ᒪᕐᒃ 3
3
ᓇᐸᐤ ᑲ ᒪᔅᑲᔨᒡ ᐅᑎᒋᔾ
ᒪᑎᔪᐤ 12.9-14; ᓗᒃ 6.6-11
1ᐸᐃᒂᐤ ᒥᓐ ᒋᓴᔅ ᐊ ᐱᒐᑦ ᒍᐤ ᐊᔭᒥᐊᐅᒋᐛᐱᒡ ᒋ ᑕᔪᐛ ᐊᓐᑕ ᓇᐸᐛ ᐊ ᒪᔅᑲᔨᒡ ᐅᑎᒋᔪᐤ᙮ 2ᒋ ᑕᔪᐛ ᑭᔭ ᐊᓐᑕ ᐊᐛᔪᐛ ᐊ ᐎ ᓇᓂᑐᐤ ᒪᒥᓯᒥᑯᑦ ᒋᓴᔅ ᐊᑯ ᓇᔅᒡ ᑲ ᓂᓇᑭᑐᐛᔨᒥᑯᑦ ᒐᒋ ᒥᓏᒋᐃᐛᒂ ᐊ ᐊᔭᒥᐊᐅᒋᓯᑲᔨᒡ᙮ 3ᒋᓴᔅ ᒋ ᐃᑕᐤ ᐊᓂᔭ ᓇᐸᐛ ᑲ ᒪᔅᑲᔨᒡ ᐅᑎᒋᔪᐤ, “ᐊᔅᑎᒻ ᐅᑕ ᓂᑲᓄᒡ᙮”
4ᐊᑯ ᒋᓴᔅ ᒂ ᑯᒂᒋᒪᑦ ᐊᓂᔭ ᐃᔪᐛ ᐊᓐᑕ ᐊ ᑕᔨᒋ, “ᑕᓐ ᐊᑎᔅᑕᒡ ᐎᓱᐛᐅᓂᒡ ᒐᒋ ᐃᑐᑎᒪᒄ ᐊ ᒍᐤ ᐊᔭᒥᐊᐅᒋᓯᑲᒡ ? ᑕᓐ ᒪᐅᒡ ᒪᔽᓯᒡ ᒐᒋ ᐃᑐᑎᒥᓐ ᒐᒂᓐ ? ᐊ ᒥᔪᑐᑎᒥᓐ ᒪᒃ ᐊ ᒥᒋᑐᑎᒥᓐ, ᐊ ᐱᒪᒋᑕᔨᓐ ᒪᒃ ᐊ ᓂᓱᐅᓇᒋᑕᔨᓐ ?” ᐊᓐᒡ ᒪᒃ ᐊᓐᑕ ᑲ ᑕᒡ ᓇᒪ ᓇᔅᒡ ᐅᒋ ᒋᑐᒡ᙮
5ᒋᓴᔅ ᒋ ᒋᔄᓱᐤ ᐊ ᑭᓄᐛᐱᒪᑦ ᑭᔭ ᒋ ᒥᓯᒥᑕᐃᔅᑲᑯᐤ ᐊᓂᔭ ᐊ ᓯᐱᑎᒥᔨᒋ᙮ ᐊᑯ ᒂ ᐃᑕᑦ ᐊᓂᔭ ᓇᐸᐛ ᑲ ᒪᔅᑲᔨᒡ ᐅᑎᒋᔪᐤ, “ᓴᑐᐱᔨᑕ ᔅᑎᒋᔾ᙮” ᒋ ᓴᑐᐱᔨᑕᐤ ᒪᒃ ᐊᓐ ᓇᐸᐤ ᐊᓂᔭ ᐅᑎᒋᔾ, ᑭᔭ ᑲ ᒥᓏᒋᑕᑭᓄᐎᒡ ᐊᓂᔭ ᐅᑎᒋᔾ, ᒧᔭᒻ ᐊᓂᔭ ᑯᑎᒋᔪᐤ ᐅᑎᒋᔾ ᑲ ᐃᓯ ᒥᔽᔨᒡ ᐊᐅᑯᓐ ᑲ ᐃᓯᓇᑯᓂᔨᒡ ᐊᓂᔭ ᐅᑎᒋᔾ ᑲ ᒪᔅᑲᔨᒡ᙮
