Luù 14
14
Wo Jisɛ̀ naŋ sùngò wo felaa sàaŋ bà
1Kè Ɗɔ̀ɔ̀ zòòlò aŋ Juùù nyaŋ bà guùŋ diɛŋ wo Jisɛ̀ naŋ wa kɔ̀ ko gbòò wo nyùùŋ gbèè aŋ Fɛlosiì nyaŋ bà guùŋ ko jììyè nɛ̀ŋje. Yèè anyùùŋ nyaŋ gbiŋ nauŋ wa jàà fɛ̀ɛ̀ diɛŋ. 2E teenga kpuu sùà wo felaa bà kuwa wa maŋ kuàŋ yèè maŋ golò mìngè minge naŋ hnè koɓɛ̀ Jisɛ̀i. 3Wo Jisɛ̀ naŋ dàwè aŋ kààmɔ̀ɔ̀ŋ maŋ Sàwà Dayà nyaŋ yèè aŋ Fɛlosiì nyaŋ wààŋ, “Ke Sàwà wiɛ̀ naŋ wi gè nyààŋ diɛŋ wèè eiŋ sùngà wo nyùùŋ ke Ɗɔ̀ɔ̀ Zòòlò aŋ Juùù nyaŋ diɛŋ ɔ̀ɔ̀ kpele?”
4Kɛɛ aŋ gò wa wòò è keì gbiŋ. Wo Jisɛ̀ naŋ ɓèmè wo felaaà wouŋ sùngà, wouŋ dangè wo ka. 5Kpeiŋ wò naŋ wòò nyiŋ gbiŋ wààŋ, “Sèè nyɛ̀iŋ nyɛɛ̀ŋ bà guùŋ wo weè kùwìè wo jɔ̀àfelaa ɔ̀ɔ̀ wo diì wo ka wo sɛ̀ɛ̀ ko gòlò maŋ màì ke Ɗɔ̀ɔ̀ Zòòlò aŋ Juùù nyaŋ diɛŋ, muŋ naàŋ tomo wèè mauŋ noo gè kè ɗɔɔ yii diɛŋ ɔ̀ɔ̀ mùŋ douŋ noo nàŋ jòò e jèèsùà wɔŋ niìsìaà bàa?”
6Kɛɛ aŋ gòuŋ wa ɓɛ̀nɛ̀ŋ fàsai è nyaàiŋ dè è keì lɛɛ̀.
Wo Jisɛ̀ naŋ kìɛ̀ŋ e gòo e nyaàiŋ dè ke nyowo yaà e kpùùmaŋ
7Nààŋ wo Jisɛ̀ naŋ yɛ̀mɛ̀ e ɗeweɛ̀ aŋ nyùùnèènyɛiŋ nyàŋ yaà wa ɓèmè sùà maŋ jɛ̀i kɛnɛ màŋ lɛ, wò naŋ wòò aŋ gbiŋ ke kàɓanè yɛɛ̀ wààŋ, 8“Sèè wo nyùùŋ bà wò nyààùm wɔŋ ɗàà gè ke yɛɛ̀ gbìaŋ diɛŋ, ɓɔ̀ mùŋ jɛi kè kpùa kɛnɛɛ̀ diɛŋ. È wɛ̀i ɓɛ̀nɛ̀ŋ nɔ̀ŋ kɛ̀ àŋ naŋ nyààŋ wo nyuùŋ gbee bà wo yèɔ naum nìàŋ wɔ. 9Kpeiŋ kɛ̀ wo nyùnɔ̀ɔŋ naum nyààŋ wɔ wò ɓɛ̀nɛ̀ŋ hnàŋ ko nɛ̀ɛ̀ŋ muìŋ woum woò wààŋ, ‘Tɔ̀ wo nyùùŋ wɛɛ̀ wo jɛi ke kpùa yɛɛ̀ diɛŋ.’ Tɛɛ̀ doum nàŋ kpɛɛ̀ŋ yèè sɔɔ̀ maŋ nyiŋ yèwà diɛŋ maŋ ka maŋ jɛ̀ì ke kpùa joo diɛŋ ko hùu kɔ̀ɔ̀i. 10Kɛɛ sèè wo nyùùŋ wò nyààùm, kɔ̀à muŋ jɛi ke kpùaà diɛŋ ko hùu kɔ̀ɔ̀i, wèè kɛ̀ wo nyùnɔ̀ɔŋ naum nyààŋ wɔ wò hnàŋ ko nɛ̀ɛ̀ŋ muìŋ wo woò wààŋ, ‘Jowà kià dàwi miɔ̀ŋ, muŋ jɛi ke kpùa kɛnɛ yɛɛ̀ diɛŋ.’ Tɛɛ̀ doum nàŋ kìɛ̀ŋ e dɛ̀ɛ̀kɛ ko fɛ̀ɛ̀fèìŋ aŋ nyùùnèènyɛiŋ nyàŋ gbiŋ. 11Esaɓù kɛ̀ anyùùŋ nyaŋ joowà nyiŋ bi nyàŋ, wo Dayà do nyiŋ nàŋ deeyè. Anyùùŋ nyaŋ deeyà nyiŋ bi nyàŋ, wo Dayà do nyiŋ nàŋ joowò.”
