Markus 6

Nasaret Yone Yesusre Nainyehike

(Mat. 13:53-58; Luk. 4:16-30)

1Yairusle maengke waleungebokera, Yesus na moisa orowate yo bele alainyekoke ewate Yesus kabande yeuboke yone aibaleke. 2Sabat ya mo, Yesus huba raweuboke Allahre ei mom-mom imaene kelewoumi. Ro miyae helen sele borowate yo yae fa yae bowate. Hiwa yo yae elewate, “Nda nanemene makeisabe yarowole? Rahe isaei hebaenbe ikainye? Naendae wanen mae rambun emere-emere na hului mokole? 3Aeisaeise nekande neyae ore ahuneweke kiyae. Meyae ranneboke nenake Maria nauwake wa Yakobus, Yoses, Yudas, Simon? Nemaen wa aengkele nekande.” Nebei yo Yesusre moi yae bulewainye.

4Nebeinye Yesus yae weumi, “Yenjo kayaayo a hi a hine be hineyaimi, nebeibe na yo yanne na aka nolo baeke nolonena be ehineyei.”

5Nebeinye rambun emere-emere helen selere Yesus omokoikoi sului. Erana buloona yo mbembare mo, me yae nauwa randa kolowoumi onomire iwoumi. 6Hila rabo ban nekewate erewoumine, Yesus fa yae bowole.

Yesus Na Moisa Orowate Yo Ukeumi Ewate

(Mat. 10:5-15; Luk. 9:1-6)

Nebeisa Yesus aloungekoke, yo ran yo ranne keleumiyeke. 7Na moisa orowate ro me bee oro hi nen bee belere mo kaeneumikoke, beere beere waheukoke, walobore hukenaimile naei elae kiteumiboke, yo hire yo hire ukeumi enatere. 8Nibire enate naei ane weumi, “Era inyale, feu, be kangke, roi, eyaroijae, o mehukun mbaibe yarongkombe embe. 9Oro mehau hirengkombe, nebeibe ambelae beere eyaroijae.” 10Na hibi weumi, “Emembombe yo imae mbainye ehe konaikombena, nebei imaene nekembe. Nekengkombe mo, nebei yora membalembe. 11Anuwau hi embe na ro miyae mare ei ehaweinya, a wemmilere oboroinya, embalembe hee mai orona kani bahe rubommibombe. Nda iwau wanen kelemmibombe neyae me u beko hele mokaiboke!”

12Na moisa orowate yo alainyekoke ewate yae ahuba huwaimiyeke ro miyae wali bekora nulu kennaimibonde bukenaibonde hele. 13Nda yo walobo u ranna nekai hukewaimi, era yo buloo yo helen minyak yae kolowaimi onomi iwaimi.

Yohanes Bure Kowoumi Kiyae Na Yun Naisake

(Mat. 14:1-12; Luk. 9:7-9)

14Rambun emere-emere Yesus mokowolene, a hina a hina yo Nare isaeyaeiboke. Nebei abe yoboungekoke Ondofolo Herodes borouboke. Ro miyae hiwa yae elate, “Neyae Yohanes bure kowoumi kiyae herekebe benen waleuboke. Nebeinye rambun emere-emere mokole.”

15Hiwa yo yae elate, “Neyae Allahle yendo kayaalo Elia!”

Hiwa yo elate, “Neyae yendo kayaalo hi bena yenjo kayaayo wanen.”

16Herodes nebei a faeu elewate boroukokene elele, “Nda Yohanes bure kowoumi bere na yunde ukamaele naisake kiyae, nebeibe waleuboke ya!”

