ᒪᕐᒃ 7
7
ᑕᓐ ᒧᔅ ᑲ ᐸᒋ ᐃᑎᒡ ᐸᕆᓯᔨᒡ
ᒪᑎᔪᐤ 15.1-9
Mark 7.1-8,14-15,21-23 (Proper-17 Year B)
1ᐱᔅᒐ ᐸᕆᓯᔨᒡ ᑭᔭ ᐱᔅᒐ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒋᕈᓯᓕᒥᒡ ᑲ ᐅᑐᑕᒡ ᒋ ᐸᒋ ᒪᐅᓱᑯᑲᐳᐅᒡ ᐊᓐᑕ ᒋᓴᓴ ᐊ ᑕᔨᒋ᙮ 2ᓇᔅᒡ ᒋ ᒋᐧᑲᔭᐱᒪᐅᒡ ᐊᓂᔭ ᒋᔅᒋᓄᐊᒧᐛᑭᓇ ᐊᓂᔭ ᐊᑲ ᐅᒋ ᑲᓯᑎᒐᔨᒋ ᐊᔅᒄ ᐊᑲ ᒥᒋᓱᔨᒋ᙮ ᐊᒋ ᒪᒃ ᐃᑎᓱᐛᔨᒋ ᐸᕆᓯᐊ ᒐᒋ ᑲᓯᑎᒐᔨᒋ ᐊᐛᔪᐛ ᐊᔅᒄ ᐊᑲ ᒥᒋᓱᔨᒋ᙮
3ᐛᔅ ᐸᕆᓯᔨᒡ ᑭᔭ ᒥᓯᐛ ᒍᐤ ᐃᔪᒡ ᓇᔅᒡ ᐃᔭᒂ ᒋ ᓂᓇᑭᑐᐛᔨᑎᒧᒡ ᒐᒋ ᐃᑐᑕᒡ ᑭᔭ ᐎᔨᐛᐤ ᑕᓐ ᑲᒋ ᐸᒋ ᐃᑐᑎᒥᔨᒋ ᐊᓂᔭᐧᑲ ᐅᑕᐎᐛᐛ᙮ ᓇᒪ ᐅᒋ ᒥᒋᓱᐅᒡ ᐸᑐᔅ ᑲ ᑐᑕᒡ ᐊᓂᔭ ᑕᓐ ᒋᐸ ᐃᑐᐅᒡ ᐊ ᒋᔅᑕᐸᐅᑕᒡ ᐅᑎᒋᐛᐛ᙮ 4ᓇᒪ ᑭᔭ ᐅᒋ ᒥᒍᐅᒡ ᒐᒂᔪᐤ ᐊᓐᑕ ᐊ ᐊᑕᒥᑐᓇᓄᐎᒡ ᐊᒋ ᐅᑎᓇᑭᓄᐎᒡ ᐸᑐᔅ ᑲᒋ ᒋᔅᑕᐸᐅᑕᒡ᙮ ᓂᓇᐧᑯᐤ ᑭᔭ ᑎᑯᓂᔪᐛ ᑯᑎᑲ ᐃᑎᓱᐛᐅᓇ ᐊ ᓂᓇᑭᑐᐛᔨᑕᒡ ᒐᒋ ᐃᑐᑕᒡ ᐊᓂᔭᔪᐛ ᑕᓐ ᑲ ᐃᓯ ᒥᔭᑭᓄᐎᒡ ᒐᒋ ᓂᓇᐃᑕᒡ, ᒧᔭᒻ ᐊᓂᔭ ᑕᓐ ᐊᓐ ᒋᐸ ᐃᑐᐅᒡ ᐊ ᒋᔅᑕᐸᐅᑕᒡ ᐅᒥᓂᒂᑭᓄᐛᐛ ᑭᔭ ᐅᑦ ᐃᓴᑯᐎᔭᑭᓄᐛᐛ᙮ ᑭᔭ ᑕᓐ ᒋᐸ ᐃᑐᐅᒡ ᐊ ᒋᔅᑕᐸᐅᑕᒡ ᐅᑦ ᐊᔅᒋᐧᑯᐛᐛ᙮
5ᐊᑯ ᐊᓐᒡ ᐸᕆᓯᔨᒡ ᑭᔭ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒂ ᑯᒂᒋᒪᒡ ᒋᓴᓴ ᐊ ᐃᑕᒡ, “ᐅᒡ ᒪ ᒋᒋᔅᒋᓄᐊᒧᐛᑭᓐᒡ, ᒐᒂᔪᐤ ᐛᒋ ᐊᑲ ᐃᑐᑕᒡ ᑕᓐ ᑲ ᐃᓯ ᐸᒋ ᐊᓱᐤ ᓂᓇᑭᑐᐛᔨᑕᒡ ᒍᑕᐎᓄᐅᒡ ᒐᒋ ᐃᓯ ᓂᓇᑭᑐᐛᔨᑕᑭᓄᔨᒋ᙮ ᒥᒄ ᐃᓯ ᒥᒋᓱᐅᒡ ᐊᑲ ᐛᐛᒡ ᐃᑐᑕᒡ ᐊᓂᔭ ᒋᐸ ᐃᑐᐅᒡ ᐊ ᒋᔅᑕᐸᐅᑕᒡ ᐅᑎᒋᐛᐛ ?”
