1 ໂຄລິນໂທ 12
12
ສີງ ລີ່ງ ເຍີຍ ຕສີ້ງ ເຫຍີ່ຍ
1ຕສວັ໋ງ ກໍ໋-ໂຢ໌ວ ອ່າ, ເຢຍ ອ໋ອຍ ເມີ່ຍ ບົວ ເມ່ງ ແປະ ສີງ ລີ່ງ ເຖສີຍ ປຸນ ເຍີຍ ຕສີ້ງ ເຫຍີ່ຍ. 2ເມີ່ຍ ບົວ ຮິ້ວ ຕຸ໊ ຕສິ້ນ ດ່າງ ເມີ່ຍ ບົວ ໄມ້ ແກ້ງ ສຽນ ເຢຊູ ວົ້ວ ຕສັ່ນ, ເມີ່ຍ ບົວ ຕສຸ ທສ້ຳ-ຫຍູ່ງ ດົ໊ວ ເມີ່ຍ ບົວ ມີ່ງ ປ໋າຍ ໄມ້ ໄຮ່ ກ໊ອງ ຫວ່າ ເຍີຍ ໝິ່ວ-ຝັງ. 3ເຫວີ່ຍ ນ້າຍ ເຢຍ ອ໋ອຍ ເມີ່ຍ ບົວ ຮິ້ວ ຕຸ໊ ມ່າຍ ສີງ ລີ່ງ ຕໍ້ ເຍີຍ ມ່ຽນ ໄມ້ ໄຮ່ ກ໊ອງ, “ປຸນ ເຢຊູ ຕສຸ ຕສ໋ຽວ ອ໊ະ.” ຟີ່ ຮນັ້ງ ເຍີຍ, ທສວດ ລິ໌ວ ສີງ ລີ່ງ ຕໍ້ ເຍີຍ ມ່ຽນ, ໄມ້ ມ່າຍ ຫາຍ ເຕົ້າ ໄຮ່ ກ໊ອງ, “ເຢຊູ ໂຕສ໋ວ ຕສ໊ຽວ.”
4ສີງ ລີ່ງ ເຖສີຍ ປຸນ ເຍີຍ ຕສີ້ງ ເຫຍີ່ຍ ມ່າຍ ທສ້ຳ-ຫຍູ່ງ ມປ່າ ສີງ ລີ່ງ ເຊ ດຸ ເຕົ້າ ຮນັ້ງ. #ໂລມາ 12:6-8 5ມ່າຍ ທສ້ຳ-ຫຍູ່ງ ຕສະເອີ໋ຍ ຟູ-ສູ ມປ່າ ເຊ ຟູ-ສູ ດຸ ເຕົ້າ ຕສ໊ຽວ ຮນັ້ງ. 6ມ່າຍ ທສ້ຳ-ຫຍູ່ງ ກົງ ໂຕສ໋ວ, ມປ່າ ປຸນ ຕສວັ໋ງ ມ່ຽນ ມ່າຍ ປັ້ນ ເຕສີ່ຍ ເກ໊າະ-ມ່ຽນ ໂຕສ໋ວ ເກ໊າະ-ມ່ຽນ ເຍີຍ, ເຊ ດຸ ເຕົ້າ ທິນ-ຮູ່ງ ຮນັ້ງ. 7ເຕົ້າໆ ມ່ຽນ ຕຸ໊ ຢຽດ ຫຍູ່ງ ປຸນ ທສີງ ສີງ ລີ່ງ ຢຽມ ນິ່ນ ເຍີຍ ໂຮຍ້ວ ເຫວີ່ຍ ເຖງ ຕສວັ໋ງ ມ່ຽນ ຕຸ໊ ຫລົງ. 8ສີງ ລີ່ງ ປຸນ ເຕົ້າ ມ່ຽນ ໄຮ່ ກ໊ອງ ທສົງ-ເມ່ງ ເຍີຍ ຫວ່າ, ແອ໋ງ ປຸນ ກັ້ນ ເຕົ້າ ໄຮ່ ກ໊ອງ ໄກວ-ທຈ້າວ ເຍີຍ ຫວ່າ. ຢ່າ ຕົ້ງ ດຸ ເຕົ້າ ສີງ ລີ່ງ ປຸນ. 9ຕົ້ງ ນ້າຍ ເຕົ້າ ສີງ ລີ່ງ ຢ່າ ປຸນ ເຕົ້າ ມ່າຍ ສຽນ ຟິມ ຢ່າ ປຸນ ກັ້ນ ເຕົ້າ ມ່າຍ ປັ້ນ ເຕສີ່ຍ ຕສໍ່ ແປ່ງ. 10ແອ໋ງ ປຸນ ເຕົ້າ ໄຮ່ ໂຕສ໋ວ ບົວະ ຮ່ອງ ເຍີຍ ສີ່, ແອ໋ງ ປຸນ ເຕົ້າ ໄຮ່ ໂຕ່ວ ທິນ-ຮູ່ງ ເຍີຍ ຫວ່າ, ຢ່າ ປຸນ ເຕົ້າ ໄຮ່ ສຳ ຕຸ໊ ທສວດ ຫາຍ ຫຍູ່ງ ຢຽມ ສີງ ລີ່ງ ຕ້າຍ, ຫາຍ ຫຍູ່ງ ຢຽມ ມ້ຽນ ຕ້າຍ. ສີງ ລີ່ງ ແອ໋ງ ປຸນ ເຕົ້າ ໄຮ່ ກ໊ອງ ກັ້ນ ຫຍູ່ງ ຫວ່າ, ແອ໋ງ ປຸນ ເຕົ້າ ໄຮ່ ຟານ ວົ້ວ ເຕີ໋ຍ ຫວ່າ. 11ນ້າຍ ເຕີ໋ຍ ຢຽດ ຕສູ໊ງ ຢຽມ ວົ້ວ ເຕົ້າ ດຸ ເຕົ້າ ສີງ ລີ່ງ ຕ້າຍ. ສີງ ລີ່ງ ຢ່າ ເອີຍ ນິ່ນ ກັ້ນ ເຍີຍ ຕສະເອີ໋ຍ ຕີ່ງ ຫາຍ ເຕົ້າ ຕຸ໊ ຫາຍ ຫຍູ່ງ ຕສີ້ງ ເຫຍີ່ຍ.
ຢຽດ ນອມ ຊິນ ມ່າຍ ເຕສ໋ຍ ຫຍູ່ງ ກັ໊ບ ຈ໊ຽນ
12ກີຕູ່ ເຊ ຮນັ້ງ ຢຽດ ນອມ ຊິນ, ມ່າຍ ເຕສ໋ຍ ຫຍູ່ງ ກັ໊ບ ຈ໊ຽນ. ໄມ້ ກຸ໊ນ ມ່າຍ ເຕສ໋ຍ ຫຍູ່ງ ກັ໊ບ ຈ໊ຽນ, ຂູງ ເປ໋ນ ຢຽດ ນອມ ຊິນ ຮນັ້ງ. #ໂລມາ 12:4-5 13ບົວ ຢ່າ ຟີ່ ຮນັ້ງ ເຍີຍ, ໄມ້ ກຸ໊ນ ຢິວໄທ ມ່ຽນ ໄຟ ຈັ໋ນ, ໂຕສ໋ວ ໂນ່ວ ເຍີຍ ໄຟ ໄມ້ ໂຕສ໋ວ ໂນ່ວ ເຍີຍ, ຢຽດ ຕສູ໊ງ ຈວັ່ງ ດຸ ເຕົ້າ ສີງ ລີ່ງ ເຈ໋ຍ ເລີ໌ຍ ເປ໋ນ ຢຽດ ນອມ ຊິນ. ຢຽດ ຕສູ໊ງ ຢ່າ ຕຸ໊ ຈວັ່ງ ດຸ ເຕົ້າ ສີງ ລີ່ງ ຮົບ.
