ᓗᒃ 9
9
ᒋᓴᔅ ᑲ ᒋᑎᓴᐛᑦ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ
ᒪᑎᔪᐤ 10.5-15; ᒪᕐᒃ 6.7-13
1ᒋᓴᔅ ᒋ ᒪᒧᐤ ᐎᓴᒪᐤ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ᙮ ᒂ ᒥᔭᑦ ᓱᐧᑲᑎᓯᐅᓂᔪᐤ ᑭᔭ ᑎᐸᔨᒋᒐᐅᓂᔪᐤ ᒐᒋ ᐎᐎᑎᓴᐛᔨᒋ ᒥᒋ ᐊᒐᒂ ᑭᔭ ᒐᒋ ᒥᓏᒋᐊᔨᒋ ᓂᓇᐧᑯᐤ ᐊ ᐃᑕᔅᐱᓇᔨᒋ ᐊᐛᔪᐛ᙮ 2ᐊᑯ ᒂ ᒋᑎᓴᐛᑦ ᒐᒋ ᑭᒐᔅᒋᒧᔨᒋ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᐊ ᐛᐎᑎᒥᔨᒋ ᐊᔪᐤ ᒐᒋ ᒥᓏᒋᐊᔨᒋ ᐊᐛᔪᐛ ᑲ ᐊᐧᑯᓯᔨᒋ᙮
3ᒋ ᐃᑎᓱᒪᐤ ᒪᒃ, “ᐅ ᒐ ᔅᑐᑕᔭᒄ ᐊᑲᐎᔾ ᒋᑭ ᐅᒋ ᑕᐧᑯᓇᓇᐛᐤ ᒐᒂᓐ᙮ ᐊᑲᐎᔾ ᐊᔭᒄ ᓯᔅᑲᐅᓐ, ᓂᒪᐅᑦ, ᒥᒋᒻ, ᓱᓇᔭᐤ ᐛᐛᒡ ᑭᔭ ᐊᔪᐛᒃ ᒋᑦ ᐊᐱᒋᑕᐅᓄᐛᐛ ᐊ ᒋᔅᑭᒪᒄ᙮ 4ᑭᔭ ᐊᓐ ᒥᒋᐛᑉ ᑕᓐᑕ ᒐ ᐱᑎᑲᐃᑯᐛᒂ, ᐊᑯᑕ ᐊᓐᑕ ᒐ ᑕᔭᒄ ᐸᑐᔅ ᓂᑭᑎᒪᒂ ᐊᓐ ᐅᑕᓇᐤ᙮ 5ᐅᑎᑎᒪᒂ ᒪᒃ ᐅᑕᓇᐤ ᐊᑲ ᒪᒃ ᐎ ᐱᑎᑲᐃᑯᔭᒂ, ᓂᑭᑎᒥᒄ ᐊᓐ ᐅᑕᓇᐤ᙮ ᒐ ᐸᐳᓯᑕᓯᒧᔭᒄ, ᐊ ᓄᑯᑕᔭᒄ ᐊ ᐃᔭᒂᒥᒪᑯᒡ ᐊᑲ ᐅᒋ ᐎ ᐅᑎᓇᒡ ᒥᔽᒋᒧᐅᓂᔪᐤ᙮” 6ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒂ ᔅᑐᑕᒡ ᐊᓐᑕ ᓂᓇᐧᑯᐤ ᐅᑕᓇᒡ ᒂ ᐃᑐᑕᒡ ᐊ ᐛᐎᑕᒡ ᒥᔽᒋᒧᐅᓂᔪᐤ ᑭᔭ ᐊ ᒥᓏᒋᐊᒡ ᑲ ᐊᐧᑯᓯᔨᒋ᙮
ᐊᕈᑦ ᑕᓐ ᑲ ᐃᓯ ᐛᐛᓇᔨᑕᐧᒃ
ᒪᑎᔪᐤ 14.1-12; ᒪᕐᒃ 6.14-29
7ᐃᔅᐱ ᒪᒃ ᒋᓴᐅᒋᒪᐤ ᐊᕈᑦ ᐱᔭᑕᐧᒃ ᑕᓐ ᐊ ᐃᑎᔨᒋ ᒋᓴᓴ, ᓇᔅᒡ ᑕᑈ ᒋ ᐛᐛᓇᔨᑎᒥᐃᑯᐤ ᐛᔅ ᒋ ᑕᐅᒡ ᐃᔪᒡ ᐊ ᐱᐸᒪᒋᒧᒡ ᐊ ᐃᔅᒋᔄᒡ, ᒠᓐ ᐅᓯᑲᐃᑕᒐᐤ ᐅ, ᒥᓐ ᑲᐤ ᐱᒪᑎᓯᐤ᙮ 8ᒋ ᑕᐅᒡ ᒥᓐ ᑯᑎᑭᒡ ᐊ ᐃᔅᒋᔄᒡ, “ᐊᐅᒄ ᐅ ᐃᓚᐃᒐ, ᒥᓐ ᑲᐤ ᐱᒪᑎᓯᐤ᙮” ᐃᔭᐱᒡ ᒪᒃ ᒥᓐ ᒋ ᑕᐅᒡ ᑯᑎᑭᒡ ᐊᐛᓐᒋ ᐊ ᐃᔅᒋᔄᒡ, “ᐊᐅᒄ ᐅ ᐸᐃᒄ ᐛᔅᑭᒡ ᐅᒋᔅᒋᐛᐃᒐᓱᐤ ᒥᓐ ᑲᐤ ᐱᒪᑎᓯᐤ᙮” 9ᐊᕈᑦ ᒪᒃ ᒋ ᐃᔅᒋᔄᐤ, “ᐊᐛᓐ ᐅ ᑲ ᐃᓯ ᒪᒥᔅᑲᒡ ᐃᑕᒋᒪᑭᓄᐅᑦ ? ᓇᒪᐎᔾ ᒂᔄᓐ ᒠᓐ, ᓂ ᒐᔅᑎᓇᐅᓐ ᐊᒋ ᒋᒥᔅᑎᒂᓇᐛᑭᓄᐅᑦ ᐎᔾ ᒠᓐ᙮” ᐊᑯ ᓇᔅᒡ ᑲ ᐎ ᐛᐱᒪᑦ ᐊᓂᔭᔪᐛ ᒋᓴᓴ᙮