6ᒋᓴᔅ ᒪᒃ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒋ ᑕᑈᑯᐱᓇ ᐊᓂᔭ ᐊᐃᓴᔭ ᑲ ᐎᑕᐧᒃ ᑕᓐ ᑲ ᐃᓯ ᐎᑎᒪᑯᑦ ᒋᓴᒪᓂᑐᐛ ᒐᒋ ᐃᓯ ᐎᑕᐧᒃ᙮ ᒋᔨᐛᐤ ᑲ ᐊᔭᒥᐊᐧᑲᓱᔭᒄ ᔅᒋ ᐊᔨᒧᒥᑯᐛᐤ ᒋᓴᒪᓂᑐᐤ ᑲ ᐃᔅᒋᔄᑦ,
ᐅᒡ ᐃᔪᒡ ᐅᑐᓂᐛᒡ ᓂ ᐅᒋ ᒋᔅᑕᒋᒥᑯᒡ, ᒥᒄ ᒪᒃ ᓇᒪ ᓇᔅᒡ ᓂᑦ ᐊᐱᑕᔨᒥᑯᒡ ᐅᑕᐃᐛᒡ᙮
7ᓇᒪ ᐊᐱᑎᓂᔪᐤ ᐊᓂᔭ ᐊ ᐸᒋ ᐊᔭᒥᐊᔅᑐᐅᒡ ᐛᔅ ᐃᔭᐱᒡ ᐎᔨᐛᐤ ᐅᐎᓱᐛᐅᓄᐛᐛ ᒋᔅᑯᑎᒪᒐᐅᒡ, ᓇᒪ ᐎ ᐊᓂᔭᔪᐛ ᒋᓴᒪᓂᑐᐛ ᑲ ᐸᒋ ᐱᔅᑎᓂᒥᔨᒋ᙮
ᐊᔪᐅᒄ ᐅᔭ ᑲ ᐃᑎᓯᓇᐊᐧᒃ ᐊᓂᔭᐧᑲ ᐊᐃᓴᔭ᙮” 8ᒋᓴᔅ ᒋ ᐃᔅᒋᔄᐤ, “ᐊᐅᑯᓐ ᒪᒃ ᐊ ᐃᑎᔭᒄ ᒋᔨᐛᐤ᙮ ᓇᒪ ᒋᑦ ᐊᐱᑕᔨᑎᒺᓇᐛᐤ ᑕᓐ ᐊ ᐃᑎᓱᐛᑦ ᒋᓴᒪᓂᑐᐤ ᐊᑯ ᐊᓂᔭ ᑕᓐ ᐊ ᐃᓯ ᒋᔅᑯᑎᒪᒐᑦ ᓇᐸᐤ ᐊᐅᑯᓐ ᐊᓐ ᐃᔭᐱᒡ ᓂᔭᐃᑎᒪᒄ᙮”
9ᒋ ᐊᑎ ᐃᔅᒋᔄᐤ ᒥᓐ ᒋᓴᔅ, “ᑕᑈ ᒋ ᑭᔅᒋᐅᓇᐛᐤ ᐊᓐ ᐊ ᐃᑎᔭᒄ ᐊᑲ ᐊᐱᑕᔨᑎᒺᒄ ᐊᓂᔭ ᑕᓐ ᑲ ᐃᑎᓱᐛᑦ ᒋᓴᒪᓂᑐᐤ ᒋᔨᐛᐤ ᑕᓐ ᐊ ᐃᓯ ᒋᔅᑯᑎᒪᒐᔭᒄ ᐃᔭᐱᒡ ᒐᒋ ᒋᔅᑕᔨᑎᒥᐃᑯᔭᒄ᙮ 10ᐛᔅ ᒋ ᐃᔅᒋᔄᐤ ᐊᓂᔭ ᒧᓱᔅ,
ᒋᔅᑕᔨᒻ ᒍᑕᐎᔾ ᑭᔭ ᒋᑲᐎᔾ ᑭᔭ ᒋ ᐃᑎᓱᐛᐤ, ᐊᓐ ᐊᐛᓐ ᒐ ᒪᔭᔨᒪᒂ ᐅᑕᐎᔭ ᒪᒃ ᐅᑲᐎᔭ ᐊᑯᔅ ᒋᑭ ᓂᐳᐤ᙮”
