လံာ်လူၤကၣ် 20
20
တၢ်သံကွၢ်ဘၣ်ဃးယ့ၣ်ၡူးအတၢ်စိတၢ်ကမီၤ
(မး. ၂၁:၂၃-၂၇; မၢ်. ၁၁:၂၇-၃၃)
1ဘၣ်မုၢ်တနံၤဖဲယ့ၣ်ၡူးအိၣ်လၢတၢ်လုၢ်ဟံၣ်အပူၤ, သိၣ်လီၤသီလီၤပှၤဂီၢ်မုၢ်တဖၣ်, ဒီးစံၣ်တဲၤတဲလီၤတၢ်သးခု ကစီၣ်အဖၢမုၢ်န့ၣ်, ပှၤလုၢ်တၢ်အခိၣ်အဒိၣ်တဖၣ်, ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဃုာ်ဒီးပှၤယူဒၤဖိကရၢအခိၣ်အနၢ်တဖၣ်ဟဲဝဲ, 2ဒီးစံးဘၣ်အီၤ, “စံးဘၣ်တဲဘၣ်ပှၤတက့ၢ်. နမၤတၢ်သ့ၣ်တဖၣ်အံၤန့ၣ်, နအိၣ်ဒီးတၢ်ခွဲးတၢ်ယာ်မနုၤတမံၤလဲၣ်. မ့ၢ်မတၤဟ့ၣ်စိဟ့ၣ်ကမီၤနၤလၢနကမၤတၢ်သ့ၣ်တဖၣ်အံၤအဂီၢ်န့ၣ်လဲၣ်.”
3ယ့ၣ်ၡူးစံးဆၢအဝဲသ့ၣ်, “ခဲကနံၣ်အံၤ, ပျဲယသံကွၢ်သုလၢတၢ်သံကွၢ်တထံၣ်န့ၣ်တက့ၢ်. စံးဘၣ်တဲဘၣ်ယၤတက့ၢ်. 4စီၤယိၤဟၣ်အတၢ်ခွဲးတၢ်ယာ်, တၢ်စိတၢ်ကမီၤလၢအကဘျၢပှၤန့ၣ်, ဟဲလၢကစၢ်ယွၤအအိၣ်ဧါ. မ့တမ့ၢ်ဟဲလၢပှၤကညီအအိၣ်လဲၣ်.”
5အဝဲသ့ၣ်စးထီၣ်ဂ့ၢ်လိာ်ဘှီလိာ်အသးလၢအသကိးဒၣ်ဝဲကဒဲကဒဲ အကျါဒီးစံးဝဲ, “ပကစံးဒ်လဲၣ်. ပမ့ၢ်စံး, ‘လၢယွၤအအိၣ်’ ဒီးအဝဲဒၣ်ကစံးဝဲ, ‘မ့မ့ၢ်ဒ်န့ၣ်ဒီး, ဘၣ်မနုၤအဃိ, သုတစူၢ်တနာ်ပှၤဘျၢတၢ်စီၤယိၤဟၣ်န့ၣ်လဲၣ်.’ 6မ့မ့ၢ်ပမ့ၢ်စံး, ‘ဟဲလၢပှၤကညီအအိၣ်’ ဒီးပှၤကမျၢၢ်ဖဲအံၤခဲလၢာ်ကကွံာ်ပှၤလၢလၢၢ်, အဂ့ၢ်မ့ၢ်လၢအဝဲသ့ၣ်နာ်လၢစီၤယိၤဟၣ်မ့ၢ်ဝံတဂၤအဃိလီၤ.” 7လၢတၢ်န့ၣ်အဃိအဝဲသ့ၣ်စံးဆၢဝဲ, “တၢ်ဒိးဘျၢအဝဲန့ၣ်ဟဲဖဲလဲၣ်ပတသ့ၣ်ညါဘၣ်.”
8ဒီးယ့ၣ်ၡူးစံးဘၣ်အဝဲသ့ၣ်, “ဒ်န့ၣ်အသိး, ယမၤတၢ်သ့ၣ်တဖၣ်အံၤလၢ မတၤအတၢ်ဟ့ၣ်စိဟ့ၣ်ကမီၤယၤလဲၣ်န့ၣ်, ယတစံးဘၣ်တဲဘၣ်သုဘၣ်.”
