Matthew 26

Jisua that rangtie an mintuo

(Mk 14:1-2; Luk 22:1-2; Joh 11:45-53)

1Hanchu Jisua'n ha chongngei murdi hah a ril zoiin chu a ruoisingei kôm, 2“Sûnnik suoleh, Kalkân kût hong om atih iti nin rieta. Miriem Nâipasal hih jêmdel rangin pêk nîng atih,”#Jôk 12:1-27 a tia. 3Hanchu ochaisingei le Upangei hah Ochai Inlal Caiaphas inpuia intongna an neia, 4inrûkin an sûra, an that rang lam an mintuoa. 5Nikhomrese, “Kût sûngin chu ni no rese, mipui lâia injêlna tete om duoi nih,” an tia.

Bethany'a Jisua sariek polin a om

(Mk 14:3-9; Joh 12:1-8)

6Hanchu, Jisua hah Bethany'a aphârpa Simon inah a oma. 7Jisua bu a nêk lâitakin, nupang inkhat alabaster bilôrin sariek mirimhoi man luttak ahong chôia, a luah a buok pea. 8Ruoisingeiin an mu inchu an ningathika. “Irangmo hi anga a inchek hi? 9Hi mirimhoi hih man tamtaka zuora, inriengngei kôma sem thei kêng ani,” an tia. 10Jisua'n an ti ngei hah a rieta, an kôm, “Ithomo hi nupangnu hih nin rokôk? kata rangin sin asa le enhoi tak ai tho ani. 11Inriengngei chu nin kôma om tit an nia, hannirese, kei chu nin kôma om bang noning. 12Hi sariek mirimhoi ka takpuma ai buok hih phûm ranga ni sinsiamna ranga ai tho ani. 13Atûn, chongdiktak nangni ki ril, rammuol pumpuia thurchisa an misîrna nâma, hi nupangnu sintho khom hih ama riettitna rangin misîr sa ngâi an tih,” a tia.

Juda'n Jisua minsûr rang a nuom

(Mk 14:10-11; Luk 22:3-6)

14Masuole Ruoisi sômleinik ngei lâia inkhat a riming Judas Iscariot an ti hah ochaisingei kôm a sea 15Male ama'n, “Jisua nangni ki minsûr inte imo mi nin pêk rang?” a tia. Anni han sumdâr sômthum an tela ama an pêka. 16Masuo renga chu Judas han Jisua an kuta a pêk theina rangin chuminrên a rok tit zoi.

Jisua a ruoisingei leh kalkân ruoi an sâk

(Mk 14:12-21; Luk 22:7-13,21-23; Joh 13:21-30)

17Cholboivâipôl Kût ni sûn motontakah han, ruoisingei an honga, Jisua kôm, “Kalkân Kût hih khotieng mo va minsûk unglang nu nuom?” tiin an rekela. 18Ama han an kôm, “khopuiliena mi inkhat kôm se ungla, a kôm. ‘Minchupu'n ko zora anâi zoia; ku ruoisingei leh Kalkân Kût ni inah mang kin tih,’ a ti va ti roi,” a tia. 19Jisua'n an kôm he a be lam angtakin an thoa, Kalkân Kût hah an va minsûk zoia. 20Kholoi ahong nînchu, Jisua le ruoisi sômleinik hah khalâi ottin an insung lâiin. 21Khalâi an ot lâitakin Jisua'n an kôm, “Nangni ki ril, nin lâia mi inkhat hin ni minsûr a tih,” a tipe ngeia. 22Hanchu ruoisingei mulung dûkatonga, a kôm, “Pumapa, keima mo mi ni ti?” tiin inkhat inkhatin an rekel paka. 23Jisua'n an kôm, “Khênga vâipôl mi pûrpuipu hin ni minsûr a tih.#Lap 41:9 24Pathien Lekhabu'n ai ti anghan, Miriem Nâipasal hih thîng a tih, nikhomrese, Miriem Nâipasal minsûrpu chung chu arik bâk rang na! Ha miriem ha chu ânzir tetloi nisenla ata rangin sa uol a tih,” a tia. 25A minsûr rangpu Judas hah a hongchonga, “Minchupu, keima mo mini ti tatak?” tiin a rekela. Jisua'n a kôm, “Nên ti hate” tiin a thuona.

Pumapa Jânbu

(Mk 14:22-26; Luk 22:14-20; 1 Kor 11:23-25)

26Hanchu an sâk lâitakin, Jisua'n vâipôl a lâka, râisânchong a ril zoiin chu a khoia, a ruoisingei kôm a pêka, an kôma, “Lâk ungla, sâk roi, hi hih ka taksa ani,” a tia. 27Masuole chu, kilât a lâka, Pathien kôm râisânchong a ril zoiin chu an kôm a pêka, “Nêk roi, nin rêngin; 28ma hih ki thisen mi tamtak nunsie ngâidamna ranga suok rang, Pathien chonginkhit mindet rang chu ani.#Jôk 24:8; Jer 31:31-34 29Nangni ki ril, Ka Pa Rêngrama nangni leh uain thar ke nêk ni atung mâka chu hi uain hih nêk nôk khâi no ning,” a tia. 30Masuole chu la inkhat an thoa, an tho suolechu Oliv tâng tieng an se zoi.

