Luka 13

Zhar Hara Bikayeri Ta Ga Asə Mta

1Ata saka nda, mji laga aɗi anda na pəla aka Yesu ata kəra mjir Galili natə Bilatus vu tə mdə tsəgəi ɗa akwa sakar hamta saɗaka nda. 2Antə Yesu ku shinau ala ɗa ka pəla, “Giri akwa tamata abbər bikər mjir Galili natə mdə tsəgəi akwa laku ngəni ni, ku təramta bikər shanga mjir Galili na mbili ni ya? 3Awa, hun wa! Tsuwa I akwa pəla ala giri abbər ma giri aɗi tubi ka zhar bikayeri ar giri wa, shanga giri ata kurəmtadzi tsu apa da. 4Nənga giri ana wuta apa mji kumnya ncisu tə mbwa na nal na ahar Silowam ndlangkərdzi ala ɗa ka kurəmta ɗa ni, da an mji na ɗimi ta shang akwa Urushalima ya? 5Awa, hun wa. Tsuwa I akwa pəla ala giri abbər ma giri aɗi tubi ka zhar bikayeri ar giri wa, shanga giri ata kurəmtadzi tsu apa da.”

Karapu Ata Kəra Nfur Kamnda Na Aɗi Ya Wa

6Antə Yesu ku ngkər ala ɗa karapu ngəni ka pəla, “Mdə laga aɗi na ka nfur kamnda akwa fakər anap arni. Təng vir laga tsa mwari abbər ka tsa ɗəmtsə yar kamndə ni, amma sakatə mwari tsa aɗi wutə ya ata wa. 7Antə tsa pəla aka mdər wul fakə ni, ‘Wul diya kulini məva makər I akwa si akwa bara kamnda ata nfu ni, amma I aɗi ana wutə su ata wa. Antə I ata nthləmta ni! Kamnyar mi tə tsa akwa ngkata ali vəi kula suari aɗi ri?’ ”

8 “Amma mdər wul fakə ni shinau alari ka pəla, ‘Zanuwa, jaktə zhar ni ka pal avana, kəi latə vəi na kalaktə ni ni ka pudza alari kuɓa. 9Antə ma tsa ku ya apta, shanga su ata ndzi lapiya. Amma ma shang tsa aɗi ya wa, ga amzhi nthləmta ni.’ ”

Yesu Ku Mbantə Mwala Laga Vir Ghərəmtaghəra

10Vir Ghərəmtaghəra laga Yesu akwa thlipa akwa mbwar vəngkər səli, 11antə tsa wutə mwala laga anda natə shatan hara ala nggawakur tə dzari ndzi apa mtəmtari har məva kumnya ncisu. Shilku ni takurtə mwala ni tə hilari ndzi ɗukɗukwari, har tə tsa amzhi thlentədzi dwaɗu kəra wa. 12Sakatə Yesu ku wutə ni, antə tsa ku kəga ni ka pəla alari, “Mwala, ga ku msərantədzi ta bwaniyir ngə ni!” 13Antə tsa ku vəngkər tsiyari alari, təkəma antə tsa thlentədzi dwaɗu ka ləkwa hu Hyel.

14Amma ɗəffa olər mbwar vəngkər səliyir mjir Yahudi ni ku ɓzi, kamnyar tə Yesu mbantə mwala ni akwa Vir Ghərəmtaghəra. Antə tsa pəla aka mji abbər, “Vir ngkwa aɗi natə kalkal ka mdə kəthlər akwa. Ka giri si akwa virayeri ngəni kamnyar ka giri wutə mbantədzi, amma aɗi Vir Ghərəmtaghəra wa.”

15Antə Mthlaku pəla alari, “Giri shimnya! Wan akwa nca giri na aɗi ana mpəli thlarni wala kwararni ata səkwam Vir Ghərəmtaghəra, ka mwantə ni akwa thlyagha kamnyar ka tsa sa yimi wa ri? 16Antə aɗi kalkal ka mdə msərantə mwala ngəni akwa bwaniyirni Vir Ghərəmtaghəra wa ya, mwala na akwa durər Ibrahim, natə Shatan ku mbwi ni har məva kumnya ncisu ni?” 17Antə gari ngəni tə tsa pəla ni vu tə shanga dawayeri arni ləkwa səli. Amma shanga mambila mji ku hara kucali ata kəra shanga surndatayeri tə tsa hara ni.

