Iuanna 1
1
OMiccie lon lothupuththuput loKapik lothakkat pul iponyi
1Ncinomun papꞌrek pellat cik, lon lokat cik ana lon lokat cik noKapik. 2Ana ncinomun kwokat cik okin oKapik.
3Ana Kapik kokkathe aꞌrupu appik nti ikkun wolon len ana papella ipokat cik pokkattathe aukun wolon len wakonnokkot. 4Thikkoik thaat nnolon ana thikkoik then ithen akkanane ul kꞌran ikimmiekin cik appik. 5Kꞌran kaccieik iꞌrïmak, ana ngïꞌrïmak ngannalkot kꞌran ken.
6Pul pꞌrek pakkakathe ipa Kapik kothïothe ponat kꞌran itti oIuanna. 7Kwaat itti akwatherene ul lon lokꞌran ken ikainet ul, othakka itti aul appik occokot lon nomïkït nti ilon loIuanna. 8Ook ngka kung pakannoka kꞌran ikacco, kwaat itti akwatherene ul lon lopul ipethekkin kꞌran ikacco. 9Kꞌran ikacco ikaik ïcat ikacciene ul cik appik kokat cik akao nocapu.
10Lon lokat cik nocapu antoka manna itti capu ncik appik cokkattathe nti ikkun wung anaruk capu commarok. 11Kwainet pothok ipokat pung anaruk ul wung wakinnikkiek cik. 12Anaruk okkwion ithikkierok cik ana ithoccokothe lon lokꞌran kung nomïkït, kwokorronnathekin akin othakka nyukul nyoKapik, 13nyukul inya akorronno okwonta nti iul ionyi ana akka ul ionyi wongothe itti okin thakwonta anaruk okin thokwontat noKapik.
14Lon lothakkakathe ka kopul iponyi akikkat cik iaron. Oron thimmat thrïk thung, thrïk thung pulluk pen okkwi ipaat naththan, nthoporot thoppot ana lon ilaik ïcat.
15OIuanna pocoꞌrothok ntherethok llon ilaik ïcat akwiꞌre mpoꞌre cittan itti, “Ook empi ipa mpiꞌret lon len itti, ‘Okkwi ipamakothin prïk naun akka kwokat cik tokït naun.’” 16Ana nti ithoporot thung ithoppot, kwethïetheron cik arttot nomaꞌri moppot. 17Akka lon lothonceꞌret lon cik loKapik lakkethet ton nti ikkun woMucca ana thoporot ana lon ilaik ïcat laIeccuo oMiccie akkonat. 18Pul pella pimmat Kapik kirrkkir. Anaruk ukul wung wulluk, iammakka Kapik ïcat ana iaik iccik kung, ien akkiniet ton Kapik.
Lon loIuanna pomamuthie
(Maththa 3.1–12; Markkoc 1.2–8; Lukka 3.15–17)
19Lon elli ila Iuanna pomamuthie peret ngka kung akka ul ittïttïk woIouth wonokaꞌran koUruccelim wothïothe ul wonoppan toKapik ana ul woLaui akin othipittothok itti ook okkwen. 20Kwakonnocukkwat nolon anaruk kwiꞌret ncinokkït itti, “Mpannoka oMiccie.”
21Akin ipittathok itti, “Ana oung okkwen? Oung oIliai?”
Ana kwiꞌrekathe itti, “Mpakannoka oIlia.”
Ana okin thipittathok itti, “Ana oung pul ipernte lon loKapiki?”
Kwothïanthet kin tit itti, “Aa.”
22Ittina pꞌrïn akin iꞌrekathok itti, “Ana oung okkwen? Iꞌrethenïn lon ilanïn onekine ul iothïothenïn. Ngkwiꞌre itti oung oththa?”
23OIuanna pothïatherit llon lopul pothernte lon loKapik oIccaia iliꞌre itti,
“Oun poꞌre ipaik pakkakkaro nti ithampang, apiꞌre itti,
‘Nokkinthet Ili kathar kocoꞌrotheik.’”#Iccaia 40.3
24Ittina ul woPriccin iarothïlathe, 25ipittat oIuanna itti, “Ana ngkwonin akka aethet ul mamuthie amma ngkwannoka oMiccie ana manna okonnoka oIlia ana manna okonnoka pul pothernte lon loKapik?”
26AIuanna othïat tit itti, “Mpethet non mamuthie ngngꞌri, anaruk opilin paik ianon ipanon thomma. 27Ook ipamakothin ook ipa mpakannekko nan itti mpakꞌrinok loꞌrak lowok.”
28Elli appik lokkattathe nokaꞌran koPeththania nokuthut korue toÜrüthün nthokarkan nacïngkï ummot ngngin, na aIuanna pokat akwikket ul mamuthie.
