ᓗᒃ 1
1
ᐊ ᒋᒋᐱᔨᑕᑭᓄᐅᒡ
1ᒋᔾ ᑎᔪᐱᓚᔅ, ᒋᑭ ᐊᔨᒧᑎᒪᑎᓐ ᐊᓐ ᒥᔽᒋᒧᐅᓐ ᑕᓐ ᑲ ᐃᓯ ᐱᒪᑎᓯᑦ ᒋᓴᔅ ᐅᑕ ᐊᔅᒋᒡ ᒪᒂᒡ ᐊ ᑕᔭᒡ ᑲ ᑕᑦ᙮ ᒥᒐᑦ ᐊᐛᓐᒋ ᒋ ᑯᒋᑕᐅᒡ ᒐᒋ ᒥᓯᓇᐊᒡ ᐊᓂᔭ ᑕᓐ ᑲ ᐃᓯ ᐱᒪᑎᓯᔨᒋ ᒋᓴᓴ᙮ 2ᐊᔪᐅᒄ ᐅᔭ ᑲ ᐃᓯ ᐎᑎᒧᐎᒥᒡ ᐊᓐᒡ ᐊᐛᓐᒋ ᓂᔅᑎᒻ ᑲ ᐛᐱᒪᒡ ᑭᔭ ᑲ ᐸᑐᐛᒡ ᒋᓴᓴ᙮ ᐊᐅᑯᓐᒡ ᐊᓐᒡ ᑲ ᐎᑕᒡ ᒥᔽᒋᒧᐅᓂᔪᐤ᙮ 3ᐊᑯ ᒪᒃ ᓇᔅᒡ ᐃᔭᒂ ᑲ ᓂᑐ ᑭᒐᔅᒐᔨᑎᒪᓐ ᐅᔭ ᒥᓯᐛ ᒐᒂᔪᐤ ᑕᓐ ᐊᓐ ᑲ ᐊᑎ ᐃᔅᐱᔨᒋ ᐅᔅᑭᒡ ᒐᒋᐱᔨᒋ᙮ ᐊᑯ ᒪᒃ ᑲ ᐃᑕᔨᑎᒥᐃᑯᔭᓐ ᒐ ᒥᔽᒂ ᑭᔭ ᓂᔾ ᒐᒋ ᒥᓯᓇᐊᒪᓐ ᐊ ᐎᑎᒪᑕᓐ ᒥᓯᐛ ᑕᓐ ᐊᓐ ᑲ ᐊᑎ ᐃᔅᐱᔨᒡ ᑭᔭ ᒐᒋ ᐃᑎᓴᐊᒪᑕᓐ ᓂᒥᓯᓇᐃᑭᓐ, ᒋᔾ ᑎᔪᐱᓚᔅ ᒪᐅᒡ ᒐᔅᑕᔨᑕᑯᓯᔨᓐ᙮ 4ᐅ ᒪᒃ ᓂ ᐃᑐᑕᓐ ᒐᒋ ᒋᔅᒐᔨᑎᒥᓐ ᐊ ᑕᑈᒥᑲᒡ ᑕᓐ ᑲ ᐃᓯ ᒋᔅᑯᑎᒪᑯᔨᓐ ᐊᓐᑕ ᐅᑕᒡ᙮
ᐃᔅᐱ ᒠᓐ ᐅᓯᑲᐃᑕᒐᐤ ᒐ ᐱᒪᑎᓯᑦ
5ᒪᒂᒡ ᐊᕈᑦ ᑲ ᒋᓴᐅᒋᒪᐅᑦ ᐊᓐᑕ ᒍᑎᔭ ᐊᔅᒋᒡ, ᒋ ᑕᐤ ᒍᐤ ᐊᔭᒥᐊᐅᒋᒪᐤ ᓴᑲᕋᔭ ᐊᒋ ᐃᓯᓂᐧᑲᓱᑦ᙮ ᐊᓂᔭ ᐊᐸᐃᒐ ᑲ ᐃᓯᓂᐧᑲᓱᔨᒋ ᐊᔭᒥᐊᐅᒋᒪᐛ ᐊ ᑕᔨᒋ ᐊᑯᑕ ᑲ ᐅᒋᑦ ᓴᑲᕋᔭ᙮ ᒋ ᐸᒋ ᒪᒥᔅᑯᒋᔅᑲᑐᐅᒡ ᐊᔭᒥᐊᐅ10 ᒋᒪᐅᒡ ᐊᓐᒡ ᐊᐸᐃᒐ ᐊ ᑕᔨᒋ ᑲ ᐅᒋᒡ᙮ ᐎᐛ ᒪᒃ ᐃᓕᓴᐸᑦ ᒋ ᐃᓯᓂᐧᑲᓱᔪᐛ᙮ ᐅ ᒪᒃ ᐃᓕᓴᐸᑦ ᐊᓐᑕ ᐊᕋᓐ ᑲ ᐃᓯᓂᐧᑲᓱᔨᒋ ᐊᔭᒥᐊᐅᒋᒪᐛ ᐊ ᑕᔨᒋ ᒋ ᐅᒋ ᐊᓂᔅᒐ ᐱᒪᑎᓯᐤ᙮ 6ᓴᑲᕋᔭ ᑭᔭ ᐃᓕᓴᐸᑦ ᒋ ᑯᐃᔅᑯᑕᑎᓯᐅᒡ᙮ ᓇᔅᒡ ᒋ ᓂᓇᐃᑎᒺᐅᒡ ᐅᑎᐸᔨᒋᒐᐛ ᐅᑭᒐᔅᒋᒧᐅᓂᔪᐛ ᑭᔭ ᐅᑦ ᐃᑎᓱᐛᐅᓂᔪᐛ᙮ ᑭᔭ ᓇᔅᒡ ᒋ ᓇᐊᔨᑎᒥᐊᐅᒡ ᒋᓴᒪᓂᑐᐛ ᐊᓂᔭ ᑕᓐ ᑲ ᐃᓯ ᐱᒪᑎᓯᒡ᙮ 7ᓇᒪ ᒪᒃ ᐅᒋ ᐊᔭᐛᐅᒡ ᐊᐛᓴ ᐛᔅ ᐃᓕᓴᐸᑦ ᓇᒪ ᐅᒋ ᐊᔭᐛᐤ ᐊᐛᓴ, ᑭᔭ ᓴᔅ ᑕᐱᔅᑯᓐ ᒋ ᒋᓴᐃᔪᐅᒡ᙮
