Yahwana 1
1
Ndər Ni Ku Ndzi Mda
1Təng akwa baɗitari Ndər ni aɗi, tsuwa Ndər ni ata vəi duku ka Hyel, tsuwa Ndər ni an Hyel. 2Təng tsu akwa baɗitari ni Ndər ni ata kəma duku ka Hyel. 3Atar ni antə shanga suayeri namtədzi, shanga su tə Hyel namtə ni, aɗi wala duku na namtədzi kula mnyari akwa wa. 4Atar ni antə mpika aɗi, antə mpikə ni an parakə ni aka mji. 5Antə parakə ni akwa mbəla akwa kuthlu, amma kuthlu ni aɗi akwa nggyari ni wa.
6Mdə laga aɗi ka thləmari Yahwana tə Hyel thlenta. #Mat 3:1; Mar 1:4; Luk 3:1-2 7Tsa si kamnyar ka tsa ngkərɓəla jirkur na ata kəra parakə ni aka mji, kamnyar ka shanga mji nggatə labar ata kəra parakə ni, ka da hamta jiri akari atar ni. 8Aɗi tsa ka kərari an parakə ni wa, amma tsa si kamnyar ka tsa hara seɗa ata kəra parakə ni. 9Tsa na parakəu na jirari na ata hamta parakəu aka shanga mji ni, an akwa si akwa duniya ni.
10Təng waci Tsa akwa duniya ni, amma wala tə duniya ni namtədzi atar ni, duniya ni aɗi səndə ni wa. 11Tsa si akwa tsəɗiyirni, amma mjirni aɗi dlu ni wa. 12Amma shanga mji na ku dlu ni ka hamta jiri alari, tsa ku na ala ɗa duna ka da ndzi maɗa' Hyel. 13Da aɗi ndzi maɗa'ni atar kum ka mamshi na thlata akəla nggukər dza wa, amma Hyel surni an namtə ɗa maɗa'ni.
14Antə Ndər ni ndzi mda, ka ndzi akwa nca mburu. Mburu ku wutə səliyirni, səliyir Ɓzər na duku shini akəla Təddarni, tsuwa tsa nghyinghyari ka ɓɗakkur ka jirkur tsuwa.
15Yahwana ku hara seɗa ata kərari, ka haptə kurakari akwa pəla, “Ngəni an mdə tə I gari ala giri ata kərari, abbər ‘Mdə na akwa si aghəli ni ku təramta ra ka olkur, kamnyar tsa aɗi akəmata iya.’ ”
16Kamnyar atar hangkur ɓɗakkur tə tsa kəgari antə shanga mburu ku wutə barka ata kəra barka ata kər ata kər. 17Kamnyar Hyel hamta tsawu ni atar Musa, amma tsa hara ala mburu ɓɗakkur ka jirkur atar Yesu Kristi. 18Mda aɗi na ku ɗar wutə Hyel wa. Ɓzərni na duku shini, na kalkal ka Hyel ni, na akwa humba Təddarni ni, an ngkərɓəla ni ala mburu.
Yahwana Ku Hara Seɗa Ata Kəra Yesu
(Mat 3:1-12; Mar 1:1-8; Luk 3:1-18)
19Antə nggədza seɗa tə Yahwana hara akwa sakatə mjir Yahudi na ahar Urushalima thlentə pristayeri ka mjir Lawi adzə Yahwana, ka da yu ni abbər tsa an wa ri ni. 20Antə Yahwana aɗi beɗi wa, tsa pəlaɓəla ala ɗa ata bəbal ka pəla, “Aɗi I an Kristi ni wa.”
21Antə da jaktə yu ni ka pəla, “Ka ar nga, ga an wa ri? Ga an Iliya ni ya?”
Antə tsa pəla, “Awa, aɗi I wa.”
“Ka ga an naɓi ni ya?”
Antə tsa pəla, “Awa,”
22Antə da pəla alari, “Ka ar ngə ga an wa ri? Na ala yeru amsa tə yeru ata mwanta aka mji na thlentə yeru ni. Ga ana pəla ga an wa ri?”