တၢ်ကတိၤဒိဘၣ်ဃးပှၤဒိးလဲအသးလၢ စပံးလီၢ်တဖၣ်
(မး. ၂၁:၃၃-၄၆; မၢ်. ၁၂:၁-၁၂)
9တုၤနုၤတစုယ့ၣ်ၡူးစံးဘၣ်တဲဘၣ်ပှၤဂီၢ်မုၢ်တဖၣ်လၢတၢ် ကတိၤဒိတထံၣ်အံၤလီၤ. “ပှၤတဂၤသူၣ်လီၤစပံးလီၢ်တလီၢ်, ဒိးလဲလီၤဝဲဆူပှၤမၤဟီၣ်ခိၣ်တဖၣ်, ဝံၤဒီးဟးထီၣ်လၢအဟံၣ်ဖးယံာ်လီၤ. 10ဖဲတၢ်ဆၢကတီၢ်တုၤဃီၤန့ၣ်, အဝဲဒၣ်ဆှၢလီၤတၢ်ခ့တၢ်ပှၤတဂၤဆူပှၤမၤဟီၣ်ခိၣ်တဖၣ်အအိၣ်, ဒ်သိးအကဒိးန့ၢ်ဘၣ်ဟီၣ်ခိၣ်အတၤသၣ်တနီၤလၢအကြၢး ဒိးန့ၢ်ဘၣ်ဝဲန့ၣ်လီၤ. ဘၣ်ဆၣ်ဒီး, ပှၤမၤဟီၣ်ခိၣ်တဖၣ်တီၢ်တၢ်ခ့တၢ်ပှၤတဂၤန့ၣ်ဝံၤဆှၢ ကဒါက့ၤအီၤထဲအစုယၢ်ခီန့ၣ်လီၤ. 11လၢတၢ်န့ၣ်အဃိ, အဝဲဒၣ်ဆှၢလီၤကဒီးတၢ်ခ့တၢ်ပှၤအဂၤတဂၤလီၤ. ဘၣ်ဆၣ်ဒီးပှၤမၤစပံးလီၢ်တဖၣ်တီၢ်အီၤစ့ၢ်ကီးဒီးမၤမဲာ်ဆှးအီၤဝံၤ ဒီးဆှၢလီၤက့ၤအီၤထဲအစုယၢ်ခီန့ၣ်လီၤ. 12အန့ၣ်ဝံၤဒီးအဝဲဆှၢလီၤကဒီးတၢ်ခ့တၢ်ပှၤသၢဂၤတဂၤ, ဒီးပှၤမၤစပံးလီၢ်မၤဘၣ်ဒိဘၣ်ထံးအီၤစ့ၢ်ကီးဒီးကွံာ်ထီၣ်ကွံာ်အီၤလီၤ. 13တုၤနုၤတစုစပံးလီၢ်ကစၢ်စံးဝဲ, ‘ယကဘၣ်မၤဒ်လဲၣ်. ယကဆှၢလီၤယဖိခွါသးဘိဒၣ်ယဲဒီး, သပှၢ်ကတၢၢ်, အဝဲသ့ၣ်ကယူးယီၣ်ပာ်ကဲအီၤလီၤ.’ 14ဘၣ်ဆၣ်ဒီး, ဖဲပှၤမၤစပံးလီၢ်တဖၣ်ထံၣ်အီၤန့ၣ်, အဝဲသ့ၣ်စံးလိာ်အသးတဂၤဒီးတဂၤ, ‘အဝဲအံၤမ့ၢ်စပံးလီၢ်ကစၢ်အဖိခွါလီၤ. မ်ပမၤသံအီၤတက့ၢ်. ဒီးအဝဲအတၢ်န့ၢ်သါကကဲထီၣ်ပတၢ်လီၤ.’ 15လၢတၢ်န့ၣ်အဃိအဝဲသ့ၣ်ကွံာ်ထီၣ်ကွံာ်အီၤဆူစပံးလီၢ်အချၢ ဒီးမၤသံအီၤလီၤ. မ့မ့ၢ်ဒ်န့ၣ်ဒီး, စပံးလီၢ်ကစၢ်ကမၤ ပှၤမၤစပံးလီၢ်တဖၣ်ဒ်လဲၣ်.” ယ့ၣ်ၡူးသံကွၢ်ဝဲ, 16“အဝဲဒၣ်ကဟဲဒီးမၤသံပှၤသ့ၣ်တဖၣ်န့ၣ်, ဒီးဟ့ၣ်လီၤက့ၤစပံးလီၢ်ဆူ ပှၤမၤဟီၣ်ခိၣ်အဂၤတဖၣ်အစုပူၤလီၤ.” ဖဲပှၤဂီၢ်မုၢ်တဖၣ်နၢ်ဟူတၢ်အံၤန့ၣ်, အဝဲသ့ၣ်စံးဝဲ, “မ်တၢ်သုတမၤအသးဒ်န့ၣ်တဂ့ၤ.”
