लूका 24

येसु सिउनी सैंसिद ओसोव

(मत्ती २८:१-१०; मर्कूस १६:१-११; यूहन्‍ना २०:१-१०)

1सातालाव उस॰कताव छ्याम, नो मेंमार छकाल्‍न्‍या घग ज़ सोद नो सरजाम याजैव अतररास येसुए ओखादरदा बाकेर। 2नक याकेसोत नो खादरलाई कसिउ घ्योःव लुँ पल्‍तैसिउ रँःकेर। 3नल यापसिक प्रभु येसुए ओमोरो मादैकेर। 4‘आव कै ओताव’ लिद यायुँ आँचा पाँचा ओताज़्‍याक ऩेब्‍लो बनै तक तकौ क्‍वा क्‍वाइसिउनी उमँःजानी याङ़ाक निच्‍याँःसिहुव यारारँःकेर। 5यारारँःव प़ाइँना बनै छे·द नामक याफुलुप्‍सिक, नो चाकर्‍यानी है यारादोकिनी, “जे जींदोलाई सिउराए पोल काराव जेखिम्‍हुज़्‍याव? 6नो आल माले, सैंसिद सोधुके। जेस गालीलल उलिज़्‍याकाव है ओदाचिउ पाँर य़ाका दोच्‍यो। 7‘ङा मिँ मिन्‍सिउ पापीराए कुइत सूँपिनारिज़्‍यार। नोराए क्रुसत तङ्गैद यासैःनाव स़ोंलात ङासैंसिरिज़्‍या,’ है ओदाचिउ सैं माःक?” है निरादोक ते, 8नो मेंमाराए नो पाँ चेतैद, 9खादरनी ओल्‍द बाद एघार जना उसिसर स़ोनो ओलस बाऱिज़्‍याव छुतरालाई ब नो पाँ भरी है यारादोनाकेर। 10नो पाँ सथैज़्‍याव मेंमार तोबो मरियम मग्‍दलिनी, तोबो योअन्‍ना स़ोनो तोबो याकूबए ओआमा मरियम याल्‍यो। यास बाव छुत मेंमाराए ब येसुए ओसाचीरालाई है यारादोज़्‍याव। 11नोराए नो पाँ याथैक ओअर्थ माल्‍यो मिताव थ·रैद मारापतिकेर। 12पत्रुस ते थर च्‍याँःसिद खादरदा धोंःनाद, खादरल घोम लिद उचिऊक येसुलाई लुम्‍बैसिउ क्‍वार वाज़ रँःक्‍यो। नलाव ताव भरी उयुँल खामिद ओल्‍द बाके।

इम्‍माउसदा बान्‍या येमक येसु ओसरैंःसिउ

(मर्कूस १६:१२-१३)