8ᐊᓐᒡ ᒪᒃ ᐊᔭᒥᐊᐅᒋᒪᐅᒡ ᒪᒥᔅᑯᒡ ᒋ ᐊᑐᔅᒐᐅᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮ ᐸᐃᒂᐤ ᒪᒃ ᒪᒂᒡ ᐊᓐᑕ ᐊᒋ ᐅᑎᒋᐱᔨᒡ ᐎᔾ ᓴᑲᕋᔭ ᒂᔅᒋᐱᓐ ᒐᒋ ᐊᑐᔅᒐᑦ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮ 9ᒋ ᐅᑎᓇᑭᓄᐤ ᒐᒋ ᓯᔅᑲᐊᒃ ᑲ ᐎᒋᒪᔅᑕᔨᒋ ᒐᒂᔪᐛ ᐊᓐᑕ ᑲᒋ ᒥᑐᔅᑕᐊᒪᓄᐎᒡ, ᐛᔅ ᐊᐅᑯᓐ ᑲᒋ ᐃᓯ ᓂᓇᑭᑐᐛᔨᑕᒡ ᐊᔭᒥᐊᐅᒋᒪᐅᒡ᙮ ᐊᑯ ᒪᒃ ᒂ ᐱᒐᑦ ᐊᓐᑕ ᐅᑎᐸᔨᒋᒐᐛ ᐅᒋᓴᐊᔭᒥᐊᐅᒋᐛᐱᒡ ᒐᒋ ᓯᔅᑲᐊᒃ ᑲ ᐎᒋᒪᔅᑕᔨᒋ᙮ 10ᒪᒂᒡ ᒪᒃ ᐊᓐᑕ ᒋᓴᐊᔭᒥᐊᐅᒋᐛᐱᒡ ᐊ ᑕᑦ ᓴᑲᕋᔭ, ᐎᐎᑎᒥᒡ ᐊᓐᑕ ᒋ ᑕᐅᒡ ᐊᓐᒡ ᐃᔪᒡ ᐊ ᒪᒧᐤ ᐊᔭᒥᐊᒡ᙮
11ᓴᑲᕋᔭ ᒪᒃ ᒋ ᓄᑯᓯᔅᑕᑯᐤ ᐅᑎᐸᔨᒋᒐᐛ ᐅᑦ ᐊᓐᒋᓂᒥᔪᐛ, ᐊᓐᑕ ᐅᒥᔪᐅᓂᒡ ᐊᓐᑕ ᐊᓂᔭ ᐱᔅᑎᓂᒐᐅᓇᐱᔅᑯᒡ ᐊᓐᑕ ᑲᒋ ᐃᔎᓯᑭᓄᐎᒡ ᑲᐎᒋᒪᑯᓯᔨᒡ ᐊᑯᑕ ᑲ ᓂᐳᔨᒋ᙮ 12ᐃᔅᐱ ᒪᒃ ᓴᑲᕋᔭ ᐎᔭᐱᒪᑦ ᐊᓂᔭ ᐊᓐᒋᓇ ᒋ ᑯᔅᑯᐱᔪᐤ ᑭᔭ ᓇᔅᒡ ᒋ ᓴᒋᓱᐤ᙮ 13ᐊᑯ ᒂ ᐃᑎᑯᑦ ᐊᓂᔭ ᐊᓐᒋᓇ, “ᐊᑲᐎᔾ ᓴᒋᓯ, ᓴᑲᕋᔭ, ᐛᔅ ᔅᒋ ᐸᑕᒄ ᒋᓴᒪᓂᑐᐤ ᑕᓐ ᑲ ᐃᓯ ᓂᑐᑎᒧᐅᑦ᙮ ᒋᐅ ᐃᓕᓴᐸᑦ ᒋᑭ ᐊᔭᐛᐤ ᐊᐛᓴ, ᒋᑭ ᓇᐸᓯᐎᔪᐛ᙮ ᒠᓐ ᒪᒃ ᒋᑭ ᐃᓯᓂᐧᑲᑕᐤ ᐊᓐ ᐊᐛᔅ᙮ 14ᓇᔅᒡ ᒪᒃ ᒋᑭ ᒥᔽᔨᑕᓇᐛᐤ ᑭᔭ ᓇᔅᒡ ᒋᑭ ᓯᒋᔭᔨᑕᓇᐛᐤ᙮ ᒥᒐᑦ ᑭᔭ ᐊᐛᓐᒋ ᒋᑭ ᒥᔽᔨᑎᒧᒡ ᐃᔅᐱ ᐱᒪᑎᓯᔨᒐᓂ᙮ 15ᐅᑎᐸᔨᒋᒐᐛ ᒋ ᐅᑎᓂᑯᐤ ᐊᓐ ᐊᐛᔅ ᐛᔅ ᒋᔅᑕᔨᑕᑯᓂᔪᐤ ᑕᓐ ᐛ ᐃᑕᐱᒋᐃᑯᑦ᙮ ᓇᒪ ᓂᑕ ᒋᑭ ᐅᒋ ᒥᓄᐤ ᓱᒥᓇᐳᔪᐤ ᑭᔭ ᐃᔅᑯᑕᐛᐳᔪᐤ᙮ ᐛᔅ ᑲ ᐸᔭᒋᓯᔨᒋ ᐊᒐᒂ ᓇᔅᒡ ᒋᑭ ᐱᒥᐱᔨᐃᑯᐤ ᐊᑎ ᐊᔅᒄ ᒪᒂᒡ ᐅᑲᐎᔭ ᑭᓄᐛᔨᒥᑯᒐ ᐅᔅᐱᔭᔨᒡ᙮ 16ᒥᒐᑦ ᒪᒃ ᐃᔅᕋᐃᓪ ᐃᔪᐛ ᒋᑭ ᐃᑐᑐᐛᐤ ᒐᒋ ᒂᔅᑲᑎᓯᔨᒋ, ᑲᐤ ᒐᒋ ᓂᓇᐃᑐᐛᔨᒋ ᐅᑎᐸᔨᒋᒐᐛ, ᐅᒋᓴᒪᓂᑐᒥᔪᐛ᙮ 17ᒠᓐ ᒪᒃ ᒋᑭ ᓂᑲᓂᑎᓯᐛᑭᓄᐤ ᒐᒋ ᐎᒋᐊᑦ ᒋᓴᒪᓂᑐᐛ ᐅᑦ ᐃᔨᒥᔪᐛ ᒐᒋ ᐊᔭᔅᑯᐎᔨᒋ ᑎᑯᓯᓂᔨᒐ ᐅᑎᐸᔨᒋᒐᐛ᙮ ᒋᑭ ᐊᔭᐛᐤ ᐊᓂᔭ ᐊᒐᒂ ᑲ ᐱᒥᐱᔨᐃᑯᔨᒋ ᐊᓂᔭᐧᑲ ᐃᓚᐃᒐ ᑲ ᐃᓯᓂᐧᑲᓱᔨᒋ ᒋᓴᒪᓂᑐᐛ ᑲᒋ ᐊᔨᒥᔅᑎᒧᐛᔨᒋ ᑭᔭ ᐊᓂᔭ ᓱᐧᑲᑎᓯᐅᓂᔪᐤ ᑕᓐ ᑲ ᐃᓯ ᐊᔭᔨᒋ, ᐊᐅᑯᓐ ᑭᔭ ᐎᔾ ᒐ ᐃᓯ ᐊᔭᑦ᙮ ᒋᑭ ᐃᑐᑐᐛᐤ ᐅᑕᐎᒪᐛ ᑲ ᒥᒋᐱᔨᐃᑐᔨᒋ ᐅᑦ ᐊᐛᓯᒥᔪᐛ ᒥᓐ ᑲᐤ ᒐᒋ ᓴᒋᐃᑐᔨᒋ᙮ ᑭᔭ ᐊᓂᔭ ᐊᑲ ᑯᐃᔅᑯᑕᑎᓯᔨᒋ ᒋᑭ ᐃᑐᑐᐛᐤ ᒐᒋ ᐃᓯ ᑭᒐᑕᐛᔨᑎᒥᔨᒋ ᑕᐱᔅᑯᓐ ᐊᓂᔭ ᑲ ᑯᐃᔅᑯᑕᑎᓯᔨᒋ᙮ ᐊᔪᐅᒄ ᐅᔭ ᒐ ᐊᐃᑎᑦ ᒠᓐ ᒐᒋ ᐊᔭᔅᑯᐎᐊᑦ ᐊᐛᔪᐛ ᒐᒋ ᓂᒋᐊᔨᒋ ᐅᑎᐸᔨᒋᒐᐛ᙮” ᐊᐅᒄ ᒪᒃ ᐅᔭᔪᐤ ᑲ ᐃᓯ ᐎᑎᒪᑯᑦ ᓴᑲᕋᔭ ᐊᓂᔭᔪᐛ ᐊᓐᒋᓇ᙮
18ᓴᑲᕋᔭ ᒪᒃ ᒋ ᐃᑕᐤ ᐊᓂᔭ ᐊᓐᒋᓇ, “ᑕᓐᑕ ᒪᒃ ᒐᒋ ᐅᒋ ᒐᔅᑎᓇᐅᔭᓐ ᐊ ᑕᑈᒥᑲᒡ ᐅ ᑲ ᐃᓯ ᐎᑎᒧᔨᓐ, ᓴᔅ ᒪᒃ ᐊ ᒋᓴᐃᔪᐎᔭᓐ ᑭᔭ ᓂᐅ ᓴᔅ ᐊ ᒋᓴᐃᔎᐅᑦ ?”
19ᐊᑯ ᐊᓂᔭ ᐊᓐᒋᓇ ᒂ ᐃᔨᒥᔨᒋ, ᐊ ᐃᑎᑯᑦ, “ᐊᐅᒄ ᓂᔾ ᑲᑉᕆᔭᓪ, ᐅᑎᔅᑯᐤ ᒋᓴᒪᓂᑐᐤ ᐊ ᑕᑦ ᓂ ᓂᐳᐅᓐ ᐊ ᐊᑐᔅᑯᐅᒃ᙮ ᓂᒋ ᐸᒋ ᐃᑎᓴᐅᒄ ᒐᒋ ᐎᑎᒪᑕᓐ ᐅ ᒥᔽᒋᒧᐅᓐ᙮ 20ᐊᑯ ᒪᒃ ᓂᑐᑕ, ᓇᒪ ᒋᑭ ᒋ ᐃᔨᒥᓐ ᐸᑐᔅ ᒋ ᐃᔅᐱᔨᒐ ᑕᓐ ᑲ ᐃᓯ ᐎᑎᒪᑕᓐ᙮ ᐊᐅᒄ ᐅ ᒐ ᐃᔅᐱᔨᓐ ᐊᑲ ᐅᒋ ᑕᑈᑐᐎᔨᓐ ᑕᓐ ᑲ ᐃᓯ ᐎᑎᒪᑕᓐ᙮”
21ᐊᓐᒡ ᒪᒃ ᐃᔪᒡ ᒋ ᐊᓱᐛᐱᒪᐅᒡ ᓴᑲᕋᔭᔨᒋ ᒐ ᐃᔅᐱᔅ ᐸᒋ ᐎᐎᔨᒋ᙮ ᐊᑯ ᑲ ᒪᒥᑐᓇᔨᑎᒥᐃᑯᒡ ᒐᒂᔪᐤ ᐛᒋ ᓇᔅᒡ ᓇᐅᔅ ᑕᔨᒋ ᐊᓐᑕ ᐱᑎᑭᒥᒡ᙮ 22ᐃᔅᐱ ᒪᒃ ᐱᔭᒋ ᐎᐎᑦ ᓴᑲᕋᔭ ᓇᒪ ᐅᒋ ᐃᔨᒧᐤ᙮ ᐊᑯ ᐊᓐᒡ ᐃᔪᒡ ᑲ ᒋᔅᒐᔨᑕᒡ ᐛᐸᑎᔨᐛᐅᓂᔪᐤ ᐊᒋ ᐛᐸᑎᔭᑭᓄᔨᒋ ᐱᑎᑭᒥᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮ ᒥᒄ ᒋ ᐃᓯᓂᔅᒐᐱᔪᐤ ᓴᑲᕋᔭ ᒐᒂᔪᐤ ᐊ ᐎ ᐃᔅᒋᔄᑦ ᐊᑲ ᑲ ᐅᒋ ᐃᔨᒥᑦ᙮
23ᐃᔅᐱ ᒪᒃ ᑲᒋ ᐃᓯ ᐊᑐᔅᒐᑦ ᓴᑲᕋᔭ ᐊᓐᑕ ᒋᓴᐊᔭᒥᐊᐅᒋᐛᐱᒡ ᐊᑯ ᒂ ᒋᐛᑦ᙮ 24ᐎᐱᒡ ᒪᒃ ᑕᑈ ᒋ ᑭᓄᐛᔨᒪᐅᓱᔪᐛ ᐊᓂᔭ ᐎᐛ ᐃᓕᓴᐸᑕ᙮ ᐱᑕᑕᒡ ᑕᑐᐤ ᐱᓯᒺ ᒪᒃ ᒋ ᑲᓱᔅᑎᐛᔪᐛ ᐃᔪᐛ᙮ 25ᐊᑯ ᐃᓕᓴᐸᑦ ᒂ ᐃᔅᒋᔄᑦ, “ᓂᒋ ᓴᒂᔨᒧᓐ ᐊᑲ ᐅᒋ ᐊᔪᐛᒃ ᐊᐛᔅ, ᒥᒄ ᒪᒃ ᓂᒋ ᐃᑐᑎᒪᒄ ᐅᑎᐸᔨᒋᒐᐤ ᒐᒋ ᐊᔭᐅᒥᒋ ᐊᐛᓴ, ᑭᔭ ᓇᒪ ᓂᑭ ᐅᒋ ᓴᒂᔨᒧᓐ᙮”