ᒋᓴᔅ ᑲ ᐊᓯᒪᑦ ᐱᑕᑕᒡ ᒐᓯᐱᔪᐤ ᐃᔪᐛ
ᒪᑎᔪᐤ 14.13-21; ᒪᕐᒃ 6.30-44; ᒠᓐ 6.1-14
10ᐃᔅᐱ ᑕᑯᓯᓂᒡ ᐊᓐᒡ ᐊᑈᔅᑕᓇᒡ ᑲ ᒋᑎᓴᐛᑭᓄᐎᒡ ᐊᑯ ᒂ ᐎᑎᒧᐛᒡ ᒋᓴᓴ ᑕᓐ ᑲ ᐃᑎᒡ ᑲ ᐃᔅᐱᔅ ᐊᑲ ᑕᒡ᙮ ᐊᑯ ᒂ ᓂᑭᑕᒡ ᐊᓂᔭ ᑲ ᒥᒐᑎᔨᒋ ᐃᔪᐛ, ᑎᐸᓐ ᑲ ᐃᑐᑕᒡ ᐊ ᐎᒐᐛᒡ ᒋᓴᓴ ᐊᓐᑕ ᐸᑦᓴᐃᑕᒡ ᐊ ᐃᑐᑕᔨᒋ᙮ 11ᐃᔅᐱ ᒪᒃ ᒥᒐᑦ ᐊᐛᓐᒋ ᑲ ᐸᑕᒡ ᐊᒋ ᔅᑐᑕᔨᒋ ᐊᑯ ᒂ ᓄᓱᔅᑯᐛᒡ᙮ ᒋᓴᔅ ᒪᒃ ᒋ ᒥᔽᔨᑎᒻ ᐊ ᑎᑯᓯᓂᔨᒋ᙮ ᒋ ᐛᐎᑎᒧᐛᐤ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᐊ ᐃᑕᔨᑕᑯᓂᔨᒡ ᑭᔭ ᒋ ᒥᓏᒋᐊᐤ ᐊᓂᔭᔪᐛ ᐊᐛᔪᐛ ᑲ ᓂᑐᐛᔨᑎᒥᔨᒋ ᒐᒋ ᒥᓏᒋᐊᑭᓄᔨᒋ᙮
12ᓴᔅ ᒪᒃ ᒋ ᐊᑎ ᐅᑕᑯᓯᔪᐤ ᐊᑯ ᐊᓐᒡ ᓂᓱᓴᑉ ᒋᔅᒋᓄᐊᒧᐛᑭᓐᒡ ᒂ ᐃᑕᒡ ᒋᓴᓴ, “ᐃᒐᑎᓴᐅᒡ ᒪ ᐊᑯ ᐊᓐᒡ ᐃᔪᒡ ᒐ ᓇᓂᑐᐛᔨᑕᒡ ᒐᒂᔪᐤ ᒐ ᒥᒋᒡ ᑭᔭ ᐊᓐᑕ ᒐ ᒥᔽᔨᒧᒡ ᒐ ᑎᐱᔅᑲᔨᒡ᙮ ᑕᐸ ᑎᑯᓐ ᒐᒂᓐ ᐅᑕ ᐎ᙮”
13ᐊᑯ ᒋᓴᔅ ᒂ ᐃᑕᑦ, “ᒋᔨᐛᐤ ᒥᔭᐧᑯᒡ ᒐᒂᔪᐤ ᒐ ᒥᒋᒡ᙮” ᒋᔅᒋᓄᐊᒧᐛᑭᓐᒡ ᒪᒃ ᒋ ᐃᑕᐅᒡ, “ᒥᒄ ᐱᑕᑕᒡ ᐸᒂᓯᑭᓐᒡ ᓂᓱ ᒪᒃ ᓂᒪᓯᒡ ᐊᑯᓐ ᐊ ᐃᔅᐱᔅ ᑎᒂᒡ ᒐᒂᓐ᙮ ᒥᒄ ᑭᑈ ᓂᔭᓐ ᐅᑎᓂᒪᒐ ᒥᒋᒻ ᒐᒋ ᒥᒋᓱᒡ ᐅᒡ ᐊ ᑎᓯᒡ ᐊᐛᓐᒋ᙮” 14ᓴᓯᑲᓐ ᐱᑕᑕᒡ ᒐᓯᐱᔪᐤ ᒋ ᑎᓯᒐᓂᒋ ᓇᐸᐅᒡ ᐊᓐᑕ ᐊ ᐃᑎᓯᓇᓄᐅᒡ᙮ ᒋᓴᔅ ᒂ ᐃᑕᑦ ᐊᓂᔭ ᒋᔅᒋᓄᐊᒧᐛᑭᓇ, “ᐃᑕᐧᑯᒡ ᐊᓐᒡ ᐃᔪᒡ, ᒐᒋ ᐸᐱᑕᑕᑐᔪᐛᐱᒡ ᐸᐃᒂ ᐊᓂᔭ ᐊ ᒥᓇᐱᒡ᙮”