14ຊິນ ໄມ້ ເຕສີ໌ຍ ມ່າຍ ດຸ ຫຍູ່ງ ຮນັ້ງ, ມ່າຍ ເຕສ໋ຍ ຫຍູ່ງ ກັ໊ບ ຈ໊ຽນ. 15ເຊ ກ໊ອງ ເຕສົ໋າ ກ໊ອງ, “ເຢຍ ໄມ້ ເຕສີ໌ຍ ປົ໌ວ, ເຢຍ ຕສ່ຽວ ໄມ້ ເຕສີ໌ຍ ໂຕສ໋ວ ຊິນ ເຍີຍ ຢຽດ ຫຍູ່ງ,” ນ້າຍ ໄມ້ ເຕສີ໌ຍ ປຸນ ເຕສົ໋າ ໄມ້ ໂຕສ໋ວ ຊິນ ເຍີຍ ຢຽດ ຫຍູ່ງ. 16ເຊ ກ໊ອງ ມນ່ອມ ຢ່າ ກ໊ອງ, “ເຢຍ ໄມ້ ເຕສີ໌ຍ ມຕສີງ, ເຢຍ ຕສ່ຽວ ໄມ້ ເຕສີ໌ຍ ໂຕສ໋ວ ຊິນ ເຍີຍ ຢຽດ ຫຍູ່ງ,” ນ້າຍ ໄມ້ ເຕສີ໌ຍ ປຸນ ມນ່ອມ ໄມ້ ໂຕສ໋ວ ຊິນ ເຍີຍ ຢຽດ ຫຍູ່ງ. 17ເຊ ກ໊ອງ ຕສຢັ້ງ ຊິນ ຂູງ ໂຕສ໋ວ ມຕສີງ ຮນັ້ງ, ຮນັ້ງ ຫາຍ ນໍ ໄຮ່ ໝວັງ ຕຸ໊ ໄຮ໌? ເຊ ກ໊ອງ ຂູງ ໂຕສ໋ວ ມນ່ອມ ຮນັ້ງ, ຮນັ້ງ ຫາຍ ນໍ ໄຮ່ ຮນົ້ມ ດສຢາວ? 18ມປ່າ ທິນ-ຮູ່ງ ເອີຍ ນິ່ນ ກັ້ນ ເຍີຍ ຕສະເອີ໋ຍ ປຸນ ຊິນ ຕສັ່ງ ຢຽດ ຫຍູ່ງ ມ່າຍ ຢຽດ ຫຍູ່ງ ເຍີຍ ຕ໋ອງ ຢຽມ. 19ເຊ ກ໊ອງ ຊິນ ເຍີຍ ຢຽດ ຕສູ໊ງ ຂູງ ດຸ ຫຍູ່ງ ຮນັ້ງ, ນ້າຍ ໄມ້ ໄຮ່ ເປ໋ນ ຊິນ ອ໊ະ. 20ມປ່າ ຊິນ ຕສະເກ້ງ ມ່າຍ ເຕສ໋ຍ ຫຍູ່ງ ກັ໊ບ ຈ໊ຽນ ຖສີງ ຕ້າຍ ໄຮ່ ເປ໋ນ ຢຽດ ນອມ ຊິນ.
21ເຫວີ່ຍ ນ້າຍ, ມຕສີງ ໄມ້ ໄຮ່ ບົ໋ວ ປົ໌ວ, “ເຢຍ ໄມ້ ຖຈຽມ ຕສຸ ຫລົ່ງ ເມີ່ຍ.” ມອກ໊ອງ ຢ່າ ໄມ້ ໄຮ່ ບົ໋ວ ເຕສົ໋າ, “ເຢຍ ໄມ້ ຖຈຽມ ຕສຸ ຫລົ່ງ ເມີ່ຍ.” 22ມປ່າ ໄມ້ ເຕສີ໌ຍ ຮນັ້ງ ໜ່າຍ. ປວັດ ຊິນ ເຍີຍ ຫາຍ ຫຍູ່ງ ເມົາ ເຈ໋ຍ, ວົ້ວ ຫຍູ່ງ ບົວ ເກົ້າ ຖຈຽມ ຫລົ່ງ ເຈ໋ຍ. 23ບົວ ຮນ້ຳ ຕ້າຍ ຊິນ ເຍີຍ ຫາຍ ຫຍູ່ງ ເກົ້າ ໄມ້ ທ່າຍ ເຍີຍ, ຕົ້ງ ວົ້ວ ຫຍູ່ງ ບົວ ເກົ້າ ອ໋ອຍ ຕສຸ ທ່າຍ. ໄມ້ ເປ໋ນ ໝັ່ງ ເຍີຍ ຕ໋ອງ, ເກົ້າ ອ໋ອຍ ຕສຸ ຈ້ຽມ ກວານ ຫລົງ. 24ເດສວີ່ຍ ເຍີຍ ຕ໋ອງ ໄມ້ ຖຈຽມ ຕສຸ ຕສອງ. ມປ່າ ທິນ-ຮູ່ງ ກັ໊ບ ຊິນ ຕສັ່ງ ຕ້າຍ, ປຸນ ໄມ້ ທ່າຍ ເຍີຍ ຕ໋ອງ ຖສໍ່ ເກົ້າ ອ໋ອຍ ຕສຸ ທ່າຍ. 25ຮນັ້ງ ໜ່າຍ ຊິນ ຖສີງ ຕ້າຍ ໄມ້ ລ່ຳ ແດສງ ຕ໋ອງ. ຊິນ ເຍີຍ ຫຍູ່ງໆ, ເມີ່ຍ ໂກ໋ວ ເຢຍ, ເຢຍ ໂກ໋ວ ເມີ່ຍ ຟີ່ ຮນັ້ງ ເຍີຍ. 26ເຊ ກ໊ອງ ຊິນ ເຍີຍ ຢຽດ ຫຍູ່ງ ຕສຸ ມຸນ, ຕສຢັ້ງ ຊິນ ຕສ່ຽວ ເຖສົາ ຈ໊ຽນ ມຸນ ເດສ່ງ. ເຊ ກ໊ອງ ຊິນ ເຍີຍ ຢຽດ ຫຍູ່ງ ຕຸ໊ ມ່ຽນ ທ່າຍ, ຕສຢັ້ງ ຊິນ ຕສ່ຽວ ເຖສົາ ຈ໊ຽນ ອຈຽນ-ໂຢ້ວ ເດສ່ງ.