17-18Herodes u benere nekewainye manemfa hele na miyae Herodias kenare kole hului ukeumi Yohanesre ikilaiboke kawane haeinyekoke. Rabuhine ban Yohanes na hibi-hibi Herodesre a elae yae uwounge, “Na ijen ban sele Filipus na miyae Herodias roukae!” Filipus Ondofolo Herodes na aka baeke. 19Nebei aerene Herodias Yohanesre ikele yae kowounge, kena hele kowole Yohanesre hombondere, nebeibe Herodes yae aheungekene mokombondere kabewounge. 20Ondofolo Herodes naeisaei Yohanes wali himaloungebokene nane merau Allahle holona rone, fe faewounge. Nebeinye weumi, “Yohanesle wali kayaare foi sele hebembe.” Yohanes ahubane isuwewole hee Herodes na kena osaeiboi ikowole, nebeibe kena hele borondere ikowole.

21Herodes na ralo yakama barauboke yabe mon foi sele rouke. Nebei ya Herodes eraman bulau kaban mokoumiboke. Naei yo wakuna anuwau bele holona yo, fela yun-jun holona yo, Galilea kanina ro bele ro bele yo kaenewoumi. 22Nebei hee yae Herodiasle maengke meweufike, baene kowole. Ondofolo Herodes nebei kaenewoumi mekate yo bele nda maengke bae kole yae mokowoumi na kenare roweumihike.

Nebeinye Herodes yae nebei maengke fare weunge, “Rahe rambun kenare kole riyeufehinde, reyae ware isete! 23Na hele wawale, naendae wanen horo lon raei yo waku nekale reufire riyeufehindena, reyae ware kinyerete hakerete.”

24Nebei maengke fa eke nenakere ekeufinewounge, “Ana, weyae rahebe kena koyae reyae risehinde?”

Nenake yae weunge, “Yohanes bure koumi kiyaele ro yunbe riyeisi!”

25Nebei maengke fa na hibi bukeufike Ondofolo Herodesle bokore eke weunge, “Reyae riyawale nda hee yae Yohanes bure kowoumi kiyaele yun hote einye menaiseyende!”

26Nebei a wanen riyeungehikene Ondofolo Herodes mehi neufake, na kena beko hele hubawounge. Nebeibe hokoumeke yo bene a holo yae heteungekoke boraibokene, nda maengke yae riyeufike rambunde ahi ewei sului. 27Na hibi kayaare hebate felayo mbaise ukeungele Yohanes bure kowoumi kiyaele yun roweise. Nda ro kawa eise eke Yohanes na yun neufake. 28Nebeisa hote einye Yohanesle yunde mo auboke meke nebei maengke fare ikeunge. Nebei maengke rouke nenakere ikeunge.

29Yohanesle moisa orowate yo hereke a angkaei boroukatene, ekate na uwa bangkare mo elaeisake a bulune aimoloufake.

Yesus Yae Ro Miyae Helen Selere Raman Wahewoumi Anewate

(Mat. 14:13-21; Luk. 9:10-17; Yoh. 6:1-14)

30Yesus na abu ako ukeumi ekate ahuba huwewaimile bele onomi iwaimile bele kaliara bukaiboke Yesusle bokore mekate, ekaikelewaimile ekaimokowate a nemene Yesusre huwainyekoke. 31Ro miyae helen ele mele kowatene, Yesus na abu ako bele ramande anenaikondere mon ban. Nebeinye Yesus yae weumi, “Men, enaei mo ema. Na hului mayae no yeiboise aku ban nau ban anuwaufe yae ema.”

32Uwa monde roungaterene, kaisa hawaiboke aku ban nau ban anuwaufe ewate. 33Nebeibe nda yo naeisikere ro miyae helen eraimiboke nane merau enate anuwau isaeyaeiboke. Nebeinye ro miyae nebei yo honatena, yau nibira oro habelei-sabelei yae wainyehake, bere holo yae nebei anuwaufe faibaleke. 34Yesus naei kaikaisa fainyoke yae ro miyae helen sele erewoumine kena beko hele hubawounge. Nebei ro miyae domba wanen yaweiboi ro ban. Nebeinye huba raweuboke a helen kelewoumi.

