Matew 25

Pyjê te tej jarẽn xà

Matew 25.1-13

1Mã Jeju te, cute amji jaxàr xà to me cumã hahkre prãmte me cumã:

— Amcro ata kam, quê ha côjkwa kam Pahpãm himpej xà ata pê ihhêj rũm me cuprỳ te tej atajê pyràc. Ne cute ahpỹanre na me hõ pôc xà incwỳr, ne pry cahti ri me to jũm xũmre jikwa tuw xà ata jikaj. Ne caxwa ri ihtỳj mehkrĩ ne me hikaj, cute me hũnãr ne mehkôt cahãj ata jũrkwa kam amji kĩn wỳr me hàr prãmte.

2— Ne me cuprỳ te xĩc ne mehkrã nare, ne mehkwỳ te xĩc itajê quêt mehkrã kre te amji jahkre pejti. 3Ne por mehkrã nare atajê te ame hõ pôc xà incwỳr, ne nee caxuw amji mã me cacô incwỳr nare. 4Mã quêt mehkwỳ te amji mã me cacô incwỳr. 5Mã cormã hũmre jikwa tuw xà na mehkwỳ itajê apu mehkên, mã ame hõt ne pry cahti ri ame hikaj xà ame hikwa ne ame gõr.

6— Mã ramã caxwa picapôn kam, cute mehkrãhhia kam mencrer na mempar. Mã me cumã caràr to: “Ramã me hikwa tuw xà na mehkwỳ me amji to mõ! Ajpên cuna mã me pra!” hajỹr.

7— Mã me cuprỳ te me tej itajê amehkrĩ, ne ame ipimprar, ne cute ame hõ pôc xà atajê to impej par, mãr quê me cumã ihpôc pej. 8Mã hamre me cuprỳ krã nare atajê pê ihpôc xà cacô jamre, mã me cupê ihtyc, mã mehkwỳ mã: “Me imã gõ pôc xà cacô kwỳ incrire ne. Ampo na? Ramã me ipê me ijõ pôc xà cacô jamre, ne ramã ihtyc to mõ” hajỹr.

9— Mã me cuprỳ krã kreti atajê me cumã: “Jũ wỳr quê. Hamreare, jũ wỳr quê incrire ita kam me pahcatwỳ. Ca ha ma me pra ne caxuw amji mã mehkwỳ japrô” hane.

10— Mã ma ihpôc xà cacô kwỳ japrôr to me pra, mã me hakàn pê me hikwa tuw xà na mehkwỳ cator. Mã cute me cumã me hikwa tuw atajê jũrkwa jarkwa jihê mẽn, mã amji kĩn wỳr mehkôt me hàr. Mã me ahna cute me to hihê.

11— Mã me ahna ahtũmre, mã mehkrã nare atajê te amji mã me cacô japrôr, ne me cator, ne ame caràr to: “Pahhi, pahhi, cama me ijamã, wa me cuxà me acjêj!” hane.

12— Mã me cumã: “Ipê me gahkre kêatre, wa nee ite pry cahti ri me anõ pupun nare. Ne ramã ikre mã mencjêj xà jirô pê ihpỳm, mã hihê” hane.

13— Hõhõ, cwỳrjapê ca ha me amji jamã, ne me gàhcuprõn hiahpuro, nãmri me apê ipê me Ahàkà te amji jaxàr xà jõ amcro ata jahkre kêatre, côt ca ihhêaj to ahtwỳ — hajỹr.

Me ajpẽn pê me pahcunea to ipicokjêr xà

Matew 25.31-46

31Mã Jeju te me cumã Pahpãm te mehcukij xà to hahkre prãmte me cumã:

— Quê ha me Ahàkà amji to Pahhiti, ne ajpên ahpar mã mõ, cumã memprar catêjê cunea me, ne pahhi krĩ xà catia ata kam me jỹ. 32Quê ha pjê kam mehkrĩ atajê cunea cuna mã me cuprõ, quê ha me to ajcokjê. Pom ahnaa mã carà cahàcre hôhti to me ipijapar catêjê, hãn ne ihhôhti ita pê, increcrerti to caprã ne to ajcokjê he, ita na quê ha me ato. 33Ne quê ha awpôc rũm carà cahàcre hôhti to cuprõ, ne awke rũm ihhô nare itajê to cuprõ.