23Antə Yahwana hamta ala ɗa amsa ka ndər tə Naɓi Ishaya pəla waci nda abbər,
“I an kuraka mdə na akwa mtaku na akwa kəga,
‘Namtə gir laku dwaɗu aka Mthlaku!’ ”
24Antə bwadukwa mjir Farisi tə mdə thlentə ɗa ni, 25pəla aka Yahwana abbər, “Ka kamnyar mi tə ga akwa hara baptizma, ma ga aɗi an Kristi nə wa, wala Iliya wa, wala Naɓi nə wa ri?”
26Antə Yahwana pəla ala ɗa, “Arna I ana hara baptizma ka yimi. Amma mdə laga aɗi akwa nca giri natə giri aɗi səndə ni wa. 27Tsa akwa si aghəli, natə ɓɗakkurərna aɗi mzhi wala kəi mpəli səwur ɓaɓiyirni wa.”
28Suayeri ngəni hara akwa Bethlani, aɓəla bwanda Thlyagha Jodan, akwa vəi tə Yahwana ana hara baptizma akwa ni.
Ɓzər Gam ar Hyel
29Səɓəla ɗəpari təng Yahwana wutə Yesu akwa si adzə ni. Antə tsa pəla, “Nggədza giri Ɓzər Gam ar Hyel, mdə na ata kələmta bikər mjir duniya! 30Ngəni an mdə tə I gari ala giri ata kərari abbər, ‘Mdə na akwa si aghəli ni ku təramta ra ka olkur, kamnyar tsa aɗi akəmata iya,’ ni. 31Hwatu I aɗi səndə mdə na ata si nə wa, amma I ku si akwa hara baptizma ka yimi, kamnyar ka mdə ncantə ni aka mjir Israila.”
32Antə Yahwana ku hara seɗa ka pəla, “I ku wutə Mambəl akwa səghəi amtazi apa bukəl, ka pwa ata kərari. 33Hwatu I aɗi səndə ni wa, amma Hyel na thlentə ra abbər kəi hara baptizma ka yimi ni an pəla ali abbər, ‘Ma mdə tə ga ku wutə Mambəl ku səghəi amtazi ka pwa ata kərari ka ndzəndzi, an tsa na ata hara baptizma ka Mambəl na Ɓɗakkarkara ni.’ 34Apani I ku wutə su ngəni hara ata kəra Yesu, antə I akwa seɗata ala giri abbər ngəni an Ɓzər Hyel ni.”
Mjir thlipə Na Ntangkəma Ar Yesu
35Səɓəla ɗəpari Yahwana athləthlata ata vəi ni ka mjirthlipərni suɗa adzə ni. 36Sakatə tsa wutə Yesu akwa təramta antə tsa pəla, “Wul giri Ɓzər Gam ar Hyel!”
37Sakatə mjirthlipər Yahwana na suɗə ni nggatə su tə Yahwana pəla ni, antə da nutə Yesu. 38Sakatə Yesu shinardzi ka wutə ɗa akwa nu ni, antə tsa pəla ala ɗa, “Man tə giri akwa barari ri?”
Antə da pəla alari abbər, “Rabbi, karapwari an Maləm, ga ka ndzi ama ri?”
39Antə Yesu pəla ala ɗa, “Sər giri ka giri wuta.”
Apa saka nfwar na tahaku, antə da mwari kəga tsa ka wutə vəi ndzəndziyirni. Antə da ɓukci adzə ni vir nda.
40Antə Andrawus na ɓzərma' Siman Bitrəs, na pal akwa nca mji na suɗə na nggatə ndər tə Yahwana pəla ni, ku nutə Yesu. 41Su tə Andrawus hara ntangkəma an tsa paktə ɓzərma'ni Siman, ka pəla alari abbər, “Yeru ku wutə Almasihu ni” karapur ndər ngəni an Kristi. 42Antə tsa mwantə Siman adzə Yesu. Antə Yesu wul ni ka pəla, “Azha ga an Siman na ɓzər Yahwana ni ya? Mda ata sə kəga thləma ga Kefas,” wala tsuwa Bitrəs natə karapwari an pela.
