Jăng 19

Pilat Jào Yàng Jêsu Tơ Buơl Làng Juđa

1Tŭ nư̆n, Pilat pơđăr ba Yàng Jêsu nau sơ̆ng pơđăr glih-pờng Pô. 2Buơl lĭng mơñàm sa boh kơlmu ngă sơ̆ng druơi, pơklŭm tơ akŏ Pô, sơ̆ng pơc̆ù tơ Pô sa blah ào mơr-yah. 3Buơl guñu truh jĕ Pô, sơ̆ng đờm: “Khoai pơtau buơl làng Juđa!” Bloh nư̆n guñu pah tơ 'bò Pô.

4Pilat tơbiă tơ agàh sa amăng tra wơ̆, đờm sơ̆ng buơl làng: “Ni, kơu ba ñu tơbiă tơ agàh gơ buơl guhã, tô buơl guhã thơu la kơu 'buh duah 'buh ñu hũ glài-sơnoh hơgĕ ơu.” 5Yơu nư̆n, Yàng Jêsu nau tơbiă, akŏ klŭm kơlmu sơ̆ng druơi, rùp c̆ù ào mơr-yah. Pilat đờm sơ̆ng buơl guñu: “Ni, ñu ni.” 6Bloh tŭ du mơnih gơnuăr apăn-akŏ pơyă phơ̆n duh-dơlbăt sơ̆ng du mơnih dò tơ ala gơnuăr buơl guñu 'buh Pô, nư̆n kơmrào driau lài: “Pơ̆ng ñu tơ kơyơu pơkăl! Pơ̆ng ñu tơ kơyơu pơkăl!” Pilat đờm sơ̆ng buơl guñu: “Rùp-phŭn buơl guhã mă bĕ ñu sơ̆ng ba nau pơ̆ng tơ kơyơu pơkăl, kơyoa kơu 'buh duah 'buh ñu hũ glài-sơnoh hơgĕ ơu.” 7Du mơnih Juđa đờm: “Buơl dơlhă hũ adăt-adia, sơ̆ng tui adăt-adia buơl dơlhă, nư̆n ñu păl mơtai, kơyoa ñu hũ pơ-angăn rùp-phŭn ñu la Anà Yàng Pô Lơngì.”

8Tŭ Pilat mơhư̆ yơu nư̆n, ñu 'brŏ huơĭ-kơđa rơlau wơ̆. 9Ñu gài tơma wơ̆ lăm sàng-glăng bloh đờm sơ̆ng Yàng Jêsu: “Hã mư̆ng lơi truh?” Bloh Yàng Jêsu 'buh đờm sơđồ. 10Kơyoa nư̆n, Pilat đờm sơ̆ng Pô: “Hã 'buh đờm hơgĕ sơ̆ng kơu ơu? Hã 'buh thơu lài kơu hũ gơnuăr toh-tơleh hã, kŭng hũ gơnuăr pơ̆ng hã tơ kơyơu pơkăl ơu?” 11Yàng Jêsu đờm: “Yah 'buh kơyoa mư̆ng ngŏ brơi tơ kơi, nư̆n kơi 'buh hũ gơnuăr hơgĕ tơ ngŏ Kơu. Kơyoa nư̆n, mơnih jào Kơu tơ kơi hũ glài traŭ rơlau.” 12Mư̆ng tŭ nư̆n, Pilat duah pơnuaĭ tô toh-tơleh Pô, bloh du mơnih Juđa driau prŏng lài: “Yah kwăng toh-tơleh mơnih ni, nư̆n kwăng 'buh iơŭ la mơnih tơpă sa hơtai-hơtiàn sơ̆ng Sesa. Kơyoa mơnih lơi pơ-angăn rùp-phŭn drơi la pơtau, nư̆n la tămdră-wơ̆ sơ̆ng Sesa.”

13Tŭ Pilat mơhư̆ du pơnuaĭ ni, nư̆n ba Yàng Jêsu tơbiă tơ agàh, bloh nư̆n dò guh tơ anih c̆ahrơña, tơ anih angăn la Rơnơ̆-Pơtơu, ia Hebrơ angăn la Gabatha. 14Hơrơi nư̆n la hơrơi Rơc̆ăng-Dơlhơu tơ pơnuaĭ pơjŭm 'bơ̆ng Nau-Găn, tŭ pơgăp sa-pluh dua jơ glai hơrơi, Pilat đờm sơ̆ng du mơnih Juđa lài: “Ni la pơtau buơl guhã!” 15Buơl guñu driau prŏng: “Pơluĭ-pơlơhiă ñu bĕ! Pơluĭ-pơlơhiă ñu bĕ! Pơ̆ng bĕ ñu tơ kơyơu pơkăl!” Pilat đờm: “Kơu rơŭ pơ̆ng pơtau buơl guhã tơ kơyơu pơkăl la?” Du mơnih gơnuăr apăn-akŏ pơyă phơ̆n duh-dơlbăt đờm: “Buơl dơlhă mĭn hũ sa aràng pơtau soh, nư̆n la Sesa.” 16Pilat jào Yàng Jêsu tơ buơl guñu, tô ba nau pơ̆ng tơ kơyơu pơkăl.

Yơu nư̆n, guñu mă Pô sơ̆ng ba nau.

Yàng Jêsu Kŏng Pơ̆ng Tơ Kơyơu Pơkăl

(Mathiơ 27:32-44; Mak 15:21-32; Luka 23:26-43)

17Yàng Jêsu glăm kơyơu pơkăl nau truh tơ sa anih angăn la Brò Akŏ, ia Hebrơ angăn la Gôgôtha. 18Tơ anih nư̆n, buơl guñu pơ̆ng Pô lăm kơyơu pơkăl. Hũ dua aràng mơnih pơkơ̆n kŭng kŏng pơ̆ng lăm kơyơu pơkăl yơu Pô; sa aràng gah ni sơ̆ng sa aràng gah dih, dò Yàng Jêsu nư̆n tơkrah. 19Pilat kŭng pơđăr mă sa blơ kơmàn sơ̆ng yuăl tơ ngŏ kơyơu pơkăl. Lăm blơ kơmàn nư̆n hũ wă: “Jêsu Mơnih Nasaret, Pơtau Buơl Làng Juđa.” 20Kơyoa anih Yàng Jêsu kŏng pơ̆ng tơ kơyơu pơkăl dò jĕ tơ plơi-prŏng, sơ̆ng blơ kơmàn hũ wă sơ̆ng ia Hebrơ, ia Latin sơ̆ng ia Grek, nư̆n hũ lô mơnih Juđa pơrpoh-c̆ơ. 21Du mơnih gơnuăr apăn-akŏ pơyă phơ̆n duh-dơlbăt mơnih Juđa đờm sơ̆ng Pilat: “Yòng juơi wă: ‘Pơtau buơl làng Juđa,’ bloh wă bĕ: ‘Mơnih ni đờm: Kơu la Pơtau buơl làng Juđa.’ ” 22Pilat đờm sơđồ: “Pơnuaĭ kơu hũ wă, nư̆n kơu hũ wă bơjơ.”

23Hơdơi tŭ pơ̆ng Yàng Jêsu lăm kơyơu pơkăl, du mơnih lĭng mă ào agàh Pô, pơrpha ngă pà pơ-ơnah, yàu aràng mă sa pơ-ơnah. Buơl guñu kŭng mă găm ào jruh Pô, bloh ào jruh ni la sa blah bơ-yài mơñàm mư̆ng ngŏ trŭn tơ ala, 'buh hũ jơlàn sì. 24Nư̆n buơl guñu đờm sơ̆ng gơŭ: “Juơi hĕt ào ni, bloh buơl gudrơi suă khà bĕ, c̆ơ aràng sơi hũ.” Bruă tơbiă truh iơŭ yơu pơnuaĭ 'Bồn Bơ-àr Sơc̆ih-Sri:

“Buơl guñu pơrpha gơŭ khăn-ào Kơu,

Suă khà mă ào jruh Kơu.” #19:24 Pơđik Adoh Mơyòm 22:18.

Nư̆n la bruă buơl lĭng hũ ngă.

25Dò dơ̆ng tơ tơkai kơyơu pơkăl aràng pơ̆ng Yàng Jêsu hũ ame Pô, sơ-ai ame Pô, Mari sơdiŭ Klôpa, sơ̆ng Mari Mađơlen. 26Yàng Jêsu 'buh ame Pô, sơ̆ng mơnih tui-mơgru Pô rơnăm dò dơ̆ng jĕ, nư̆n Pô đờm sơ̆ng ame Pô: “Ơ ame, nư̆n la anà ame!” 27Bloh nư̆n Pô đờm sơ̆ng mơnih tui-mơgru nư̆n: “Ni la ame hã!” Mư̆ng jơ nư̆n, mơnih tui-mơgru ni ba mò mơrai wơ̆ tơ sàng drơi.

28Hơdơi mư̆ng nư̆n, Yàng Jêsu thơu tơgrơ̆ bruă hũ wĭl-tơ̆l bơjơ, tô pơnuaĭ 'Bồn Bơ-àr Sơc̆ih-Sri hũ tơbiă iơŭ tơpă, nư̆n đờm lài: “Kơu mơhau ia!” 29Tơ anih nư̆n hũ sa boh bìng pơdơ̆ng baŭ ia mơsăm. Buơl guñu mă sa kleh phơ̆n kơsồp, ơñrŭ baŭ ia mơsăm, akă tơ akŏ sa 'bĕ gai, bloh nư̆n pơyơ̆r truh tơ kàng Yàng Jêsu. 30Hơdơi tŭ Yàng Jêsu tiăm ia mơsăm, Pô đờm: “Tơgrơ̆ bruă hũ wĭl-tơ̆l bơjơ.” Bloh nư̆n Pô kŭn akŏ trŭn sơ̆ng kloh suàn.