OIeccuo, thungkat thoKapik
29Ngorrot ngen oIuanna pimmakathe oIeccuo akwanthan naak akwiꞌrekat itti, “Nantokatha, thungkat thoKapik okkwi ipapaꞌre lon ilokithak cik nnocapu. 30Ook ipa mpokat cik aneret akka mpiꞌret itti, ‘Pul ipamakothin prïk naun akka kwokat cik amparthuk okwonta.’ 31Manna inenni oun ngka kin mpommak itti kwaka okkwen anaruk lon ila mpaik pikkenthet ul mamuthie ngngꞌri othakka itti aul woIccereil inak.”
32Ittina aIuanna iꞌrekat lon ila kwimmat itti, “Mpimmat Kanang ikupupure akuo ntothiꞌrot ere cülükkür akoꞌrat naak. 33Mpakannainarok anaruk okkwi ipothïothin anathikket ul mamuthie ngngꞌri, akkiꞌrethin itti pul ipanon thaik thakathecce, Kanang koKapik kaꞌro nan akikkat cik naak, ook ipikket ul mamuthie ngKanang ikupupure. 34Mpimmat ana mpaik piꞌre ila mpimmat itti ook ukul woKapik.”
Ul iammakot oIeccuo wocittokït
35Ana ngorrot ngen, oIuanna pokat cik akwocoꞌro nnul iammakothok weꞌra. 36Kwimmakathe oIeccuo akwoppo cïnang. Ana kwiꞌrekathe itti, “Nokatha thungkat thoKapik theꞌre.”
37Anakka ul iammakothok ieꞌra woccïkothe akwiꞌre lon elli, okin thomakathe oIeccuo. 38Manakka oIeccuo polliakothe, akwimmakat kin akin omakothok akwipittat kin itti, “Ngintha akka annokwariccat?”
Okin thiꞌrekathe itti, “Pul ipangkene, kaman kang kaik kartha?”
39Akwiꞌrekat kin itti, “Nanthan annathokatha.”
Menik akin oingkat akin othokathakat na kwokat akwikkoik ana okin thikkatheik cipin cen okin aththut ana cïngkï cokat cocoꞌrin cocipin.
40Anthrauc opang poCamaan oPoththuruc okin nti iakin itheꞌra ithoccïkothe lon ila Iuanna piꞌret akin omakathok. 41Lon ila Anthrauc pokkothe cittokït itti kwiothe opang poCamaan akwerekanthok itti, “Onïn thiothe oMiccie okkwi ipa Kapik kothiothe.” 42Ana kwonakathok na aIeccuo.
Ana oIeccuo pokathakathok ana kwiꞌrekathe itti, “Ngkwoccot kꞌran itti oCamaan ukul woIuanna. Ngkwakkarako itti oCcappa” (ilonu itti oPoththuruc).
OIeccuo pakkaro oPilippic ana oNathanail
43Ana ngorrot ngen, oIeccuo piꞌrekathe itti kwaeo noththok poCelïl ana kwiathe oPilippic ana kwiꞌrekathok itti “Omakothin.”
44OPilippic pokat ponokaꞌran koPeththcceitha ammakka Anthrauc ana oPoththuruc. 45OPilippic piathe oNaththanail akwiꞌrekathok itti, “Onïn thiothe okkwi ipa oMucca pappokurrot lon len iatham wothonceꞌret lon cik ana ipa ul wothernte lon loKapik wokurrot lon len cakuruk itti oIeccuo poNaccir, ukul woIuccip.”
46ANaththanail ipittat itti, “Lon lꞌrek lakaik iloporot lanthan nokaꞌran koNacciri?”
APilippic omekathok itti, “Aꞌrik aththokatha.”
47Anakka oIeccuo pimmat oNaththanail akwanthan naak, akwiꞌrekat itti, “Katha okkwempi paIccereil ïcarïcat ipella loꞌrek moloko manna lotte.”
48ANaththanail ipittathok itti, “Ngkwinan taththa?”
AIeccuo othïat tit itti, “Mpimmarung akka ngkwokat cik icuꞌre copïcït, aPilippic parthuk akkarong.”
49ANaththanail iꞌrekat lon mpoꞌre cittan itti, “Pul ipangkene, oung ukul woKapik, oung Ili woIccereil.”
50AIeccuo iꞌrekat itti, “Ngkwoccokothe lon nocïkït akka mpiꞌret itti mpimmathung icuꞌre copïcïri? Ngkwimma lon lommaththik nolon elli.” 51AIeccuo apparttat nan itti, “Mpiꞌret non lon ilaik ïcat, onon thimma tothiꞌrot tanyattatheik ana uꞌrupa wothothïlettat woKapik awaik akuꞌrot ana uo ntan nokkul wopul iponyi.”
Currently Selected:
Iuanna 1: Lumun
Highlight
Share
Copy
Want to have your highlights saved across all your devices? Sign up or sign in
´© (Active), Wycliffe Bible Translators, Inc. All rights reserved