12Kpeiŋ wo Jisɛ̀ naŋ wòò felaaà naŋ nyiŋ nyààŋ wɔ wààŋ, “Sèè mùŋ nyaaŋ anyùùŋ wèè e nɛ̀ŋje jììyà koɓɛ̀ guùŋ, ɓɔ̀ mùŋ nyààŋ àŋ dàwium nyàŋ ɔ̀ɔ̀ àŋ wùìyaum nyàŋ ɔ̀ɔ̀ kè kpoo mɔɛ̀ŋ ɔ̀ɔ̀ ànyuùŋ bàne nyàŋ. Esaɓù kɛ̀ àŋ doum nàŋ nyààŋ muàŋ pɛɛ, yèè e ɗewe lɛɛ̀ sùà àŋ doum nàŋ nɔ̀ɔ̀ŋ pààwa sùà wèè e yèɛ mùŋ naŋ nyɛ̀nɛ̀ŋ lɛ. 13Sèè mùŋ woà mààŋ muŋ gè wɔŋ ɗaa, nyaàŋ anyuùŋ pɔ̀ɔ nyàŋ, anyuùŋ kpɔ̀ɔ̀kpɔɔ nyàŋ, anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ, yèè anyuùŋ zììlè fɛ̀ɛ̀ nyaŋ. 14Wo Dayà doum nàŋ kpuumò, esaɓù kɛ̀ anyùùŋ nyiiŋ fòum ɓɛ̀nɛ̀ŋ pààwa. Wo Dayà doum nàŋ paawà ke ɗɔɔɛ̀ anyùùŋ tɔ̀ɔ̀nyaàŋ nyaŋ yewe wa nàwèè e fàaà dìì lɛ.”
Ke kàɓànè wɔŋ Ɗaa Gbeeɔ̀
(Maafiù 22.1-10)
15Nààŋ wo nyùùnèènyɛiŋ nɔɔ̀ŋ bà guùŋ jaa wa wɔŋ gbɛ̀gbɛ̀ɔ diɛŋ naŋ tɛɛ̀ kòmò, wò naŋ wòò wò Jisɛ̀ wààŋ, “E zɔlɔ̀ do nàŋ nɔ̀ŋ anyùùŋ nyaŋ do nàŋ nɔ̀ŋ wɔŋ ɗaaà diɛŋ nyàŋ e Kànà Dayàa sùà.”