35Hu akombondere yae Yesus na moisa orowate yo mekate wainye, “Be bahele nane merau nda anuwau monne, 36nda yo weimi, ‘Ai, yo hine eraman ayaneko.’ ”

37Nebeibe Yesus yae weumi, “Mayae raman yemmile anenaikondere ya!”

Na moisa orowate yo yae wainye, “Nda ro miyae feu helen anenate. Ro mbai oko mehine name na me buhaena roi yae nebei feu hului yaromakonde. Weyae kena koyae nebei feufe emayarongkonde imamile anenaikondere?”

38Yesus beufoke hineumi, “Mainya feu naennaen helen nen honayembe? Emerembo!”

Eraikoke mo wainye, “Feu maehae mbai, ka bee honate.”

39Nebeisa Yesus na moisa orate yore ukeumi, “Ro miyae nanemene wemmile ke ranne riyane riyane mo nungaikonde.” 40Riyane riyane rowate yo holo hi 100 roiboyate holo hi 50 roiboyate. 41Yesus feu maehae mbai bele ka bee belere mo yaroukoke. Na be bumare weuweke Allahre helen foise mo ukeunge. Nebei feufe kayeukoke na moisa orowate yore yeumikoke ro miyaere wahenaimikondere. Nebei sului mbai ka bee kayeukoke nebei yore wahaeimikoke. 42Nane yo anewate wande hele yaeiboke. 43Yesus na moisa orowate yo eraman kalunde mo nemene arilaisike kakali me bee oro hi nen bee bele. 44Feufe anaikoke yo ro mo nanemene 5.000.

Yesus Bu Randa Orole

(Mat. 14:22-33; Yoh. 6:15-21)

45Yesus na hibi na moisa orowate yore ukeumi bere holo yae Betsaida yore kaisa fonatere. Nebeisa nebeinya ro miyae helen enatere uwoumi.

46Here ukera Yesus elure ebeli boikoise ewole. 47Huae yeuboke ereumi na moisa orate yo kaikaisa bumoko nolone fowate, Yesus yaunge namman hebele. 48Yesus erewoumi nda yo na kaikai ren auwatebe, kabewainye alu bera haraungeboke rawewolene. Nebeinye yare mefo hukai name hului Yesus nda yo bokore bu randa oroumeke moi wommiyonde wanen mae mokoungeboke. 49-50Nda yo Yesus erekainyelene nanemene kulu-kulu yaeiboke, bu randa mewolene enaelo yae elaikokene ele kali bowate.

Nebeinye Yesus weumi, “Hilembo, Reyae ya, fe efaei yae!” 51Nebei kaikai einye eweufileukoke bele, alu na hibi kalaungeboke. Yesus na moisa orowate yo fa hele yae bowate, 52rabuhine ban Yesus naei elae wakere namman onaeite handate, erabae manemfana feu anewatere naei ijoko yae erewate. Naei u bene na hului ban sele isaeinyaibondere.

Yesus Genesaret Yone Erana Buloona Yore Onomi Iwoumi

(Mat. 14:34-36)

53Bu habala reufine fokate, Genesaret yo isounge yaiboke yawate. 54Kaikaisa akowate yae ro miyae rainyeboke Yesusbe meke. 55Ro miyae na yore eisa bele meisa bele habelaete. Erana buloona yo Yesus ekenekele anuwaufe na ijongku honoi kewa ranne yarate mate. 56Yesus makeise makeise eyewole yo ei yan ei bele yo moinye bele, era yo buloo yo nebei yo yanna nai hei-sei anuwaunge relaeimi honate. Yesus elere erana buloona yo yae riyainye ehe ferere kommikondere na malo kabanne ikilenatere, na hului banna, na malo burainye mo ikilenaibonde. Ikilewate yo nanemene onomi yarowate.

Currently Selected:

Markus 6: setDBL

Highlight

Copy