Maliko 15
15
Yesu bamutwala kuli Pilato
(Mat. 27.1-2,11-14; Luk. 23.1-5; Yoh. 18.28-38)
1Ulo bwachele, intungulushi shabachipupila nabachilolo nabasambishi ba Mafunde, nabachilye bonse, balipangene amano. Bakakile Yesu nokumutwala kuli Pilato kateka wabena Loma. 2Pilato afumbile Yesu ati, “Napo webo niwe Mfumu ya Bayuda?”
Yesu amwasukile ati, “Wasosa.”
3Intungulushi shabachipupila balikusosela Yesu ifintu ifinji. 4Pilato amufumbile nakambi ati, “Kanshi tekuti wasukepo nangu chimo? Bona ifintu bakokwebelela ubwinji!”
5Nomba Yesu atalele chelele, asuka Pilato chamupesha namano.
Pilato apingwila Yesu ukufwa
(Mat. 27.15-26; Luk. 23.13-25; Yoh. 18.39—19.16)
6Kali kafuto imyaka yonse pakulya Chakulya Chakuchilila, Pilato alikukakwilapo Abayuda umufungwa umo uwo abene balikufwaya. 7Panshita yenka njilya, muchifungo mwalipo umuntu umo uwalikwitwa Balabasi pamo nabambi pamulandu wakwalukila ubuteko nokwipaya abantu. 8Ibumba ilikulu ilyabantu lyayile kulongana kuli Pilato, kateka wabane Loma bamupapatile ati, “Utuchitile ifyo utuchitila lonse!” 9Naye alibafumbile ati, “Napo mukofwaya mukakwile Imfumu ya Bayuda?” 10Umulandu abafumbile mfi, nipakuti alishibile ukuti nipamulandu wamufimbila epo intungulushi shabachipupila shatwalile Yesu kuli ye.
11Intungulushi shabachipupila shatunkilishe abantu ukuti balombe Balabasi. 12Pilato afumba nakambi ati, “Nga kanshi nkochitapo shani nangu muntu mweba ati nimfumu ya Bayuda?”
13Nabo babilikishe bati, “Musamikeni!”
14Pilato afumbile ati, “Nomba mulandu ndo uwo achitile?”
Elo nabo bachishamo ukusowela, “Musamikeni bwaka!”
15Pakufwaya ukusekesha ibumba, Pilato abakakwile Balabasi, Yesu ye abebele ukuti bamupame ifikoti, elo abalubulwile ukuti baye bamusamike.
Abashilikali basekuluka Yesu
(Mat. 27.27-31; Yoh. 19.2-3)
16Abashilikali batwite Yesu mukati kalubansa lwakwisano ulwitwa Pulitoliyamu. Elo balongenye bonse abashilikali banabo. 17Bafwikile Yesu umwinjila uuswetele, bapikwile neng’ana yaminga nokumufwika kumutwi. 18Batatikile nokumupela umutende bakomusekuluka bati, “Mutendepo, we Mfumu ya Bayuda!” 19Bakomupamaula netete pamutwi, nokumushipila amate. Balikufukama, bakomutotela. 20Ulo balekele ukumusekuluka, bamufulile ilaya iliswetele ndilya, bamufwikile amalaya akwe nakambi. Elo bamutwite mukumusamika pamutashi.
Basamika Yesu pamutashi
(Mat. 27.32-44; Luk. 23.26-43; Yoh. 19.17-27)
21Munshila bakumenye umuntu umo, Simoni uwaku Sailini, wishi waku Alekisanda na Lufusi, alikufuma mumpanga. Eye bakakatishe ukupintilako Yesu umutashi. 22Elo batwite Yesu kuchifulo ichitwa Gologota, “Ekweba ati Ichifulo Chefupa Lyamutwi.” 23Bamupele waini uyo basankenye nomuti wakunasha ukufinya. Yesu alikene ukunwa. 24Nomba balimusamikile. Bachitile bumwine-mano pakwakana amalaya akwe pakuti beshibe icho umo-umo engabulapo. 25Ulo basamikile Yesu inshita yali ni 9 koloko waluchelo. 26Umulandu uyo bamwipayilepo baulembele pamulu wamutashi ukuti, “Imfumu ya Bayuda.” 27Basamikilepo notupondo tubili pamo na Yesu, kamo kumulyo, kambi nako kuchipiko. [ 28Ekufikilisha ifyalembwa mu Mashiwi aku Lesa ukuti, “Apendelwe pamo nefipondo.”]