11ᐊᑯ ᒥᓐ ᒂ ᐊᑎ ᐃᔅᒋᔄᑦ ᒋᓴᔅ, “ᒋᔨᐛᐤ ᒪᒃ ᒋ ᐊᑎ ᐃᓯ ᒋᔅᑯᑎᒪᒐᓇᐛᐤ ᐊᑲ ᐅᓂᐱᔨᑦ ᐊᐛᓐ ᐊᓂᔭ ᐊᑲ ᒋᔅᐸᐛᑕᑦ ᐅᓂᒋᐃᒂ ᐃᔭᐱᒡ ᒪᒃ ᒧᔅ ᐃᑕᒐ, ‘ᓂ ᒥᑕᒋᔨᐛᓯᓐ, ᑕᐸ ᔅᒋ ᐎᒋᐃᑎᓇᐛᐤ ᐛᔅ ᓴᔅ ᒋᓴᒪᓂᑐᐤ ᓂᒋ ᒥᔭᐤ ᑕᓐ ᒋᐸ ᐃᓯ ᒥᔨᑎᓇᐛᐤ ᒋᔨᐛᐤ᙮’ 12ᓇᒪ ᐅᓂᐱᔪᐤ ᒋᑦ ᐃᑕᐛᐤ ᐅᔭ ᐊ ᐃᑎᑦ᙮ 13ᐅ ᒪᒃ ᐊ ᐃᓯ ᐊᓱᐤ ᒋᔅᑯᑎᒪᒐᔭᒄ ᒋ ᐱᑯᓂᒺᓇᐛᐤ ᒋᓴᒪᓂᑐᐤ ᐅᑦ ᐃᔨᒧᐅᓐ᙮ ᑎᑯᓐ ᒪᒃ ᒥᒐᑦ ᑯᑎᑲ ᒐᒂᔪᐛ ᐊ ᐃᑎᔭᒄ ᐊᑲ ᑯᐃᔅᒄ ᐃᓯᓇᒂᒋ᙮”
ᐊᓂᔭᔪᐛ ᒐᒂᔪᐛ ᐊ ᐃᑐᑕᑯᑦ ᐊᐛᓐ ᒐᒋ ᒥᒋᑐᑕᐧᒃ
ᒪᑎᔪᐤ 15.10-20
Mark 7.1-8,14-15,21-23 (Proper-17 Year B)
14ᐊᑯ ᒋᓴᔅ ᒥᓐ ᒂ ᐎᓴᒪᑦ ᐊᓂᔭ ᐃᔪᐛ ᒐᒋ ᐸᒋ ᐃᑐᑕᔨᒋ ᐊᑯ ᒂ ᐃᑕᑦ, “ᓂᑐᑐᐅᒄ ᒪ, ᒥᓯᐛ ᐊ ᑎᓯᔭᒄ, ᑭᔭ ᐎ ᓂᔅᑐᑐᐅᒄ ᑕᓐ ᒐ ᐃᔅᒋᔄᔭᓐ᙮ 15ᓇᒪ ᐎ ᒐᒂᔪᐤ ᐊ ᒥᒋᑦ ᒪᒃ ᐊ ᒥᓂᑦ ᐊᐛᓐ ᒋᑭ ᒋ ᐃᑐᑕᑯᐤ ᒐᒋ ᒥᒐᑎᓯᑦ᙮ ᐊᓂᔭ ᑕᓐ ᐊ ᐃᓯ ᒥᒋ ᐃᔨᒥᑦ ᒪᒃ ᐊ ᐃᓯ ᒥᒋᒪᒥᑐᓇᔨᑕᐧᒃ ᐊᔪᐅᒄ ᐊᓂᔭ ᒐ ᐃᑐᑕᑯᑦ ᒐᒋ ᒥᒋᑐᑕᐧᒃ᙮ 16ᒧᔭᒻ ᒪᒃ ᐊᐛᓐ ᐱᔭᑎᒧᒂ ᐊᑯᔅ ᒋᑭ ᓂᑐᑎᒻ᙮”