15ᒋᔅᒋᓄᐊᒧᐛᑭᓐᒡ ᒪᒃ ᒋ ᐃᑐᑎᒧᒡ ᐊᓂᔭ ᑲ ᐃᑎᓱᒪᑭᓄᐎᒡ ᐊᑯ ᒥᓯᐛ ᐊᐛᓐ ᑲ ᐛᐛᔨᐱᑦ᙮ 16ᐊᑯ ᒋᓴᔅ ᐛᑎᓇᑦ ᐊᓂᔭ ᐱᑕᑕᒡ ᐸᒂᓯᑭᓇ ᑭᔭ ᐊᓂᔭ ᓂᓱ ᓂᒪᓴ, ᐃᔅᐱᒥᒡ ᒂ ᐃᑕᐱᑦ ᐊ ᓂᓇᔅᑯᒪᑦ ᒋᓴᒪᓂᑐᐛ᙮ ᒂ ᐸᒂᓇᑦ ᐊᓂᔭᔪᐛ ᐸᒂᓯᑭᓇ ᐊᑯ ᒂ ᒥᔭᑦ ᐊᓂᔭ ᐅᒋᔅᒋᓄᐊᒧᐛᑭᓇ ᒐᒋ ᒪᑎᓂᒧᐛᔨᒋ ᐊᓂᔭ ᐃᔪᐛ᙮ 17ᒥᓯᐛ ᒪᒃ ᐊᐛᓐ ᒋ ᒥᒋᓱᐤ ᑭᔭ ᒋ ᑕᐱᔅᑯᔪᐤ, ᐊᑯ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᑲ ᒪᒧᓴᒋᓂᒥᔨᒋ ᐊᓂᔭ ᐃᔅᑯᔅᑐᐛᓂᔪᐤ᙮ ᓂᓱᓴᑉ ᒪᒃ ᐅᑎᐱᐅᑕ ᒋ ᓴᑭᔅᒋᓂᑕᐅᒡ᙮
ᐱᑕᕐ ᑲ ᓂᔅᑐᓄᐛᑦ ᒋᓴᓴ ᐊ ᐊᐎᔨᒡ ᙭ᑕ
ᒪᑎᔪᐤ 16.13-19; ᒪᕐᒃ 8.27-29
18ᐸᐃᒂᐤ, ᒋᓴᔅ ᒋ ᐊᔭᒥᐊᐤ ᒥᒄ ᐊ ᐸᐃᑯᓯᑦ, ᐅᒋᔅᒋᓄᐊᒧᐛᑭᓇ ᒪᒃ ᒥᒋᒪ ᒋ ᑕᔪᐛ ᐊᑯ ᒂ ᑯᒂᒋᒪᑦ ᐊ ᐃᑕᑦ, “ᐊᐛᓐ ᓂᔾ ᐊ ᐃᑕᔨᒥᒡ ᐊᐛᓐᒋ ?” 19ᒂ ᐃᑎᑯᑦ, “ᑯᑎᑭᒡ ᐊᐛᓐᒋ ᒠᓐ ᐅᓯᑲᐃᑕᒐᐤ ᒋᑦ ᐃᑕᔨᒥᑯᒡ, ᐊᑯ ᑯᑎᑭᒡ ᐊᓂᔭᐧᑲ ᐸᐃᒄ ᐅᒋᔅᒋᐛᐃᒐᓱᐤ ᐃᓚᐃᒐ ᑲ ᐃᓯᓂᐧᑲᓱᑦ ᒋᑦ ᐃᑕᔨᒥᑯᒡ, ᐊᑯ ᒥᓐ ᑯᑎᑭᒡ ᐊ ᐃᔅᒋᔄᒡ ᐛᔅᑭᒡ ᐅᒋᔅᒋᐛᐃᒐᓱᐤ ᒥᓐ ᑲᐤ ᐊ ᐱᒪᑎᓯᑦ ᐊ ᐃᑕᔨᒥᔅᒡ᙮” 20ᐊᑯ ᒋᓴᔅ ᒥᓐ ᒂ ᑯᒂᒋᒪᑦ, “ᒋᔨᐛᐤ ᒪᒃ ᐎ, ᐊᐛᓐ ᓂᔾ ᐊ ᐃᑕᔨᒥᔭᒄ ?” ᐱᑕᕐ ᒋ ᐃᓯ ᐎᑎᒧᐛᐤ, “᙭ ᒋᔾ, ᐊᐅᒄ ᒋᔾ ᒋᓴᒪᓂᑐᐤ ᑲ ᐃᔅᒋᔄᑦ ᒐ ᐸᒋ ᐃᑎᓴᐛᑦ᙮”
ᒋᓴᔅ ᑲ ᐊᔨᒧᑕᐧᒃ ᒐ ᐃᓯ ᐎᓯᒐᔨᑕᐧᒃ ᑭᔭ ᒐ ᓂᐱᑦ
ᒪᑎᔪᐤ 16.20-28; ᒪᕐᒃ 8.30-9.1
21ᐊᑯ ᒋᓴᔅ ᒂ ᐃᑎᓱᒪᑦ ᐅᒋᔅᒋᓄᐊᒧᐛᑭᓇ ᒐ ᐊᑲ ᐊᓂᔭ ᐎᑎᒧᐛᔨᒋ ᑯᑎᑲ ᐊᐛᔪᐛ᙮ 22ᐊᑯ ᒂ ᐃᑕᑦ, “ᐃᔪᐤ ᐅᑯᓯᓴᓐ ᐃᑕᔨᑕᑯᓂᔪᐤ ᒐᒋ ᒥᔅᑎ ᐛᐎᓯᒐᔨᑎᒥᐃᑯᑦ ᑭᔭ ᒐᒋ ᐊᑐᐛᔨᒥᑯᑦ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ, ᑭᔭ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐃᔪᐛ, ᑭᔭ ᐊᓂᔭᔪᐛ ᑲ ᒋᔅᑯᑎᒪᒐᔨᒋ ᐎᓱᐛᐅᓂᔪᐤ᙮ ᒋᑭ ᓂᐸᐊᑭᓄᐤ ᑭᔭ, ᒥᒄ ᒪᒃ ᓂᔅᑐ ᒋᓯᑲᐤ ᐃᔅᐱᔅ ᑲᐤ ᒋᑭ ᐱᒪᑎᓯᐤ᙮”
ᐊ ᓇᓴᐛᑭᓄᐅᑦ ᒋᓴᔅ
