Jowãw 3

Pê Pahpãm te me pahto ipintuw xà pê hacpỹa mã me pahpỳpỳm xà pyràac

1Ne pê hũmre nõ japrỳ te Nicotem ata pê Juta catêjê jõ pahhi na mehkwỳ nõa, ne cupê Parixêw catêjê kwỳ nõ, ne cupê Mojxe xwỳ jõ kàhhôc to me cumã hahkre catêjê nõa. 2Ne ma caxwa ri Jeju wỳr mõ, cute hõmpun, ne cumã ihcakôc prãmte. Ne hỹrmã cator ne cumã:

— Ỹhỹ Jeju, wa ite, Pahpãm te me imã apê ampo to hahkre catê na akujahêc na gahkre pej. Ampo na? Ca atỳj Pahpãm carôat to ampo pihhoti jàhtôa ton to apa atajê, ihtỳj Pahpãm carôt tỳjti to ipipẽ to mõ. Jũ wỳr quê Pahpãm jũm kujahêc nare, quê jũm ampo itajê nõ to — hajỹr.

3Mã Jeju cumã:

— Ỹhỹ, wa ha nee amã ihêj xi jarẽn nare. Quê ha jũmjê mã Pahpãm himpej xà mã mencjêj to prãm na, quê ha xa hacpỹa mã amehpỳpỳm — hajỹr.

4Mã Nicotem cumã:

— Pỳhàpà, jũ wỳr quê ha ramã jũm kàhtu ata amji mã hamã, nehacpỹa mã inxi tu mã axà ne hipêr ihpỳm — hane. 5-6Mã Jeju te cumã ihkôt harẽn to:

— Ỹhỹ, wa nee apu amã ihêj xi jarẽn nare. Quê ha jũmjê te Pahpãm himpej xà mã incjêj prãm na, quê ha xa hacpỹ mã amehpỳpỳm, jirô pê mã quê ha cormã me acjêj. Pê ca mam gĩ to, anã tu kam cô ata kôt apỳm, ne apê anã kra. Jĩkjê na, ca ha hipêr Pahpãm Carõ Pejti kôt, acaxwỳn carõ to amji mã intuw, ne apê Pahpãm kra.

7— Nee ca ite amã hacpỹa mã, me acunea pỳpỳm na me garẽn ita to amji mã ame apikrar nare. 8Ampo na? He Pahpãm Carõ Pejti kôt amehpỳpỳm xà ata pê ihhêj rũm kôc pyràac. Jũ wỳr ca ha jũ kam kôc te hàpêr xà na amji mã prãm xà ata wỳr hàpêr na hõmpu. Ca ha me hàmcoco pit kampa, ne nee hõmpun nare. Ne nee ca ha jũ pĩn cator xà me, jũ kam ihtẽm xà ata na hahkre pej nare. Jĩkjê na mã, Pahpãm Carõ Pejti jàpên xà pê hũràac. Ne nee quê ha jũm Pahpãm Carõ Pejti te jũm to amji mã ihkra xà ata na hahkre pej ne hõmpun nare — hajỹr.

9Mã Nicotem cumã:

— Jũ mã quê ajte ita, ne hane? — hane.

10Mã Jeju cumã:

— Pỳhàpà, pom apê Juta catêjê mã ampo to hahkre catê ita! Nõ na mã apê ampo ita jahkre kêatre? 11Wa ha nee amã ihêj xi jarẽn nare. He wa amcro cunea kam me akwỳ mã, ite ampo jahkre pej itajê to hahkre to ipa. Ne hanea ne ite ito jĩa to ampo pupun atajê pupun xàa kôt, wa me amã harẽn to ipa cakrô, ca ajte nee cormã ate me ipar nare. 12Ne wa ramã ite me amã pjê ita kam ampo te jũ mãn xà ata na harẽn, ca nee ajte ate ikam me gapac nare. Ita kam, ca ha pijamã ite me amã côjkwa kam ampo jarẽn xà atajê cunea na me ikampa? Me gũpar nare ita kam, ca ha nee me ikam gapac nare. 13Ne rỳ jũ caxuw côjkwa wỳr jũm jàpir ne hacpỹ ne cute amji jaxàr nare. Ne pa nare, he ipê kỳj pê, côjkwa kam me Ahàkà, cwỳrjapê wa curũam ite me hũmre na amji ton ne iwrỳc.