17ᐃᔅᐱ ᒪᒃ ᓇᑭᑕᑦ ᐊᓂᔭ ᑲ ᐸᒋ ᒪᒧᑲᐳᔅᑕᑯᑦ ᒋ ᐱᒐᐤ ᐊᓐᑕ ᒥᒋᐛᐱᒡ᙮ ᐊᑯ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᒂ ᑯᒂᒋᒥᑯᑦ ᒐᒋ ᐎᑎᒧᐛᑦ ᑕᓐ ᐊ ᐃᓯ ᐎᑎᒪᒐᒥᑭᓂᔨᒡ ᐊᓂᔭ ᑲ ᐃᔅᒋᔄᑦ᙮ 18ᒋᓴᔅ ᒪᒃ ᒋ ᐃᔅᒋᔄᐤ, “ᓇᒪᐎᔾ ᐊ ᒋ ᓂᔅᑐᑕᓇᐛᐤ ᑭᔭ ᒋᔨᐛᐤ ? ᓇᒪᐎᔾ ᐊ ᒋ ᒋᔅᒐᔨᑕᓇᐛᐤ ᑕᐸ ᓇᒪᔭᔪᐤ ᒥᒋᒥᔪᐤ ᑲ ᐃᑐᑕᑯᑦ ᐊᐛᓐ ᐛᒋ ᒥᒋᑐᑕᐧᒃ ? 19ᐛᔅ ᑕᐸ ᐅᑕᐃᒡ ᐱᒋᐱᔪᐤ ᐊᓂᔭ ᒥᒋᒥᔪᐤ ᐊᓐᑕ ᐅᔅᑭᑕᒡ ᐊᑯᑕ ᐊ ᐃᔅᐱᔨᒡ ᑭᔭ ᐛᐎᐱᔨᑕᑦ᙮” ᐅᔭ ᑲ ᐃᔅᒋᔄᑦ ᒋᓴᔅ ᒋ ᐎᑎᒻ ᒥᓯᐛ ᐊ ᐃᓯᓇᑯᓂᔨᒡ ᒥᒋᒥᔪᐤ ᐊ ᐸᔭᐧᑭᓂᔨᒡ ᒐᒋ ᒥᒋᓇᓄᐎᒡ᙮ 20ᒋᓴᔅ ᒥᓐ ᒋ ᐊᑎ ᐃᔅᒋᔄᐤ, “ᐊᓂᔭ ᑕᓐ ᐊ ᐃᓯ ᑭᓄᐛᔨᑕᐧᒃ ᐊᐛᓐ ᐅᑕᐃᒡ ᐊᔪᐅᒄ ᐊᓂᔭ ᒐ ᐃᑐᑕᑯᑦ ᒐᒋ ᒥᒋᑐᑕᐧᒃ ᒪᒃ ᒐᒋ ᒥᒋ ᐃᔨᒥᑦ᙮”
Mark 7.1-8,14-15,21-23 (Proper-17 Year B)
21“ᐛᔅ ᐊᓐᑕ ᐅᑕᐃᒡ ᐊᑯᑕ ᐊᐛᓐ ᓇᔅᒡ ᓂᑎᒥᒄ ᒐᒋ ᐃᑕᔨᑕᐧᒃ ᑭᔭ ᓂᑎᒥᒄ ᒐᒋ ᐃᑎᑦ, ᒪᒃ ᒐᒋ ᑭᒐᒧᑎᑦ, ᒐᒋ ᓂᐸᐃᐛᑦ, 22ᒪᒃ ᒐ ᐱᓯᒂᑎᓯᑦ, ᒪᒃ ᒐᒋ ᒧᔅᑕᓂᒧᐛᑦ ᐊᐛᔪᐛ ᒐᒂᔪᐤ ᐊ ᐃᓯ ᐊᔭᔨᒋ, ᒪᒃ ᒐᒋ ᒥᒋᑥᑦ, ᒪᒃ ᒐᒋ ᐎᔭᓯᐃᐛᑦ, ᒪᒃ ᒐᒋ ᐎᓂᓱᐛᑎᓯᑦ, ᒪᒃ ᒐᒋ ᐅᑕᔨᑕᐧᒃ, ᑭᔭ ᒐᒋ ᒥᒋ ᐊᔨᒧᒪᑦ ᐊᐛᔪᐛ, ᒪᒃ ᓇᔅᒡ ᒋᒋᐛ ᒐᒋ ᐃᑕᔨᒥᓱᑦ, ᑭᔭ ᒐᒋ ᒋᔎᐤ ᐱᒪᑎᓯᑦ᙮ 23ᒥᓯᐛ ᒪᒃ ᐅᔭ ᐊ ᐃᓯ ᒥᒋᑐᑕᐧᒃ ᐊᐛᓐ ᐱᒡ ᐊᓐᑕ ᐊ ᑕᑦ ᐅᒋᐱᔪᐤ, ᐊᔪᐅᒄ ᒪᒃ ᐅᔭ ᒪᒋᓇᑯᐃᑯᑦ᙮”
ᐅᑕᑈᑎᒧᐅᓐ ᐃᔎᐤ ᐳᓂᓯᔭ ᑲ ᐅᒋᑦ
ᒪᑎᔪᐤ 15.21-28
Mark 7.24-37 (Proper-18 Year B)
24ᒋᓴᔅ ᒪᒃ ᒋ ᔅᑐᑕᐤ᙮ ᐊᓐᑕ ᐊᓂᔭ ᐊᔅᒋᔪᐤ ᒥᒋᒪ ᓴᐃᑐᓐ ᑭᔭ ᑕᐃᕋ ᑲ ᑎᑯᓂᔨᒡ ᐊᑯᑕ ᑲ ᐃᑐᑕᑦ᙮ ᑕᑯᓯᓂᑦ ᒪᒃ ᒋ ᐱᒐᐤ ᒥᒋᐛᐱᔪᐤ ᐊᑯ ᒂ ᐃᑎᓱᐛᑦ ᒐ ᐊᑲ ᒋ ᐎᑎᒧᐛᑭᓄᔨᒋ ᐊᐛᔪᐛ ᐊᓐᑕ ᐊ ᑕᑦ᙮ ᒥᒄ ᒪᒃ ᓇᒪ ᓇᐅᔅ ᐅᒋ ᐃᓯᓇᑯᓂᔪᐤ ᐅᔭ ᑲ ᐃᓯ ᓂᑐᐛᔨᑕᐧᒃ᙮ 25ᒋ ᑕᔪᐛ ᐃᔎᐛ ᐊᒋ ᐸᑎᒥᔨᒋ ᐊᓐᑕ ᐊ ᑕᑦ ᐊᑯ ᑎᐛᒡ ᒂ ᓂᑐᐛᐱᒥᑯᑦ ᐊ ᐸᒋ ᐸᒋᓯᒥᐱᔪᐅᔨᒋ ᐊᓐᑕ ᐅᓯᑎᒡ ᐃᔅ᙮ ᐛᔅ ᐅ ᐃᔎᐤ ᒋ ᑕᔪᐛ ᐅᑕᓂᓴ ᐊ ᐱᒋᔅᑲᑯᔨᒋ ᒥᒋ ᐊᒐᒂ᙮ 26ᐅ ᒪᒃ ᐃᔎᐤ ᑯᕆᒃ ᒋ ᐃᑎᔅᑲᓇᓱᐤ, ᐊᓐᑕ ᐳᓂᓯᔭ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐊᓐᑕ ᐃᑕᒐ ᓯᕆᔭ ᐊᔅᒋᒡ ᑲ ᑎᑯᓂᔨᒡ, ᐊᑯᑕ ᒋ ᐱᒪᑎᓯᒐ᙮ ᓇᔅᒡ ᒋ ᐊᔨᐧᑭᒥᓯᔪᐤ ᐊ ᓂᑐᑎᒧᐛᑦ ᒋᓴᓴ ᒐᒋ ᐎᐎᑎᓴᐛᔨᒋ ᐊᓂᔭ ᒥᒋ ᐊᒐᒂ ᑲ ᐱᒋᔅᑲᑯᔨᒋ ᐅᑕᓂᓴ᙮