23ᐊᑯ ᒥᓯᐛ ᒂ ᐃᑕᑦ, “ᐊᐛᓐ ᐛ ᓇᓴᐅᒂ ᐊᑯᔅ ᒋᐸ ᐱᔅᑎᓂᒻ ᐊᓂᔭ ᐎᔾ ᑕᓐ ᐛ ᐃᓯ ᓂᓇᐊᔨᑎᒥᐃᓱᑦ, ᐊᓯᑯᒻ ᒋᓯᑲᐛ ᒋᐸ ᐅᑎᓇᐤ ᐅᒋᐱᔭᑎᑯᒪ ᑭᔭ ᓂᐸ ᐸᒋ ᓇᓴᐅᒄ᙮ 24ᐛᔅ ᐊᐛᓐ ᑲ ᐎ ᑭᓄᐛᔨᑎᒪᓱᑦ ᐅᐱᒪᑎᓯᐅᓐ ᒋᑭ ᐅᓂᑕᐤ᙮ ᐊᓐ ᒪᒃ ᐊᐛᓐ ᑲ ᐎ ᐱᔅᑎᓇᐧᒃ ᒥᓯᐛ ᒐᒂᔪᐤ ᑕᓐ ᑲ ᐎ ᐃᑐᑕᐧᒃ ᐛᐛᒡ ᑭᔭ ᐅᐱᒪᑎᓯᐅᓐ ᐊ ᐎ ᐸᒋ ᓇᓴᐅᑦ ᐊᐅᑯᓐ ᐊᓐ ᒐ ᒥᔭᑭᓄᐅᑦ ᐱᒪᑎᓯᐅᓂᔪᐤ᙮ 25ᐊᑯ ᒪᒃ ᐊᓐ ᐊᐛᓐ ᑲ ᐎ ᑭᓄᐛᔨᑕᐧᒃ ᐅᐱᒪᑎᓯᐅᓐ, ᓂᐱᒐ ᒪᒃ ᑕᓐᑕ ᒐᒋ ᐅᒋ ᐎᒋᐃᑯᑦ ᐊᑎ ᒋ ᐎᐧᑯᒋᑎᒪᓱᒐ ᒥᓯᐛ ᒐᒂᔪᐤ ᐅᑕ ᐊᔅᒋᒡ ᐎᔾ ᑕᓐ ᑲ ᐃᓯ ᓂᑐᐛᔨᑕᐧᒃ ᒐᒋ ᐃᓯ ᐊᔭᑦ ? 26ᐊᐛᓐ ᒪᒃ ᓴᒂᔨᒧᒐ ᓂᔾ ᐅᒋ ᑭᔭ ᓂᑦ ᐃᔨᒧᐅᓂᔪᐤ ᐅᒋ ᐊᐅᒄ ᒐ ᓴᒂᔨᒧᐊᑦ ᐃᔪᐤ ᐅᑯᓯᓴᓐ ᐃᔅᐱ ᒥᓐ ᑎᑯᓯᓂᔨᒐᓂ ᐅᒋᔅᑕᔨᑕᑯᓱᐅᓂᔨᒡ᙮ ᐊᑯᑕ ᒐ ᒋᔅᒐᔨᑕᒡ ᐊᐛᓐᒋ ᐊ ᐃᔅᐱᔅ ᒋᔅᑕᔨᑕᑯᓯᔨᒋ ᐃᔪᐤ ᐅᑯᓯᓴᓇ ᐛᔅ ᒋᑭ ᐛᐸᑎᔨᐛᐅᒡ ᐅᑕᐎᒪᐤ ᑭᔭ ᑲ ᐸᔭᒋᓯᒡ ᐊᓐᒋᓐᒡ ᐊ ᐃᔅᐱᔅ ᒋᔅᑕᔨᑕᑯᓯᔨᒋ᙮ 27ᑕᑈ ᒋᑦ ᐃᑎᓇᐛᐤ, ᑕᑈ ᐊ ᑕᒡ ᐅᑕ ᐊᐛᓐᒋ ᒐ ᐛᐸᑕᒡ ᒋᓴᒪᓂᑐᐤ ᐅᒋᓴᐅᒋᒪᐅᓂᔪᐤ ᒪᒂᒡ ᐊᔅᒄ ᐊ ᐱᒪᑎᓯᒡ ᐅᑕ ᐊᔅᒋᒡ᙮”
ᒋᓴᔅ ᑲ ᒂᔅᒋᓇᑯᓯᑦ
ᒪᑎᔪᐤ 17.1-8; ᒪᕐᒃ 9.2-8
Luke 9.28-36 (Transfiguration Year C)
28ᓴᓯᑲᓐ ᔭᓇᐤ ᑕᑐᐤ ᒋᓯᑲᐛ ᒋᓴᔅ ᐅᔭᔪᐤ ᑲ ᐃᔅᐱᔅ ᐊᔨᒧᑕᐧᒃ ᒋ ᔅᑐᑕᐊᐤ ᐱᑕᕋ, ᒠᓇ ᑭᔭ ᒋᒥᓴ ᐊᒋ ᐎᒐᐛᑦ ᐱᔅᑯᑎᓇᒡ ᐊᓐᑕ ᒐᒋ ᐊᔭᒥᐊᒡ᙮ 29ᒪᒂᒡ ᒪᒃ ᐊᓂᔭ ᐊ ᐊᔭᒥᐊᑦ ᐅᑕᔅᑎᒥᐧᒄ ᒋ ᒂᔅᒋᓇᑯᓂᔪᐤ ᑭᔭ ᐅᑦ ᐊᐱᒋᑕᐅᓇ ᓇᔅᒡ ᑕᑈ ᒋ ᐱᔭᑭᔅᒡ ᐛᐸᔪᐛ ᓇᔅᒡ ᐊᒋᐧᑲᔭᔅᑐᐛᔨᒋ᙮ 30ᓯᔅᒋᑯᒡ ᒪᒃ ᒋ ᐅᒋ ᓂᓯᔨᐛ ᓇᐸᐛ ᐊ ᐃᔨᒥᐃᑯᑦ ᒋᓴᔅ᙮ ᐊᐅᑯᓐᒡ ᐊᓂᔭᐧᑲ ᒧᓱᔅ ᑭᔭ ᐃᓚᐃᒐ᙮ 31ᐊᑯ ᒂ ᐊᔨᒧᑎᒧᐛᒡ ᒋᓴᓴ ᓴᔅ ᐊ ᐸᓱᓇᑯᓂᔨᒡ ᒐ ᓂᐱᔨᒋ ᐊᓐᑕ ᒋᕈᓯᓕᒥᒡ, ᐊᓂᔭ ᒋᓴᒪᓂᑐᐛ ᑲ ᐃᓯ ᐎᔅᑕᔨᒋ ᒐ ᐃᔅᐱᔨᒡ᙮ ᓇᔅᒡ ᒪᒃ ᐊ ᒥᔽᔅᑕᔨᒡ ᒋᒋᒋᓯᒄ ᐛᔅᑕᐅᓂᔪᐤ ᒋ ᐛᔅᑕᔪᐤ ᐊᓐᑕ ᐛᔅᑲ ᐊ ᑕᒡ᙮