ᒪᕆ ᑲ ᓄᑯᓯᔅᑕᑯᑦ ᐊᓐᒋᓇ
Luke 1.26-38 (Advent-4 Year B)
26ᐃᔅᐱ ᒪᒃ ᐊᓱᑕᒡ ᑕᑐᐤ ᐱᓯᒺ ᑲ ᐃᔅᐱᔅ ᑭᓄᐛᔨᒪᐅᓱᑦ ᐃᓕᓴᐸᑦ, ᒋᓴᒪᓂᑐᐤ ᒋ ᐃᑎᓴᐛᐤ ᐊᓂᔭ ᐊᓐᒋᓇ ᑲᑉᕆᔭᓪ ᑲ ᐃᓯᓂᐧᑲᓱᔨᒋ ᐊᓐᑕ ᑲᓕᓕ ᐊᔅᒋᒡ, ᐊᓐᑕ ᓇᓴᕆᑦ ᑲ ᐃᓯᓂᐧᑲᑕᔨᒡ ᐅᑕᓇᔪᐤ᙮ 27ᐊᓐ ᐊᓐᒋᓐ ᒋ ᐃᑎᓴᐛᑭᓄᐤ ᒐᒋ ᓂᑐᐛᐱᒪᑦ ᐅᔅᒋᓂᒋᔎᐛ ᒪᕆ ᐊ ᐃᓯᓂᐧᑲᓱᔨᒋ᙮ ᒪᕆ ᒪᒃ ᒋᐸ ᓂᐳᐅᐤ ᐊᓂᔭ ᒍᓯᑉ ᑲ ᐃᓯᓂᐧᑲᓱᔨᒋ ᓇᐸᐛ ᒐᒋ ᐎᒋᒪᑦ᙮ ᐅ ᒪᒃ ᒍᓯᑉ, ᒋ ᐊᓂᔅᒐ ᐅᒧᓱᒧᐤ ᐊᓂᔭ ᒋᓴᐅᒋᒪᐛ ᑎᐱᑦ ᑲ ᐃᓯᓂᐧᑲᓱᔨᒋ᙮ 28ᒋ ᓂᑐᐛᐱᒥᑯᐤ ᒪᒃ ᒪᕆ ᐊᓂᔭ ᐊᓐᒋᓇ ᐊᑯ ᒂ ᐃᑎᑯᑦ, “ᒋᔭᒪᔨᑕ, ᐛᔅ ᐅᑎᐸᔨᒋᒐᐤ ᒋ ᐎᒐᐅᒄ᙮ ᒋᓴᒪᓂᑐᐤ ᒥᔅᑎ ᒋ ᓱᐛᔨᒧᒄ᙮”
29ᒪᕆ ᒪᒃ ᒋ ᓴᒋᓱᐤ ᑭᔭ ᒋ ᒥᔅᑲᑕᔨᑎᒥᐃᑯᐤ ᐅᔭ ᑕᓐ ᑲ ᐃᑕᑭᓄᐅᑦ ᑭᔭ ᒋ ᒪᒥᑐᓇᔨᑎᒥᐃᑯᐤ ᐊᓂᔭ ᑕᓐ ᑲ ᐃᓯ ᐎᑎᒪᑯᑦ ᐊᓂᔭᔪᐛ ᐊᓐᒋᓇ᙮ 30ᒋ ᐃᑎᑯᐤ ᐊᓂᔭ ᐊᓐᒋᓇ, “ᐊᑲᐎᔾ ᓴᒋᓯ ᒪᕆ, ᐛᔅ ᒋᓴᒪᓂᑐᐤ ᒋᒋᐛ ᒋ ᓱᐛᔨᒧᒄ᙮ 31ᒋᑭ ᑭᓄᐛᔨᒪᐅᓱᓐ, ᓇᐸᔅ ᒋᑭ ᐊᔭᐛᐤ᙮ ᒋᓴᔅ ᒋᑭ ᐃᓯᓂᐧᑲᑕᐤ᙮ 32ᓇᔅᒡ ᑕᑈ ᒋᑭ ᒋᔅᑕᔨᑕᑯᓱᐤ᙮ ᒋᓴᒪᓂᑐᐤ ᒪᐅᒡ ᑲ ᐃᔅᐸᔨᑕᑯᓯᑦ ᐅᑯᓴ, ᐊᑯᓐ ᒐ ᐃᓯᓂᐧᑲᑕᑭᓄᐅᑦ᙮ ᐛᔅ ᐅᑎᐸᔨᒋᒐᐛ ᒋᓴᒪᓂᑐᐛ ᒋᑭ ᒋᓴᐅᒋᒪᐅᐃᑯᐤ ᐊᓐᑕ ᐃᔅᕋᐃᓪ ᐊᔅᒋᒡ ᒧᔭᒻ ᑲ ᐃᓯ ᒋᓴᐅᒋᒪᐅᐊᑭᓄᔨᒋ ᐊᓂᔭᐧᑲ ᐅᑦ ᐊᓂᔅᒐ ᐅᒧᓱᒪ ᑎᐱᑦ ᑲ ᐃᓯᓂᐧᑲᓱᔨᒋ᙮ 33ᓇᓂᑎᒻ ᒋᑭ ᐊᔭᐤ ᑎᐸᔨᒋᒐᐅᓂᔪᐤ ᐃᔅᕋᐃᓪ ᐃᔪᐛ ᒐᒋ ᒋᓴᐅᒋᒪᐅᑐᑐᐛᑦ᙮ ᐊᑯ ᒪᒃ ᐊᓂᔭ ᐊ ᑎᐸᔨᒋᒐᑦ ᓇᒪ ᓂᑕ ᒋᑭ ᐅᒋ ᐃᔎᐱᔨᔪᐤ᙮”
34ᐊᑯ ᒪᕆ ᒂ ᐃᑕᑦ ᐊᓂᔭ ᐊᓐᒋᓇ, “ᑕᓐᑕ ᒐᒋ ᐅᒋ ᐃᔅᐱᔨᒡ ᐅ, ᐊᑲ ᒪᒃ ᓂᑕ ᐅᒋ ᐸᓱᐛᐱᒥᒃ ᓇᐸᐤ ?”