6ᐊᑯ ᐊᓐᒡ ᐸᕆᓯᔨᒡ ᒋ ᐊᑎ ᐎᐎᔪᒡ ᐊᓐᑕ ᒍᐤ ᐊᔭᒥᐊᐅᒋᐛᐱᒡ᙮ ᐊᑯ ᑎᐛᒡ ᑲ ᓂᑐᐛᐱᒪᒡ ᐊᓂᔭᔪᐛ ᐊᐛᔪᐛ ᐊᕈᑕ ᐅᑦ ᐊᐱᒋᐊᑭᓂᔪᐛ ᐊᑯ ᒂ ᒪᒧᐎᒡ᙮ ᒋ ᐊᔨᒧᑎᒧᒡ ᑕᓐ ᒋᐸ ᒋ ᐃᑐᐅᒡ ᒐᒋ ᓂᐸᐊᒡ ᒋᓴᓴ᙮
ᓯᓱᒡ ᓴᑲᐃᑭᓂᒡ ᑲ ᒥᒐᑎᓇᓄᐎᒡ ᒋᓴᔅ ᐊ ᓂᑐᑐᐛᑭᓄᐅᑦ
7ᒋᓴᔅ ᒋ ᔅᑐᑕᐤ ᐊ ᐎᒐᐅᑯᑦ ᐅᒋᔅᒋᓄᐊᒧᐛᑭᓇ, ᐊᑯ ᐊᓐᑕ ᑲᓕᓕ ᓴᑲᐃᑭᓂᒡ ᑲ ᐃᑐᑕᒡ᙮ ᒥᒐᑦ ᒪᒃ ᐊᐛᔪᐛ ᒋ ᓇᓴᐅᑯᐅᒡ᙮ ᓂᓇᐧᑯᐤ ᒋ ᐅᑐᑕᔪᐛ, ᑲᓕᓕᒡ ᒋ ᐅᑐᑕᔪᐛ ᑭᔭ ᒍᑎᔭᒡ, 8ᑭᔭ ᒋᕈᓯᓕᒥᒡ, ᐃᑐᒥᔭᒡ, ᑭᔭ ᐊᑲᒥᒡ ᐊᓂᔭ ᒠᕐᑕᓐ ᓯᐱᔪᐤ ᒋ ᐅᑐᑕᔪᐛ᙮ ᑭᔭ ᑕᐃᕋ ᑭᔭ ᓴᐃᑐᓐ ᑲ ᐃᓯᓂᐧᑲᑕᔨᒋ ᐅᑕᓇᐛ ᒋ ᐅᑐᑕᔪᐛ᙮ ᒋ ᐸᑎᒧᒡ ᐅᒡ ᐊᐛᓐᒋ ᒥᓯᐛ ᑕᓐ ᑲ ᐃᑎᔨᒋ ᒋᓴᓴ ᐊᑯ ᒂ ᐎ ᐸᒋ ᓂᑐᑐᐛᒡ᙮ 9ᒋᓴᔅ ᒋ ᐃᑕᐤ ᐅᒋᔅᒋᓄᐊᒧᐛᑭᓇ ᒐᒋ ᐊᔭᔅᑯᔅᑕᔨᒋ ᐅᐤᑎᔪᐤ ᒐᒃ ᓂᑐᐛᔨᑕᑯᓂᔨᒐ ᒐᒋ ᐳᓯᑦ ᐛᓴ ᓯᑎᔅᑲᑯᒐ ᐊᐛᔪᐛ᙮ 10ᐛᔅ ᐊᓂᔭ ᒥᒐᑦ ᐊᐛᔪᐛ ᐊᒋ ᒥᓏᒋᐊᑦ ᐊᑯ ᒥᒐᑦ ᑯᑎᑲ ᐊᐛᔪᐛ ᓂᓇᐧᑯᐤ ᐊ ᐃᑕᔅᐱᓇᔨᒋ ᒂ ᐸᒋ ᑯᐧᑯᓂᑐᔨᒋ ᐊ ᐎ ᑕᒋᓂᑯᑦ᙮ 11ᒥᒋ ᐊᒐᐧᑯᒡ ᒪᒃ ᐛᔅ ᒧᔭᒻ ᐎᔭᐱᒪᒡ ᒋᓴᓴ ᒋ ᐃᑐᑐᐛᐅᒡ ᐊᓂᔭᔪᐛ ᐊᐛᔪᐛ ᑲ ᐱᒋᔅᑯᐛᒡ ᒐᒋ ᐸᒋᓯᓂᔨᒋ ᐅᑎᔅᑯᐤ ᒋᓴᓴ ᐊ ᑕᔨᒋ ᐊᑯ ᒂ ᐅᒋ ᑕᑈᒡ ᐊᓐᒡ ᒥᒋ ᐊᒐᐧᑯᒡ ᐊ ᐃᔅᒋᔄᒡ, “ᐊᐅᒄ ᒋᔾ ᒋᓴᒪᓂᑐᐤ ᐅᑯᓴ᙮” 12ᒋᓴᔅ ᒪᒃ ᓱᒃ ᒋ ᐃᔨᒪᐊᐤ ᐊ ᐃᑕᑦ ᒐ ᐊᑲ ᐎᑎᒧᐛᔨᒋ ᐊᐛᔪᐛ ᐊᐛᓐ ᐊ ᐊᐎᑦ᙮
ᒋᓴᔅ ᑲ ᐅᑎᓇᑦ ᓂᓱᓴᑉ ᐊᑈᔅᑕᓇ
ᒪᑎᔪᐤ 10.1-4; ᓗᒃ 6.12-16
13ᐊᑯ ᒋᓴᔅ ᑲ ᓴᑭᒋᐛᑦ ᐱᔅᑯᑎᓇᔪᐤ᙮ ᐊᑯᑕ ᑲ ᐎᓴᒪᑦ ᐊᓂᔭ ᑲ ᐅᑎᓇᑦ᙮ ᒋ ᓇᑎᑯᐤ ᒪᒃ᙮ 14ᐊᑯ ᓂᓱᓴᑉ ᐛᑎᓇᑦ ᒐᒋ ᐱᐸᐎᒐᐅᑯᑦ ᑭᔭ ᒐᒋ ᒋᑎᓴᐛᑭᓄᔨᒋ ᒐᒋ ᑭᒐᔅᒋᒧᔨᒋ᙮ 15ᑭᔭ ᒋ ᒥᔭᐤ ᑎᐸᔨᒋᒐᐅᓂᔪᐤ ᒐᒋ ᐎᐎᑎᓴᐛᔨᒋ ᒥᒋ ᐊᒐᒂ᙮ 16ᒪᐅᔭᔪᐛ ᑲ ᐅᑎᓇᑦ, ᓴᐃᒥᓐ, ᐊᐅᑯᓐ ᐅᔭ ᐱᑕᕐ ᑲ ᐃᓯᓂᐧᑲᑕᑦ ᒋᓴᔅ, 17ᐊᑯ ᒥᓐ ᒋᒥᔅ, ᓴᐱᑎ ᐅᑯᓯᔪᐛ, ᑭᔭ ᒠᓇ, ᒋᒥᔅ ᐎᐧᑲᓂᓴ᙮ ᐅᔭ ᒋᒥᓴ ᑭᔭ ᒠᓇ ᑈᓇᕐᒋᔅ ᒋ ᐃᓯ ᓂᔅᐱᐎᐊᐤ ᒋᓴᔅ᙮ ᐅᔭ ᒪᒃ ᑲ ᐃᓯ ᓂᔅᐱᐎᐊᑦ ᓂᒥᔅᒍᐅᒡ ᐅᑯᓱᐛᐛ ᐃᓯ ᐱᔭᑭᔅᒋᑕᑯᑕᑭᓄᐅᔪᐤ᙮ 18ᐊᑯ ᒥᓐ ᐅᔭ ᐛᑎᓇᑦ, ᐊᓐᑎᕈ, ᐱᓕᑉ, ᐸᕐᑥᓚᒥᔪ, ᒪᑎᔪᐤ, ᑥᒥᔅ, ᑭᔭ ᒋᒥᔅ᙮ ᐅ ᒪᒃ ᒋᒥᔅ, ᐊᓪᐱᔭᔅ ᒋ ᐃᓯᓂᐧᑲᓱᔪᐛ ᐅᑕᐎᔭ᙮ ᑕᑎᔭᔅ ᒋ ᐃᓯᓂᐧᑲᓱᐤ ᒥᓐ ᑲ ᐅᑎᓇᑭᓄᐅᑦ, ᐊᑯ ᒥᓐ ᑯᑎᒃ ᓴᐃᒥᓐ ᑲ ᐊᔭᒥᐊᐛᑎᓯᑦ ᑲ ᐃᓯᓂᐧᑲᑕᑭᓄᐅᑦ, 19ᐊᑯ ᒪᒃ ᒍᑎᔅ ᐃᔅᑲᕆᔭᑦ ᐊᓐ ᒐ ᐎᔭᓯᐱᔅᑎᓇᑦ ᒋᓴᓴ, ᐊᐅᑯᔪᐤ ᐅᔭ ᒥᓐ ᑲ ᐅᑎᓇᑦ᙮
ᑕᓐᑕ ᑲ ᐅᑎᓇᐧᒃ ᒋᓴᔅ ᐅᒥᔅᑯᓯᐅᓐ
ᒪᑎᔪᐤ 12.22-32; ᓗᒃ 11.14-23; 12.10
20ᐊᑯ ᒂ ᒋᐛᑦ ᒋᓴᔅ ᑕᓐᑕ ᐊᓂᔭ ᒪᒂᒡ ᑲ ᑕᑦ᙮ ᐊᑯ ᒥᓐ ᒂ ᒥᒐᑎᔨᒋ ᐊᐛᔪᐛ ᐊ ᐸᒋ ᒪᒧᐎᔨᒋ᙮ ᒐᒃ ᓇᒪ ᐛᐛᒡ ᐅᒋ ᐃᔅᐱᓯᔪᒡ ᒋᓴᔅ ᑭᔭ ᐅᒋᔅᒋᓄᐊᒧᐛᑭᓇ ᒐᒋ ᒥᒋᓱᒡ᙮ 21ᐃᔅᐱ ᒪᒃ ᐊᓂᔭᔪᐛ ᑲ ᐎᐧᑲᓂᓯᑦ ᐱᔭᑎᒥᔨᒋ ᐅᔭ ᒋ ᓂᑐᐛᐱᒥᑯᐤ ᒐᒋ ᔅᑐᑕᐃᑯᑦ ᐊᓐᑕ ᐅᒋ ᐛᔅ ᒋ ᐃᑕᔨᒥᑯᐤ ᐊᐛᔪᐛ ᐊᑲ ᑯᐃᔅᑯᑯᑕᔨᒡ ᐅᒥᑐᓇᔨᒋᑭᓐ᙮
22ᑭᔭ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒪᒂᒡ ᒋ ᑕᐅᒡ ᐊᓐᑕ᙮ ᒋᕈᓯᓕᒥᒡ ᒋ ᐅᑐᑕᐅᒡ᙮ ᒋ ᐃᑕᐅᒡ ᒪᒃ, “ᐸᐃᓪᓯᐳᓪ, ᒥᒋ ᐊᒐᐧᑯᒡ ᐅᒋᒪᒧᐛᐛ ᐱᒋᔅᑲᑯᐤ᙮ ᐊᐅᑯᓂ ᐊᓂᔭᔪᐛ ᒪᔨᑯᑦ ᒥᑕᐅᓂᔪᐤ ᒐᒋ ᐎᐎᑎᓴᐛᑦ ᒥᒋ ᐊᒐᒂ᙮”