32ᐱᑕᕐ ᑭᔭ ᐊᓐᒡ ᑯᑎᑭᒡ ᐊᐛᓐᒋ ᒋᓴᓴ ᑲᒋ ᐎᒐᐛᒡ ᒋ ᑯᐎᑯᓱᐅᒡ᙮ ᒋ ᐸᑯᐱᔪᒡ ᐃᔅᐱ ᒪᒃ ᐊᔭᐱᓯᐧᑯᓯᒡ ᒋ ᐛᐸᑎᒧᒡ ᐛᔅᑕᐅᓂᔪᐤ ᐛᔅᑲ ᒋᓴᓴ ᐊ ᑕᔨᒋ ᑭᔭ ᒋ ᐛᐱᒪᐅᒡ ᐊᓂᔭ ᓂᓱ ᓇᐸᐛ ᐊ ᐎᒋᑲᐳᔅᑕᑯᔨᒋ᙮ 33ᐃᔅᐱ ᒪᒃ ᐊᓐᒡ ᓇᐸᐅᒡ ᐛ ᓂᑭᑕᒡ ᒋᓴᓴ, ᐱᑕᕐ ᒋ ᐃᑕᐤ, “ᒋᔅᑯᑎᒪᒐᓱᐤ ᐊᔪᐛᒡ ᒥᔽᔨᑕᑯᓐ ᐅᑕ ᒐᒋ ᐃᑕᐛᐅᒐ᙮ ᓇᐃᒥᓇᓐ ᒪ ᒐᒋ ᐅᓯᑕᔭᒡ ᓂᔅᑐ ᒥᒋᐛᐸ, ᐸᐸᐃᒄ ᒐ ᐊᔭᔭᒄ, ᒋᔾ, ᒧᓱᔅ ᑭᔭ ᐃᓚᐃᒐ᙮” ᐱᑕᕐ ᒪᒃ ᓇᒪ ᓇᔅᒡ ᐅᒋ ᒋᔅᒐᔨᑎᒻ ᒐᒂᔪᐤ ᐅᔭᔪᐤ ᐛᒋ ᐃᔅᒋᔄᑦ᙮ 34ᒪᒂᒡ ᒪᒃ ᐊᔅᒄ ᐊ ᐃᔨᒥᑦ, ᑭᔅᑯᐅᓂᔎ ᒋ ᐅᒋ ᓄᑯᓯᔪᐛ ᓇᔅᒡ ᐊ ᐅᑲᔅᑕᔅᑲᑯᒡ᙮ ᐊᓐᒡ ᒪᒃ ᒋᔅᒋᓄᐊᒧᐛᑭᓐᒡ ᓇᔅᒡ ᑕᑈ ᒋ ᓴᒋᓱᐅᒡ ᐃᔅᐱ ᓇᔅᒡ ᐊ ᐊᑯᓇᐅᑯᒡ ᐊᓂᔭ ᑭᔅᑯᐅᓂᔎ᙮ 35ᐊᓐᑕ ᒪᒃ ᑭᔅᑯᐅᓂᔅᑯᒡ ᒋ ᐅᒋ ᐸᑎᒧᒡ ᐸᑕᑯᓱᐅᓂᔪᐤ, ᐊᐛᔪᐛ ᐊ ᐃᔅᒋᔄᔨᒋ, “ᐊᐅᒄ ᐅ ᓂᑯᔅ ᑲ ᓴᒋᐊᒃ᙮ ᓂᑐᑐᐛᐧᒄ᙮” 36ᐃᔅᐱ ᒪᒃ ᑲᒋ ᐃᓯ ᐃᔨᒥᑦ ᐊᓐ ᐊᐛᓐ, ᒋ ᐛᐱᒪᐅᒡ ᒋᓴᓴ ᐊ ᐸᐃᑯᑲᐳᔨᒋ᙮ ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᓇᒪ ᐅᒋ ᑎᐸᒋᒧᐅᒡ ᐅᔭᔪᐤ ᑕᓐ ᑲ ᐃᓯ ᐛᐸᑕᒡ ᐊ ᐃᔅᐱᔨᒡ ᒪᒂᒡ ᐊᓐᑕ᙮
ᒋᓴᔅ ᑲ ᒥᓏᒋᐊᑦ ᓇᐸᓴ ᒥᒋ ᐊᒐᒂ ᐊᒋ ᐱᒋᔅᑲᑯᔨᒋ
ᒪᑎᔪᐤ 17.14-18; ᒪᕐᒃ 9.14-27
37ᒥᓐ ᒪᒃ ᐎᔭᐱᓂᔨᒡ ᒋ ᓂᑎᒋᐛᐅᒡ ᐊᓂᔭ ᐱᔅᑯᑎᓇᔪᐤ, ᒋ ᒥᒐᑎᔪᐛ ᒪᒃ ᐊᐛᔪᐛ ᐊ ᐸᒋ ᓂᒋᐃᑯᑦ ᒋᓴᔅ᙮ 38ᐊᓐᑕ ᒪᒃ ᒪᒂᒡ ᐊ ᒥᒐᑎᓇᓄᐅᒡ ᒋ ᑕᑈᐤ ᐸᐃᒄ ᓇᐸᐤ ᐊ ᐃᑕᑦ ᐊᓂᔭ ᒋᓴᓴ, “ᒋᔅᑯᑎᒪᒐᓱᐤ, ᒋ ᐱᑯᓴᔨᒥᑎᓐ ᒐᒋ ᐎᒋᐃᑦ ᓂᑯᔅ, ᐛᔅ ᐊᐅᒄ ᒥᒄ ᐅ ᐊ ᐸᐃᑯᓯᑦ ᓂᑦ ᐊᐛᓯᒻ᙮ 39ᒪᓯᐃᑯᐤ ᓇᓂᑯᑎᓂᔾ ᒥᒋ ᐊᒐᒂ ᐊ ᐃᑐᑕᑯᑦ ᓯᔅᒋᑯᒡ ᒐᒋ ᐊᓯᒂᑦ᙮ ᐊᑯ ᒪᒃ ᑭᔭ ᐊ ᐅᒋᐱᑎᑯᑦ ᒪᓐ ᓇᔅᒡ ᐛᔅ ᒋ ᐱᔅᑕᐅᑕᑎᒻ᙮ ᓇᔅᒡ ᓂᓇᐧᑲᑕᔨᑎᒥᐃᑯᐤ ᐅᔭ ᒥᒋ ᐊᒐᒂ ᐊᑲ ᒪᒃ ᐎ ᓂᑭᑎᑯᑦ᙮ 40ᐊᑎ ᒪᒃ ᓂᒋ ᑯᒂᒋᒪᐅᒡ ᒋᒋᔅᒋᓄᐊᒧᐛᑭᓐᒡ ᒐᒋ ᐎᐎᑎᓴᐛᒡ ᐅᔭ ᒥᒋ ᐊᒐᒂ, ᓇᒪ ᒪᒃ ᐅᒋ ᐃᑐᑎᒧᒡ᙮”