Peter'n a minlêm rang Jisua'n a leiril

(Mk 14:27-31; Luk 22:31-34; Joh 13:36-38)

31Hanchu Jisua'n an kôm, “Avien jân lelea hin nin rêngin rot let nin ta, ni mâk riei nin tih, Pathien Lekhabu'n, ‘Pathien'n belrihôlpu hah that an ta, belringei hah chekinchâi chit an tih,’#Zak 13:7 a ti sikin. 32nikhomrese, kên thoinôk suoleh Galilee rama nin motona lei sêng ki tih,”#Mat 28:16 a tia. 33Peter'n a kôm, “Adangngeiin nang mâk riei khomrese ngei, keiman chu nang mâk tet no ning!” a tia. 34Jisua'n Peter kôm, “Nang ki ril, avien jân ârkhuong mân nangma'n voithum keima hih riet ngâi mu-ung ni tîng ni tih,” a tipea. 35Peter'n a kôm, “Ni thina thisa rang khom nînlang ma anghan ti tet no ning,” tiin a thuona. Ruoisi dangngei khomin ha angdên han an ti paka.

Gethsemani ruhuona Jisua chubaitho

(Mk 14:32-43; Luk 22:39-46)

36Hanchu Jisua hah a ruoisingei leh munkhatin Gethsemani an tina han an sea, Jisua'n an kôm, “Soson chubai ka va tho sûngkâr chu hin lên sung roi,” a tipe ngeia. 37Peter le Jebedee nâipasal inik ngei hah a tuonga, Rathainvâina le mulungdûk tongnân ahong sipa, 38male an kôm, “ka mulungdûk atong raia athi rang dôrin kêng ki ni zoi. Hin om ungla mên ning pui roi,” a tia. 39Hanchu, mântieng ava se uol vieta, pila ânboka, chubai a thoa, “O Pa, anitheiin chu, hi tuongna kilât hih ko kôm renga ni khâi pai pe roh! Nikhomrese, keima racham niloiin nangma racham ni rese,” a tia. 40Masuole chu a hongkîr nôka, ruoisi inthum ngei hah an inin a hong mua; Peter kôm, “Inmo nangni inthum hite dârkâr khat luo khom mi inningpui thei loi tie hi? 41Huongna nin lût loina rangin intûng chienin chubai roi. Ratha'n chu a nuoma, taksa'n ai phari loi ani” a tia. 42Hanchu, avoiniknân Jisua a se nôka, a chubai nôka, “O pa hi tuongna kilât hi ke nêk loia pai thei aninônchu nangma racham ni rese,” a tia. 43A hong nôkin chu ruoisingei hah ain dênin a mu nôka; an mitngei reng an meng zoi loi sikin. 44Jisua'n a mâk ngei nôka, a voithumnân a ti nanâk hah tiin chubai a tho nôka. 45Male ruoisingei kôm a hong nôka, an kôm, “Atûn tena inngamin nin la in bang na? En ta u, Miriem Nâipasal hih mi nunsiengei kuta pêk rang zora ahongtung zoi. 46Inthoi ungla, sêng ei ti zoi. En ta u, ni sûr rangpu hih ahong nâi zoi!” a tia.

Jisua an sûr

(Mk 14:43-50; Luk 22:47-53; Joh 18:3-12)

47Hanchu, Jisua a chong la mong loiin ruoisi sômleinik ngei lâia Judas hah a hong tunga. Ama lômin Ochaisingei le Upangei hongtîr mipui, khandai le tôkmol chôiin an hong sa. 48A minsûr rangpu han, “A bieng ku tum takhah nin rokpu nîng a tih, sûr kelen roi!” tiin minsinna a lei pêksai ani. 49Judas hah Jisua kôm a se pata, a kôm, “Minchupu, nu chunga rathanngamna om rese,” tiin a bieng a tuma. 50Jisua'n a kôm, “Mal, no hongna abi tho kelen roh!”#26:50 Mal, no hongna abi tho kelen roh! aninônchu Mal ithomo mahin no honga? a ti pea,