35ᐊᑯ ᒂ ᐃᑎᑯᑦ ᐊᓂᔭ ᐊᓐᒋᓇ, “ᑲ ᐸᔭᒋᓯᑦ ᐊᒐᐧᒄ ᒋᑭ ᐅᑎᑎᒄ, ᒋᓴᒪᓂᑐᐤ ᒪᐅᒡ ᐊ ᐃᔅᐸᔨᑕᑯᓯᑦ, ᐅᓱᐧᑲᑎᓯᐅᓂᒡ ᐊᑯᑕ ᒐ ᐅᒋ ᑭᓄᐛᔨᒪᐅᓱᔨᓐ᙮ ᐊᐅᒄ ᒪᒃ ᒐ ᐅᒋ ᐃᓯᓂᐧᑲᑕᑭᓄᐅᑦ ᐊᓐ ᐊᐛᔅ ᒐ ᐱᒪᑎᓯᑦ ᑲ ᐸᔭᒋᓯᑦ, ᒋᓴᒪᓂᑐᐤ ᐅᑯᓴ ᒋᑭ ᐃᓯᓂᐧᑲᑕᑭᓄᐤ᙮” 36ᑭᔭ ᒋ ᐃᑎᑯᐤ ᒪᕆ ᐊᓂᔭ ᐊᓐᒋᓇ, “ᐛᐛᒡ ᒋᐧᑲᓂᔅ ᐃᓕᓴᐸᑦ, ᓇᒪ ᒋᑭ ᒋ ᐊᔭᐛᐤ ᐊᐛᓴ ᑲ ᐃᑕᑭᓄᐅᑦ, ᓴᔅ ᐊᓱᑕᒡ ᑕᑐᐤ ᐱᓯᒺ ᑭᓄᐛᔨᒪᐅᓱᐤ, ᐊᑎ ᒪᒃ ᓴᔅ ᐊ ᒋᓴᐃᔎᐅᑦ᙮ 37ᓇᒪ ᑎᑯᓂᔪᐤ ᒐᒂᔪᐤ ᒋᓴᒪᓂᑐᐤ ᒐ ᐊᑲ ᒋ ᐃᑐᑕᐧᒃ᙮”
38ᐊᑯ ᒪᕆ ᒂ ᐃᑕᑦ ᐊᓂᔭ ᐊᓐᒋᓇ, “ᓴᔅ ᓂᑭ ᐊᔭᔅᑯᐎᔨᓐ ᑕᓐ ᒐ ᐃᑕᐱᒋᐃᑦ ᐅᑎᐸᔨᒋᒐᐤ᙮ ᒋᑭ ᐃᔅᐱᔪᐤ ᐊᓐ ᑲ ᐃᔅᒋᔄᔨᓐ᙮” ᐊᑯ ᒪᒃ ᒂ ᓂᑭᑎᑯᑦ ᐊᓂᔭ ᐊᓐᒋᓇ᙮
ᒪᕆ ᑲ ᒧᐱᔅᑐᐛᑦ ᐎᐧᑲᓂᓴ ᐃᓕᓴᐸᑕ
Luke 1.39-55 (Advent-4 Year C)
39ᐸᑎᒪ ᒪᒃ, ᒪᕆ ᒋ ᐃᑐᑕᐤ ᐊ ᐎ ᒋᓯᐱᔨᑦ ᐊᓐᑕ ᐊᓂᔭ ᐅᑕᓇᔪᐤ ᐊᓐᑕ ᐊ ᐛᐛᑭᑕᐅᐧᑲᔨᒡ ᒍᑎᔭ ᐊᔅᒋᒡ ᑲ ᑎᑯᓂᔨᒡ᙮ 40ᓴᑲᕋᔭ ᐎᒋᔨᒡ ᒋ ᐱᒐᐤ ᐊᑯ ᒂ ᐛᒋᔭᒪᑦ ᐊᓂᔭ ᐃᓕᓴᐸᑕ᙮ 41ᐃᔅᐱ ᒪᒃ ᐃᓕᓴᐸᑦ ᑲ ᐛᒋᔭᒥᑯᑦ ᒪᕆᔨᒋ ᒋ ᒧᓯᐊᐤ ᐊ ᐅᒋ ᔭᔭᒋᔨᒋ ᐅᑦ ᐊᐛᓯᒪ᙮ ᐊᑯ ᐃᓕᓴᐸᑦ ᑲ ᓴᑭᔅᒋᓇᔅᑲᑯᑦ ᑲ ᐸᔭᒋᓯᔨᒋ ᐊᒐᒂ᙮ 42ᒂ ᐃᑕᑦ ᐊᓂᔭ ᒪᕆᔨᒋ ᐊ ᒋᔄᐛᑦ, “ᒋᔾ ᒪᐅᒡ ᒋ ᓱᐛᔨᒧᒄ ᒋᓴᒪᓂᑐᐤ ᐊ ᑎᓯᒡ ᐃᔎᐅᒡ, ᑭᔭ ᓇᔅᒡ ᑕᑈ ᓱᐛᔨᑕᑯᓱᐤ ᐊᓐ ᐊᐛᔅ ᒐ ᐊᔭᐅᑦ᙮ 43ᓂ ᒥᔅᑲᑕᔨᑕᓐ ᒪᒃ ᒐᒂᓐ ᓂᔾ ᐛᒋ ᐸᒋ ᒧᐱᔅᑐᐎᓐ ᓂᑎᐸᔨᒋᒐᓯᒻ ᐅᑲᐎᔭ ? 44ᐃᔅᐱ ᑲ ᐸᒋ ᐛᒋᔭᒥᔨᓐ ᐊᓐ ᓂᑦ ᐊᐛᓯᒻ ᒋ ᐅᒋ ᐊᔭᒋᐤ ᐊ ᒥᔽᔨᑕᐧᒃ᙮ 45ᑕᓐ ᒋᑦ ᐃᔅᐱᔅ ᓱᐛᔨᑕᑯᓯᓇᒐ ᐛᔅ ᓇᔅᒡ ᔅᒋ ᑕᑈᑎᒺᓐ ᑕᓐ ᑲ ᐃᓯ ᐎᑎᒪᔅᒃ ᐅᑎᐸᔨᒋᒐᐤ ᐅᑦ ᐊᓐᒋᓇᒪ ᒐ ᐃᔅᐱᔨᒡ᙮”
ᒪᕆ ᑲ ᒪᒥᒋᒪᑦ ᒋᓴᒪᓂᑐᐛ
