso nokwiba ifintu fyakwe, kuntu abala akaka umuntu wafiso ngulya. Elo engeba ifintu fyamunanda yakwe.

30“Umuntu uutasuminishanyapo nandibo, mulwani wanji, noutangafwako ukulonganya, alasalanganya. 31Echo nkomweba ati, Lesa kuti anakililapo abantu abachita ifibi nemiponto yonse, nomba uwakupontela Umupashi Wabuta ye takanakililwepo. 32Chimo chenka umuntu onse uwakwebaula Umwana wa Muntu kuti anakililwa. Nomba onse uwakupontela Umupashi Wabuta, takanakililwepo nangu munkulo njino nangula muli njilya iikoyisa.

Ichiti nefitwalo fyachiko

(Luk. 6.43-45)

33“Mwalishiba ukuti ichiti ichiweme chitwala ifitwalo ifiweme, nechiti ichibipile chitwala ifitwalo ifibipile pakuti ichiti chonse chishibikilwa kufitwalo fyachiko. 34Mwe bana bansoka mwe! Nga mungasosa shani ifiweme mwe babi mfi? Pakuba akanwa kamuntu kalabila pafyayiula mumutima wakwe. 35Umuntu umuweme alabila ifiweme ififuma mumutima wakwe. Umubi naye alabila pafibipile ifyayiula mumutima wakwe

36“Nomba nkomweba ati, pakasuba kabupingushi abantu bakupelwa imilandu pamulandu wamashiwi onse awo basosa ichisose-sose. 37Echo nikumashiwi yenu yenka eko mwakupelelwapo nangula ukutapelelwapo umulandu.”

Ichakubwenako ichakwa Yona

(Mk. 8.11-12; Luk. 11.29-32)

38Nomba bambi abasambishi ba Mafunde na Bafalisi basosele kuli Yesu ati, “We musambishi, tukofwaya ukuti utulangeko ifyafiso ifikulu.”

39Elo naye abasukile ati, “Abantu mba ababipa abatachetekela abamuli njino nkulo bakofwaya ukubona ifyafiso ifikulu. Nomba tabakafibonepo, sembi ichachitikile kuli Yona umusoseshi.#Yon. 1.17; 2.10 40Fyenka ifyo Yona ali mumala answi iikulu inshiku shitatu, akasuba nobushiku, efyo no Mwana wa Muntu akuba munda yachalo inshiku shitatu. 41Elo pakasuba kakupingulwa, abantu bamu Ninive bakwisa kumupela umulandu pakuti balilekele ukuchita ifibi ulo baumfwile ukusambisha kwakwa Yona!#Yon. 3.5-8 42Pakasuba kakupingulwa, nyina-mfumu waku Sheba akwisa kwimakana nokumupela umulandu, pantu afumine kumpela yachalo ukwisa mukumfwa ukusambisha ukwamulangwe kumfumu Solomoni. Nomba nkomweba ati, epo ali mpano uuchilile Solomoni!#1 Ishamf. 10.1-10; 2 Imil. 9.1-12

Ukubwela kwa Mupashi Uubi

(Luk. 11.24-26)

43“Ulo umupashi uubi wafuma mumuntu, uya ulo wendauka kumulundu, ukofwaya ichifulo chakutushishapo. Nga tausangilepo ichifulo, 44ulayisosha uwine wenka ati, ‘Nkobwelela kunanda yanji uko nafumine.’ Ulo wabwelela, wasanga tamupo ichilimo, muliweme nokusungwa bwino. 45Elo ulafuma nokuya kuleta imipashi inakwe isano na ibili iibipile ukuchila wo, elo ikoyisa kwinjila nokwikalamo. Kumupwilo, ngulya muntu akuba uubipile ukuchila ifyo ali pakwamba. Efyo chakuba nakuli njino nkulo iibi.”

Banyina nabawakwe baku Yesu

(Mk. 3.31-35; Luk. 8.19-21)

46Ulo Yesu alikusosa kubantu, kwayishile banyina nabawakwe, bayimakene panse, bamutumine intumi ukumwita ukuti basose nakwe. 47Elo umuntu umo aebele Yesu ati, “Banyinenwe nabawenu balimakene panse bakofwaya ukusosa namwe.”

48Elo Yesu abasukile ati, “Nibani bama? Nibani bawesu?” 49Elo atandeshe amenso ukwayikele abakusambila bakwe nokusosa ati, “Boneni, mba ebama nabawesu. 50Pakuti umuntu uuli onse uuchita ififwaya Bata bakumulu, ewesu, enkashi nakambi ebama.”

Currently Selected:

Mateyo 12: LalaNT

Highlight

Copy