16Wo Jisɛ̀ nauŋ woò wààŋ, “Wo kenàŋ bà naŋ wa nyàànè wɔŋ ɗaa gèe gbee wɔŋ yèɔ wò naŋ wa nyààŋ anyuùŋ zimgbe diɛŋ wɔ̀ŋ. 17Nààŋ e teengaà naŋ wa haì wèè wɔŋ ɗaaà, wò naŋ tùɔ̀ŋ wo ɓɔìjɔ̀àuŋ nɔɔ̀ŋ wèè wo woò anyùùŋ wààŋ, ‘Hnaìŋ wɔŋ ɗaaà diɛŋ, manɛ̀ŋ maŋ gbiŋ yaà bànèbane miŋ.’ 18Kɛɛ wo bà guùŋ gbiŋ naŋ wa tɔ̀ɔ̀tù dàwe wèè ke kàfaì. Wo nyuùŋ jiɛ̀jiɛ̀ɔ naŋ wòò wo ɓɔìjɔ̀àa wààŋ, ‘Mìŋ naŋ nɔŋ dènè wɔŋ ɓù sààmɛ yèè kuŋ mìŋ yaà kɔɔyɛ wèè ka wuŋ yɛmɛ̀. Weètii jùùyaàim hakɛ̀.’ 19Wo bà guùŋ naŋ ɓɛìŋ dawè wèè ke kàfaì yèè wò naŋ woò wààŋ, ‘Mìŋ naŋ dènè aŋ dìì wòwò zììyà, mìŋ yaà kɔɔyɛ wèè ka tùàŋ maŋ nɔnɔŋ e kìlà ka yɛmɛ̀ sèè mààŋ diè àŋ yaà. Weètii jùùyaàim hakɛ̀.’ 20Wo bà guùŋ naŋ woò wààŋ, ‘Mìŋ naŋ nɔŋ mɔ̀nɔ̀ŋ wo jawè miɔ̀ŋ e ɗɔ̀ɔ̀ tìyèeɛ̀, wèè esaɓù lɛɛ̀ mìŋ fè ɓɛ̀nɛ̀ŋ hnàaŋ.’ 21Wo ɓɔìjɔ̀àa naŋ kɛ̀ɛ̀ maŋjɛ̀wɛ yèè wò naŋ wòò tɛɛ̀ gbiŋ koɓɛ̀ wo kààmɔɔuŋ nɔɔ̀ŋ. Wo kààmɔɔuŋ nɔɔ̀ŋ naŋ wa tuù yèè wò naŋ wòò wo ɓɔìjɔ̀àa wààŋ, ‘Kɔ̀à fiò maŋ dòmaŋ màŋ diɛŋ yaà e jawaà sùà muŋ hiàŋ anyuùŋ pɔ̀ɔ nyàŋ, anyuùŋ kpɔ̀ɔ̀kpɔɔ nyàŋ, anyuùŋ zììlè fɛ̀ɛ̀ nyaŋ, yèè anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ.’ 22E teenga kpuu sùa wo ɓɔìjɔ̀àa naŋ kɛ̀ɛ̀ maŋjɛ̀wɛ yèè wò naŋ wòò wo kààmɔɔuŋ nɔɔ̀ŋ wààŋ, ‘Kà nyɛ̀nɛ̀ŋ e nɛ̀ɛŋ mùŋ naim woò wèè ka nyɛ̀nɛ̀ŋ lɛ, kɛɛ maŋ jɛ̀i foo zimgbe naŋ joo wèè anyuùŋ zimgbe.’ 23Kpeiŋ wo kààmɔɔɔ̀ŋ naŋ wòò wo ɓɔìjɔ̀àa wààŋ, ‘Kɔ̀à maŋ dòmàŋ jawa ɗi màŋ diɛŋ yaà maŋ dòmàŋ ɓù maŋ diɛŋ muŋ nyààŋ anyùùŋ aŋ hnàŋ aŋ dià wɔŋ gbolo miɔ̀ŋ sùà ko gboo miìŋ. 24Mìŋ yààùm wòò sùà, anyùùŋ nyaŋ kinɛiŋ mìŋ naŋ tùɔ̀ŋ ke mìè jiɛ̀ yèè aŋ gò hnàŋ nyaŋ, wo bà guùŋ pɛɛ wo naàŋ wɔ̀ɔ̀ è nɛ̀ŋje bi bà.’ ”
E nɛ̀ɛŋ mùŋ nyɛnɛŋ wèè maŋ nɔ̀ŋ wo nyùùŋ màŋjɛ̀wɛ̀ Jisɛ̀ lɛ
(Maafiù 10.37, 38)