Luke 1.46-55 (Advent-4 Year B)
46ᐊᑯ ᒪᕆ ᒂ ᐃᔅᒋᔄᑦ,
“ᓂ ᒪᒥᒋᒪᐤ ᐅᑎᐸᔨᒋᒐᐤ ᓂᑦ ᐊᒐᐧᑯᒡ,
47ᑭᔭ ᓇᔅᒡ ᑕᑈ ᓂ ᓯᒋᔭᓯᓐ ᐊ ᒪᒥᑐᓇᔨᑎᒥᐃᑯᐅᒡ ᐊᓂᔭᔪᐛ ᑕᓐ ᑲ ᐃᓯ ᐃᑐᑎᒧᐅᑦ ᒋᓴᒪᓂᑐᐤ ᓂᐱᒪᒋᐃᐛᒻ᙮
48ᐛᔅ ᒋ ᓂᓇᑭᑐᐛᐸᑎᒧᐛᐤ ᐅᑦ ᐊᐱᒋᐊᑭᓂᔎᒪ ᐅᑎᐱᑕᔨᑕᑯᓱᐅᓂᔪᐤ᙮ ᑕᓐ ᒐ ᐃᔅᐱᔅ ᐊᓂᔅᒐ ᐱᒪᑎᓯᐛᒂ ᐃᔪᒡ ᐊᓐᑕ ᐃᔅ ᓂᔅᑕᒥᒡ ᒋᑭ ᐊᔨᒧᑎᒧᒡ ᑕᓐ ᑲ ᐃᔅᐱᔅ ᓱᐛᔨᒥᑯᐎᒡ᙮
49ᐛᔅ ᒋᓴᒪᓂᑐᐤ ᑲ ᓱᐧᑲᑎᓯᑦ ᒪᒥᔅᑲᒡ ᓂᒋ ᐃᓯ ᒥᔪᑐᑎᒪᒄ ᑭᔭ ᒋᔅᑕᔨᑕᑯᓂᔪᐤ ᐅᑦ ᐃᓯᓂᐧᑲᓱᐅᓐ᙮
50ᒧᔅ ᓱᐛᔨᒪᐤ ᐊᓂᔭ ᐊᐛᔪᐛ ᑲ ᓇᓂᒋᔅᑕᑯᑦ, ᐊᐅᑯᓐ ᒧᔅ ᑲ ᐸᒋ ᐃᑎᑦ ᑭᔭ ᐊᐅᑯᓐ ᒧᔅ ᒐ ᐃᑎᑦ᙮
51ᒋ ᐛᐸᑎᔨᐛᐤ ᑕᓐ ᐊᔅᐱᔅ ᓱᐧᑲᑎᓯᑦ᙮ ᑭᔭ ᒋ ᐃᒐᑎᓴᐛᐤ ᐊᓂᔭᔪᐛ ᐊᐛᔪᐛ ᓇᔅᒡ ᑲ ᒋᔅᑕᔨᒥᓱᔨᒋ ᑭᔭ ᓇᒪ ᐅᒋ ᐃᑐᑎᒥᔪᐛ ᐊᓂᔭᔪᐛ ᒐᒂᔪᐛ ᑲ ᐃᑕᔨᑎᒥᐃᑯᔨᒋ ᒐᒋ ᐃᑐᑎᒥᔨᒋ᙮
52ᐅᑦ ᐊᐳᐅᓂᔨᒡ ᒋ ᐅᒋ ᓂᑎᓇᐤ ᐊᓂᔭ ᓇᔅᒡ ᑲ ᐅᒋᒪᐛᔨᑕᑯᓯᔨᒋ ᒋᓴᐅᒋᒪᐛ ᐊᑯ ᑲ ᒋᔅᑕᔨᑕᑯᐊᑦ ᐊᓂᔭ ᑲ ᑎᐱᑕᔨᑕᑯᓯᔨᒋ᙮
53ᒋ ᐛᔪᒡ ᒥᔭᐤ ᑕᓐ ᐊ ᐃᓯ ᓂᑐᐛᔨᑎᒥᔨᒋ ᐊᓂᔭ ᑲ ᒋᔅᑎᒪᑎᓱᔨᒋ ᐊᑯ ᐊᓂᔭᔪᐛ ᑲ ᐛᔪᑎᓯᔨᒋ ᒋ ᐃᒐᑎᓴᐛᐤ ᐊᑲ ᒐᒂᔪᐤ ᐊᔭᔨᒋ᙮
54ᒋ ᐎᒋᐊᐤ ᐃᔅᕋᐃᓪ ᐃᔪᐛ, ᒧᔅ ᐊᒋ ᒋᔅᒋᓯᑦ ᑕᓐ ᐊ ᐃᓯ ᒋᔅᑎᒪᒐᔨᒪᑦ᙮
55ᒋ ᒋᔅᒋᓱᐤ ᑕᓐ ᒐ ᐃᓯ ᑲᒋᒡ ᒋᔅᑎᒪᒐᔨᒪᑦ ᐊᑉᕋᐊᒪ ᑭᔭ ᐊᓂᔅᒐ ᐅᑦ ᐊᐛᓯᒥᔪᐛ᙮”
56ᐊᐅᒄ ᒪᒃ ᐅᔭ ᒥᓯᐛ ᑲ ᐃᔅᒋᔄᑦ ᒪᕆ᙮
ᐊᑯ ᒪᒃ ᐊᑯᑕ ᑲ ᑕᑦ ᐊᓐᑕ ᐃᓕᓴᐸᑕ ᐎᒋᔨᒡ᙮ ᓂᔅᑐ ᐱᓯᒺ ᒋ ᐎᒋᒪᐤ, ᐊᑯ ᒂ ᒋᐛᑦ᙮
ᑲ ᐱᒪᑎᓯᑦ ᒠᓐ ᐅᓯᑲᐃᑕᒐᐤ
57ᒐᒃ ᒋ ᐅᑎᒋᐱᔪᐤ ᐃᓕᓴᐸᑦ ᒐ ᐱᒪᑎᓯᔨᒋ ᐊᓂᔭ ᐅᑦ ᐊᐛᓯᒪ, ᒋ ᓇᐸᓯᐎᔪᐛ ᒪᒃ᙮ 58ᐃᔅᐱ ᒪᒃ ᐱᔭᑎᒥᔨᒋ ᐎᐧᑲᓂᓱᐛᐛ ᑭᔭ ᒥᓯᐛ ᐃᔪᐛ ᐊᓐᑕ ᒥᒋᒪ ᑲ ᑕᔨᒋ, ᓇᔅᒡ ᑕᑈ ᒋ ᒥᔽᔨᑎᒥᔪᐛ ᐊᒋ ᐸᑎᒥᔨᒋ ᑕᓐ ᑲ ᐃᓯ ᒥᔪᑐᑎᒪᑯᑦ ᐅᑎᐸᔨᒋᒐᐛ᙮