27ເມີ່ຍ ບົວ ເຊ ກີຕູ່ ເຍີຍ ຊິນ. ເມີ່ຍ ບົວ ເຕົ້າໆ ຢ່າ ໂຕສ໋ວ ຊິນ ເຍີຍ ຢຽດ ຫຍູ່ງ. 28ທິນ-ຮູ່ງ ອອນ ມ່ຽນ ຢຽມ ຈິວ-ປາງ ໂຕສ໋ວ ກົງ. ຕະຢ໊ຽດ ໂຕສ໋ວ ກົງ-ໂຕສ້, ຕະເຫຍີ່ຍ ໂຕສ໋ວ ໂຕ່ວ ຫວ່າ ມ່ຽນ, ຕະຟາມ ໂຕສ໋ວ ຟິນ-ແຊງ. ແອ໋ງ ມ່າຍ ເຕີ໋ຍ ໂຕສ໋ວ ບົວະ ຮ່ອງ ເຍີຍ ສີ່. ມ່າຍ ເຕີ໋ຍ ໄຮ່ ຕສໍ່ ແປ່ງ, ມ່າຍ ເຕີ໋ຍ ມ່າຍ ປັ້ນ ເຕສີ່ຍ ເຖງ ມ່ຽນ, ມ່າຍ ເຕີ໋ຍ ມ່າຍ ປັ້ນ ເຕສີ່ຍ ກຸ໊ນ ສີ່, ຢ່າ ມ່າຍ ເຕີ໋ຍ ໄຮ່ ກ໊ອງ ກັ້ນ ຫຍູ່ງ ຫວ່າ. #ເອເຟໂຊ 4:11 29ນິ່ນ ບົວ ໄມ້ ເຕສີ໌ຍ ຢຽດ ຕສູ໊ງ ໂຕສ໋ວ ກົງ-ໂຕສ້, ໄຟ ໂຕ່ວ ຫວ່າ ມ່ຽນ, ໄຟ ຟິນ-ແຊງ. ໄມ້ ເຕສີ໌ຍ ຢຽດ ຕສູ໊ງ ໄຮ່ ໂຕສ໋ວ ບົວະ ຮ່ອງ ເຍີຍ ສີ່, 30ໄຟ ໄຮ່ ຕສໍ່ ແປ່ງ, ໄຟ ໄຮ່ ກ໊ອງ ກັ້ນ ຫຍູ່ງ ຫວ່າ, ໄຟ ໄຮ່ ຟານ ວົ້ວ ຫຍູ່ງ ຫວ່າ. 31ເມີ່ຍ ບົວ ອ໋ອຍ ຕສຸ ຈອມ ໂຮຍ້ວ ລໍ໌ ເກົ້າ ຫລົ່ງ ຈ໊ຽນ ເຈ໋ຍ ເຍີຍ ຕສີ້ງ ເຫຍີ່ຍ.
ມປ່າ ມ່າຍ ຕິ່ວ ເຈົ໊າ ເກົ້າ ຫລົງ ເຈ໋ຍ, ເຢຍ ອ໋ອຍ ປຸນ ເມີ່ຍ ບົວ ຮິ້ວ.
Currently Selected:
1 ໂຄລິນໂທ 12: IuMiLAO
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Lao Script) © 2007 Thailand Bible Society, 2007.