25E tèèngà guùŋ bà e faaŋ gbee naŋ wa dè wo Jisɛ̀ maŋjɛ̀wɛ. Nààŋ àŋ yaà wa kɔɔyɛ, wo Jisɛ̀ naŋ kìlè yèè wò naŋ nyiŋ woò wààŋ, 26“Anyùùŋ nyaŋ hnàŋ ko nɛ̀ɛ̀ŋ miìŋ nyaŋ, aŋ fè ɓɛ̀nɛ̀ŋ nɔ̀ŋ ànyùùŋ màŋjɛ̀wɛ̀im sɔɔ̀ nɔŋ aim mànàŋ e nìàŋ aŋ dèda yèè aŋ yèye nyiŋ nyàŋ, aŋ jàwè yèè aŋ jɔ̀à nyiŋ nyàŋ, e kpùlìà aŋ wùìyà yèè aŋ jaa nyiŋ nyàŋ. E kìlà sɔɔ̀ aim mànàŋ e nìàŋ maŋ nyiiŋ nyiŋ màŋ. 27Wo nyùùŋ gbiŋ fè ɓɛ̀nɛ̀ŋ nɔ̀ŋ wò nyùùŋ màŋjɛ̀wɛ̀im sɔɔ̀ nɔŋ wo ɓèmè wɔŋ vànèkpaauŋ nɔɔ̀ŋ woim dè maŋjɛ̀wɛ. 28Sèè nyɛ̀iŋ nyɛɛ̀ŋ bà guùŋ gbiŋ mɔnɔŋ wèè maŋ nyɛ̀lɛ̀ ke sààŋ fùùŋ, mùŋ do nàŋ jɛi maŋ dè ɗì wèè maŋ nyìmàŋ e nɛɛnɛɛ̀ŋ jikaà mùŋ do nàŋ maàŋ lɛ, e kìlà maŋ nyìmàŋ sèè mààŋ kòò mùŋ kuwa e nɛɛnɛŋ sɛmɛ wèè maŋ kpɛ̀ɛ̀yɛ̀ e tòmoɛ̀. 29Sèè mùŋ go yɛi nyɛ̀nɛ̀ŋ, mùŋ do nàŋ tɔ̀ɔ̀tù e kpèè ke sààŋ fùùɛŋ, kɛɛ muŋ naàŋ ɓɛnɛ̀ŋ wèè maŋ kpɛ̀ɛ̀yɛ̀ è tòmoɛ̀. Kpeiŋ anyùùŋ nyaŋ do niŋ nàŋ yɛmɛ̀ nyaŋ àŋ doum nàŋ hiilè. 30Àŋ do nàŋ woò nyààŋ, ‘Wò naŋ tɔ̀ɔ̀tù nyɛ̀lɛ, kɛɛ wo gò ɓɛ̀nɛ̀ŋ kpɛ̀ɛ̀yɛ̀ è tòmoɛ̀.’ 31Sèè wo kana nyuuŋ kòà anyuùŋ tààsùùŋ zììyà (10,000) wèè wo sumiàŋ wo kanaà yèɔ kuwa anyuùŋ taasùùŋ kpɛ̀ɛ̀ùŋ wɔ (20,000), sɔɔ̀ wo kana wii jɛi wo gongò sèè mààŋ kòò wò kuwa e gààŋ sɛmɛ wèè wo sùmìàŋ wo kanaà bàa. 32Sèè wò yɛmɛ̀ kɛ̀ wo fòuŋ ɓɛ̀nɛ̀ŋ sùmiaŋ, wò do nàŋ tùɔ̀ŋ aŋ keela koɓɛ̀ wo kana bi e teengaà wò yaà koɓɛ̀ dii lɛ̀ wèè aŋ dawè wèè e mìèsùàgùùŋ ke jii fàa.” 33Ko dìèmè e gbòauŋ nɛ̀, wo Jisɛ̀ naŋ woò wààŋ, “Weètii, nyɛ̀iŋ nyɛɛ̀ŋ bà gbiŋ fè ɓɛ̀nɛ̀ŋ nɔ̀ŋ wò nyùùŋ màŋjɛ̀wɛ̀im, sɔɔ̀ maŋ gè manɛ̀ŋ siwèum màŋ gbiŋ kùàŋ.”
Maŋ hɛiŋ gò ɓuuyè maŋ
(Maafiù 5.13; Mài 9.50)
34“Maŋ hɛiŋ siaŋ, kɛɛ sèè e ɓùùyè maŋ hɛiŋ nɛ̀ e miŋ jùà, dièsɔa màŋ naŋ ɓɛìŋ ɓɛ̀nɛ̀ŋ kùwà e nɛ̀ŋjeɛ̀ wèè e ɓuuyè? 35Sèè e ɓùùyè maŋ hɛiŋ nɛ̀ e miŋ jùà, maŋ siàŋ pɛɛ ɓɛìŋ wèè è dììɛ. Màŋ siaŋ naàŋ nɔŋ wèè anyùùŋ aŋ miŋ gò. Weètii, jàaìŋ maŋ nùŋ dìì tɛ̀ɛ̀ sèè nìŋ kɛɛnɛ̀ŋ maŋ nùŋ!”
Currently Selected:
Luù 14: WFESD
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.
