Mat'fey 24

Dünyəni axıri ı̌šalayinşaksuna avabakest'ala nišanxo

(Mrk'. 13:1-23; Luk'. 21:5-24)

1İsus xrame məəlnexun c'eğat'an şagirdxo ı̌šalayinşaki İçu xrame binoğot'un ak'est'i. 2İsusen şot'oğo pine: «Mot'oğo bitova ananksa? Və̌x düzinəz nex: mot'oğoxun ǰě ǰěne loxol tene mandal, bito śareśi barale».

3İsus Zeytun buruğo tək arśi vədine İz şagirdxo İz t'ǒğǒl hari xavart'un haq'i: «Yax upa, me Vi piyorox hevaxt' bakale? Vi qaybaksuna q'a me dünyəni axır hari p'ap'suna mayin avabakalyan?» 4İsusen şot'oğo pine: «Eht'iyətlü bakanan ki, və̌x şuk'k'alen maq'an ferett'i. 5Şot'o görə ki, gelet'in hari içu Bez gala laxi "Xrist'os zuzu" upsunen gele amdarxo feret't'ale. 6Və̌n davin səsurxo q'a tağala davoğoy xavarxo ibakalnan. Ama ma q'ı̌banan! Hametərəl bakalane, ama mo hələ dünyəni axır tene. 7Şot'aynak' ki, millət milləti, padçağluğ padçağluği loxol ěqeğale. Gele ganxo busaluğ saal oç̌al galbsun bakale. 8Morox bito əyel baksuni q'ač'urxoy burqesun k'inək'e.

9T'e vədə və̌x əzyət tadi besp'alt'un. Efi Bezi şagirdxo baksuna görə bütüm azuk'xon və̌x nifrətbale. #24:9 Mat'. 10:22 10T'e vədə gelo iz věluğaxun qoş bakale, amdarxon suna toydalt'un, nifrətbalt'un. 11Gele əfçi xavareçalxo meydane c'eri gelet'u feret't'alt'un. 12Pisluğ gele baksuna görə gelet'ay çuresun malbakale. 13Ama axıral śirik' portp'alo çark'eğale. #24:13 Mat'. 10:22 14Me əşurxoxun běš göye padçağluği Mǔq Xavara dirist' dünyəne car sakalt'un ki, şot'o nu ibakala azuk' maq'an mandi. Hat'e vədəl hər şeye axır eğale.

15Metərluğen, və̌n Daniel xavareçalen pi "ǐvel ganu murdarlayinşbseynak' laxeśi irit'p'un şeya" #24:15 murdarlayinşbseynak' laxeśi irit'p'un şey - Daniel xavareçalen pi me əyitmux beşi erinaxun 168 usen běš Ant'iox Yp'ifanen Yerusalima bakala xrama eçeri binik' buxačuğo laxi əbraniğoynak' haram hesabbakala bǒq'ə̌ q'urban eşt'unen bexe p'ap'ey. İsusen me əyitmoğo upsunen dünyəni axırast'a hetər murdar əşurxoy baksunane ak'est'un çuresay. Dan. 9:27; 11:31; 12:11 ak'at'an, (barta k'alk'alt'in mot'o q'amişakeq'an), 16İudeyina bakalorox buruxmoğoq'at'un t'it'eri. 17Barta t'e vədə k'ojin bel bakalt'in koyaxun k'ənesa exst'eynak' oq'a maq'an śiri. 18Barta q'oruğa bakalt'inal izi loxolxun lakalt'u exst'eynak' k'oya maq'an qaybaki. #24:17-18 Luk'. 17:31 19T'e ğimxo bǐhi çupuxxoy q'a döş tadala çupuxxoy vay hala! 20Afırıpanan ki, ef t'ist'un ı̌ǰena nəəl Şamat' ğine #24:20 Şamat' ğine - k'anuna görə Şamat' ğine əbraniğo ə̌xil yaq' taysun batenekoy. maq'an baki 21şot'o görə ki, t'etər koruğ-əzyət bakale ki, dünyəni burqesunaxun mağay həysət'inəl śirik' metəro tene bake, bakalal tene. #24:21 Dan. 12:1; Qay. əyit 7:14 22Əgər t'e ğimxo nu gödəybakiniy, sal sa amdar dirist' tene mandoy. Ama c'ək'eśit'oğo görə t'e ğimxo gödəybakale.