Karapu Ata Kəra Munya Mastad

(Mat 13:31-32; Mar 4:30-32)

18Antə Yesu pəla, “Kuthlikurər Hyel ni dludzi ka mə ri? Ka mi antə I ata gira nə ri? 19Tsa ndzi tsu apa hwulfər munya mastad tə mdə laga kətə ka ra thləkamtari akwa fakərni. Antə tsa ku kəla ka hara nfwa, har tə ɗikayeri ku si ka pwa tsiyayerari.”

Karapu Ata Kəra Yist

(Mat 13:33)

20Antə Yesu jaktə pəla, “Ka mi antə I ata mzhi gira kuthlikurər Hyel nə ri? 21Tsa ndzi tsu apa yist natə mwala laga kətə ka hərtə ka mpwa ar tasa makər, har tə yist ni ndlətə shanga mpu na hərhərari ni.”

Nyarmbwa Na Cinggəthlu

(Mat 7:13-14,21-23)

22Sakatə Yesu ku tamtə lakur mwari ahar Urushalima, antə tsa nutə bərniyayeri kəga kauyayeri akwa thlipa aka mji. 23Antə mdə laga yu ni abbər, “Mthlaku təng mji laga daci an ata sə wutə mbantədzi ni ya?”

Yesu pəla ala ɗa, 24“Mbalɓəla girdzi ka giri ləmbwa ata nyarmbwa na cinggəthlu. Kamnyar I akwa pəla ala giri, mji hang akwa mwaɓə ka da ləmbwa, amma da aɗi ata mzhari wa. 25Ma sakatə mthlakər kəi ku thlatə ka hartə nyarmbwa ni, wala giri an thləthlata aɓəla akwa tsarar nyarmbwa akwa pəla, ‘Mdərkəi, kəlar ala yeru nyarmbwa ni,’ tsa ata pəla ala giri, ‘I aɗi səndə vəi tə giri thlata akwa wa.’ 26Sakanda antə giri ata pəla alari, ‘Diya mburu ku səma ka sa ata vəi duku kəga ga, tsuwa ga ku thlipa akwa kauyayeri ar yeru!’ 27Amma tsa ata shinau ka pəla, ‘I aɗi səndə giri wa, wala vəi tə giri thlata akwa wa. Tərar girdzi kazhar ra, shanga giri na mjir hara ɗimikur!’ 28Anda antə giri ata tuwa ka ɓɗə thlir, kamnyar giri ata s wutə Ibrahim, ka Ishaku, ka Yakub, ka shanga naɓiyayeri ni akwa kuthlikurər Hyel, amma ar giri mda ata puɓəla giri aɓəla! 29Mji ata sə thlata abwar raghəi ka bwar ramta, ka abwar yala ka bwar, anəm ka si kamnyar səm susəma akwa kuthlikurər Hyel. 30Sakanda mji na aghəli kulini ata sə ndzi na ntangkəma, antə mji na ntangkəma kulini ata sə ndzi akwa tsikərari.”#Mat 19:30; 20:16; Mar 10:31

Yesu Ku Damitədzi Ata Kəra Urushalima

(Mat 23:37-39)

31Tsu akwa sakanda, antə mjir Farisi laga si adzə Yesu ka pəla alari, “Təra ka zhar vəi ngəni, kamnyar Hirudus akwa bara tsi nga.”

32Antə Yesu pəla ala ɗa, “Mwar giri, ka pəla aka pwagha na ndaga abbər, ‘I ata kədləɓəla shatanayeri ka kuri shilkayeri ashina ka ɗəpa, antə akwa vir na makərkur, I ata sə kuri kəthlərərna.’ 33Amma wala apani tar kəi ləkəma ka mwarna ashina ka ɗəpa ka appsara pwanda, kamnyar aɗi ndzi kalkal aka naɓi ka mdə tsi ni akwa vəi damwa wa, amma tar akwa Urushalima.

34 “Aiyi Urushalima, Urushalima! Mjir nga ku tsəgəi naɓiyayeri, ka ndzəndzəhtə mji tə Hyel thlentə ala giri! Ka yiɗau, antə I bara kəi tsaptə maɗa' nga apatə anggira mtəka ana tsaptə maɗa'ni akira ɓəɓəkari, amma giri aɗi hir wa ri! 35Nggədza ja kulini mdə ku zhar ala giri mbwar Hyelər giri kula mda akwa. Tsuwa I akwa pəla ala giri, giri aɗi ata jaktə wutə ra kəra wa tar ma sakatə giri ku pəla, ‘Tsa ka barka mdə na ata si akwa thləma Mthlaku.’ ”

Currently Selected:

Luka 13: KNB

Highlight

Copy