34— Ita na wa ha ipê me gõ Pahhiti awpôc rũm me xa itajê mã ijũjarẽn to: “Por Inxũ te me ato impej atajê, ajpên me mõ. Ajpên me mõ ne ihhimpej xà krac ri me axà. Por pê mam pjê te amji ton xwỳjrea na, Inxũ me amã ihhimpej xà to ata mã, ca me acjêj. 35Ampo na? Nee mã ampo na nare. He pê imã prãm, pê ca me imã ijarte. Ne imã kôr, pê ca me ikõm. Ne icahkrit cakrô, pê ca me gũrkwa wỳr me ijaprô. 36Ne pê ipê ikà nare, pê ca me imã ikà gõ. Ne pê wa ixà, pê ca me ijamã. Ne pê me hacjên xà kam me ijaxà, pê ca ma me ipupun to me apa” hajỹr.

37— Mã mempejti atajê te mehcukij to: “Pahhiti, jũ caxuw ri amã prãm, wa ite me amã gõ jõr? Ne amã kôr, wa ite me amã cô jõr? 38Ne jũ caxuw ri acahkrit, wa ite me ijũrkwa wỳr me gaprôr? Nare, apê akà nare, wa ite me amã me akà ita jõr? 39Ne jũ caxuw ri axà, nare, cute me gaxàr, wa ite me apupun prãmte awỳr me mõ?” hajỹr. 40Mã Pahhiti te impar ne me cumã: “Ampeaj kam wa ha me amã awjarẽ, por ikôt me ipa catêjê kryjre nõ mã ate me acaca xà ton ata, imãa ca ate me ton” hajỹr.

41— Jirô pê mã ri cute awke rũm amehcuhhê atajê mã: “Icuna mã me akêanre atajê, ipê me ajcamẽ. Ne ma Xatanaj me, cumã memprar catêjê mã, ite me to kên xà na cuhy tyc xà nare ton ata wỳr me pra. 42Ampo na? Nee mã ampo na nare. He pê imã prãm, pê ca nee me imã ijarte nare. Ne imã kôr, pê ca nee me ikõm nare. 43Ne pê icahkrit, pê ca nee me gũrkwa wỳr, me ijaprôr nare, ne ipê ikà nare, pê ca nee me imã ikà jõr nare. Ne pê ixà, pê ca nee me ijamãr nare, ne pê me hacjên xà kam me ijaxà, pê ca nee kam me ito amji japackre ne me ipupun nare” hane.

44— Mã mehkên catêjê te mehcukij to: “Pahhi, jũ caxuw wa ite me amã prãm na me apupun, ne amã kôr me, acahkrit me, apê akà nare me, axà me, me hacjên xà kam ite me apupun, ne nee ite me atehcajpar nare?” hajỹr.

45— Mã Pahhiti me cumã: “Ampeaj kam wa ha me amã awjarẽ, ca hãn ne mehkryjre atajê tehcajpar prãm nare, ne me hicu ita kam, nee ate me itehcajpar nare, ne hanea ne ate me ijicu, ne me icaca” hane.

46— Hõhõ, pom mehkên te me hajỹrjê, quê ha ma mehkên mã mencjêj xà ata wỳr me pra, ne curia quê ha amji pupun to kêanre to mehcuhhê rohnỳtti mã. Quê ha hanea ne, mempejti atajê ma mencaca xà impejti tĩr rohnỳtti mã xà ata wỳr me pra — hane.

Currently Selected:

Matew 25: ram

Highlight

Copy