Luù 14
14
Wo Jisɛ̀ naŋ sùngò wo felaa sàaŋ bà
1Kè Ɗɔ̀ɔ̀ zòòlò aŋ Juùù nyaŋ bà guùŋ diɛŋ wo Jisɛ̀ naŋ wa kɔ̀ ko gbòò wo nyùùŋ gbèè aŋ Fɛlosiì nyaŋ bà guùŋ ko jììyè nɛ̀ŋje. Yèè anyùùŋ nyaŋ gbiŋ nauŋ wa jàà fɛ̀ɛ̀ diɛŋ. 2E teenga kpuu sùà wo felaa bà kuwa wa maŋ kuàŋ yèè maŋ golò mìngè minge naŋ hnè koɓɛ̀ Jisɛ̀i. 3Wo Jisɛ̀ naŋ dàwè aŋ kààmɔ̀ɔ̀ŋ maŋ Sàwà Dayà nyaŋ yèè aŋ Fɛlosiì nyaŋ wààŋ, “Ke Sàwà wiɛ̀ naŋ wi gè nyààŋ diɛŋ wèè eiŋ sùngà wo nyùùŋ ke Ɗɔ̀ɔ̀ Zòòlò aŋ Juùù nyaŋ diɛŋ ɔ̀ɔ̀ kpele?”
4Kɛɛ aŋ gò wa wòò è keì gbiŋ. Wo Jisɛ̀ naŋ ɓèmè wo felaaà wouŋ sùngà, wouŋ dangè wo ka. 5Kpeiŋ wò naŋ wòò nyiŋ gbiŋ wààŋ, “Sèè nyɛ̀iŋ nyɛɛ̀ŋ bà guùŋ wo weè kùwìè wo jɔ̀àfelaa ɔ̀ɔ̀ wo diì wo ka wo sɛ̀ɛ̀ ko gòlò maŋ màì ke Ɗɔ̀ɔ̀ Zòòlò aŋ Juùù nyaŋ diɛŋ, muŋ naàŋ tomo wèè mauŋ noo gè kè ɗɔɔ yii diɛŋ ɔ̀ɔ̀ mùŋ douŋ noo nàŋ jòò e jèèsùà wɔŋ niìsìaà bàa?”
6Kɛɛ aŋ gòuŋ wa ɓɛ̀nɛ̀ŋ fàsai è nyaàiŋ dè è keì lɛɛ̀.
Wo Jisɛ̀ naŋ kìɛ̀ŋ e gòo e nyaàiŋ dè ke nyowo yaà e kpùùmaŋ
7Nààŋ wo Jisɛ̀ naŋ yɛ̀mɛ̀ e ɗeweɛ̀ aŋ nyùùnèènyɛiŋ nyàŋ yaà wa ɓèmè sùà maŋ jɛ̀i kɛnɛ màŋ lɛ, wò naŋ wòò aŋ gbiŋ ke kàɓanè yɛɛ̀ wààŋ, 8“Sèè wo nyùùŋ bà wò nyààùm wɔŋ ɗàà gè ke yɛɛ̀ gbìaŋ diɛŋ, ɓɔ̀ mùŋ jɛi kè kpùa kɛnɛɛ̀ diɛŋ. È wɛ̀i ɓɛ̀nɛ̀ŋ nɔ̀ŋ kɛ̀ àŋ naŋ nyààŋ wo nyuùŋ gbee bà wo yèɔ naum nìàŋ wɔ. 9Kpeiŋ kɛ̀ wo nyùnɔ̀ɔŋ naum nyààŋ wɔ wò ɓɛ̀nɛ̀ŋ hnàŋ ko nɛ̀ɛ̀ŋ muìŋ woum woò wààŋ, ‘Tɔ̀ wo nyùùŋ wɛɛ̀ wo jɛi ke kpùa yɛɛ̀ diɛŋ.’ Tɛɛ̀ doum nàŋ kpɛɛ̀ŋ yèè sɔɔ̀ maŋ nyiŋ yèwà diɛŋ maŋ ka maŋ jɛ̀ì ke kpùa joo diɛŋ ko hùu kɔ̀ɔ̀i. 10Kɛɛ sèè wo nyùùŋ wò nyààùm, kɔ̀à muŋ jɛi ke kpùaà diɛŋ ko hùu kɔ̀ɔ̀i, wèè kɛ̀ wo nyùnɔ̀ɔŋ naum nyààŋ wɔ wò hnàŋ ko nɛ̀ɛ̀ŋ muìŋ wo woò wààŋ, ‘Jowà kià dàwi miɔ̀ŋ, muŋ jɛi ke kpùa kɛnɛ yɛɛ̀ diɛŋ.’ Tɛɛ̀ doum nàŋ kìɛ̀ŋ e dɛ̀ɛ̀kɛ ko fɛ̀ɛ̀fèìŋ aŋ nyùùnèènyɛiŋ nyàŋ gbiŋ. 11Esaɓù kɛ̀ anyùùŋ nyaŋ joowà nyiŋ bi nyàŋ, wo Dayà do nyiŋ nàŋ deeyè. Anyùùŋ nyaŋ deeyà nyiŋ bi nyàŋ, wo Dayà do nyiŋ nàŋ joowò.”
12Kpeiŋ wo Jisɛ̀ naŋ wòò felaaà naŋ nyiŋ nyààŋ wɔ wààŋ, “Sèè mùŋ nyaaŋ anyùùŋ wèè e nɛ̀ŋje jììyà koɓɛ̀ guùŋ, ɓɔ̀ mùŋ nyààŋ àŋ dàwium nyàŋ ɔ̀ɔ̀ àŋ wùìyaum nyàŋ ɔ̀ɔ̀ kè kpoo mɔɛ̀ŋ ɔ̀ɔ̀ ànyuùŋ bàne nyàŋ. Esaɓù kɛ̀ àŋ doum nàŋ nyààŋ muàŋ pɛɛ, yèè e ɗewe lɛɛ̀ sùà àŋ doum nàŋ nɔ̀ɔ̀ŋ pààwa sùà wèè e yèɛ mùŋ naŋ nyɛ̀nɛ̀ŋ lɛ. 13Sèè mùŋ woà mààŋ muŋ gè wɔŋ ɗaa, nyaàŋ anyuùŋ pɔ̀ɔ nyàŋ, anyuùŋ kpɔ̀ɔ̀kpɔɔ nyàŋ, anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ, yèè anyuùŋ zììlè fɛ̀ɛ̀ nyaŋ. 14Wo Dayà doum nàŋ kpuumò, esaɓù kɛ̀ anyùùŋ nyiiŋ fòum ɓɛ̀nɛ̀ŋ pààwa. Wo Dayà doum nàŋ paawà ke ɗɔɔɛ̀ anyùùŋ tɔ̀ɔ̀nyaàŋ nyaŋ yewe wa nàwèè e fàaà dìì lɛ.”
Ke kàɓànè wɔŋ Ɗaa Gbeeɔ̀
(Maafiù 22.1-10)
15Nààŋ wo nyùùnèènyɛiŋ nɔɔ̀ŋ bà guùŋ jaa wa wɔŋ gbɛ̀gbɛ̀ɔ diɛŋ naŋ tɛɛ̀ kòmò, wò naŋ wòò wò Jisɛ̀ wààŋ, “E zɔlɔ̀ do nàŋ nɔ̀ŋ anyùùŋ nyaŋ do nàŋ nɔ̀ŋ wɔŋ ɗaaà diɛŋ nyàŋ e Kànà Dayàa sùà.”