17ယ့ၣ်ၡူးကွၢ်ဃီၤအဝဲသ့ၣ်ဒီးသံကွၢ်ဝဲ, “မ့မ့ၢ်ဒ်န့ၣ်ဒီး, တၢ်ကွဲးအသးလၢလာ်တတီၤအံၤအခီပညီမ့ၢ်မနုၤလဲၣ်.
‘လၢၢ်တဖျၢၣ်ဃီလၢပှၤဘှီတၢ်ဖိ တဖၣ်ညိကွံာ်ဝဲဒ်တၢ်လၢအလုၢ်အပှၤတအိၣ်ဘၣ်န့ၣ်,
ကဲထီၣ်လၢလၢၢ်အကါဒိၣ်ကတၢၢ်တဖျၢၣ်
တခီန့ၣ်လီၤ.’
18ပှၤတဂၤလၢ်လၢ်လၢအလီၤတဲာ်လၢလၢၢ်တဖျၢၣ်န့ၣ်အဖီခိၣ်န့ၣ်, ကဘၣ်ကူးဘၣ်ကါဝဲအကူာ်ကူာ်, ဒီးလၢၢ်အဝဲအံၤမ့ၢ်လီၤတဲာ်လၢပှၤတဂၤဂၤအလိၤန့ၣ်, ကမၤသဘှံးမၤကမူၣ်ကွံာ်အီၤလီၤ.”
တၢ်သံကွၢ်ဘၣ်ဃးတၢ်ဟ့ၣ်တၢ်အခိအသွဲ
(မး. ၂၂:၁၅-၂၂; မၢ်. ၁၂:၁၃-၁၇)
19ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ် ဒီးပှၤလုၢ်တၢ်အခိၣ်အဒိၣ်တဖၣ်ဂုာ်ကျဲးစၢးဟံးဃာ် ယ့ၣ်ၡူးတဘျီဃီဖဲန့ၣ်, အဂ့ၢ်မ့ၢ်လၢအဝဲသ့ၣ်သ့ၣ်ညါလၢ ယ့ၣ်ၡူးကတိၤတၢ်ကတိၤဒိအဝဲအံၤထီဒါအဝဲသ့ၣ်အဃိ န့ၣ်လီၤ. ဘၣ်ဆၣ်ဒီးအဝဲသ့ၣ်ပျံၤပှၤဂီၢ်မုၢ်လီၤ. 20လၢတၢ်န့ၣ်အဃိ, အဝဲသ့ၣ်အိၣ်ခိးကွၢ်တၢ်ဆၢကတီၢ်လၢ အကြၢးဝဲဘၣ်ဝဲလီၤ. အဝဲသ့ၣ်ဟ့ၣ်ပှၤတနီၤစ့ဒ်သိးအကပာ်မၤအသးလၢအမ့ၢ်ပှၤ အသးဘျၢ, ဒီးဆှၢလီၤအဝဲသ့ၣ်လၢအကသံကွၢ်သံဒိးယ့ၣ်ၡူး ဒီးဖီၣ်န့ၢ်အီၤလၢအတၢ်ကတိၤဒ်သိးအဝဲသ့ၣ်ဟ့ၣ်လီၤကွံာ်အီၤ ဆူရိမ့ၤအပဒိၣ်ဖးဒိၣ်အတၢ်စိတၢ်ကမီၤအပူၤကသ့ဝဲအဂီၢ် န့ၣ်လီၤ. 21ပှၤကွၢ်ဟုၣ်ကွၢ်စုာ်တၢ်တဖၣ်အံၤစံးဘၣ်ယ့ၣ်ၡူး, “သရၣ်ဧၢ, ပသ့ၣ်ညါလၢနတကွၢ်မဲာ်ပှၤကညီအလီၢ်အလၤဘၣ်. မ့မ့ၢ်နသိၣ်လိတၢ်မ့ၢ်တၢ်တီဘၣ်ဃးဒီးကစၢ်ယွၤ အတၢ်ဘၣ်အသးလၢပှၤကညီအဂီၢ်လီၤ. 22စံးဘၣ်တဲဘၣ်ပှၤတက့ၢ်. ပဟ့ၣ်တၢ်ခိတၢ်သွဲဆူရိမ့ၤစီၤပၤဖးဒိၣ် အအိၣ်န့ၣ်ထီဒါပတၢ်သိၣ်တၢ်သီဧါ, တထီဒါလဲၣ်.”