41ᒋᓴᔅ ᒪᒃ ᒋ ᐃᑕᐤ ᐊᓂᔭ ᐃᔪᐛ ᐊᓐᑕ ᑲ ᑕᔨᒋ, “ᒋᔨᐛᐤ ᐊᓄᒡ ᑲ ᐱᒪᑎᓯᔭᒄ ᐊᑲ ᐊᔭᔭᒄ ᑕᑈᑎᒧᐅᓐ ᑭᔭ ᐊᑲ ᒂᔅᑲᑎᓯᔭᒄ, ᓇᒪ ᑭᔭ ᑯᐃᔅᒄ ᒋ ᐊᑎ ᐃᓯ ᐱᒪᑎᓯᓇᐛᐤ᙮ ᑕᓐ ᒐ ᐃᔅᐱᔅ ᑕᔭᓐ ᐅᑕ ᐊ ᑕᔭᒄ ᐃᔭᒄ ᒐᒋ ᓂᔅᑐᑎᒪᒄ ? ᑕᓐ ᒐ ᐃᔅᐱᔅ ᐊᓱᐛᐱᒥᑎᑯᒡ ᐊᑯ ᒐᒋ ᐊᔭᔭᒄ ᑕᑈᑎᒧᐅᓐ ? ᐸᓱᐛᐧᒄ ᐊᓐ ᓇᐸᔅ᙮”
42ᒪᒂᒡ ᒪᒃ ᐊ ᐸᒋ ᓇᑕᑦ ᐊᓂᔭ ᒋᓴᓴ ᐊᓐ ᓇᐸᔅ, ᒥᒋ ᐊᒐᒂ ᓇᔅᒡ ᒋ ᐛᐱᓂᑯᐤ ᐊᑯ ᒂ ᐃᑐᑕᑯᑦ ᒐᒋ ᐅᒋᐱᑎᑯᑦ᙮ ᒋᓴᔅ ᒪᒃ ᒋ ᒋᑕᐊᒧᐛᐤ ᐊᓂᔭ ᒥᒋ ᐊᒐᒂ ᒂ ᐃᑕᑦ ᒐᒋ ᓂᑭᑕᔨᒋ ᐊᓂᔭ ᓇᐸᓴ᙮ ᐊᑯᑕ ᒪᒃ ᑲ ᐊᑎ ᒥᓏᑎᓯᑦ ᐊᓐ ᓇᐸᔅ᙮ ᐊᑯ ᒋᓴᔅ ᒂ ᒋᐛᒥᔭᑦ ᐊᓂᔭ ᓇᐸᐛ ᐊᓂᔭᔪᐛ ᐅᑯᓯᔪᐛ᙮ 43ᒥᓯᐛ ᒪᒃ ᐊᓐᒡ ᐃᔪᒡ ᒋ ᒪᒥᔅᑲᑕᔨᑎᒥᐃᑯᐅᒡ ᒋᓴᒪᓂᑐᐛ ᐅᓱᐧᑲᑎᓯᐅᓂᔪᐤ᙮
ᒋᓴᔅ ᒥᓐ ᑲ ᐊᔨᒧᑕᐧᒃ ᒐ ᓂᐸᐊᑭᓄᐅᑦ
ᒪᑎᔪᐤ 17.22-23; ᒪᕐᒃ 9.30-32
ᒪᒂᒡ ᒪᒃ ᐊ ᒪᒥᔅᑲᑕᔨᑎᒥᐃᑯᒡ ᑕᓐ ᑲ ᐃᓯ ᐃᑐᑎᒥᔨᒋ ᒋᓴᓴ, ᒋᓴᔅ ᒋ ᐃᔨᒪᐊᐤ ᐅᒋᔅᒋᓄᐊᒧᐛᑭᓇ ᐊ ᐃᑕᑦ, 44“ᒋᔅᒋᓯᒄ ᔭᐃᑕᔾ ᑕᓐ ᒐ ᐃᑎᑎᑯᒡ᙮ ᒋᑭ ᐱᔅᑎᓇᑭᓄᐎᒡ ᐃᔪᒡ ᒐᒋ ᐃᑐᑐᐛᒡ ᑕᓐ ᐛ ᐃᑐᑐᐛᒡ ᐃᔪᐤ ᐅᑯᓯᓴᓇ᙮” 45ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᓇᒪ ᐅᒋ ᓂᔅᑐᑎᒧᒡ᙮ ᓇᒪ ᐅᒋ ᒋᔅᒐᔨᑎᒧᒡ ᑕᓐ ᑲ ᐎ ᐃᓯ ᐎᑎᒪᑯᒡ ᒋᓴᓴ, ᐛᔅ ᐊᔅᒄ ᓇᒪ ᐅᒋ ᒥᔭᑭᓄᐎᒡ ᒐᒋ ᓂᔅᑐᑕᒡ᙮ ᒋ ᓴᒋᓱᐅᒡ ᒪᒃ ᒐᒋ ᑯᒂᒋᒐᒧᒡ ᒐᒂᔪᐤ ᐅᔭ ᑲ ᐃᔅᒋᔄᔨᒋ᙮
ᐊᓐ ᐊᐛᓐ ᒪᐅᒡ ᒐ ᒋᔅᑕᔨᑕᑯᓯᑦ ᐊᓐᑕ ᐊ ᑎᓯᒡ
ᒪᑎᔪᐤ 18.1-5; ᒪᕐᒃ 9.33-37
