လံာ်တၢ်ကဲထီၣ်အခီၣ်ထံး 16
16
နီၢ်ဟၤကၢ်ဒီးစီၤယံးၡမၤဧ့လး
1စီၤအၤဘြၣ်အမါနီၢ်စၤရဲန့ၣ်တဆံးစၢ်န့ၢ်အဖိနီတဂၤလၢစီၤအၤဘြၣ်အဂီၢ်ဘၣ်. မ့မ့ၢ်အဝဲဒၣ်အိၣ်ဒီးအပှၤအဲၤကူပတူးဖိအကုၢ်ပိာ်မုၣ်တဂၤလၢအမံၤမ့ၢ်ဝဲ နီၢ်ဟၤကၢ်န့ၣ်လီၤ. 2မၤသးဒ်န့ၣ်ဒီး, နီၢ်စၤရဲစံးဘၣ်စီၤအၤဘြၣ်, “ယွၤတြီယၤဒ်သိးယဖိသုတအိၣ်တဂ့ၤလီၤ. လဲၤမံဃုာ်ဒီးယကုၢ်ပိာ်မုၣ်ဖိန့ၣ်တက့ၢ်. ဘၣ်တဘၣ်အဝဲကဒိးန့ၢ်ဘၣ်ဖိတဂၤလၢယဂီၢ်ကန့ၢ်ကသ့ဝဲလီၤ.” စီၤအၤဘြၣ်အသးလီၤပလိာ်ဒီးတၢ်လၢနီၢ်စၤရဲစံးဝဲဒၣ်န့ၣ်လီၤ. 3မၤသးဒ်န့ၣ်ဒီး, နီၢ်စၤရဲဟ့ၣ်ဝဲအကုၢ်ပိာ်မုၣ်နီၢ်ဟၤကၢ်ဆူ စီၤအၤဘြၣ်ဒ်သိးကကဲထီၣ်အသံၣ်အမါန့ၣ်လီၤ. (တၢ်အံၤမၤအသးဖဲစီၤအၤဘြၣ်အိၣ်ဝဲလၢကီၢ်ကနၤဧၣ်အပူၤအနံၣ် တဆံဝံၤအလီၢ်ခံန့ၣ်လီၤ.) 4စီၤအၤဘြၣ်မံဃုာ်ဂဲၤဃုာ်ဒီးနီၢ်ဟၤကၢ်ဝံၤနီၢ်ဟၤကၢ်ဒၢထီၣ်ဝဲဒၣ်န့ၣ်လီၤ. ဒီးတုၤအသ့ၣ်ညါဝဲလၢအဒၢထီၣ်န့ၣ်အဝဲပာ်ထီၣ်ထီအသးဒီးပာ် နီၢ်စၤရဲဒ်တမ့ၢ်တၢ်နီတမံၤလၢအမဲာ်ညါအသိးန့ၣ်လီၤ.
5တုၤနုၤတစု, နီၢ်စၤရဲစံးဘၣ်စီၤအၤဘြၣ်, “နီၢ်ဟၤကၢ်ပာ်ယၤဒ်ယတမ့ၢ်တၢ်နီတမံၤအသိးန့ၣ်မ့ၢ်ဒၣ်နတၢ်ကမၣ်လီၤ. ယနီၢ်ကစၢ်ဒၣ်ယဲယဟ့ၣ်လီၤအီၤလၢနၤဒီးစးထီၣ်လၢအသ့ၣ်ညါဝဲ လၢအဒၢထီၣ်န့ၣ်, ပာ်ယၤဒ်ယတမ့ၢ်တၢ်နီတမံၤဘၣ်အသိးန့ၣ်လီၤ. မ်ယွၤစံၣ်ညီၣ်တၢ်လၢနၤဒီးယၤအံၤမ့ၢ်မတၤအတၢ်ဘၣ်လဲၣ်န့ၣ်တက့ၢ်.”
6ဒီးစီၤအၤဘြၣ်စံးဆၢဝဲဒၣ်, “ဂ့ၤလံ, အဝဲဒၣ်န့ၣ်မ့ၢ်နကုၢ် ဒီးအိၣ်လၢနတၢ်ပၢအဖီလာ်လီၤ. မၤအီၤဒ်တၢ်လၢနအဲၣ်ဒိးမၤအီၤန့ၣ်တက့ၢ်.” တုၤနုၤတစုနီၢ်စၤရဲမၤနီၢ်ဟၤကၢ်အၢအၢသီသီတုၤဒၣ်လဲာ် နီၢ်ဟၤကၢ်ဘၣ်ထွးထီၣ်ဃ့ၢ်ဝဲဒၣ်န့ၣ်လီၤ.