23ဘၣ်ဆၣ်ဒီးယ့ၣ်ၡူးသ့ၣ်ညါအဝဲသ့ၣ်အတၢ်ကူၣ်တၢ်ဖး, ဒီးစံးဘၣ်အဝဲသ့ၣ်, 24“ဒုးနဲၣ်ယၤစ့အဘ့ၣ်တဘ့ၣ်န့ၣ်တက့ၢ်. လၢအမဲာ်သၣ်လိၤန့ၣ်မတၤအခိၣ်အဂီၤဒီးအမံၤအိၣ်လဲၣ်.” အဝဲသ့ၣ်စံးဆၢဝဲ, “ကဲစၢ်အခိၣ်အဂီၤဒီးအမံၤအိၣ်လီၤ.”
25မၤသးဒ်န့ၣ်ဒီးယ့ၣ်ၡူးစံးဝဲ, “မ့မ့ၢ်ဒ်န့ၣ်ဒီး, ဟ့ၣ်ကဲစၢ်လၢကဲစၢ်အတၢ်, ဒီးဟ့ၣ်ကစၢ်ယွၤလၢကစၢ်ယွၤအတၢ်တက့ၢ်.”
26လၢပှၤဂီၢ်မုၢ်တဖၣ်အမဲာ်ညါန့ၣ်, အဝဲသ့ၣ်ဖီၣ်အီၤလၢအတၢ်ကတိၤတန့ၢ်နီတဘီဘၣ်. လၢတၢ်န့ၣ်အဃိအဝဲသ့ၣ်အိၣ်ဘှီၣ်ကလာ်, ဒီးကမၢကမၣ်ဝဲလၢယ့ၣ်ၡူးအတၢ်စံးဆၢအဃိလီၤ.
တၢ်သံကွၢ်ဘၣ်ဃးတၢ်ဂဲၤဆၢထၢၣ်က့ၤလၢတၢ်သံ
(မး. ၂၂:၂၃-၃၃; မၢ်. ၁၂:၁၈-၂၇)
27ပှၤစးဒူၤကဲတနီၤဟဲဝဲဆူယ့ၣ်ၡူးအအိၣ်လီၤ. အဝဲသ့ၣ်မ့ၢ်ပှၤတဖၣ်လၢအစံးဝဲလၢပှၤကညီတဂဲၤ ဆၢထၢၣ်က့ၤလၢတၢ်သံဘၣ်န့ၣ်လီၤ. အဝဲသ့ၣ်သံကွၢ်အီၤ, 28“သရၣ်ဧၢ, စီၤမိၤၡ့ကွဲးတၢ်သိၣ်တၢ်သီတထံၣ်အံၤလၢပဂီၢ်လီၤ. ပှၤတဂၤမ့ၢ်သံဒီးပာ်လီၤတဲာ်တ့ၢ်အမါဘၣ်ဆၣ်အဖိမ့ၢ်တအိၣ်နီ တဂၤန့ၣ်, ပိာ်ခွါလၢအသံတဂၤန့ၣ်အဒီပုၢ်ဝဲၢ်ခွါကဘၣ်န့ၢ်မါလၢမုၣ် ကမဲအဝဲန့ၣ်, ဒ်သိးအဝဲသ့ၣ်ကဒုးအိၣ်ထီၣ်ဖိလၢပှၤသံတဂၤအဂီၢ်လီၤ. 29တဘျီန့ၣ်, ပှၤဒီပုၢ်ဝဲၢ်ခွါအိၣ်ဝဲနွံဂၤလီၤ. ဒီပုၢ်ဝဲၢ်ခွါအဒိၣ်ကတၢၢ်တဂၤန့ၢ်အမါဒီးဖဲအသံန့ၣ်, အဖိတအိၣ်လီၤတဲာ်တ့ၢ်နီတဂၤဘၣ်. 30တုၤနုၤတစုဒီပုၢ်ဝဲၢ်ခွါခံဂၤတဂၤန့ၢ်မါလၢမုၣ်ကမဲအဝဲန့ၣ်လီၤ. 31အန့ၣ်ဝံၤအလီၢ်ခံဒီပုၢ်ဝဲၢ်ခွါသၢဂၤတဂၤလီၤ. တၢ်တမံၤဃီမၤအသးဒီးပှၤဒီပုၢ်ခွါနွံဂၤလၢာ်လီၤ. အဝဲသ့ၣ်သံဝဲ, ဒီးအဖိအလံၤတအိၣ်လီၤတဲာ်တ့ၢ်နီတဂၤဘၣ်. 32လၢခံကတၢၢ်န့ၣ်ပိာ်မုၣ်သံဝဲစ့ၢ်ကီးလီၤ. 33မ့မ့ၢ်ဒ်န့ၣ်ဒီးဖဲတၢ်ဂဲၤဆၢထၢၣ်သမူထီၣ်က့ၤအနံၤန့ၣ်, ပိာ်မုၣ်တဂၤန့ၣ်ကမ့ၢ်ဒီပုၢ်ဝဲၢ်ခွါဖဲလဲၣ်တဂၤအမါလဲၣ်. အဝဲသ့ၣ်နွံဂၤလၢာ်န့ၢ်တ့ၢ်အမါလၢပိာ်မုၣ်တဂၤအံၤလီၤ.”
34ယ့ၣ်ၡူးစံးဆၢအဝဲသ့ၣ်, “ပှၤပိာ်ခွါဒီးပှၤပိာ်မုၣ်ဖဲစိၤတစိၤအံၤ န့ၢ်မါန့ၢ်ဝၤလီၤ. 35ဘၣ်ဆၣ်ဒီးပှၤလၢယွၤပာ်အီၤလၢအကြၢးဝဲလၢအကဂဲၤ ဆၢထၢၣ်သမူထီၣ်က့ၤလၢတၢ်သံတဖၣ်န့ၣ်, တန့ၢ်မါန့ၢ်ဝၤလၢစိၤလၢအကဟဲန့ၣ်ဘၣ်. 36အဝဲသ့ၣ်လီၤဂာ်ဒီးကလူးတဖၣ်, ဒီးသံဝဲတသ့ဘၣ်. အဝဲသ့ၣ်မ့ၢ်ကစၢ်ယွၤအဖိတဖၣ်, အဂ့ၢ်မ့ၢ်လၢအဂဲၤဆၢထၢၣ်က့ၤလံဝဲလၢတၢ်သံအဃိန့ၣ်လီၤ. 37ဒီးစီၤမိၤၡ့အုၣ်အသးဖျါဖျါလၢပှၤသံတဖၣ်ဘၣ် တၢ်ဒုးဂဲၤဆၢထၢၣ်သမူထီၣ်က့ၤအီၤလီၤ. ဖဲတၢ်ကွဲးတတီၤလၢအ ဘၣ်ဃးဒီးသ့ၣ်တၤဆှုၣ်တခိၣ်လၢမ့ၣ်အူအီၣ်အီၤအပူၤန့ၣ်, အဝဲဒၣ်ကတိၤတၢ်ဘၣ်ဃးဒီးကစၢ်ဒ်အမ့ၢ်ဝဲ စီၤအၤဘြၤဟၣ် အကစၢ်ယွၤ, စီၤအံၤစဲးအကစၢ်ယွၤ, ဒီးစီၤယၤကိာ်အကစၢ်ယွၤလီၤ. 38အဝဲဒၣ်မ့ၢ်ပှၤမူအကစၢ်ယွၤ, ဒီးတမ့ၢ်ပှၤသံအကစၢ်ယွၤဘၣ်. အဂ့ၢ်ဒ်အံၤ, ပှၤကိးဂၤဒဲးမူဝဲလၢအီၤလီၤ.”
39ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတနီၤကတိၤထီၣ်တၢ်ဒီးစံး, “သရၣ်ဧၢ, နစံးဆၢတၢ်ဂ့ၤမးလီၤ.” 40အဂ့ၢ်မ့ၢ်လၢ, အဝဲသ့ၣ်သံကွၢ်အီၤတၢ်ဆူညါတဘူၣ်လၢၤဘၣ်အဃိလီၤ.
တၢ်သံကွၢ်ဘၣ်ဃးခရံာ်
(မး. ၂၂:၄၁-၄၆; မၢ်. ၁၂:၃၅-၃၇)
41ယ့ၣ်ၡူးစံးဘၣ်အဝဲသ့ၣ်, “တၢ်စံးဝဲလၢခရံာ်ကမ့ၢ်စီၤဒၤဝံးအစၢၤ အသွဲၣ်န့ၣ်, သ့ဝဲလၢကျဲဒ်လဲၣ်. 42အဂ့ၢ်ဒ်အံၤ, စီၤဒၤဝံးအနီၢ်ကစၢ်ဒၣ်ဝဲစံးဝဲဖဲလံာ်စံးထီၣ်ပတြၢၤအပူၤ,
‘ကစၢ်စံးဘၣ်ယကစၢ်
ဆ့ၣ်နီၤဖဲအံၤလၢယစုထွဲတကပၤ
43တုၤလၢယပာ်နဒုၣ်နဒါတဖၣ်လၢ နခီၣ်အဖီလာ်
ဒ်နခီၣ်ယီၢ်လီၤအလီၢ်အသိးန့ၣ်တက့ၢ်.’
44စီၤဒၤဝံးကိးအီၤလၢကစၢ်လီၤ. မ့မ့ၢ်ဒ်န့ၣ်ဒီးခရံာ်မ့ၢ်စီၤဒၤဝံးအစၢၤအသွဲၣ်ကသ့ဝဲလၢ ကျဲဒ်လဲၣ်.”
ယ့ၣ်ၡူးဟ့ၣ်ပလီၢ်တၢ်ဘၣ်ဃး ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်
(မး. ၂၃:၁-၃၆; မၢ်. ၁၂:၃၈-၄၀)
45ဖဲပှၤဂီၢ်မုၢ်ခဲလၢာ်ဒိကနၣ်ယ့ၣ်ၡူးအတၢ်စံးတၢ်ကတိၤအဖၢမုၢ်န့ၣ်, အဝဲဒၣ်စံးဘၣ်အပျဲၢ်အဘီၣ်တဖၣ်, 46ပလီၢ်သုသးလၢပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်, ပှၤလၢအအဲၣ်ဒိးဟးထီၣ်ဟးလီၤကူသိးဒီးအဆ့ကၤဖးထီ, ဒီးအဲၣ်ဒိးပှၤကတိၤဒိၣ်ကတိၤဆၢဂ့ၤအီၤဖဲဖၠါပူၤ, ပှၤလၢအဃုထၢလီၢ်ဆ့ၣ်နီၤအဂ့ၤကတၢၢ်တဖၣ်လၢ ဘူၣ်ဘျီၣ်လၢအမ့ၢ်တၢ်ဘါလီၢ်အပူၤ, ဒီး 47တၢ်လီၢ်အဂ့ၤကတၢၢ်ဖဲဘူၣ်အဆၢကတီၢ်, ပှၤလၢအဟံးန့ၢ်တၢ်အခွဲးအယာ်လၢ မုၣ်ကမဲတဖၣ်အဖီခိၣ်ဒီးဂုာ်န့ၢ်ဝာ်န့ၢ်အဟံၣ်အဃီတဖၣ်, ဒီးအန့ၣ်ဝံၤအလီၢ်ခံပာ်မၤအသးခီဖျိအဃ့ဘါထု ကဖၣ်တၢ်ထီထီကလဲာ်တဖၣ်န့ၣ်တက့ၢ်. တၢ်စံၣ်ညီၣ်လၢအဝဲသ့ၣ်အဂီၢ်ကမ့ၢ်တၢ်အအၢကတၢၢ်လီၤ.”
Currently Selected:
လံာ်လူၤကၣ် 20: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