Cu ha amji mã Jeju to pahhimpej na, cu ha Pahpãm cahê na amji to me ajpa

14— Ne pê Mojxe xwỳ mat ri, põ kam me hamreare ata ri, wakỳre te cagã to, ne pĩ na cuxô. Ampo na? Nee mã pê ampo na wakỳre te cagã ata xôr nare. Pê cagã ajco me cãmxa, pê me wakỳre te cagã ata pupu, ne hacpỹa mã mempej. Ita jĩkjê na wa ha hanea. Quê ha jũ caxuw me ito wakỳre te cagã ata pyràac, ne me icuran xà caxuw, pĩ na me ixô. 15Quê ha jũm ito cagã ata ne ipupu, ne ito amji mã ihhimpej, quê ha ihtỳj ihtyc xà jirô pê ampo kên catia ata pê amji pytà, ne Pahpãm cahê na amji to ipijapar rohnỳtti mã.

16— He ampeaj kam Pahpãm mã pjê kam mehcunea ame ipa itajê kĩn, mã cute me cumã, ipê cumã ihkra pyxit peaj kĩnti ata to hũjahkre ne hõr, ne pjê wỳr ajpên ikujahêc. Mãr quê cute ito amji mã mehhimpej atajê me ty, ne nee mehtyc tu ne Pahpãm kaj na ame ipa nare, ne quêt hacpỹa mã mehtĩr, ne Pahpãm cahê na me ipa rohnỳtti mã. 17Pê nee Inxũ imã harkwa to: “Cute mehkên ton jahpan xà na, pjê wỳr wrỳ ne curê mã me amẽ” hajỹr nare. Ne quêt cama imã: “Ca ha wrỳ ne mehkên pê me hũtà” hane.

18— Na quê ha jũmjê te, ipê Pahpãm kra na amji mã ito mehhimpej na, quê ha nee Inxũ cute cuna mã ihkên ton xà atajê to me cumã ihcakôc, ne curê mã me irẽn nare. Ne por nee amji mã me ito mehhimpej nare atajê ri, ramã curê mã cute me mẽn na, me ahna me amji ton. Ampo na? Nee cute amji mã me ito ihhimpej nare, na quê ha curê mã me cumẽ.

Pê Jeju me hàhtôa atajê mã mehkên jarẽn na cumã to prãm nare

19— Cu ha ampo kên tũmti ata wỳr me pajàhcujro xà nõ, pôc pejti ata to mõ, ne me to ihtũmti ata pupun pyrentu. Jĩkjê na ri ipê pjê kam mehcunea jàhcujro xà. Ampo na? He wa itỳj me cumã cute mehkên ton xà atajê jarẽ, mã me hõmpu, ne cute me hahkre pej xà ita caxuw wa me hỹrmã iwrỳc, ne amehcujro to mõ. Mã ma mehkwỳ apu ite mehcujro ita na mehcaca, ne me cumã amji kam awcapàtkôti ita na pit mã me to prãm. Ampo na? Awcapàtkô ita kam ri hãn ne ihtỳj ame ampo kên ton to me ipa, cwỳrjapê ri ma ame icaca. Ne quê ha, cute me icaca catêjê cute me ampo kên ton atajê jahpan xà na, Pahpãm ame to kêanre ne.

20— Ỹhỹ, por awcapàtkô kam ame ampo kên ton to me ipa atajê mã amji cujro prãm nare. Ampo na? Cute ampo kên ton atajê na me hahkre pej cupate ri ma ame amji cujro caca. Cwỳrjapê ri mehkên catêjê ipê ampỳa mã ame ipa. 21Ne por catyt kam Pahpãm jarkwa kôt me ipa atajê ri, ijàhcujro impejti ata kam ihtỳj ame ipa xà. Mãr quê mehcunea catyt kam, Pahpãm jarkwa kôt me ipa na me hõmpu, quê nee ame ampo kên ton nare, na ri ihtỳj ame ipa. Na ri hanea ne ihtỳj mempejti catêjê atajê ikôt me ipa — hane.

Jowãw te mehcumrãr catê pê Jeju jarkwa to imprar catê

22Ita jirô pê mã, wa ma Jeju me, me ipê ihkôt me ipa catêjê me, Krĩpinkrên pê me icator, ne ma põ pê Juta jõ pjê kam ame ipa. Ne curia me cahê na ite jũ mã amji to me amcro ton, wa itỳj harkwa kôt cô kam amehcumrãr to me ipa. 23Pê hanea ne ihtỳj Jowãw, cô japrỳ te Enõ pê Xarim jõ krĩ na pire mã xa ata kam, cô kam amehcumrãr to mõ. Ampo na? Ampeaj kam quêt curi cumã cô cati. 24Ne pê caxuw cormã nee me Jowãw jaxàr nare.