27ᒋᓴᔅ ᒪᒃ ᒋ ᐃᑕᐤ, “ᓂᔅᑎᒻ ᐊᓐᒡ ᒍᐤ ᑲ ᐃᑎᔅᑲᓇᓯᒡ ᓂᐸ ᐎᒋᐊᐅᒡ᙮ ᓇᒪ ᑯᐃᔅᒄ ᐃᓯᓇᑯᓐ ᐊᑎᒧᒡ ᒐᒋ ᐃᓯ ᐛᐱᓂᒧᐛᑭᓄᐎᒡ ᐊᐛᓴ ᐅᒥᒋᒥᔪᐤ᙮”
28ᐊᑯ ᒂ ᐃᔅᒋᔄᑦ ᐊᓐ ᐃᔎᐤ, “ᓂᐦᐃ, ᒋ ᑕᑈᓐ, ᑎᐸᔨᒋᒐᓱᐤ᙮ ᒥᒄ ᒪᒃ ᐛᐛᒡ ᐊᓐᒡ ᐊᑎᒧᒡ ᓯᐸ ᒥᒋᓱᐛᑭᓇᑎᑯᒡ ᑲ ᑕᒡ ᒪᒧᓯᐧᑲᑎᒺᐅᒡ ᑕᓐ ᐊ ᐃᓯ ᐱᐅᑐᐛᔨᒋ ᐊᓂᔭ ᐊᐛᓴ᙮”
29ᐊᑯ ᒋᓴᔅ ᒂ ᐃᑕᑦ, “ᐊᓐ ᐊᒋ ᐃᓯ ᐎᑎᒧᐎᔨᓐ, ᒪᒋ, ᓇᒪ ᓴᔅ ᐱᒋᔅᑲᑯᐤ ᒋᑕᓂᔅ ᐊᓂᔭ ᒥᒋ ᐊᒐᒂ᙮” 30ᒋ ᒋᐛᐤ ᒪᒃ ᐊᓐ ᐃᔎᐤ ᒂ ᐛᐱᒪᑦ ᐊᓂᔭ ᐅᑕᓂᓴ ᐅᓂᐸᐅᓂᔨᒡ ᐊ ᐱᒥᓯᓂᔨᒋ, ᑕᑈ ᐊᒋ ᓂᑭᑎᑯᐎᒂᓂ ᐊᓂᔭ ᒥᒋ ᐊᒐᒂ᙮
ᒋᓴᔅ ᑲ ᒥᓏᒋᐊᑦ ᓇᐸᐛ ᐊᑲ ᐅᒋ ᐸᑎᒥᔨᒋ ᑭᔭ ᐊᑲ ᐅᒋ ᓂᑕᐛᔨᒋ
31ᒋᓴᔅ ᒪᒃ ᒋ ᔅᑐᑕᐤ ᐊᓐᑕ ᑕᐃᕋᒡ ᐅᒡ᙮ ᐃᔅᐱ ᐛᑎᑕᐧᒃ ᓴᐃᑐᓐ ᒥᒄ ᒋ ᓴᐳᑐᐛᔅᑭᒻ᙮ ᐊᑯ ᐊᓐᑕ ᐊᓂᔭ ᐊᔅᒋᔪᐤ ᐸᐃᑯᔪᐤ ᐅᑕᓇᐛ ᑲ ᑎᑯᓂᔨᒋ ᒂ ᐃᓯ ᐱᒧᑕᑦ ᒐᒃ ᒂ ᐅᑎᑕᐧᒃ ᑲᓕᓕ ᓴᑲᐃᑭᓂᔪᐤ᙮ 32ᐊᑯᑕ ᒪᒃ ᐊᓐᑕ ᑲ ᑕᔨᒋ ᐊᐛᔪᐛ ᐊ ᐸᑥᑯᑦ ᓇᐸᐛ ᐊᑲ ᐸᑎᒥᔨᒋ ᑭᔭ ᐊᑲ ᓂᑕᐛᔨᒋ᙮ ᓱᒃ ᒪᒃ ᒋ ᐎ ᐊᔨᐧᑭᒥᐊᐅᒡ ᒋᓴᓴ ᒐᒋ ᑕᒋᓇᔨᒋ ᐊᓂᔭᔪᐛ ᓇᐸᐛ᙮