16Wo Jisɛ̀ nauŋ woò wààŋ, “Wo kenàŋ bà naŋ wa nyàànè wɔŋ ɗaa gèe gbee wɔŋ yèɔ wò naŋ wa nyààŋ anyuùŋ zimgbe diɛŋ wɔ̀ŋ. 17Nààŋ e teengaà naŋ wa haì wèè wɔŋ ɗaaà, wò naŋ tùɔ̀ŋ wo ɓɔìjɔ̀àuŋ nɔɔ̀ŋ wèè wo woò anyùùŋ wààŋ, ‘Hnaìŋ wɔŋ ɗaaà diɛŋ, manɛ̀ŋ maŋ gbiŋ yaà bànèbane miŋ.’ 18Kɛɛ wo bà guùŋ gbiŋ naŋ wa tɔ̀ɔ̀tù dàwe wèè ke kàfaì. Wo nyuùŋ jiɛ̀jiɛ̀ɔ naŋ wòò wo ɓɔìjɔ̀àa wààŋ, ‘Mìŋ naŋ nɔŋ dènè wɔŋ ɓù sààmɛ yèè kuŋ mìŋ yaà kɔɔyɛ wèè ka wuŋ yɛmɛ̀. Weètii jùùyaàim hakɛ̀.’ 19Wo bà guùŋ naŋ ɓɛìŋ dawè wèè ke kàfaì yèè wò naŋ woò wààŋ, ‘Mìŋ naŋ dènè aŋ dìì wòwò zììyà, mìŋ yaà kɔɔyɛ wèè ka tùàŋ maŋ nɔnɔŋ e kìlà ka yɛmɛ̀ sèè mààŋ diè àŋ yaà. Weètii jùùyaàim hakɛ̀.’ 20Wo bà guùŋ naŋ woò wààŋ, ‘Mìŋ naŋ nɔŋ mɔ̀nɔ̀ŋ wo jawè miɔ̀ŋ e ɗɔ̀ɔ̀ tìyèeɛ̀, wèè esaɓù lɛɛ̀ mìŋ fè ɓɛ̀nɛ̀ŋ hnàaŋ.’ 21Wo ɓɔìjɔ̀àa naŋ kɛ̀ɛ̀ maŋjɛ̀wɛ yèè wò naŋ wòò tɛɛ̀ gbiŋ koɓɛ̀ wo kààmɔɔuŋ nɔɔ̀ŋ. Wo kààmɔɔuŋ nɔɔ̀ŋ naŋ wa tuù yèè wò naŋ wòò wo ɓɔìjɔ̀àa wààŋ, ‘Kɔ̀à fiò maŋ dòmaŋ màŋ diɛŋ yaà e jawaà sùà muŋ hiàŋ anyuùŋ pɔ̀ɔ nyàŋ, anyuùŋ kpɔ̀ɔ̀kpɔɔ nyàŋ, anyuùŋ zììlè fɛ̀ɛ̀ nyaŋ, yèè anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ.’ 22E teenga kpuu sùa wo ɓɔìjɔ̀àa naŋ kɛ̀ɛ̀ maŋjɛ̀wɛ yèè wò naŋ wòò wo kààmɔɔuŋ nɔɔ̀ŋ wààŋ, ‘Kà nyɛ̀nɛ̀ŋ e nɛ̀ɛŋ mùŋ naim woò wèè ka nyɛ̀nɛ̀ŋ lɛ, kɛɛ maŋ jɛ̀i foo zimgbe naŋ joo wèè anyuùŋ zimgbe.’ 23Kpeiŋ wo kààmɔɔɔ̀ŋ naŋ wòò wo ɓɔìjɔ̀àa wààŋ, ‘Kɔ̀à maŋ dòmàŋ jawa ɗi màŋ diɛŋ yaà maŋ dòmàŋ ɓù maŋ diɛŋ muŋ nyààŋ anyùùŋ aŋ hnàŋ aŋ dià wɔŋ gbolo miɔ̀ŋ sùà ko gboo miìŋ. 24Mìŋ yààùm wòò sùà, anyùùŋ nyaŋ kinɛiŋ mìŋ naŋ tùɔ̀ŋ ke mìè jiɛ̀ yèè aŋ gò hnàŋ nyaŋ, wo bà guùŋ pɛɛ wo naàŋ wɔ̀ɔ̀ è nɛ̀ŋje bi bà.’ ”
E nɛ̀ɛŋ mùŋ nyɛnɛŋ wèè maŋ nɔ̀ŋ wo nyùùŋ màŋjɛ̀wɛ̀ Jisɛ̀ lɛ
(Maafiù 10.37, 38)
