Luk'a 3

K'unuk'bal İoani eysun

(Mat'. 3:1-12; Mrk'. 1:1-8; İoan. 1:19-28)

1İmp'erat'or T'iberiin kalaluğbsuni qos's'emci useney. T'e vədinest'a P'ont'i P'ilat' İudeyani kaloney. İroden Galileyina, iz viçi Filip'en İt'ureyina q'a T'raxont'is oç̌alxo, Lisaniyanal Abileniyanane kalaluğbsay. 2Xanan q'a K'ayafa isə samci běyinšxoy kalot'uniy. Hat'e vədə çölö Zəkəriyəy ğar İoana Buxačuğoy əyite p'ap'i. 3Şot'inal İordan oqe hərrəmine bakala bütüm oç̌alxo tarapsun amdarxo içoğoy günaxxo bağışlayinşak'seynak' toobabi k'unuk'baksunane karoozbsay. 4Hetər ki, xavareçal İsayay girke boş śameśeney:

«Çölö bayanbalt'ay ost'aar səse c'eysa:

"Q'ončuğoy yaq'a həzirbanan,

Şot'ay c'ovakala cığırxo düzbanan.

5Hər dərə buybakale,

Hər burux, hər təpə oç̌alaxun barabar bakale,

Yaq'e k'ori ganxo düz bakale,

Ala-oq'a ganxo barabar bakale.

6Bütüm amdarxonal Buxačuğoy çark'est'una ak'alt'un"». #3:4-6 İsa. 40:3-5

7İoanen k'unuk'bakseynak' iz t'ǒğǒl eğala amdarxo nexey: «Ay dizik'i nəsil! Şina pi ki, və̌ynak' həzirbaki cazinaxun ef elmoğo çark'est'es bakalnan? #3:7 Mat'. 12:34; 23:33 8Toobina ef tadala barurxoxun ak'est'anan. Ef ük'e boş "Beş bava Avrahame" pi arxayin ma bakanan. Və̌x nexzu, Buxačuğon me ǰěyurxoxunal Avrahameynak' əyloxe yaratmişes bakon. #3:8 İoan. 8:33 9Ene tavar xodurxoy tume bitene. Metərluğen, şaat' bar nu tadala hər xod bot'eśi aruğone bosesa». #3:9 Mat'. 7:19

10Camaaten şot'oxun xavare haq'say: «P'oy yan k'ə ben?» 11İoanen şot'oğo metəre coğab tadi: «İzi p'ə̌ gurat' bakalt'in sunt'u nu bakalt'uq'an tadi. Haketərəl, iz ukun bakala amdaren nu bakalt'uxun t'e ukuna cöybeq'an».

12Naloggirbalxonal k'unuk'bakseynak' şot'ay t'ǒğǒl hari xavart'un haq'say: «Məəlim, yan k'ə ben?» #3:12 Luk'. 7:29 13İoanen şot'oğo pine: «Və̌x tapşurbi q'ədərəxun gele nalog ma girbanan».

14Bəzi əsk'ərxonal hari şot'oxun xavart'un haq'i: «P'oy yan k'ə ben?» İoanenal şot'oğo coğabe tadi: «Şuk'k'alaxun zoren təngə ma haq'anan, nahaq' gala şuk'k'ala taxsırkər ma c'evk'anan, ef haq'ala maaşaxun irəziləyinşakanan».

15Amdarxon umuden yaq'e běğsay, bitot'inal İoani barada içoğoy boş fikirt'unbsay: «Mo Xrist'os bakes banekon?» 16İoanen şot'oğo bütümə metəre coğab tadi: «Zu və̌x xenenez k'unuk'bsa. Ama zaxun gele Zorbone eysa. Zu Şot'ay torok'ali bağa şadbsunal layiğ tezu. Şot'in və̌x Ǐvel Urufen q'a aruğon k'unuk'bale. 17İz ec'a təmizbi taxıla ambara topbseynak' k'oda #3:17 K'oda - durut'i lap'at'k'a İz kiyel həzire. Kološa isə Şot'in nu aç̌ala aruğoy boş bok'osp'ale». 18Hametər, İoanen q'erəzəl gele ögüd-nəsyətxo tast'unen amdarxo Mǔq Xavarane p'ap'espsay.

19Ama hari kalaluğbal İrodi iz viçey çuux İrodiya haq'suna q'a şot'ay mandiyal pis əşurxo pisləyinşat'an 20İroden şot'o biq'i zindanane bosest'i. Metərluğen, iz biq'i pis əşurxoy loxol soğoval avuzebay. #3:19-20 Mat'. 14:3-4; Mrk'. 6:17-18

İsusi k'unuk'baksun

(Mat'. 3:13-17; Mrk'. 1:9-11)

21Bito amdarxo k'unuk'bakat'an, İsusal k'unuk'ebaki. Şot'in afırık'at'an göy qayeśi. 22Ǐvel Urufal göyərçini bədənen baki Şot'ay loxole śiri. Göynuxunal sa səse hari: «Hun Bezi çureğala Ğarnu, Vaxun irəzizu». #3:21-22 Burq. 22:2; Ǐvel mə̌ğ. 2:7; İsa. 42:1; Mat'. 3:17; Mrk'. 1:11; Luk'. 9:35

İsusi əsil

(Mat'. 1:1-17)

23İsusen İz q'ulluğa burqat'an təxminən otuz yəşt'əney. Amdarxoy fikiren, Şo Helin ğar bakala İosifi ğarey. 24Helinaxun běš isə Şot'ay əsili boş bakalorox moroxey: Mat't'at', Levi, Melxi, Yannay, İosif, 25Mat't'atiya, Amos, Naum, Esli, Naggay, 26Maat, Mat't'atiya, Semeyin, İosex, İoda, 27Yoxanan, Resa, Zerubbabil, Şealt'iel, Neri, 28Melxi, Addi, Kosam, Elmadam, Er, 29Yesus, Eliyazar, Yorim, Mat't'at', Levi, 30Simeon, İuda, İosif, Yonam, Eliak'im, 31Melea, Menna, Mat't'at'a, Nat'an, David, 32Yesse, Oved, Boaz, Salmon, Naxşon, 33Amminadav, Admin, Arni, Xesron, P'eres, İuda, 34İak'ov, İsaak', Avraham, Tera, Naxor, 35Serux, Ragav, Falek', Ever, Şela, 36Kenan, Arp'ak'şad, Sam, Noy, Lemek', 37Met'uşelax, Xanok', Yered, Mahalalel, Kenan, 38Enoş, Şet', Adam - Buxačuğoy ğar.

Currently Selected:

Luk'a 3: udi

Highlight

Copy