Yesu Ku Kəga Filibus Ka Nathlaniyel
43Səɓəla ɗəpari antə Yesu ɗəmha abbər tsa ata mwari ahar Galili. Antə tsa wutə Filibus, ka pəla alari, “Nu ra.”
44Filibus an ɓzər Bethsaida, diyir kəga Andrawus ka Bitrəs. 45Antə Filibus wutə Nathlaniyel ka pəla alari abbər, “Yeru ku wutə mdə tə Musa ka naɓiyayeri rəbuta ata kərari akwa kakaɗər Tsawu ni, tsa na Yesu ar Nazareth na ɓzər Yusuf.”
46Antə Nathlaniyel pəla alari, “Har mda ata mzhi wutə su na ɓɗaku akwa Nazareth ya?” Antə Filibus pəla alari, “Sər ka gə wuta.”
47Sakatə Yesu wutə Nathlaniyel akwa si adzə ni, antə tsa pəla, “Wul giri mdər Israila na jirari ja, na aɗi ana thlandər wa!”
48Antə Nathlaniyel yu ni abbər “Apa madi tə gə səndə ra ri?”
Antə Yesu pəla alari, “I wutə nga sakatə ga akira nfur kamndə nda, akəmata Filibus akəga nga.”
49Antə Nathlaniyel pəla alari, “Maləm, ga an Ɓzər Hyel! Ga an Kuthlir Israila ni!”
50Antə Yesu pəla alari, “Kamnyar tə I pəla ala ga abbər, I wutə nga akira nfur kamnda antə gə hamta jiri ali təkəma ni ya? Ai ga ata wutə suayeri na ol'ola ta ngəni.” 51Antə tsa pəla ala ɗa, “I akwa pəla ala giri jirkur, giri ata sə wutə vəi na amtazi akwa kəlardzi, ka mjirthlentərhyel akwa ləmta ka səghəi ata Ɓzər Mda.”
Currently Selected:
Yahwana 1: KNB
Highlight
Share
Copy
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
Yahwana 1
1
Ndər Ni Ku Ndzi Mda
1Təng akwa baɗitari Ndər ni aɗi, tsuwa Ndər ni ata vəi duku ka Hyel, tsuwa Ndər ni an Hyel. 2Təng tsu akwa baɗitari ni Ndər ni ata kəma duku ka Hyel. 3Atar ni antə shanga suayeri namtədzi, shanga su tə Hyel namtə ni, aɗi wala duku na namtədzi kula mnyari akwa wa. 4Atar ni antə mpika aɗi, antə mpikə ni an parakə ni aka mji. 5Antə parakə ni akwa mbəla akwa kuthlu, amma kuthlu ni aɗi akwa nggyari ni wa.
6Mdə laga aɗi ka thləmari Yahwana tə Hyel thlenta. #Mat 3:1; Mar 1:4; Luk 3:1-2 7Tsa si kamnyar ka tsa ngkərɓəla jirkur na ata kəra parakə ni aka mji, kamnyar ka shanga mji nggatə labar ata kəra parakə ni, ka da hamta jiri akari atar ni. 8Aɗi tsa ka kərari an parakə ni wa, amma tsa si kamnyar ka tsa hara seɗa ata kəra parakə ni. 9Tsa na parakəu na jirari na ata hamta parakəu aka shanga mji ni, an akwa si akwa duniya ni.
10Təng waci Tsa akwa duniya ni, amma wala tə duniya ni namtədzi atar ni, duniya ni aɗi səndə ni wa. 11Tsa si akwa tsəɗiyirni, amma mjirni aɗi dlu ni wa. 12Amma shanga mji na ku dlu ni ka hamta jiri alari, tsa ku na ala ɗa duna ka da ndzi maɗa' Hyel. 13Da aɗi ndzi maɗa'ni atar kum ka mamshi na thlata akəla nggukər dza wa, amma Hyel surni an namtə ɗa maɗa'ni.