7ယွၤအကလူးထံၣ်န့ၢ်နီၢ်ဟၤကၢ်ဖဲမဲးမုၢ်ခိၣ်အထံထီၣ်ပၢၢ်တတီၤ လၢကျဲလဲၤဆူဝ့ၢ်ၡူၢ်, 8ဒီးစံးဘၣ်အီၤ, “နီၢ်စၤရဲအကုၢ်ပိာ်မုၣ်နီၢ်ဟၤကၢ်ဧၢ, နဟဲလၢလဲၣ်ဒီးနကလဲၤဆူလဲၣ်.”
ဒီးနီၢ်ဟၤကၢ်စံးဆၢအီၤ, “ယဟးထီၣ်ဃ့ၢ်လၢယကစၢ်မုၣ်နီၢ်စၤ ရဲအအိၣ်န့ၣ်လီၤ.”
9ဒီးယွၤအကလူးန့ၣ်စံးဘၣ်အီၤ, “က့ၤကဒါက့ၤဆူနကစၢ်မုၣ် အအိၣ်ဒီးကဲအကုၢ်တက့ၢ်.” 10ယွၤအကလူးန့ၣ်စံးကဒီးအီၤ, “ယကဟ့ၣ်လီၤနၤလၢနစၢၤနသွဲၣ်အါ အါကလဲာ်တုၤဒၣ်လဲၣ်ပှၤဂံၢ်အီၤတန့ၢ်တသ့နီတဂၤဘၣ်န့ၣ်လီၤ. 11နကအိၣ်ဒီးနဖိခွါတဂၤ, နကယုၢ်န့ၢ်အမံၤလၢစီၤယံးၡမၤဧ့လး လီၤ. အဂ့ၢ်ဒ်အံၤ, ယွၤနၢ်ဟူလံနတၢ်ဟီၣ်တၢ်ယၢၤလၢတၢ်ကိၢ်တၢ်ဂီၤ အပူၤအဃိလီၤ. 12ဘၣ်ဆၣ်ဒီး, နဖိခွါကအိၣ်မူဝဲဒ်ကသ့ၣ်ယီၤမံၤတဒုအသိးန့ၣ် လီၤ. အဝဲကထီဒါပှၤကိးဂၤဒဲးဒီးပှၤကိးဂၤဒဲးစ့ၢ်ကီးကထီဒါ အီၤန့ၣ်လီၤ. အဝဲကအိၣ်မူလီၤဖးဒီးကယဲၢ်အဒူၣ်ဖိထၢဖိခဲလၢာ်လီၤ.”
13ဒီးနီၢ်ဟၤကၢ်သံကွၢ်လီၤက့ၤအသး, “မ့ၢ်ယထံၣ်နီၢ်နီၢ်လံ ယွၤဒီးအိၣ်မူဘၣ်ဒံးလၢကတဲတၢ်ဂ့ၢ်အံၤန့ၣ်ဧါ.” မၤသးဒ်န့ၣ်ဒီးအဝဲကိးယွၤလၢအကတိၤတၢ်ဒီးအီၤလၢ, “ကစၢ်ယွၤတဂၤလၢအထံၣ်တၢ်” န့ၣ်လီၤ. 14လၢတၢ်န့ၣ်အဃိထံပူၤတပူၤလၢအအိၣ်ဖဲဝ့ၢ်ကၤဒ့ၣ်ဒီးဝ့ၢ်ဘ့ရ့းအဘၢၣ် စၢၤန့ၣ်ပှၤဂီၢ်မုၢ်ကိးဝဲဒၣ်လၢ, “ပှၤမူတဂၤလၢအထံၣ်ယၤအထံပူၤ” န့ၣ်လီၤ.
15နီၢ်ဟၤကၢ်ဆံးစၢ်ထီၣ်အဖိခွါတဂၤလၢစီၤအၤဘြၣ်အဂီၢ်ဒီးယုၢ် န့ၢ်အမံၤလၢစီၤယံးၡမၤဧ့လးန့ၣ်လီၤ. 16အကတီၢ်ဖဲန့ၣ်စီၤအၤဘြၣ်အသးအိၣ်ဝဲဃိးဆံဃုနံၣ်လီၤ.
Currently Selected:
လံာ်တၢ်ကဲထီၣ်အခီၣ်ထံး 16: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
