Iuanna 16
16
Uꞌrupa iupupure
1“Mperenet non lon elli appik othakka itti annokorronno urttat cik. 2Okin thathokïccet non thapat nocuththun caꞌrama, caꞌri caik canthan ica ul iangwonon ome itti okin thaik thakkinthet Kapik lon loporot. 3Okin thakkot menik akka okin thomma ongappa ana manna okin thomman. 4Mpiꞌrethenon lon elli othakka itti amma caꞌri cen caat anon okwarikot itti mpokat piꞌrethenon lon len. Mpokat pakinniꞌret non lon elli ncinomun akka oron thaththokat aththut.”
Ngre ngoKanang ikupupure
5“Anaruk inenni mpaik paine okkwi ipothïothin, ana manna pul pella nti ianon ipipittothin itti, ‘Ngkwaik paeo kereni?’ 6Onon thakorronno oka thoporot noka akka mperenet non lon elli. 7Anaruk mpaik perenenon lon ilaik ïcat, loporot nanon itti mpaeo akka amma mpakorronno eo okkwi ipittarot non pakorronno anthan. Anaruk amma mpeot ana mpathothïnthet non ngok. 8Amma kwaat, kwangkene ul wonocapu lon lolon ilokithak ana ongkenekin itti okin thaka thoporot tat tokït koKapik ana ongkenekin lon lothakkma thoKapik. 9Kwakenekin lon lothokithaka then akka okin thakorronno occokot lon lin nomïkït. 10Ana kwakenekin lon lothoka thoporot then tokït koKapik akka mpaik paine ongappa nanon okorronno appimman. 11Ana kwakenekin lon lothakkma thoKapik akka Kapik kakkmat pul pothopulut ntit ili wonocapu.
12Mponu lon lanerenenon loppot inenni anaruk lalkot non. 13Anaruk amma Kanang kolon ilaik ïcat anthan, kwangwot non ilon iloporot appik. Anaruk kere lon tulluk ila koccïkothe ana kerenenon lon ilaik lathanthan. 14Kanang ken ikupupure kananin thrïk akka kaneko lon ila mponu itti mpiꞌret non akokenenon. 15Aꞌrupu wongappa appik ien win, ilen akka mpiꞌrenet itti Kanang ikupupure kaneko nnolon lin akokenenon.”
Thoccokot thiak thaprttako thopira noka
16“Papotteik onon thakinnimman ana papotteik onon thimman.”
17Aul iammakothok wꞌrek ikkat cik aerettarne itti, “Ngintha akkonu itti, ‘Papotteik onon thakorronno appimman ana papotteik onon thappimman,’ ana ngintha akka akwiꞌrene itti, ‘Akka mpaik paine ongappa pin’?” 18Okin thoꞌrungkwathe nan akin ipitto itti, “Ngintha akkonu itti, ‘papotteik’? Oron thomma lon ila kwaik pere.”
19OIeccuo pinat nan itti okin thongothe itti okin thipittothok lon len, akwiꞌrekat kin itti, “Onon thaik thipittarot lon ila mpiꞌret itti, ‘Papotteik onon thakorronno imman ana papotteik onon thappimmani’? 20Mpiꞌret non lon ilaik ïcat itti onon thangkꞌriko ana oo anaruk aul wonocapu ncik appik occiro ana opira noka. Onon thipo thiak anaruk thiak thon thaprttakoik ana thathakka thopira noka. 21Ka kakꞌrello pul ipopari amma apokwono ana ka kakꞌrellok akka caꞌri cung caat itti kwakwono anaruk amma ukul wokwontat kure nothokꞌrellako akka kwopirat noka nokkul itti wokwontathe nocapu appik. 22Ittina inenni caꞌri cothoccokot thiak con enci, anaruk mpappimma non ana onon thapira noka ana pul pella panekot non thopira noka thon. 23Caꞌri cen onon thakorronno appipittothin papꞌrek aththik. Mpiꞌret non lon ilaik ïcat itti ongappa pethet non aꞌrupu appik ia annipitto ngkꞌran kin. 24Ana manna inenni onon thakorronno ipitto lon lꞌrek ngkꞌran kin aththik. Nipitto ana onon thacco ana thopira noka thaka thoporot kirrkkir.
25Mpokat anere nthokkwie lon kuru ncik ana caꞌri canthan ica anokorronno erenenon nthokkwie lon kuru ncik anaruk mperenenon lon longappa nci nokkït. 26Caꞌri cen, onon thipitto lon ngkꞌran kin. Mpaik pakorronno iꞌre itti mpipittinthet non ongappa nti ianon. 27Aa, ongappa ngka kung pongothenon akka onon thongothin ana onon thoccokothe lon nomïkït itti mpaat noKapik. 28Mpaat nangappa anao nocapu appik ana inenni mpaik paththe nocapu appik anopakkinthet ongappa.”
29Ittina aul woIeccuo iammakothok iꞌrekat itti, “Inenni ngkwaik pere lon nci nokkït, ngkwaik pakorronno ere okkwie lon kuru ncik. 30Ittina onïn thimmat itti ngkwina lon appik ana lakorronnoka manna itti ngkwipittakot lon lꞌrek, elli lakorronnonïn, anïn occokot lon nomïkït itti ngkwaat noKapik.”
31AIeccuo iꞌrekat itti, “Onon thantroccokot lon loKapik nomïkït mon ocothot pꞌrïn. 32Anaruk caꞌri caik cao ana caat manna amma anon opettakot cik ikaman kon kurekkurek, onon thaththe naun pellek, anaruk mpakorronno oka pellek, ongappa paik naun. 33Mpiꞌrethenon lon elli itti annapot mïkït cik. Onon thaccokiettat thiak cene nocapu ncik appik anaruk nopoꞌrathan, akka mpalkothe lon lonocapu appik.”
Currently Selected:
Iuanna 16: Lumun
Highlight
Share
Copy
Want to have your highlights saved across all your devices? Sign up or sign in
´© (Active), Wycliffe Bible Translators, Inc. All rights reserved