14Antə Ndər ni ndzi mda, ka ndzi akwa nca mburu. Mburu ku wutə səliyirni, səliyir Ɓzər na duku shini akəla Təddarni, tsuwa tsa nghyinghyari ka ɓɗakkur ka jirkur tsuwa.
15Yahwana ku hara seɗa ata kərari, ka haptə kurakari akwa pəla, “Ngəni an mdə tə I gari ala giri ata kərari, abbər ‘Mdə na akwa si aghəli ni ku təramta ra ka olkur, kamnyar tsa aɗi akəmata iya.’ ”
16Kamnyar atar hangkur ɓɗakkur tə tsa kəgari antə shanga mburu ku wutə barka ata kəra barka ata kər ata kər. 17Kamnyar Hyel hamta tsawu ni atar Musa, amma tsa hara ala mburu ɓɗakkur ka jirkur atar Yesu Kristi. 18Mda aɗi na ku ɗar wutə Hyel wa. Ɓzərni na duku shini, na kalkal ka Hyel ni, na akwa humba Təddarni ni, an ngkərɓəla ni ala mburu.
Yahwana Ku Hara Seɗa Ata Kəra Yesu
(Mat 3:1-12; Mar 1:1-8; Luk 3:1-18)
19Antə nggədza seɗa tə Yahwana hara akwa sakatə mjir Yahudi na ahar Urushalima thlentə pristayeri ka mjir Lawi adzə Yahwana, ka da yu ni abbər tsa an wa ri ni. 20Antə Yahwana aɗi beɗi wa, tsa pəlaɓəla ala ɗa ata bəbal ka pəla, “Aɗi I an Kristi ni wa.”
21Antə da jaktə yu ni ka pəla, “Ka ar nga, ga an wa ri? Ga an Iliya ni ya?”
Antə tsa pəla, “Awa, aɗi I wa.”
“Ka ga an naɓi ni ya?”
Antə tsa pəla, “Awa,”
22Antə da pəla alari, “Ka ar ngə ga an wa ri? Na ala yeru amsa tə yeru ata mwanta aka mji na thlentə yeru ni. Ga ana pəla ga an wa ri?”
23Antə Yahwana hamta ala ɗa amsa ka ndər tə Naɓi Ishaya pəla waci nda abbər,
“I an kuraka mdə na akwa mtaku na akwa kəga,
‘Namtə gir laku dwaɗu aka Mthlaku!’ ”
24Antə bwadukwa mjir Farisi tə mdə thlentə ɗa ni, 25pəla aka Yahwana abbər, “Ka kamnyar mi tə ga akwa hara baptizma, ma ga aɗi an Kristi nə wa, wala Iliya wa, wala Naɓi nə wa ri?”
26Antə Yahwana pəla ala ɗa, “Arna I ana hara baptizma ka yimi. Amma mdə laga aɗi akwa nca giri natə giri aɗi səndə ni wa. 27Tsa akwa si aghəli, natə ɓɗakkurərna aɗi mzhi wala kəi mpəli səwur ɓaɓiyirni wa.”
28Suayeri ngəni hara akwa Bethlani, aɓəla bwanda Thlyagha Jodan, akwa vəi tə Yahwana ana hara baptizma akwa ni.
Ɓzər Gam ar Hyel
29Səɓəla ɗəpari təng Yahwana wutə Yesu akwa si adzə ni. Antə tsa pəla, “Nggədza giri Ɓzər Gam ar Hyel, mdə na ata kələmta bikər mjir duniya! 30Ngəni an mdə tə I gari ala giri ata kərari abbər, ‘Mdə na akwa si aghəli ni ku təramta ra ka olkur, kamnyar tsa aɗi akəmata iya,’ ni. 31Hwatu I aɗi səndə mdə na ata si nə wa, amma I ku si akwa hara baptizma ka yimi, kamnyar ka mdə ncantə ni aka mjir Israila.”