59ᐃᔅᐱ ᒪᒃ ᔭᓇᐤ ᑕᑐᐤ ᒋᓯᑲᐛ ᑲ ᐃᔅᐱᔅ ᐱᒪᑎᓯᑦ ᐊᓐ ᐊᐛᔅ ᒥᓯᐛ ᐎᐧᑲᓂᓱᐛᐛ ᑭᔭ ᐅᐎᒐᐛᑭᓄᐛᐛ ᒋ ᐸᒋ ᑎᑯᓯᓂᔪᐛ ᒐᒋ ᐃᑐᑐᐛᑭᓄᔨᒋ ᑕᓐ ᑲᒋ ᐃᑐᑐᐛᒡ ᒍᐤ ᐃᔪᒡ ᐅᑦ ᐊᐛᓯᒧᐛᐛ ᐊ ᓇᐸᓯᐎᔨᒋ, ᒋ ᒋᔅᒋᓄᐛᒋᔄᐅᒡ᙮ ᐎᐧᑲᓂᓱᐛᐛ ᒪᒃ, ᓴᑲᕋᔭ ᒋ ᐎ ᐃᓯᓂᐧᑲᑕᐅᒡ ᐅᔭ ᐊᐛᓴ ᒐᒋ ᐎᒋᓱᒪᔨᒋ ᐅᑕᐎᔪᐛ᙮ 60ᐅᑲᐎᔭ ᒪᒃ ᒋ ᐃᔅᒋᔄᔪᐛ, “ᓇᒪ, ᒠᓐ ᒋᑭ ᐃᓯᓂᐧᑲᓱᐤ᙮” 61ᐊᑯ ᒪᒃ ᒂ ᐃᑕᒡ, “ᓇᒪ ᑕᐅᒡ ᒋᐧᑲᓂᓱᐛᐅᒡ ᒠᓐ ᐊ ᐃᓯᓂᐧᑲᓱᒡ ᒐᒋ ᐃᓯ ᐎᒋᓱᒪᒄ ᐊᓐ ᒋᑦ ᐊᐛᓯᒧᐛᐤ, ᐛᔅ ᒋᐸ ᐎᒋᓱᒪᔪᐛ ᐎᐧᑲᓂᓱᐛᐛ, ᐊᐅᑯᓐ ᑲᒋ ᐃᑎᓇᓄᐅᒡ᙮”
62ᐊᑯ ᒪᒃ ᑲ ᐃᓯ ᐅᐛᔅᑕᐃᒐᒡ ᐊᓂᔭ ᐅᑕᐎᔪᐛ ᐊ ᑕᔨᒋ ᐊ ᑯᒂᒋᒪᒡ ᑕᓐ ᒐ ᐃᓯᓂᐧᑲᓱᑦ ᐅ ᐊᐛᔅ᙮
63ᓴᑲᕋᔭ ᒋ ᐃᓯ ᐅᐛᔅᑕᐃᒐᐤ ᐊ ᓂᑐᐛᔨᑕᐧᒃ ᒐᒂᔪᐤ ᐊᓐᑕ ᒐᒋ ᒥᓯᓇᐃᒐᑦ᙮ “ᒠᓐ ᒋᑭ ᐃᓯᓂᐧᑲᓱᐤ” ᒋ ᐃᑎᓯᓇᐃᒐᐤ᙮ ᒥᓯᐛ ᒪᒃ ᒋ ᓯᔅᒋᑯᒋᐃᑯᐅᒡ ᐅᔭ ᑲ ᐃᑎᔅᑕᔨᒋ᙮ 64ᐊᓂᔭ ᒪᒃ ᒪᒂᒡ ᑎᐛᒡ ᒋ ᐅᒋ ᒥᔪᐱᔪᐤ ᒥᓐ ᒐᒋ ᐃᔨᒥᑦ ᓴᑲᕋᔭ, ᐊᑯ ᒂ ᒪᒥᒋᒪᑦ ᒋᓴᒪᓂᑐᐛ᙮ 65ᐊᑯ ᐊᓐᒡ ᒥᒋᒪ ᐊᓐᑕ ᑲ ᑕᒡ ᑭᔭ ᐊᓐᒡ ᐃᔪᒡ ᐛᔅᑲ ᐊᓐᑕ ᒍᑎᔭ ᑲ ᑕᒡ ᓇᔅᒡ ᑕᑈ ᒋ ᓴᒋᓱᐅᒡ ᐃᔅᐱ ᑲ ᐸᑕᒡ ᑕᓐ ᑲ ᐃᔅᐱᔨᒂ᙮ 66ᒥᓯᐛ ᒪᒃ ᑕᑐᐤ ᐊᐛᓐᒋ ᑲ ᐸᑕᒡ ᓇᔅᒡ ᒋ ᒪᒥᑐᓇᔨᑎᒧᒡ ᐊ ᐃᑕᔨᑕᒡ, ᐃᔅ ᒪ ᒋᑭ ᐃᑕᔨᑕᑯᓱᐤ ᐅ ᐊᐛᔅ᙮ ᐛᔅ ᓇᔅᒡ ᒋ ᒋᔅᒐᔨᑕᑯᓐ ᓴᔅ ᐅᑎᐸᔨᒋᒐᐛ ᐊ ᐎᓱᐛᑎᑯᑦ ᐅ ᐊᐛᔅ᙮
ᒋᓴᒪᓂᑐᐛ ᑲ ᐃᓯ ᒥᔨᑯᑦ ᒐ ᐃᓯ ᐃᔨᒥᑦ ᓴᑲᕋᔭ
67ᓴᑲᕋᔭ ᒪᒃ ᒋ ᓴᑭᔅᒋᓇᔅᑲᑯᐤ ᑲ ᐸᔭᒋᓯᔨᒋ ᐊᒐᒂ᙮ ᐊᐅᒄ ᒪᒃ ᐅᔭ ᒋᓴᒪᓂᑐᐛ ᑲ ᒥᔨᑯᑦ ᒐᒋ ᐃᔅᒋᔄᑦ,
Luke 1.68-79 (Advent-2 Year C)
68“ᒋᑭ ᒥᔽᒋᒪᑭᓄᐤ ᑎᐸᔨᒋᒐᓱᐤ, ᐃᔅᕋᐃᓪ ᐅᒋᓴᒪᓂᑐᒪ, ᐛᔅ ᒋ ᐸᒋ ᓂᑐᐛᐱᒪᐤ ᐅᑦ ᐃᔨᒪ ᑭᔭ ᒋ ᐃᑐᑎᒻ ᒐᒋ ᐱᐧᑯᐅᔨᒋ᙮