Hanchu an honga, Jisua hah an sûr zoi. 51Jisua kôma om ngei lâia inkhatin a khandai a leka Ochai Inlaltak, a tîrlâmpa kuor a tukthâk pea. 52Jisua'n a kôm, “Na khandai hah a koka thun nôk ta roh. khandai a lek ngei chu khandai nanâkin thîng an tih. 53Ka Pa kôm sanna ko zong theia, ama'n voikhatrengin vântîrton isâng ruk pâl sômleinik nêka tam a juongtîr thei iti ni riet loi mini? 54Nikhomrese, ngên ta inlang, i angin mo Pathien chong hih hi anga hong iom rang hih ai tung thei ranga?” a tia. 55Hanchu, Jisua'n lokongei kôm han, “Khandai leh tôkmol chôiin inru sûr rang leh in-ang bangin misûr rangin nin hong na? Nîngtin Biekinah kên sunga, ki minchu ngâia, mahan misûr mak cheia.#Luk 19:47; 21:37 56Nikhomrese, dêipungei chong miziek ngei hah ahong tung dik theina rangin, hi ngei murdi hih a hong iom ani hi,” a tia. Hanchu, ruoisingei murdi'n ama an mâk raka an rêngin an rot riei zoi.

Jisua roijêkna makunga ânding

(Mk 14:53-65; Luk 22:54,55,63-71; Joh 18:13,14,19-24)

57Hanchu, Jisua sûrngei han, Ochai Inlaltak Caiaphas inah Balam minchupungei le Upangei lei intûpna han an tuong zoia. 58Peter'n alazanin a jûia, Ochai Inlaltak in khalâi dênin a jûia. Khalâidung a lûta a mongna mu rang nuomin a rungpungei kâra han ânsunga. 59Jisua an that theina rangin Ochaisingei le roijêkpu murdi han theiloi an mintum theina rang abi an roka; 60nikhomrese, mu mak ngei, mi tamtak hongin a chungroia milak ril khom senla ngei. Anûktakah mi inik an honga, 61male, “Hi mi hin, Biekin hih setin sûnthumin ki sin nôk thei,” #Joh 2:19 a ti an tia. 62Ochai Inlaltak hah ândinga, Jisua kôm, “Hi nang an nônna roia hin ite thuonna ni nei loi rang mo?” a tia. 63Nikhomrese, Jisua chu a dâireka. Ochai Inlaltak han arkôk nôka, “Pathien aring rimingin nang ki ti; ni ril roh, Pathien Nâipasal Messiah hah nini mo?” a tia. 64Jisua'n a kôm, “Ni na ti hate. Mahah ninôn khom nang ki ril; atûn renga Miriem Nâipasal hih Râtinchung chang tienga, insunga, invâna sûm chunga juong la mûng nin tih,”#Dan 7:13 a tia. 65Ochai Inlal han a puonsilngei a potkhêra, “Pathien a rilsiet zoi; Rietpuipu dang nâng khâi mak meh! Pathien a rilsiet tie chu nin riet zoi! 66I angin mo nin mindon?” a tia. Anni han, “A tho minchâi, athi ngêt rang ani” an tia. 67Hanchu a mâia an michila male an jêma; senkhatin,#Isa 50:6 68“Ni ril roh, Messiah, Tumo nang a jêm?” tiin an bêna.

Peter'n Jisua a minlêm

(Mk 14:66-72; Luk 22:56-62; Joh 18:15-18,25-27)

69Hanchu, Peter hah rukul sûng khalâiah ânsunga, Ochai Inlaltak tîrlâm dôngmate inkhat a honga, a kôm, “Nang khom, Jisua Galilee rama mi kôm no om ngâi,” a tipea. 70Hannirese, an rênga makunga a minlêma. “I thurchi mo nin misîr reng riet mu-ung” tiin a thuona. 71Rukul mokot pêntieng ava jôka, tîrlâm dôngmate dangin a lei mu nôka. Ha takah omngei kôma han, “Hi mi hih, Nazareth Jisua kôma a om ngâi” a tia. 72Peter'n a minlêm nôka, “Khomâk insâmin ki ti ani, ha mi hah riet mu-ung!” a ti nôka. 73Chomolte suoleh chu hataka inding ngei hah Peter kôm an honga, a kôm, “Nang khom an lâia mi nini khet, No chong lam renga hin ei riet thei!” an tipea. 74Male Peter'n an kôm, “Chongdik rillin khomâk kên sâm ani! Adik nônchu Pathien'n dûk ni mintong rese! Ha mi hah riet tet mu-ung!” a tia.

Masuolechu âr akhuong kelen zoi, 75male Peter han, Jisua'n a kôma, “Âr akhuong mân voithum ni minlêm ni tih,” ai tipe chong hah a hong rietsuok nôka. A jôka a chap ngu-ngui zoi.

Currently Selected:

Matthew 26: SAKNT

Highlight

Copy

Want to have your highlights saved across all your devices? Sign up or sign in

Sakachep New Testament © The Word for the World International and NECTAR, 2017.

Learn More About Pathien Lekhabu Inthieng Chongtung Thar