25E tèèngà guùŋ bà e faaŋ gbee naŋ wa dè wo Jisɛ̀ maŋjɛ̀wɛ. Nààŋ àŋ yaà wa kɔɔyɛ, wo Jisɛ̀ naŋ kìlè yèè wò naŋ nyiŋ woò wààŋ, 26“Anyùùŋ nyaŋ hnàŋ ko nɛ̀ɛ̀ŋ miìŋ nyaŋ, aŋ fè ɓɛ̀nɛ̀ŋ nɔ̀ŋ ànyùùŋ màŋjɛ̀wɛ̀im sɔɔ̀ nɔŋ aim mànàŋ e nìàŋ aŋ dèda yèè aŋ yèye nyiŋ nyàŋ, aŋ jàwè yèè aŋ jɔ̀à nyiŋ nyàŋ, e kpùlìà aŋ wùìyà yèè aŋ jaa nyiŋ nyàŋ. E kìlà sɔɔ̀ aim mànàŋ e nìàŋ maŋ nyiiŋ nyiŋ màŋ. 27Wo nyùùŋ gbiŋ fè ɓɛ̀nɛ̀ŋ nɔ̀ŋ wò nyùùŋ màŋjɛ̀wɛ̀im sɔɔ̀ nɔŋ wo ɓèmè wɔŋ vànèkpaauŋ nɔɔ̀ŋ woim dè maŋjɛ̀wɛ. 28Sèè nyɛ̀iŋ nyɛɛ̀ŋ bà guùŋ gbiŋ mɔnɔŋ wèè maŋ nyɛ̀lɛ̀ ke sààŋ fùùŋ, mùŋ do nàŋ jɛi maŋ dè ɗì wèè maŋ nyìmàŋ e nɛɛnɛɛ̀ŋ jikaà mùŋ do nàŋ maàŋ lɛ, e kìlà maŋ nyìmàŋ sèè mààŋ kòò mùŋ kuwa e nɛɛnɛŋ sɛmɛ wèè maŋ kpɛ̀ɛ̀yɛ̀ e tòmoɛ̀. 29Sèè mùŋ go yɛi nyɛ̀nɛ̀ŋ, mùŋ do nàŋ tɔ̀ɔ̀tù e kpèè ke sààŋ fùùɛŋ, kɛɛ muŋ naàŋ ɓɛnɛ̀ŋ wèè maŋ kpɛ̀ɛ̀yɛ̀ è tòmoɛ̀. Kpeiŋ anyùùŋ nyaŋ do niŋ nàŋ yɛmɛ̀ nyaŋ àŋ doum nàŋ hiilè. 30Àŋ do nàŋ woò nyààŋ, ‘Wò naŋ tɔ̀ɔ̀tù nyɛ̀lɛ, kɛɛ wo gò ɓɛ̀nɛ̀ŋ kpɛ̀ɛ̀yɛ̀ è tòmoɛ̀.’ 31Sèè wo kana nyuuŋ kòà anyuùŋ tààsùùŋ zììyà (10,000) wèè wo sumiàŋ wo kanaà yèɔ kuwa anyuùŋ taasùùŋ kpɛ̀ɛ̀ùŋ wɔ (20,000), sɔɔ̀ wo kana wii jɛi wo gongò sèè mààŋ kòò wò kuwa e gààŋ sɛmɛ wèè wo sùmìàŋ wo kanaà bàa. 32Sèè wò yɛmɛ̀ kɛ̀ wo fòuŋ ɓɛ̀nɛ̀ŋ sùmiaŋ, wò do nàŋ tùɔ̀ŋ aŋ keela koɓɛ̀ wo kana bi e teengaà wò yaà koɓɛ̀ dii lɛ̀ wèè aŋ dawè wèè e mìèsùàgùùŋ ke jii fàa.” 33Ko dìèmè e gbòauŋ nɛ̀, wo Jisɛ̀ naŋ woò wààŋ, “Weètii, nyɛ̀iŋ nyɛɛ̀ŋ bà gbiŋ fè ɓɛ̀nɛ̀ŋ nɔ̀ŋ wò nyùùŋ màŋjɛ̀wɛ̀im, sɔɔ̀ maŋ gè manɛ̀ŋ siwèum màŋ gbiŋ kùàŋ.”
Maŋ hɛiŋ gò ɓuuyè maŋ
(Maafiù 5.13; Mài 9.50)
34“Maŋ hɛiŋ siaŋ, kɛɛ sèè e ɓùùyè maŋ hɛiŋ nɛ̀ e miŋ jùà, dièsɔa màŋ naŋ ɓɛìŋ ɓɛ̀nɛ̀ŋ kùwà e nɛ̀ŋjeɛ̀ wèè e ɓuuyè? 35Sèè e ɓùùyè maŋ hɛiŋ nɛ̀ e miŋ jùà, maŋ siàŋ pɛɛ ɓɛìŋ wèè è dììɛ. Màŋ siaŋ naàŋ nɔŋ wèè anyùùŋ aŋ miŋ gò. Weètii, jàaìŋ maŋ nùŋ dìì tɛ̀ɛ̀ sèè nìŋ kɛɛnɛ̀ŋ maŋ nùŋ!”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.