ᒐᓂᓯᔅ 25
25
ᑯᑎᑲ ᐃᔎᐛ ᑲ ᐎᒋᒪᑦ ᐊᑉᕋᐊᒻ
1ᐊᑉᕋᐊᒻ ᒋ ᐎᒋᒪᐤ ᑯᑎᑲ ᐃᔎᐛ ᑲᑐᕋ ᐊᓯᓂᐧᑲᓱᔨᒋ, 2ᐊᓱᑕᒡ ᒋ ᐃᑕᑎᓯᔪᐛ ᐅᑯᓱᐛᐛ ᓯᒻᕋᓐ, ᒍᒃᓴᓐ, ᒪᑕᓐ, ᒥᑎᐊᓐ, ᐃᔅᐸᒃ ᑭᔭ ᓱᐊ ᐊ ᐃᓯᓂᐧᑲᓱᔨᒋ᙮ 3ᒍᒃᓴᓐ ᐎᔾ ᒋ ᐅᑕᐎᒪᐤ ᓯᐸ ᑭᔭ ᑎᑕᓐ᙮ ᐊᓱ ᐃᔪᐛ, ᓚᑐᒻ ᐃᔪᐛ ᑭᔭ ᓚᐅᒻ ᐃᔪᐛ ᒋᑦ ᐊᓂᔅᑯᑕᐸᓄᐤ ᑎᑕᓐ᙮ 4ᒥᑎᐊᓐ ᒋ ᐅᑯᓱᐤ ᐊᑉᐸ, ᐊᑉᐳ, ᐊᓇᒃ, ᐊᐱᑕ ᑭᔭ ᐊᓪᑕ᙮ ᑲᑐᕋ ᐅᔭ ᒥᓯᐛ ᐅᑦ ᐊᓂᔅᑯᑕᐸᓇ᙮
5ᐊᑉᕋᐊᒻ ᒥᓯᐛ ᐅᑎᐱᔨᐛᐅᓯᐅᓐ ᒋ ᓂᑭᑎᒧᐛᐤ ᐅᑯᓴ ᐊᐃᓯᑲ᙮ 6ᒥᒄ ᐊᔅᒄ ᐊᒋ ᐱᒪᑎᓯᑦ, ᒋ ᒥᔭᐤ ᒥᔨᐛᐅᓇ ᐊᓂᔭ ᐅᑯᓯᔪᐛ ᑯᑎᑲ ᐃᔎᐛ ᑲ ᐎᔪᑦ ᑭᔭ ᒋ ᐃᑎᓴᐛᐤ ᐊᓐᑕ ᐛᐱᓄᑕᒡ ᐊᔅᒋᒡ ᐃᑕᒐ, ᓇᒪ ᐅᒋ ᓂᑐᐛᔨᒪᐤ ᒐᒋ ᐎᒋᔨᒋ ᐊᓐᑕ ᐸᐃᑯᑕᐤ ᐃᑕᐅᓂᒡ ᒧᔭᒻ ᐅᑯᓴ ᐊᐃᓯᑲ᙮
ᑲ ᐳᓂᐱᒪᑎᓯᑦ ᐊᑉᕋᐊᒻ
7-8ᐊᑉᕋᐊᒻ ᒋ ᐳᓂᐱᒪᑎᓯᐤ ᐸᐃᑯ ᒥᑕᓯᒥᑎᓄᐤ ᐊᓱ ᓂᔄᐅᑕᑕᑐᔪᐤ ᐊᓱ ᐱᑕᑕᒡ ᑲ ᐃᑕᑐᐳᓇᓯᑦ᙮ 9ᒋ ᓇᐃᐧᑯᐛᐤ ᐅᑯᓴ ᐊᐃᓯᑲ ᑭᔭ ᐃᔅᒪᐃᓚ ᐊᓐᑕ ᒪᒃᐱᓚ ᐛᑎᑯᒡ᙮ ᐛᐱᓄᑕᒡ ᒪᒻᕋ ᓂᑕᐅᒋᑕᑭᓂᒡ ᐃᑉᕋᓇ ᑲᒋ ᑎᐸᔨᑎᒥᔨᒋ, ᓱᐊᕐ ᐊᑦ ᐃᔪᐛ ᐅᑯᓯᔪᐛ᙮ 10ᐊᐅᑯᔪᐤ ᐊᓂᔭ ᓂᑕᐅᒋᑕᑭᓂᔪᐤ ᐊᑉᕋᐊᒻ ᐊᑦ ᐃᔪᐛ ᑲ ᐅᒋ ᐃᔭᑦ, ᑕᐱᔅᑯᓐ ᐊᑉᕋᐊᒻ ᑭᔭ ᐎᐛ ᓴᕋᔨᒋ ᐊᑯᑕ ᑲ ᓇᐃᐧᑯᐛᑭᓄᐅᒡ᙮ 11ᑲᒋ ᐳᓂᐱᒪᑎᓯᑦ ᐊᑉᕋᐊᒻ, ᒋᓴᒪᓂᑐᐤ ᒋ ᓱᐛᔨᑕᑯᐃᒪᐤ ᐅᑯᓯᔪᐛ ᐊᐃᓯᑲ, ᒥᒋᒪ ᐱᕐ-ᓚᐊᐃ-ᕈᐃ ᑲ ᐎᒋᔨᒋ᙮
ᑲ ᓂᓱᓴᐳᔨᒋ ᐃᔅᒪᐃᓪ ᐅᑯᓴ
12ᐊᐅᑯᐤ ᐊ ᐃᓯ ᑎᐸᒋᒪᑭᓄᐅᑦ ᐃᔅᒪᐃᓪ, ᐊᑉᕋᐊᒻ ᐅᑯᓴ ᐅᑦ ᐊᓂᔅᑯᑕᐸᓇ᙮ ᐦᐊᐃᑲᕋ ᒋ ᐅᑲᐎᔪᐤ, ᐃᒋᑉᑦ ᐊᐱᒋᐊᑭᓂᔎᐛ ᓴᕋ ᑲ ᒥᔭᑦ ᐊᑉᕋᐊᒪ ᒧᔭᒻ ᐎᐛ᙮
13ᐊᐅᑯᐤ ᐊᓯᓂᐧᑲᑕᑭᓄᔨᒋ ᐃᔅᒪᐃᓪ ᐅᑯᓴ, ᐊᓯᐎᔭᑭᓄᔨᒋ ᑲ ᐃᓯ ᐃᔪᔨᒋ᙮ ᓂᔅᑎᒧᓴᓐ ᓇᐸᐃᐅᑦ, ᒂ ᑕᒡ ᑲᑕᕐ, ᐊᑦᐱᐃᓪ, ᒥᑉᓴᒻ, 14-15ᒥᔅᒪ, ᑐᒪ, ᒪᓴ, ᐊᑕᕐ, ᑕᒪ, ᒐᑐᕐ, ᓇᐱᔅ ᑭᔭ ᑲᑎᒪ᙮ 16ᐊᐅᑯᓂ ᐅᔭ ᑲ ᐃᓯᓂᐧᑲᑕᑭᓄᔨᒋ ᑲ ᓂᓱᓴᐳᔨᒋ ᐅᑯᓴ ᐃᔅᒪᐃᓪ᙮ ᒂ ᓂᑲᓂᔅᑯᐛᒡ ᓂᓱᓴᑉ ᑲ ᐃᑎᔅᑲᓇᓯᔨᒋ ᐃᔪᐛ, ᐊ ᐎᒋᒡ ᐊᓐᑕ ᑎᐸᓐ ᐅᑦ ᐃᑕᐅᓄᐛᒡ ᑭᔭ ᐊ ᐃᓯᓂᐧᑲᑕᑭᓄᔨᒋ ᐅᑦ ᐊᓂᔅᑯᑕᐸᓄᐛᐛ ᒋ ᐃᓯ ᐎᔅᒍᑎᒧᒡ ᐃᑎᑕᐅᓄᐛᐛ᙮ 17ᐸᐃᑯ ᒥᑕᓯᒥᑎᓄᐤ ᐊᓱ ᓂᔅᑐᔪᐤ ᐊᓱ ᓂᔄᐅᑕᒡ ᒋ ᐃᑕᑐᐳᓇᓱᐤ ᑲ ᐳᓂᐱᒪᑎᓯᑦ ᐃᔅᒪᐃᓪ᙮ 18ᑎᔅᑐᐎᒡ ᐊᐱᓚ ᑭᔭ ᓱᕐ ᐊᔅᒋᒡ ᒋ ᐎᒋᔨᐛ ᐅᑦ ᐊᓂᔅᑯᑕᐸᓇ ᐃᔅᒪᐃᓪ, ᐛᐱᓄᑕᒡ ᐃᒋᑉᑎᒡ ᐊᓯᕆᔭ ᐊᑎᒧᐃᒡ ᐱᒧᑕᔅᑭᓇᔪᐤ᙮ ᐦᐊᐃᑲᕐ ᐎᐧᑲᓂᓱᐛᐛ ᐊ ᑕᔨᒋ ᒋ ᐎᒍᐅᒡ᙮
ᒐᑭᑉ ᑭᔭ ᐃᓴᐅ ᑲ ᐃᔪᐅᒡ
Genesis 25.19-34 (Proper-10 Year A)
19ᐊᐅᑯᐤ ᐊ ᐃᓯ ᑎᐸᒋᒪᑭᓄᐅᑦ ᐊᐃᓯᒃ, ᐊᑉᕋᐊᒻ ᐅᑯᓴ ᐅᑦ ᐊᓂᔅᑯᑕᐸᓇ᙮
20ᒋ ᓇᐎᔪᐛᐳᓇᓱᐤ ᐊᐃᓯᒃ ᑲ ᐎᒋᒪᑦ ᕋᐸᑲᔨᒋ, ᐸᑎᐅᓪ ᐅᑕᓂᓯᔪᐛ (ᐊᕋᒻ ᐃᔪᐤ ᒪᓴᐳᑕᒥᔭᒡ ᐅᒋ) ᑭᔭ ᓚᐸᓐ ᐅᓯᒪ᙮
21ᐛᔅ ᐊᑲ ᐅᒋ ᐅᑦ ᐊᐛᓯᒥᑦ ᕋᐸᑲ, ᐊᐃᓯᒃ ᒋ ᓂᑐᑎᒧᐛᐤ ᑎᐸᔨᒋᒐᓱᐛ ᐅᔭ ᐅᒋ, ᒋ ᒥᔭᐤ ᑎᐸᔨᒋᒐᓱᐤ ᑲ ᐃᓯ ᓂᑐᐛᔨᑎᒪᑯᑦ ᐊᐃᓯᑲ ᑭᔭ ᒂ ᐊᓱᐛᐱᒪᐅᓱᑦ ᕋᐸᑲ᙮
22ᓂᓱ ᐊᐛᓴ ᒋ ᒪᑕᔨᒪᐤ ᕋᐸᑲ᙮ ᒧᔭᒻ ᐊ ᒪᓯᐧᑲᑐᐎᒋ ᒋ ᐃᑎᒪᒐᐊᐤ ᑭᔭ ᒂ ᐃᔅᒋᔄᑦ, “ᒐᒂᓐ ᐅ ᓂᔾ ᐛᒋ ᐃᓯᓇᑯᓯᔭᓐ ?” ᐊᑯ ᑲ ᑯᒂᒋᒪᑦ ᑎᐸᔨᒋᒐᓱᐛ ᒐᒂᓂᔪᐤ ᐊᑎᑦ᙮
23ᑎᐸᔨᒋᒐᓱᐛ ᒋ ᐃᑎᑯᐤ,
“ᐃᔅᐱ ᓂᑕᐅᒋᑥᐛ ᐊᓐᒡ ᐊ ᓂᓯᒡ ᒋᑯᓯᒡ ᒐᔅᑯᐅᑥᐤ,