33ᐊᑯ ᒋᓴᔅ ᒂ ᒋᑐᑕᐊᑦ ᐊᓂᔭᔪᐛ ᓇᐸᐛ ᒥᒄ ᐎᔨᐛᐤ ᒐᒋ ᓂᓯᒡ, ᐊᑯ ᒂ ᐳᒋᔅᑐᑭᔭᓇᑦ, ᑭᔭ ᒋ ᓯᔅᑎᑯᐤ ᐊᑯ ᒂ ᑕᒋᓂᒺᑦ ᐅᑕᔨᔪᐤ᙮ 34ᐃᔅᐱᒥᒡ ᒪᒃ ᒋ ᐃᓯ ᑎᔅᑎᓴᐳᐤ ᒋᓴᔅ ᐊ ᔭᐧᑭᑕᒧᑦ, ᐊᑯ ᒂ ᐃᑕᑦ ᐊᓂᔭ ᓇᐸᐛ, “ᐃᐸᑕ᙮” ᐅᔭ ᒪᒃ ᑲ ᐃᔅᒋᔄᑦ, “ᓴᓂᐱᔨ,” ᐃᓯ ᐃᔅᒋᔄᒥᑭᓐ᙮ 35ᒋ ᓴᓂᐱᔪᐛ ᐎᑐᑭᔭ ᐊᓐ ᓇᐸᐤ᙮ ᑭᔭ ᐊᓂᔭ ᐅᑕᔨᔾ ᒂ ᐊᐱᐧᑯᐱᔨᒡ ᐊᑯ ᓇᔅᒡ ᒂ ᐅᒋ ᒥᔪ ᐃᔨᒥᑦ᙮
36ᐊᑯ ᒋᓴᔅ ᒂ ᐃᑕᑦ ᐊᓂᔭᔪᐛ ᐃᔪᐛ ᒐ ᐊᑲ ᐎᑎᒧᐛᔨᒋ ᑯᑎᑲ ᐊᐛᔪᐛ ᐅᔭ ᐊᒋ ᐃᔅᐱᔨᒡ᙮ ᒥᒄ ᒪᒃ ᐊᑎᓱᐧᒄ ᐊᒋ ᒋᑕᐊᒧᐛᑦ, ᐊᑐᐎᔅ ᒋ ᐱᐸᒪᒋᒧᔪᐛ ᐊ ᐛᐎᑎᒧᐛᔨᒋ ᐊᐛᔪᐛ᙮ 37ᒥᓯᐛ ᒪᒃ ᐊᐛᔪᐛ ᑲ ᐸᑎᒥᔨᒋ ᐅᔭ ᓇᔅᒡ ᒋ ᒥᔅᑲᑕᔨᑎᒥᐃᑯᔪᐛ᙮ ᒋ ᐃᔅᒋᔄᔪᐛ ᒪᒃ, “ᒥᓯᐛ ᒐᒂᔪᐤ ᒋ ᒥᔪᑐᑎᒻ᙮ ᐛᐛᒡ ᒋ ᐃᑐᑎᒧᐛᐤ ᐊᑲ ᐸᑎᒥᔨᒋ ᒐᒋ ᐸᑎᒥᔨᒋ ᑭᔭ ᐊᓂᔭᔪᐛ ᐊᑲ ᓂᑕᐛᔨᒋ ᒐᒋ ᓂᑕᐛᔨᒋ᙮”
Currently Selected:
ᒪᕐᒃ 7: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