23ᐊᑯ ᒋᓴᔅ ᒂ ᐎᓴᒪᑦ ᐊᑯ ᒂ ᐃᔨᒪᐊᑦ ᒋᔅᑯᑎᒪᒐᐤ ᑎᐸᒋᒧᐅᓇ ᐊ ᐊᐱᒋᑕᑦ, “ᑕᓐᑕ ᒐᒋ ᐅᒋ ᐎᐎᑎᓴᐛᑦ ᒥᒋᒥᓂᑐᐤ ᒥᒋᒥᓂᑐᐛ ? 24ᐛᔅ ᒧᔭᒻ ᐊᐛᓐᒋ ᐸᐃᒄ ᐊᔅᒋᔪᐤ ᑲ ᐅᒋᒡ ᒥᒋᐱᔨᑐᑥᐛ ᓇᒪ ᓇᔅᒡ ᒋᑭ ᐅᒋ ᒥᔪᐱᔪᐅᒡ ᐊᓐᑕ ᐅᑦ ᐊᔅᒋᐛᒡ᙮ 25ᒪᒃ ᐸᐃᒄ ᐅᑕᓇᐤ ᐊᐛᓐᒋ ᒥᒋᐱᔨᑐᑥᐛ ᓇᒪ ᓇᔅᒡ ᒋᑭ ᐅᒋ ᒥᔪᐱᔪᐅᒡ᙮ 26ᒥᒋᒥᓂᑐᐤ ᒪᒃ ᒧᔭᒻ ᐊ ᓂᔅᑯᔅᑕᓱᑦ ᐃᓯᓇᑯᓯᒐ, ᓇᔅᒡ ᐊ ᑕᑎᐸᓂᐃᓱᑦ ᓇᒪ ᒋᑭ ᒋ ᐃᓯᑲᐳᐤ᙮ ᒋᑭ ᐱᑯᐱᔪᐤ ᐅᒋᒪᐅᓐ᙮ 27ᓇᒪ ᒥᒄ ᒋᑭ ᒋ ᐃᓯ ᐱᒐᐛᐤ ᐊᐛᓐ ᐊ ᓱᓯᔨᒋ ᓇᐸᐛ ᐎᒋᔨᒡ ᒐᒋ ᓂᑐ ᑭᒐᒧᑎᒧᐛᑦ, ᐸᑐᔅ ᒪᑯᐱᑕᒐ ᐊᑯ ᐃᔭᒄ ᒐᒋ ᐅᑎᓂᒺᑦ ᑕᓐ ᐊ ᐃᓯ ᑎᐱᔨᐛᐅᓯᔨᒋ᙮”
28“ᑕᑈ ᐛᔅ ᐊᓐ ᒋᑦ ᐃᑎᓇᐛᐤ, ᒋᑭ ᐛᐸᔨᑎᒧᐛᑭᓄᐎᒡ ᐊᐛᓐᒋ ᒥᓯᐛ ᐅᒥᒋᑥᐅᓄᐛᐛ ᑭᔭ ᑕᓐ ᐊ ᐃᓯ ᒥᒋ ᐊᔨᒧᒪᒡ ᐊᐛᔪᐛ᙮ 29ᒥᒄ ᒪᒃ ᐊᓐ ᐊᐛᓐ ᒐ ᐸᔅᑕᒪᒂ ᑲ ᐸᔭᒋᓯᔨᒋ ᐊᒐᒂ ᓇᒪ ᓂᑕ ᒋᑭ ᐅᒋ ᐛᐸᔨᑎᒧᐛᑭᓄᐤ᙮ ᑲᒋᒡ ᒋᑭ ᓂᓱᐅᓇᒋᒪᑭᓄᐤ ᐅᔭ ᐊ ᐃᓯ ᒥᒋᑐᑕᐧᒃ᙮”