ᐊᐛᓯᐅᑦ ᒋᑭ ᑎᐸᔨᒪᐤ ᒐᓴᐃᔪᔨᒋ᙮
ᐊ ᓂᓯᒡ ᓇᐸᓯᒡ ᒋᑭ ᓂᑕᐅᒍᐅᒡ ᑭᔭ ᒋᑭ ᐅᑦ ᐊᐛᓯᒧᐅᒡ ᑭᔭ ᐅᑦ ᐊᓂᔅᑯᑕᐸᓄᐛᐛ ᒋᑭ ᓂᓱᔅᑲᓇᓯᔪᐛ ᐊ ᐊᑐᐛᔨᒥᑐᔨᒋ᙮
ᐊᐛᓯᐅᑦ ᐅᑦ ᐊᓂᔅᑯᑕᐸᓇ ᒋᑭ ᓴᐱᔨᐛ ᐃᔅᐱᔅ ᐊ ᒋᓴᐃᔪᑦ ᐅᑦ ᐊᓂᔅᑯᑕᐸᓇ᙮ ᐊᐅᑯᐤ ᐊᑥᒥᑲᒡ ᐅ ᐃᔅᐱ ᒧᓯᔨᑥᐎ ᐊᔭᒋᓂᑐᒡ ᓇᐸᓯᒡ᙮”
24ᒂ ᐅᑎᒋᐱᔨᒡ ᒐᒋ ᐛᐱᒪᐅᓱᑦ ᕋᐸᑲ ᑭᔭ ᒧᔭᒻ ᑲ ᐃᔅᒋᔄᑦ ᑎᐸᔨᒋᒐᓱᐤ, ᑲ ᓂᓯᓯᔨᒋ ᒋ ᑭᓄᐛᔨᒪᐤ, 25ᐅᔅᑭᒡ ᐊ ᐃᔪᑦ ᒋ ᒥᑯᓯᓱᐤ ᑭᔭ ᒥᓯᐛ ᐎᔭᒡ ᑲ ᐅᐱᐛᐅᓱᐛ ᒋ ᐃᓯᓇᑯᓯᐤ, ᐃᓴᐅ ᒋ ᐃᓯᓂᐧᑲᑕᐅᒡ᙮ 26ᑯᑎᒡ ᒋ ᐃᔪᐤ ᐊᓱᒋᒪᒋᑭᓂᒺᑦ ᐅᑐᑎᓂᔪᐤ ᐃᓴᐅᐛ, ᐊᑯ ᒐᑭᑉ ᒂ ᐃᓯᓂᐧᑲᑕᑭᓄᐅᑦ᙮ ᐊᐃᓯᒃ ᐊᓱᑕᒡ ᑕᑐᔪᐤ ᒋ ᐃᑕᑐᐳᓇᓱᐤ ᐃᔅᐱ ᑲ ᐃᔪᐎᔨᒋ ᑲ ᓂᓯᓯᔨᒋ᙮
ᐃᓴᐅ ᑲ ᑕᐛᒐᑦ ᐅᓂᔅᑎᒧᓴᓇᐅᓐ
27ᐃᔅᐱ ᑲᒋ ᓂᑕᐅᒋᒡ ᓇᐸᓯᒡ, ᐃᓴᐅ ᒋ ᓄᒋᒥᐅ-ᐃᔪᐤ, ᓇᐸᐤ ᑲ ᒥᔽᔨᑕᐧᒃ ᐎᐎᑎᒥᒡ ᐊ ᑕᑦ᙮ ᒥᒄ ᒐᑭᑉ ᐃᔭᒡ ᒋ ᐃᑕᔨᑕᑯᓱᐤ, ᒋ ᒋᔭᒪᐛᔨᑕᑯᓱᐤ ᒥᒋᒪ ᐊ ᑕᑦ ᐊ ᐎᒋᒡ᙮ 28ᐊᐃᓯᒃ ᒋ ᓴᒋᐊᐤ ᐃᓴᐅᐛ, ᐛᔅ ᒋ ᐸᑥᑯᐤ ᓄᒋᒥᐅ-ᒥᒋᒥᔪᐤ ᒐ ᒥᒋᑦ, ᐊᑯ ᕋᐸᑲ ᒐᑭᐸ ᒋ ᓴᒋᐊᐤ᙮