13हो छ्याम ज़ फरी ऩेब्‍लो ओलस बाऱिज़्‍यावनी यरूसलेमनी एघार किलोमितरवा तादाङ लिज़्‍याव इम्‍माउस यादोज़्‍याव नाखारदा निबाज़्‍याव। 14निबाज़्‍याक ताव पाँ भरी नी नील निपाँनाज़्‍याव। 15नोनी पाँए पाँए निबाज़्‍याक येसु कातानी हुद नीस नीस ज़ बाके। 16येसुए नोनिलाई ओललाई मासरेस्‍न्‍या जैद उनिनैज़्‍याव। 17हाःत ज़ येसुए, “जिन काता जिन्‍पाँहुज़्‍याव?” है उनिदोक ते, नोनी च्‍याँःसिद निङाः चुम चुमो जैद, 18क्‍लेओपास यादोज़्‍यावए, “यरूसलेमल बाव भरिरानी नलाव आछिम पराःती ताव पाँ मासैंज़्‍याव नँ वाज़ नलिज़्‍याव सा,” है ओदोक ते, 19येसुए, “यरूसलेमल किताव पाँ ओताव?” है उनिदोक ते, नोनी, “नासरतलाव येसु यादोज़्‍याव तोबो मिँ ओल्‍यो। नो अगमबक्ता ओतावए परमेस्‍वर स़ोनो मिँराए ङ़ाक सक्तीलाव य़ेन दाद चावस ओरापैज़्याव। 20नोलाई मुख्‍या पुजारीर स़ोनो गेघेप्‍पाराए सिन्‍या सजाल सूँपिद क्रुसत तङ्गैद सैःकेर। 21गे ते इस्राएलीरालाई बाँचैना हुव ज़ ताखेहो है ची गेल्‍यो। नो पाँर ओताव आख ते स़ोंला ताधुके। 22हैदी ब गेसकाव ख्‍वा ख्‍वा मेंमाराए अचम्‍बलाव पाँ ज़ है दासिकेर। नोर आछ्या छकाल्‍न्‍या घग ज़ येसुए ओखादरक याबाक, 23येसुए ओमोरो खादरल ओमालिज़्‍याव दी। नक परमेस्‍वरए ओचाकर्‍यानिलाई ब यारारँःकेर दी। नोनी फरी ‘येसु जींदो ज़ लिज़्‍या’ है ब यारादोकिनी दी। 24है जैद गेसकाव तोबो ऩेब्‍लोए नो खादरक याबाक नो मेंमाराए है यालिज़्‍याव मिताव ज़ ताके। खाली येसुलाई ते मारँःकेर,” है दोकिनी।

25हाःत ज़ येसुए, “जे अधमर, अगमबक्ताराए यासरो पाँ खर्क जेतीधुरिज़्‍याव? 26नल, ‘ख्रीसए दुखर सहिद वाज़ बल्‍ल ज़गै मगैव ओराज्‍या दैरिज़्‍याव’ लिन्‍या सर्सिउ लिज़्‍या,” है दाद, 27मोसाए ओसरोकिन अगमबक्ताराए यासरो पैकाव ओल उजूँनी धर्मसास्‍त्रलाव सर्सिउ पाँर पलास्‍द निएक्‍यो।

28हाःत ज़ नो नाखार याकेस्‍हुवत येसु नोनिकिन जाँ ङ़ादा बाव ओपैंज़्‍याव मिताव ओजैसिक, 29नोनी घलैद है दोकिनी, “नम झ्यानाके। आछिम गिनस ज़ लिन्‍के,” है निदोक ते, भैंःद नीस ज़ बाके। 30नोनिस ज़्‍यान्‍याए जूँनी च़ुसिद, भरेस उकुइत रैद, असिक ऩिद, केःद निएक्‍यो। 31उनियो प़ाइँना ज़ ‘आव ते येसु ची ओल्‍यो’ लिद सरेस्‍किनी। हाःत ज़ येसु ब नक ज़ सम़ैसिके। 32नोनी फरी नी नील है लिकिनी, “येसु गिनस ज़ ओल्‍योए ची ओल्‍यो, नो येमत गिन्‍हुज़्‍याकाव धर्मसास्‍त्रलाव पाँर पलास्‍द ओयासिन्‍क गिनयुँर हाः होलाँ ओताव,” है लिद, 33हतप्‍त ज़ च्‍याँःसिद यरूसलेमदा ओल्‍द बाद एघार जना उसिसर छुत यानैंरास दुप्‍सिद यालिज़्‍याव निरादैनाक, 34नोनी निपाँ निमापाँद ज़ नोराए, “साचो ज़ ओल्‍यो, गेप्रभु जींदो ज़ उलिज़्‍याव ओल्‍यो। सिमोनए ओङ़ाक ब सरैंःसिके,” है यारादोकेर। 35फरी नोनी ब नो येमताव पाँ भरी है दाद, “भरेस केःद ओभाःव प़ाइँना ज़ गिन्‍सरेस्‍के,” है यारादोकिनी।