32Antə Yahwana ku hara seɗa ka pəla, “I ku wutə Mambəl akwa səghəi amtazi apa bukəl, ka pwa ata kərari. 33Hwatu I aɗi səndə ni wa, amma Hyel na thlentə ra abbər kəi hara baptizma ka yimi ni an pəla ali abbər, ‘Ma mdə tə ga ku wutə Mambəl ku səghəi amtazi ka pwa ata kərari ka ndzəndzi, an tsa na ata hara baptizma ka Mambəl na Ɓɗakkarkara ni.’ 34Apani I ku wutə su ngəni hara ata kəra Yesu, antə I akwa seɗata ala giri abbər ngəni an Ɓzər Hyel ni.”
Mjir thlipə Na Ntangkəma Ar Yesu
35Səɓəla ɗəpari Yahwana athləthlata ata vəi ni ka mjirthlipərni suɗa adzə ni. 36Sakatə tsa wutə Yesu akwa təramta antə tsa pəla, “Wul giri Ɓzər Gam ar Hyel!”
37Sakatə mjirthlipər Yahwana na suɗə ni nggatə su tə Yahwana pəla ni, antə da nutə Yesu. 38Sakatə Yesu shinardzi ka wutə ɗa akwa nu ni, antə tsa pəla ala ɗa, “Man tə giri akwa barari ri?”
Antə da pəla alari abbər, “Rabbi, karapwari an Maləm, ga ka ndzi ama ri?”
39Antə Yesu pəla ala ɗa, “Sər giri ka giri wuta.”
Apa saka nfwar na tahaku, antə da mwari kəga tsa ka wutə vəi ndzəndziyirni. Antə da ɓukci adzə ni vir nda.
40Antə Andrawus na ɓzərma' Siman Bitrəs, na pal akwa nca mji na suɗə na nggatə ndər tə Yahwana pəla ni, ku nutə Yesu. 41Su tə Andrawus hara ntangkəma an tsa paktə ɓzərma'ni Siman, ka pəla alari abbər, “Yeru ku wutə Almasihu ni” karapur ndər ngəni an Kristi. 42Antə tsa mwantə Siman adzə Yesu. Antə Yesu wul ni ka pəla, “Azha ga an Siman na ɓzər Yahwana ni ya? Mda ata sə kəga thləma ga Kefas,” wala tsuwa Bitrəs natə karapwari an pela.
Yesu Ku Kəga Filibus Ka Nathlaniyel
43Səɓəla ɗəpari antə Yesu ɗəmha abbər tsa ata mwari ahar Galili. Antə tsa wutə Filibus, ka pəla alari, “Nu ra.”
44Filibus an ɓzər Bethsaida, diyir kəga Andrawus ka Bitrəs. 45Antə Filibus wutə Nathlaniyel ka pəla alari abbər, “Yeru ku wutə mdə tə Musa ka naɓiyayeri rəbuta ata kərari akwa kakaɗər Tsawu ni, tsa na Yesu ar Nazareth na ɓzər Yusuf.”
46Antə Nathlaniyel pəla alari, “Har mda ata mzhi wutə su na ɓɗaku akwa Nazareth ya?” Antə Filibus pəla alari, “Sər ka gə wuta.”
47Sakatə Yesu wutə Nathlaniyel akwa si adzə ni, antə tsa pəla, “Wul giri mdər Israila na jirari ja, na aɗi ana thlandər wa!”
48Antə Nathlaniyel yu ni abbər “Apa madi tə gə səndə ra ri?”
Antə Yesu pəla alari, “I wutə nga sakatə ga akira nfur kamndə nda, akəmata Filibus akəga nga.”
49Antə Nathlaniyel pəla alari, “Maləm, ga an Ɓzər Hyel! Ga an Kuthlir Israila ni!”
50Antə Yesu pəla alari, “Kamnyar tə I pəla ala ga abbər, I wutə nga akira nfur kamnda antə gə hamta jiri ali təkəma ni ya? Ai ga ata wutə suayeri na ol'ola ta ngəni.” 51Antə tsa pəla ala ɗa, “I akwa pəla ala giri jirkur, giri ata sə wutə vəi na amtazi akwa kəlardzi, ka mjirthlentərhyel akwa ləmta ka səghəi ata Ɓzər Mda.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.