29ᐸᐃᒂᐤ ᒐᓯᑲᔨᒡ ᒪᒂᒡ ᒐᑭᑉ ᑲ ᓱᐸᐳᒐᑦ, ᒋ ᑎᑯᓯᓐ ᐃᓴᐅ ᑲᒋ ᓂᑐᐅᑦ ᐊᔭᔅᑯᓯᑦ ᑭᔭ ᐊ ᓯᐛᔨᑦ, 30ᒪᒃ ᒂ ᐃᑕᑦ ᒐᑭᐸ, “ᐸᒋᓯᒥ ᐱᔅᒐ ᐊᓐ ᑲᒥᒂᑭᒧᐛ ᓱᐸᐳᔾ ᐛᔅ ᒋᒋᐛ ᓂ ᓯᐛᔨᓐ᙮” (ᐊᐅᑯᓐ ᑲ ᐅᒋ ᐃᓯᓂᐧᑲᑕᑭᓄᐅᑦ ᐃᑕᒻ᙮)
31ᒐᑭᑉ ᐃᑕᐤ, “ᓂᔅᑎᒻ, ᐸᒋ ᒥᔾ ᒋᓂᔅᑎᒧᓴᓇᐅ-ᑎᐸᔨᑎᒧᐅᓐ᙮”
32ᐃᓴᐅ ᐃᑕᐤ, “ᐊᐅᑯᓐ ᒧᔭᒻ, ᓇᒪ ᓂᑭ ᒋ ᐎᒋᐃᑯᓐ ᓂᑎᐸᔨᑎᒧᐅᓇ ᐊ ᓂᔅᑎᒧᓴᓇᐅᔭᓐ ᐳᓂᐱᒪᑎᓯᔭᓇ ᐊ ᓄᑕᐱᐃᔭᓐ ᒥᒋᒻ᙮”
33ᒪᒃ ᒐᑭᑉ ᐃᑕᐤ, “ᓂᔅᑎᒻ ᐊᓱᑎᒪᒐ ᐊᓐ ᒐ ᒥᔨᓐ ᒋᑎᐸᔨᑎᒧᐅᓇ᙮” ᒋ ᐊᓱᑎᒪᒐᐤ ᐃᓴᐅ ᑭᔭ ᒋ ᐱᔅᑎᓂᒧᐛᐤ ᒐᑭᐸ ᐅᑎᐸᔨᑎᒧᐅᓇ᙮
34ᐊᑯ ᒐᑭᑉ ᒂ ᒥᔭᑦ ᐃᓴᐅᐛ ᐸᒂᓯᑭᓇ ᑭᔭ ᓱᐸᐳᔪᐤ᙮ ᐃᓴᐅ ᓇᒪ ᐅᒋ ᐃᔅᐱᑕᔨᑎᒻ ᐅᑎᐸᔨᑎᒧᐅᓇ ᐊ ᓂᔅᑎᒧᓴᓇᐅᑦ᙮ ᐱᓯᒄ ᐸᒂᓯᑭᓇ ᒋ ᒧᐛᐤ ᑭᔭ ᓱᐸᐳᔪᐤ ᒋ ᒥᓇᑎᒻ ᑭᔭ ᒂ ᐊᑎ ᔅᑐᑕᑦ᙮
Currently Selected:
ᒐᓂᓯᔅ 25: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