येसु उसिसराए ङ़ाक ओसरैंःसिउ

(मत्ती २८:१६-२०; मर्कूस १६:१४-१८; यूहन्‍ना २०:१९-२३; ओसाचीर १:४-८)

36निताव यापाँज़्‍यावत ज़ येसु उमँःजानी ज़ याखार्ल च्‍याँःसिहुद नोरालाई, “जेयुँर होलाँ ओताक,” है यादोक्‍यो। 37नो यारँःव प़ाइँना तखँङरी छे·द, ‘आव ते झ़्या ची सा’ है लिद बनै याछे·ज़्‍याक, 38येसुए, “जे कै जैद ‘हो ज़’ लिद जेयुँ माहुप्‍द जेछ्याचेए जेयुँर भुतु भुतु जेजैज़्‍याव? 39आव ते ङा ज़ ची, ङाखँ ङाकुइताव घाइर चिऊद सरेस्‍नाचिके। जे है जेलिज़्‍याव मिताव झ़्या ङाताकिन ते ङास्‍या ङाऱूसर मालिखेहो। जेयुँ ओमाहुप्‍किन छाप्‍नाचिके,” 40है दाद उखँ उकुइर सतैंद याएक्‍यो। 41निताव रँःद बनै अचम्ब ताद यारेंतए, ‘आव गेमँच्‍यानी गेरँःज़्‍याव सैं साचो गेरँःज़्‍याव ओताव’ है यालिज़्‍याक, येसुए, “जेस ज़्‍यान्‍यार मालिज़्‍या?” है ओरादोक ते, 42हिप्‍सिउ ङाँः तगेंदा याएक ते, 43प़ाइँए याङ़ाक ज़ कैक्‍यो।

44नकिन येसुए, “ङा जेस ङालिज़्‍याकाव मोसाए ओकानुनल, अगमबक्ताराए यासरोल स़ोनो भजन पोस्‍तोकोल ब ङा ङाजूँनी सर्सिउ भरी जुनी ब ङाक्‍याँत यो·व ज़ परिके लिद है दाव ज़ ङानैचिज़्‍याव,” है दाद, 45धर्मसास्‍त्रलाव सर्सिउ पाँए ओअर्थ भरी पलास्‍द्याद, 46“धर्मसास्‍त्रल ब ‘ख्रीस दुखर सहिद उसिउ स़ोंलात सैंसिरिज़्‍या’ लिद सर्सिउ लिज़्‍या। 47स़ोनो यरूसलेमनी सुरू जैद प़ाइँ जातलाव मिँराए ल्‍योङ बाद, ‘जेयुँ परमेस्‍वरए ल्‍योदा फर्कैचिकेदा, जेपाप भरी ख्रीसए उमिननी क्‍याल्‍सिरिज़्‍या,’ है लिद प़ाइँदा ज़ यारासथैनाचिके। 48जे आव पाँत ङासाचीर ताद जेले। 49है जैद ङा ङाबाबुए ओय़ाकालाव छैंव पुरूस परींद ङायाचिरिज़्‍या। खाली जे नोए ल्‍योनिकाव सक्तीर जेमादैवा पै यरूसलेमल ज़ लिच्‍यो,” है यादोक्‍यो।

येसु स्‍वर्गत ओबाव

(मर्कूस १६:१९-२०; ओसाचीर १:९-११)

50नकिन येसुए नोरालाई बेथानिया नाखारक पै ओलस ओलस ज़ लाँद उकुइर रा·द नोरालाई असिक याएक्‍यो। 51नो असिक ओराएज़्‍याक ज़ नोराए ल्‍योनी छींसिद स्‍वर्गदा बाके। 52नोराए उमिनर बनै सघ्‍योःद्याद रेंए रेंए यरूसलेमदा ओल्‍द बाद, 53दिनकाव ज़ ध्‍यान झ़िमल परमेस्‍वरए उमिन सघ्‍योःद्याव ज़ नैकेर।

Currently Selected:

लूका 24: NKham

Highlight

Copy