46ᒋᔅᒋᓄᐊᒧᐛᑭᓐᒡ ᒪᒃ ᒋ ᒥᒋᐱᔪᒡ ᐊ ᒋᐧᑲᒥᑐᒡ ᐊᐛᓐ ᐊᓐᑕ ᐊ ᑎᓯᒡ ᒪᐅᒡ ᒐ ᒋᔅᑕᔨᑕᑯᓯᑦ᙮ 47ᒋᓴᔅ ᒪᒃ ᒋ ᒋᔅᒐᔨᒪᐤ ᑕᓐ ᐊ ᐃᓯ ᒪᒥᑐᓇᔨᑎᒥᔨᒋ, ᐊᑯ ᐛᑎᓇᑦ ᐊᐛᓴ ᐊ ᐊᐱᓯᓯᔨᒋ ᐊᑯ ᒂ ᓂᐳᐊᑦ ᐊᓐᑕ ᐅᐱᒪ ᐊ ᑕᑦ᙮ ᒂ ᐃᑕᑦ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ, 48“ᐊᐛᓐ ᐊ ᐅᑎᓇᑦ ᐸᐃᒄ ᐅᔭ ᐊᐛᓴ ᓂᑦ ᐃᓯᓂᐧᑲᓱᐅᓂᒡ ᐅᒋ, ᒧᔭᒻ ᑭᔭ ᓂᔾ ᐊ ᐅᑎᓂᑦ ᐊᑯᓐ ᐊ ᐃᓯᓇᑯᓂᔨᒡ᙮ ᐊᓐ ᒪᒃ ᐊᐛᓐ ᑲ ᐅᑎᓂᑦ ᓇᒪᔭᔪᐤ ᓂᔾ ᑲ ᐅᑎᓂᑦ, ᐊᓂᔭᔪᐛ ᑲ ᐸᒋ ᐃᑎᓴᐅᔨᒋ ᐊᐅᒄ ᐊᓂᔭ ᐛᑎᓇᑦ᙮ ᐛᔅ ᐊᓐ ᐊᐛᓐ ᒪᐅᒡ ᔭᓯᒄ ᑲ ᐃᑕᔨᑕᑯᓯᑦ ᐊᓐᑕ ᐊ ᑎᓯᔭᒄ ᐊᐅᑯᓐ ᐊᓐ ᒪᐅᒡ ᒐᔅᑕᔨᑕᑯᓯᑦ᙮”
ᐊᓐ ᐊᐛᓐ ᐊᑲ ᓂᔅᑯᔅᑕᑕᐧᒄ ᒋ ᐎᒋᐃᑯᓄᐤ
ᒪᕐᒃ 9.38-40
49ᐊᑯ ᒠᓐ ᒂ ᐃᑕᑦ, “ᒋᔅᑯᑎᒪᒐᓱᐤ, ᓂᒋ ᐛᐱᒪᓇᓐ ᓇᐸᐤ ᐊ ᐎᐎᑎᓴᐛᑦ ᒥᒋ ᐊᒐᒂ ᒋᑦ ᐃᓯᓂᐧᑲᓱᐅᓂᔪᐤ ᐊ ᐊᐱᒋᑕᑦ, ᐊᑯ ᒂ ᒋᑕᐊᒧᐎᒋᑦ, ᐛᔅ ᐊᓐ ᑕᐸ ᐅᑕ ᒋᔭᓄᐤ ᐊ ᑕᐛᐧᒄ ᐃᓯ ᐎᒋᐃᐛᐤ᙮”
50ᒋᓴᔅ ᒂ ᐃᑕᑦ, “ᐊᑲᐎᔾ ᒋᑕᐊᒧᐛᐧᒄ᙮ ᐛᔅ ᐊᓐ ᐊᐛᓐ ᐊᑲ ᓂᔅᑯᔅᑕᑕᐧᒄ ᒋ ᐎᒋᐃᑯᓄᐤ᙮”
ᒋᓴᔅ ᑲ ᐃᑐᑕᑦ ᒋᕈᓯᓕᒥᒡ
Luke 9.51-62 (Proper-8 Year C)
51ᐊᔭᔅᒃ ᒪᒃ ᒋ ᐊᑎ ᐸᓱᓇᑯᓂᔪᐤ ᒋᓴᔅ ᒋᒋᒋᓯᑯᒡ ᒐ ᐃᓯ ᐅᑎᓇᑭᓄᐅᑦ ᐊᑯ ᓇᔅᒡ ᑲ ᐃᑕᔨᑎᒥᐃᑯᑦ ᔭᐃᑕᔾ ᒐᒋ ᐃᑐᑕᑦ ᒋᕈᓯᓕᒥᒡ᙮ ᐊᑯ ᒪᒃ ᒂ ᔅᑐᑕᑦ᙮ 52ᒪᒂᒡ ᒪᒃ ᐊᓂᔭ ᐊ ᐊᑎ ᐱᒧᑕᑦ ᒋ ᓂᑲᓂᑎᓴᐛᐤ ᐊᐛᔪᐛ ᐊᓐᑕ ᐊᓂᔭ ᐅᑕᓇᔪᐤ ᓴᒪᕆᔭ ᐃᔪᐛ ᑲ ᑕᔨᒋ, ᒐᒋ ᐊᔭᔅᑯᔅᑕᔨᒋ ᑕᓐᑕ ᒐᒋ ᑕᑦ ᐊᓂᔭ ᒐ ᑎᐱᔅᑲᔨᒡ᙮ 53ᒥᒄ ᒪᒃ ᐊᓂᔭᔪᐛ ᐃᔪᐛ ᐊᓐᑕ ᑲ ᑕᔨᒋ ᓇᒪ ᐅᒋ ᐎ ᐱᑎᑲᐃᑯᐤ ᐛᔅ ᒋ ᒋᔅᒐᔨᒥᑯᐤ ᒋᕈᓯᓕᒥᒡ ᐊ ᐎ ᐃᑐᑕᑦ᙮ 54ᐃᔅᐱ ᒪᒃ ᐊᓐᒡ ᒋᔅᒋᓄᐊᒧᐛᑭᓐᒡ ᒋᒥᔅ ᑭᔭ ᒠᓐ ᑲ ᐸᑕᒡ ᐅᔭ ᒋ ᐃᑕᐅᒡ ᐊᓂᔭ ᒋᓴᓴ, “ᐅᑎᐸᔨᒋᒐᐤ, ᒋ ᓂᑐᐛᔨᒥᓇᓐ ᐊ ᒐᒋ ᓂᑐᐛᔨᑎᒪᒡ ᐃᔅᑯᑕᐤ ᒋᒋᒋᓯᑯᒡ ᒐᒋ ᐅᒋᐱᔨᒡ ᒐᒋ ᓂᓱᐅᓇᒋᐃᑯᒡ ᐊᓐᒡ ᐃᔪᒡ ᒧᔭᒻ ᐊᓂᔭ ᐃᓚᐃᒐ ᑲ ᐃᑐᑕᐧᒃ ?” 