25Mã amcro nõ na Jowãw kôt me ipa catêjê kwỳ atajê me, Juta catêjê jõ pahhi kwỳ te ajpẽn mãn kam mehtẽm, Pahpãm mã cute me amji cũmpej xà na cô kam me amji cumrãr xà ata ri. Ne nee jũmjê te me ajpẽn par pej nare. 26Cwỳrjapê ri ma Jowãw te mehcumrãr catê pê me hõ pahhi ata wỳr, me amji to mõ, ne cute me cumã amji jarẽn to:

— Me ijõ pahhi, wa ite me amji cũmpej xà ita kam, nee ite me ampo par pej nare, ne me ikrã pictor tu. Ne por pê ca jũm xũmre to me imã awjarẽ ata, ihtỳj mehcũmpej prãmte, acuxà Côpijapjêr jõ cô kam ame cumrãr to mõ, mã quêt mehcunea ihtỳj hỹrmã me pra! Ne jũ mã mã cu ha ajte me? — hajỹr.

27Mã Jowãw te me cumã harkwa to:

— Nee ca ita to ame amji kam gapac nare. Côjkwa kam Pahpãm te ahpỹanre na me hũmre mã me hàpên xà jõr par. 28He ijàpên xà ita pê Jeju pê hũmre ata mã ite pry to impej xà, mãr quê pry ata kôt me hàhtôa ne ihwỳr me apkjê. Ne nee ipê, por pê Pahpãm me pamã to awjahkre ata nare, ne ite amji jarẽn xà na ramã ate me ipar. Ne hõ pry to ite cumã impej xà caxuw pê wa mam icato. 29Ne quê ha jõ ri me hàhtôa mã jũm pyxit peaj ne me hirôa pê impej, quê ha hỹarmã me pra. Ita jĩkjê na, quê ha jũm hikwa tuw, quê ha hĩxi impjên ata wỳr pit mã tẽ, ne nee impjên jõ ikwỳ nõ atajê wỳr ihtẽm nare cakrô, quê ha ihtỳj hũ na hõ ikwỳ nõ atajê ame hakry. Ita jĩkjê na wa itỳj Jeju jũ na ijakry. 30Na quê ha ihtỳj quêt Jeju ipicamẽn to mõ, ne cati to mõ, ne pa nare, wa ha ihkĩnte cama hacpỹa mã icri to mõ.

31— Ne Jeju quêt côjkwa pĩn cator ata ri ijirôa pê cati. Ne pa nare, pê wa ihkĩnte pjê ita kam icato, ne imã pjê kam ampo itajê to pit mã icakôc jahkre pej. 32Ne taa mã nare, quêt cute côjkwa kam ampo par ne hõmpun atajêa to hãn ne ihcakôc to ipa cakrô, mã ajmãr nee jũm te ahna amji caxàr nare. 33-34Ne mencrêre te cute ampo jarẽn xà atajê na me kam hapac, ne ihtỳj ampeaj kam cute me Pahpãm catyt kam ihcakôc ata kam me hapac. Ne Pahpãam te ri ihkujahêc na, cute me hahkre pej. He ampeaj kam ri Pahpãm cakôc xàa to Jeju ihcakôc to ipa. Ampo na? Nee mã ampo na nare. Pahpãm Carõ Pejti catia te cumã amji jõr na ri, ne nee kam Pahpãm Carõ Pejti ata crire nare.

35— Ne Hũm mã ihkra ita kĩan to ihkĩn, mã cute cumã hõ tekjêa na ampo atajê cunea jõr, ne taa mã ri ita caxuw to hõ tekjê, ne ihcunea jamã. 36Na quê ha jũmjê te amji mã Pahpãm kra te me hũtàr catê na me to amji mã hajỹr na, quê ha quêt Pahpãm cahê na mehtĩr rohnỳtti mã na ame ipa. Ne por nee me kam hapac nare, ne nee amji mã me harkwa cupa nare atajê, quê ha nee côjkwa wỳr me hàpir, ne me Pahpãm pupun nare. Quê ha cama me kam Pahpãm cryc ata me hỹrmã apkjê, ne ame to kêanre ne — hajỹr. Hõhõ, Jowãw te ihkôt me ipa catêjê mã hũjarẽn to hajỹr.

Currently Selected:

Jowãw 3: ram

Highlight

Copy