23T'e vədə və̌x "běğa, Xrist'os memiyane" nəəl "t'et'iyane" ukayt'un ma věbakanan. #24:23 Luk'. 17:21,23 24Şot'o görə ki, əfçi xrist'osxo q'a əfçi xavareçalxo əmələ eğale, şot'oğon nu ak'eśi əşur biq'i, möcüzoox ak'est'i lap c'ək'eśit'oğoval içoğoy tərəf zapsun çureğalt'un. 25Běğanan, Zu və̌x saturběš pizu. 26Metərluğen, və̌x "běğa, Şo çölene" ukayt'un ma takinan, nəəl "běğa, Şo bonin otağane" ukayt'un ma věbakanan. 27Şot'o görə ki, běğ c'eğalaxun burqi běğ batk'alal śirik' göyə bı̌yexun cöybala s'ə̌q'e duğsun k'inək' bakale Amdari Ğare p'ə̌mci kərəm eysun. #24:26-27 Luk'. 17:23-24

28Q'uzğunxoy giresunene ak'est'on ı̌šaluğa murdarbaki sa şey baksuna. #24:28 İov. 39:30; Luk'. 17:37

Amdari Ğare p'ə̌mci kərəm eysun

(Mrk'. 13:24-31; Luk'. 21:25-33)

29T'e ğimxoy koruğ-əzyətəxun hat'e saad oşa

"Běğ biq'eğale,

Xaşen işiğ tene sakal,

Muč'uliyox göynuxun barale,

Göynül p'lanet'xo iz ganaxun galk'ale". #24:29 İsa. 13:10; 34:4

30T'e vədə göynul běği ak'alt'un Amdari Ğare eysuni ı̌šalayinşaksuna. İçoğoy kiyexunal hik'k'al tene ayeğal me dünyəne bakala bito azuk'xoy, şivanbalt'un şot'oğon Amdari Ğare asoyxoy loxol hari İzi zore q'a İzi kalaluği k'ə baksuna ak'est'at'an. #24:30 Dan. 7:13; Qay. əyit 1:7 31İz angelxo yaq'abale Şot'in, şot'oğonal şeyp'ur farpi girbalt'un dünyəni bip' t'ǒǒxun İz c'ək'p'it'oğo, oç̌ali sa belxun baśi t'e belxun c'eri topbalt'un şot'oğo şeyp'uri gur səsen.

32İncilnə xodin loxol běği avabaksun k'inək'q'an baki barta morox və̌ynak': hetər ki, şot'ay taymux göyünbaki xazallayinşakat'an yəye ı̌šalayinşaksunanan avabaksa, 33haketərəl me əşurxo ak'at'an Amdari Ğare ı̌šalayinşaksuna, hari lap ç̌omoy ǰomost'a baksuna avabakalnan. 34Və̌x düzinəz nex: hələ me nəsil badalbakamin bex p'ap'ale morox bito. 35Oç̌al q'a göy c'ovaki taneğon, ama Bezi əyitmux manedon.

Şuk'k'ali nu avabakala ği q'a saad

(Luk'. 12:39-48; 17:26-35)

36Ama t'e ğina q'a saada şuk'k'alen tene ava: nə göye angelxon, nə Ğaren - tək Bavane ava. #24:36 Mrk'. 13:32 37Noye döörəst'ə hetəre bakesa, Amdari Ğare eysunal haketər bakale. #24:37 Burq. 6:5-8 38Selaxun běš bakala t'e ğimxost'a, Noyen iz biq'i gəminə bağala ginal śirik' amdarxon kəyi-ǔt'ǔnğsay, lašk'oyt'unbaksay, işq'arat'un taysay. 39Hetər ki, selen hari bitova taşamin şot'oğoy hik'k'alaxun xavar tene buy, Amdari Ğar eğala ğimxost'al hametər bakale. #24:39 Burq. 7:6-24 40T'e vədə q'oruğa bakala p'ə̌ tanaxun sunt'u ext'alt'un, soğo isə mandale. 41Kiin dən berxala p'ə̌ çuğoxun sunt'u ext'alt'un, soğo isə mandale.

42Şot'o görəl həzir bakanan. Axıri ef Q'ončuğoy mani ğine eysuna tenan ava. #24:42 Mrk'. 13:35 43K'ojin q'ončuğon oğrin mani saadast'a hari iz k'oya baysuna nu avabakala k'inək'. Ene avabakiyniy, t'e saadast'a nu bask'i şot'o baysa tene barkoy ki. 44Şot'o görə və̌nal həzir bakanan: Amdari Ğar efi nu yaq'běğala vədinest'a eğale. #24:43-44 Luk'. 12:39-40; Qay. əyit 3:3; 16:15

45Ağan nökərxo iz vədine ukun tast'eynak' şot'oğoy loxol kalo c'ək'p'i laxi nökəri haq'ullu, tadi əyitin loxol çurpes bakala sa nökər baksuna mayine avabaksa? 46K'oya qaybakat'an şot'o əşlin bel ak'at'an! Bəxt'əvəre metər nökər! 47Və̌x düzinəz nex: ağan metər nökərə bito iz var-dövlətəne tapşurbon. 48Pis nökər isə şone ki, iz ük'e boş "bez ağa hələ c'əyi eğale" pi, 49burqane içu tapşurbi nökərxo tap'sa, için isə arśi iz dost'urxoxun finağoyluğbsa. 50Metər nökəri ağa şot'ay nu yaq'běğala ğine, şot'ay nu avabakala saadast'a eğale. 51Hariyal şot'o p'ə̌ç̌olat'oğoy cazin k'ə baksuna ak'est'ale. Bosale şot'o ǒne q'a uluxxoy ğırıc'enst'un bakala t'e gala.

Currently Selected:

Mat'fey 24: udi

Highlight

Copy