30ᐊᔪᐅᒄ ᐅᔭ ᑲ ᐃᓯ ᐎᑎᒧᐛᑦ ᒋᓴᔅ ᐊᓂᔭᔪᐛ ᐊᔭᒥᐊᐅ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ ᐛᔅ ᒋ ᐃᑎᑯᐤ ᐊ ᐱᒋᔅᑲᑯᑦ ᒥᒋ ᐊᒐᒂ᙮
ᐊᐛᔪᐛ ᒋᓴᔅ ᐊ ᐅᑲᐎᔨᑦ ᑭᔭ ᐊᐛᔪᐛ ᐊ ᐎᐧᑲᓂᓯᑦ
ᒪᑎᔪᐤ 12.46-50; ᓗᒃ 8.19-21
31ᒋ ᐅᒋ ᑎᑯᓯᓂᔪᐛ ᒋᓴᔅ ᐅᑲᐎᔭ ᑭᔭ ᐎᐧᑲᓂᓴ᙮ ᐎᐎᑎᒥᒡ ᐊᓐᑕ ᒋ ᓂᐳᔪᐛ ᐊᑯ ᒂ ᐱᑕᑎᓴᐛᔨᒋ ᐊᐛᔪᐛ ᒐᒋ ᐎᓴᒪᔨᒋ ᒋᓴᓴ᙮ 32ᒋ ᒥᒐᑎᔪᐛ ᐊᐛᔪᐛ ᐊ ᐛᔅᑲᐱᔅᑕᑯᑦ ᒋᓴᔅ᙮ ᐊᑯ ᒂ ᐃᑎᑯᑦ, “ᐎᐎᑎᒥᒡ ᐅᑕ ᐃᑕᐅᒡ ᒋᑲᐎᔾ ᑭᔭ ᒋᐧᑲᓂᓯᒡ, ᒋ ᐎᓴᒥᑯᒡ᙮”
33ᐊᑯ ᒋᓴᔅ ᒂ ᐃᔅᒋᔄᑦ, “ᐊᐛᓐ ᒪᒃ ᓂᑲᐎᔾ ᑭᔭ ᐊᐛᓐᒋ ᓂᐧᑲᓂᓯᒡ ?” 34ᒥᓯᐛ ᒋ ᐃᑕᐳᐤ ᐊ ᑭᓄᐛᐱᒪᑦ ᐊᓂᔭ ᐊᐛᔪᐛ ᑲ ᐛᔅᑲᐱᔅᑕᑯᑦ ᐊᑯ ᒂ ᐃᔅᒋᔄᑦ, “ᒪᐅᒋ ᓂᐧᑲᓂᓯᒡ ᑭᔭ ᐊᐅᒄ ᓂᑲᐎᔾ᙮ 35ᐊᓐ ᐊᐛᓐ ᒐ ᐃᑐᑎᒧᒂ ᒋᓴᒪᓂᑐᐛ ᐅᑦ ᐃᑕᔨᑎᒧᐅᓂᔪᐤ ᐊᐅᑯᓐ ᐊᓐ ᐛᐧᑲᓂᓯᔭᓐ ᑭᔭ ᐊᐅᑯᓐ ᐊᓐ ᐛᑲᐎᔭᓐ᙮”
Currently Selected:
ᒪᕐᒃ 3: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