31Kơyoa tŭ nư̆n la hơrơi Rơc̆ăng Dơlhơu, nư̆n du mơnih Juđa 'buh khiăng luơi du rùp atơu sơđaŭ dò kơđòng yuăl tơ ngŏ kơyơu pơkăl lăm hơrơi sa'bat, kơyoa hơrơi sa'bat ni la prŏng-màng biă. Kơyoa nư̆n, buơl guñu yòng Pilat pơđăr mơnih pờng pơc̆ah tơlàng tơkai du mơnih nư̆n, sơ̆ng mă rùp atơu trŭn. 32Yơu nư̆n, du mơnih lĭng truh, pờng pơc̆ah tơlàng tơkai mơnih c̆ơmrừp, bloh nư̆n truh mơnih dih, la dua aràng mơnih kơđòng pơ̆ng tơ kơyơu pơkăl găm sơ̆ng Pô. 33Bloh tŭ truh anih Yàng Jêsu, buơl guñu 'buh Pô mơtai bơjơ, nư̆n 'buh pờng pơc̆ah tơlàng tơkai Pô. 34Bloh hũ sa aràng mơnih lĭng mă sơdrà jră găn rơsŭ Pô, lăm tơk mư drah sơ̆ng ia hŏ tơbiă. 35Mơnih hũ tơ mơta c̆ơ 'buh ngă grơh mư̆ng bruă ni, sơ̆ng pơnuaĭ ngă grơh mơnih nư̆n la tơpă biă, kơyoa mơnih nư̆n thơu drơi đờm pơnuaĭ tơpă, tô buơl guhã kŭng păng-tui rơi. 36Tơgrơ̆ bruă hũ tơbiă truh iơŭ tơpă yơu pơnuaĭ 'Bồn Bơ-àr Sơc̆ih-Sri hũ đờm dơlhơu: “'Buh sa 'bĕ tơlàng lơi lăm rùp Pô rơŭ kơđòng joh.” #19:36 Pơđik Adoh Mơyòm 34:20 37Sơ̆ng kŭng hũ pơnuaĭ pơkơ̆n lăm 'Bồn Bơ-àr Sơc̆ih-Sri wă lài: “Buơl guñu rơŭ c̆ơ 'buh mơnih bloh drơi hũ jră.” #19:37 Sac̆ari 12:10.

Pơnuaĭ Dơ̆r Yàng Jêsu

(Mathiơ 27:57-61; Mak 15:42-47; Luka 23:50-56)

38Hơdơi du bruă nư̆n, Jôsep mơnih plơi Arimathe, la sa aràng mơnih tui-mơgru Yàng Jêsu, bloh la sa aràng mơnih tui-mơgru tơrđơŭ-bơdơŭ, kơyoa huơĭ tơ mơnih Juđa, ñu truh yòng Pilat brơi gơnuăr mă rùp atơu Yàng Jêsu trŭn. Pilat brơi gơnuăr tơ ñu. Yơu nư̆n, Jôsep truh sơ̆ng mă rùp atơu Pô apăn nau. 39Nikôđem, la mơnih tŭ dơlhơu hũ truh sơ̆ng Yàng Jêsu lăm glai mơlăm, kŭng truh. Nikôđem apăn tui klơu pluh lĭt c̆ài-trŭ jrơu sơ̆ng gơlhơu. 40Buơl guñu mă rùp atơu Yàng Jêsu bloh nư̆n angui bơ-yài lơmŭn sơ̆ng jrào 'bơu bơlhơu bloh pơpò wơ̆, tui adăt-lơđăp pơpò atơu mơnih Juđa. 41Tơ anih Yàng Jêsu kŏng pơ̆ng tơ kơyơu pơkăl hũ sa boh apùh, sơ̆ng lăm apùh nư̆n hũ sa boh kŭt atơu dò bơrhơu, ka dơ̆r aràng sơi. 42Kơyoa hơrơi nư̆n la hơrơi Rơc̆ăng Dơlhơu tơ hơrơi pơjŭm 'bơ̆ng mơnih Juđa, sơ̆ng kŭt nư̆n kŭng dò jĕ, nư̆n buơl guñu dơ̆r Yàng Jêsu tơ anih nư̆n.

Currently Selected:

Jăng 19: CNT15

Highlight

Copy

Want to have your highlights saved across all your devices? Sign up or sign in

Learn More About Chru