Mateyo 2

Abachenjela abafumine kumutule-suba

1Yesu afyalilwe ku Betelehemu, umushi wamuchalo cha Yudeya, panshita imfumu Helodi alikuteka nchilya chalo. Ulo papitile inshiku, abantu abachenjela mukwishiba ifyantandala bafumine kumutule-suba nokufika mumusumba wa Yelusalemu. 2Ulo bafikile balifumbile ati, “Alikwisa uyo ufyelwe imfumu ya Bayuda? Pakuti twalibwene ulutandala lwakwe kumutule-suba. Nomba twayisa mukumulambila.”

3Ulo imfumu Helodi yaumfwile mfi, yalyebekelwe ukwinekantu pamo nabamu Yelusalemu bonse. 4Elo yalongenye pamo intungulushi shabachipupila bonse nabalembi nabasambishi ba Mafunde akwa Mosesi nokubafumba ati, “Mba ngu Uwasubwa waku Lesa baeba ati akufyalilwa kwisa?”

5Nabo balimwasukile ati, “Niku Betelehemu, umushi wamuchalo cha Yudeya. Efyo nomusoseshi alembele ati,

6“We Betelehemu wamuchalo cha Yudeya,

taulipo umuche nangu panini

pakati kamishi ya Yudeya.

Pakuba nimuli we emwakufuma impalume,

iikoyisa kuba nga chembela kubantu banji Abaisilaeli.”#Mik. 5.2

7Echo Helodi abetile abachenjela mbalya ukuti bakumane nakwe mubumfisolo pakwebati omfwikishe bwino inshita ulutandala lwabwenekelepo. 8Elo abatumine ku Betelehemu ati, “Kamuya, mukafwayilishe bwino ifyamwana ngu. Amwamusanga, mwise munjebe pakuti nandibo nje nkamulambile.”

9Ulo baumfwile ifyo imfumu yasosele, balimine nokuya. Bwangu-bwangu nolutandala ulo babwene kumutule-suba lwalibatanjilile, lwasukile lwayimakana apali umwana ngulya. 10Pakubona ulutandala ndulya, abachenjela bo balisekelele ukwinekantu. 11Ulo bayinjile munanda, balibwene umwana pamo nabanyina. Elo bafukeme nokumulambila, bayisula umwali ifyabusambashi bwabo nokumupela golide, ulubani namafuta aanunkila bwino akoyitwa mule.

12Nomba Lesa alibachenjeshe muchoshi ukwebati bebwelelapo kuli Helodi. Elo bayile inshila imbi kuchalo chaku mwabo.

Bafyushisha Yesu ku Ijipiti

13Ulo abachenjela bafumineko, eli umungelo waku Bashikulu abwenekele kuli Yosefe muchoshi nokumweba ati, “Ima, upinte umwana nabanyina ubutukile ku Ijipiti. Eko mukekale ukufikila inshita nakwisa kukusosha pantu Helodi akoyisa kufwaya-fwaya umwana ukuti amwipaye.”

14Penkapo Yosefe alibukile mwenka muli mbulya bushiku, apintile umwana nabanyina nokuya ku Ijipiti. 15Eko ayikele ukufikila nemfwa yakwa Helodi. Nchi chachitikile ukuti chifikilishiwe icho Bashikulu basosele ukupitila mumusoseshi ngulya ati, “Nayitile Umwana wanji ukufuma mu Ijipiti.”#Hos. 11.1

Helodi ayipaya abana

16Ulo Helodi abwene ukuti abachenjela bamutumpayika, alikalipile ukwinekantu. Elo atumine abakuya kwipaya utwana twalalume tonse utwali mu Betelehemu namumipaka yonse. Ukwambila utwali nemyaka ibili nokubwelela panshi, ukulingana nenshita aumfwililepo kubachenjela ulo ulutandala lwabwenekele.

17Epo chalifikilishiwe ichasoselwe nomusoseshi Yelemiya ati,

18“Umusowa waumfwika ku Lama,

Ukulila nenkonde-konde.

Lakelo akolila abana bakwe.

Takofwayapo nokushinshintikwa,

pakuti abana bakwe baloba.”#Yel. 31.15

Babwelako ku Ijipiti

19Ulo Helodi afwile, umungelo waku Bashikulu abwenekele muchoshi kuli Yosefe muchalo cha Ijipiti. 20Asosele kuli ye ati, “Ima, pinta umwana nabanyina ubwelele kuchalo cha Isilaeli, pakuti baalifwa bo abalikufwaya ukwipaya umwana.” 21Elo Yosefe apintile umwana nabanyina, nokubwelela ku Isilaeli.

22Ulo Yosefe aumfwile ukuti Akilausi ewali imfumu yamu Yudeya, muchifulo chabawishi ba Helodi, alitinine ukuyako. Lesa naye alimuchenjeshe muchoshi, elo ayile kuchalo cha Galili. 23Nkulya kwenka ayikele mumushi wa Nasaleti, ukuti chifikilishiwe ichasoselwe nabasoseshi ati, “Akwitwa umwina Nasaleti.”

Currently Selected:

Mateyo 2: LalaNT

Highlight

Copy