55ᒋᓴᔅ ᒪᒃ ᒋ ᒂᔅᒋᑲᐳᔅᑎᐛᐤ ᒂ ᒋᑕᐊᒧᐛᑦ ᐅᔭ ᐊ ᐃᓯ ᐃᔨᒥᔨᒋ᙮ ᒋ ᐃᑕᐤ, “ᐅ ᐊ ᐃᑕᔨᑎᒪᒄ ᓇᒪ ᒋᓴᒪᓂᑐᐤ ᐊ ᑕᑦ ᐅᒋᐱᔪᐤ, 56ᐛᔅ ᐃᔪᐤ ᐅᑯᓯᓴᓐ ᓇᒪ ᐅᒋ ᑎᑯᓯᓐ ᒐᒋ ᓂᓱᐅᓇᒋᑕᐛᑦ ᐊᐛᔪᐛ ᐅᐱᒪᑎᓯᐅᓂᔪᐤ, ᒋ ᑎᑯᓯᓐ ᒐᒋ ᐱᒪᒋᐃᐛᑦ᙮” ᐊᑯ ᐊᓐᑕ ᑯᑎᒋᔪᐤ ᐅᑕᓇᔪᐤ ᒂ ᐃᑐᑕᒡ᙮
ᑕᓐ ᐊ ᐃᑕᔨᑕᒂᒡ ᐊ ᓇᓴᐛᑭᓄᐅᑦ ᒋᓴᔅ
ᒪᑎᔪᐤ 8.19-22
57ᒪᒂᒡ ᒪᒃ ᐊᓂᔭ ᐊ ᐱᒧᑕᒡ ᒋ ᓂᒋᔅᑲᑯᐅᒡ ᓇᐸᐛ᙮ ᐊᑯ ᐊᓐ ᓇᐸᐤ ᒂ ᐃᑕᑦ ᐊᓂᔭ ᒋᓴᓴ, “ᒋᑭ ᐱᐸᐎᒐᐅᑎᓐ ᑕᓐᑕ ᒐ ᐃᑐᑕᐅᓇ᙮”
58ᐊᑯ ᒋᓴᔅ ᒂ ᐃᑕᑦ, “ᒪᒐᓱᐅᒡ ᑎᑯᓂᔪᐛ ᐅᐛᑎᑯᐛᐛ, ᐱᔭᓯᓯᒡ ᑭᔭ ᑎᑯᓂᔪᐛ ᐅᐎᒋᔅᑐᓄᐛᐛ, ᒥᒄ ᒪᒃ ᐃᔪᐤ ᐅᑯᓯᓴᓐ, ᓇᒪ ᐊᔭᐤ ᐊᓐᑕ ᒐᒋ ᐛᐛᔨᓯᓐᑦ ᒐᒋ ᐊᔅᑕᔭᔅᑯᓯᑦ᙮”
59ᐊᑯ ᒋᓴᔅ ᒂ ᐃᑕᑦ ᑯᑎᑲ ᓇᐸᐛ, “ᐸᒋ ᐎᒐᐎ᙮” ᐊᑯ ᐊᓐ ᓇᐸᐤ ᒂ ᐃᑕᑦ ᒋᓴᓴ, “ᐅᑎᐸᔨᒋᒐᐤ, ᐱᔅᑎᓂ ᐸᑎᒪ ᒐᒋ ᓇᐃᐧᑯᐅᒃ ᓄᑕᐎᔾ ᑲ ᐳᓂᐱᒪᑎᓯᑦ ᑭᔭ ᐃᔭᒄ ᒐ ᐎᒐᐅᑕᓐ᙮”
60ᐊᑯ ᒋᓴᓴ ᒂ ᐃᑎᑯᑦ, “ᐊᓐᒡ ᒧᔭᒻ ᑲ ᓂᐱᒡ ᑲ ᐃᑕᔨᑕᑯᓯᒡ ᐃᔪᒡ ᐊᑯᔅ ᒋᑭ ᓇᐃᐧᑯᐛᐅᒡ ᐊᓂᔭ ᐅᑦ ᐃᔨᒧᐛᐛ ᑲ ᓂᐱᔨᒋ᙮ ᒋᔾ ᒪᒃ, ᒪᒋ ᒐ ᐛᐎᑎᒧᑦ ᒋᓴᒪᓂᑐᐤ ᐅᒋᓴᐅᒋᒪᐅᓐ᙮”
61ᒥᓐ ᑯᑎᒃ ᓇᐸᐤ ᒋ ᐃᑕᐤ ᐊᓂᔭ ᒋᓴᓴ, “ᐅᑎᐸᔨᒋᒐᐤ, ᒋᑭ ᐱᐸᐎᒐᐅᑎᓐ, ᒥᒄ ᒪᒃ ᓂᔅᑎᒻ ᓂᑭ ᒋᐛᓐ ᐊᑯ ᒐ ᐛᒋᔭᒥᒂᐤ ᓂᒋᐃᑯᒡ ᑭᔭ ᓂᐧᑲᓂᓯᒡ᙮”
62ᐊᑯ ᒋᓴᔅ ᒂ ᐃᑕᑦ, “ᐊᐛᓐ ᓴᔅ ᐊ ᒋᒋᐱᔨᑕᑦ ᐊ ᐊᑐᔅᑯᐛᑦ ᒋᓴᒪᓂᑐᐛ, ᒧᔅ ᒪᒃ ᐊ ᒋᐛᒪᒥᑐᓇᔨᑕᐧᒃ ᐛᔅᑭᒡ ᐅᑦ ᐃᑕᑎᓯᐅᓐ ᓇᒪ ᐃᑕᔨᑕᑯᓱᐤ ᒐᒋ ᐊᑐᔅᒐᔅᑎᒺᑦ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ᙮”
Currently Selected:
ᓗᒃ 9: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