69ᑭᔭ ᔅᒋ ᐅᑎᓂᒪᑯᓄᐤ ᐊ ᓱᒋᔨᒋ ᐱᒪᒋᐃᐛᓱᐛ ᐊᓐᑕ ᐅᑦ ᐊᑐᔅᒐᔭᑭᓂᒪ ᑎᐱᑕ ᐅᑦ ᐃᔨᒥᔨᒡ ᐅᒋ᙮
70ᒧᔭᒻ ᑲ ᐃᔨᑯᐱᓇ ᐊ ᐃᔨᒥᐛᒐᐛᑦ ᐅᑐᓂᔨᐛ ᐅᐸᔭᒋ ᒋᔅᒋᐛᐃᒐᓯᒪ ᒧᔅ ᑕᒡ ᑲ ᐸᒋ ᑕᔨᒋ ᑲ ᐃᔅᐱ ᐊᔅᒋᐎᔨᒡ᙮
71ᒐᒋ ᐱᐧᑯᐅᐛᐧᒄ, ᐊᓂᔭᔪᐛ ᓇᔅᑯᔅᑕᑎᔨᑕᐧᑯ ᐅᒋ, ᑭᔭ ᐅᑭᔅᒋᐅᐎᓂᔨᒡ ᐅᒋ ᒥᓯᐛ ᐛᐧᑲᑎᔨᑕᐧᑯ᙮
72ᐊ ᒋᓴᐛᑐᑐᐛᑦ ᒍᑕᐎᓄᐛ ᑭᔭ ᐊ ᒋᔅᒋᑦ ᐅᐸᔭᒋ ᓂᔅᑯᒧᐅᓐ᙮
73ᐊᓂᔭᔪᐤ ᑲ ᐃᓯ ᒋᒋ ᓂᔅᑯᒪᑦ ᒍᑕᐎᓄᐛ ᐊᑉᕋᐊᒪ᙮
74ᒐ ᒥᔨᑕᐧᒄ ᐅᑦ, ᓴᔅ ᐊ ᐱᐧᑯᐅᐛᐧᒄ ᐊᓂᔭᔪᐛ ᓇᔅᑯᔅᑕᑎᔨᑕᐧᑯ ᐅᑭᔅᒋᐅᐎᓂᔨᒡ ᐅᒋ, ᒐᒋ ᐊᑐᔅᑯᐛᐧᒄ ᓴᔅ ᐊ ᐊᑲ ᑯᔅᑕᒋᔭᐧᒄ᙮
75ᐸᔭᒋᓯᐅᓂᒡ ᑭᔭ ᑯᐃᔅᑯᑕᑎᓯᐅᓂᒡ ᒥᓯᐛ ᑕᑐᐤ ᒋᓯᑲᐛ ᒐ ᐃᔅᐱᔅ ᐱᒪᑎᓯᔭᐧᒄ᙮
76ᐊᐦᐊ, ᒋᔾ ᒪᒃ ᐊᐛᔅ, ᒪᐅᒡ ᑲ ᐃᔅᐸᔨᑕᑯᓯᑦ ᐅᒋᔅᒋᐛᐃᒐᓯᒪ ᒋᑭ ᐃᑎᑯᐅᓐ; ᐛᔅ ᒋᑭ ᓂᑲᓄᑐᐛᐤ ᑎᐸᔨᒋᒐᓱᐤ ᒐ ᐛᐛᓯᑕᐅᑦ ᐊᓐᑕ ᒐ ᐃᑐᑕᑦ᙮
77ᒐ ᒋᔅᒐᔨᑎᒥᐃᒥᑎ ᐅᑦ ᐃᔨᒪ ᐊᓂᔭᔪᐤ ᐊ ᐛᐸᔨᑎᒧᐛᑭᓄᔨᒋ ᐅᒥᒋᑥᐅᓂᔪᐛ ᐊ ᐊᐅᓂᔨᒡ ᐱᒪᒋᐃᐛᐅᓂᔪᐤ᙮
78ᒋᒋᓴᒪᓂᑐᒥᓄᐛ ᐅᓱᐎᑕᐊᑕᒐᐅᓂᔨᒡ ᐊ ᐅᒋᐱᔨᒡ, ᐊᓐᑕ ᒐ ᐅᒋ ᐸᑕᐸᒡ ᐃᔅᐱᒥᒡ ᐅᒋ ᐅᑕ ᐊ ᑕᐛᐧᒄ᙮
79ᒐᒋ ᐛᔅᑕᔨᒡ ᐊᑕᒡ ᐊᓐᒡ ᐛᑲᔅᑕᐱᒡ, ᑭᔭ ᑕᑲᔅᑕᔅᑲᑯᒡ ᓂᐳᐅᓂᔪᐤ; ᑭᔭ ᒐᒋ ᒋᔅᒋᓄᑕᐃᑯᔭᐧᒄ ᒋᔭᒪᐛᔨᑎᒧᐅᓂᒡ ᐃᔅ᙮”
80ᐅ ᒪᒃ ᐊᐛᔅ ᒠᓐ ᒋ ᐊᑎ ᓱᒋᓂᑕᐅᒍᐤ ᐎᔭᒡ ᑭᔭ ᐅᑦ ᐊᒐᐧᑯᒡ᙮ ᐊᑯ ᒪᒃ ᐃᔅᐱ ᑲᒋ ᐃᓯ ᓂᑕᐅᒋᑦ ᐊᑯ ᒧᔅ ᑎᐸᓐ ᒂ ᐎᒋᑦ, ᐸᑐᔅ ᐛᑎᒋᐱᔨᒡ ᒐ ᑭᒐᔅᒋᒪᑦ ᐃᔅᕋᐃᓪ ᐃᔪᐛ᙮ ᐊᓐᑕ ᒪᒃ ᒋ ᐃᑕᐤ ᐸᐧᑯᑎᔅᑭᒥᑲᒡ ᐊᓐᑕ ᐊᑲ ᓂᑕᐅᒋᓂᔨᒡ ᒐᒂᔪᐤ᙮
Currently Selected:
ᓗᒃ 1: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