29Abalikupitapo balikupukumya imitwi nokumusalula ati, “Eya, wasangwapo lelo! Te we walikutwanga wati, kuti watobaula inanda yaku Lesa, nokwimaka munshiku shitatu? 30Ipulushe wenka, wike pamutashi!”
31Intungulushi shabachipupila nabasambishi ba Mafunde balikumusekuluka, bakososhanya bati, “Alikupulusha bambi, nomba chamukanga ukuyipulusha enka! 32Lekeni Klistu imfumu yabena Isilaeli yike pamutashi, tubweneshe, pakuti tumuchetekele!”
Elo nabo abasamikilwe nakwe, nabo balikumwebawila kumo.
Imfwa yaku Yesu
(Mat. 27.45-56; Luk. 23.44-49; Yoh. 19.28-30)
33Nomba ulo akasuba kafikile pa 12 koloko, imfinshi yafimbile ichalo chonse ukufika panshita ya 3 koloko wachungulo. 34Pa 3 koloko penka Yesu alyawile neshiwi ilikulu ati, “Eloi, Eloi, lama sabakatani?” Ekweba ati, “Lesa wanji, Lesa wanji, nindo mwandekelesha?”
35Abantu bambi abayimakaninepo pakumfwa, basosele ati, “Umfweni akoyita Eliya!” 36Umbi alibutukile nokupinta umwepu, autumpikile muli waini uwasasa, elo atungile nakwitete. Ulo amutambikile Yesu ukuti anwe, asosele ati, “Lekeni tubone kati Eliya akoyisa kumupulusha!”
37Ulo alilile neshiwi ilikulu, Yesu alifwile.
38Penkapo nechansalu icho balikuchinga munanda yaku Lesa chalyabakene pakati ukufuma pamulu ukufika napanshi. 39Umukulu wabashilikali, uwayimakene apalungatene na Yesu ulo abwene inshila Yesu afwililemo, asosele ati, “Nachine ngu muntu aali Mwana waku Lesa!”
40Kwalipo nabanakashi bambi abalikutamba akatalamukila, umo ni Maliya Magadala, Salome, Maliya banyina wakwa Yemusi mwayiche, na Yose. 41Mba banakashi, ulo Yesu ali mu Galili, balikumukonka nokumupyungila. Elo kwali nabanakashi abenji abayile nakwe ku Yelusalemu.
Ukushikwa kwaku Yesu
(Mat. 27.57-61; Luk. 23.50-56; Yoh. 19.38-42)
42Nomba kwatile ukuba ichungulo, pakuba kali kasuba kakuyiwamisha pakwishiba ukuti mayilo li Sabata. Kwayishile Yosefe waku Alimateya, uwamuchilye uwachinshikwa ukwinekantu. Kali ekasuba kakuwamya ifye Sabata. 43Yosefe ayile ukwambula umwenso ukwinjila kwa Pilato, kateka wabena Loma ukuya mukulomba ichitumbi chaku Yesu. Ngu Yosefe naye alikulindilila ukwisa kwa Bufumu bwaku Lesa. 44Pilato alishimbilwe pakumfwa ukuti Yesu afwile kale. Ayitile umukulu wabashilikali nokumufumba ati, “Napo kale afwile?” 45Ulo aumfwile ati alifwile, alisuminishe ukupela ichitumbi chaku Yesu kuli Yosefe. 46Nomba Yosefe ashitile insalu yambafuta. Ulo asamwine Yesu pamutashi, amupombele munsalu, elo ayile kumulalika namumanda iyo bafukwile mwibwe. Elo apilibwiilepo nebwe ilikulu pamulyango wamanda.
47Maliya Magadala na Maliya banyina wakwa Yose, balibwene umo bashikile Yesu.
Currently Selected:
Maliko 15: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
