Luka 18

Karapu Ata Kəra Hara Adduwa Kula Tsamta

1Antə Yesu ngkər karapu laga aka mjirthlipərni, kamnyar thlipa ala ɗa abbər ka da sə hara adduwa tədəku, da aɗiya ghər wa. 2Tsa pəla, “Akwa bərni laga, alkali laga aɗi na aɗi ana thlivər Hyel wa, wala damitədzi ka mji wa. 3Tsuwa mwala kughung laga aɗi akwa bərni nda na akwa si adzə ni tədəku, akwa pəla, ‘Hara ali shariyar jirkur bu, ka gə msərantə ra akwa tsiya dawarna.’ 4Ntangkəmari alkali ni aɗi hir wa. Amma aghəla nda tsa pəla akwa ɗəffari abbər, ‘Wala tə I aɗi ana thlivər Hyel wa, wala damitədzi ka mdə wa ni, 5təng tə mwala ngəni akwa dingngga damitə ra ni, I ata hara shariyar jirkur kəi msərantə ni, ta tsa asə ghərantə ra ka səyirni tədəku ni!’ ”

6Antə Mthlaku pəla, “Giri ku nggatə jili su tə alkali na kula jirkur ni pəla wa! 7Kaha, ma apani, Hyel aɗi ata msərantə mjirni na carcara na ana tuwa alari pci ka viri wa ya? Giri tamatə tsa hir ndzi tihtihha akwa dlar ɗa ya? 8I akwa pəla ala giri, tsa ata msərantə ɗa kula shamta saka. Amma akwa sakatə Ɓzər Mda ata si ngka, tsa ata mzhi wutə mdə na ka hamta jiri akwa duniya ni ya?”

Karapu Ata Kəra Mdər Farisi Ka Mdər Dlu Tsəma

9Yesu ku ngkər karapu ngəni aka mji na ana kətə kərɗa abbər da mji na pwa, har ka rutə mambila mji. 10Tsa pəla, “Mji laga aɗi suɗa na ku ləkwa mbwar vəngkər səli kamnyar hara adduwa, mdə na pal mdər Farisi, mdə na palari tsuwa mdər dlu tsəma.

11 “Antə mdər Farisi ni thlatə ka thləthlata, ka hara adduwa akwa pəla, ‘Hyel, I akwa usar nga kamnyar tə I aɗi apa mambila mji wa, apa mjir zamba, ka mjir dlərpəkur, ka mjir ləka, wala apa mdər dlu tsəma ngəni wa. 12I ana hara asham ka suɗa akwa sati pal, ka hamta zaka ar shanga su tə I wuta.’

13 “Amma ar mdər dlu tsəma ni, tsa thləthlatə ciju, tsa aɗi hir wala haptə ncari amtazi wa, amma tsa nggyarghəi kərari, ka akwa pəla, ‘Hyel, ka gə kətadzə ra, I an mdər biku!’ 14I akwa pəla ala giri, mdər dlu tsəma ni ata ngka aharngkiɗa ka kərari pasəyang akəma Hyel ta mdər Farisi ni. Kamnyar kəlara mdə na ku haptə kərari abbər tsa an ola, mda ata tərghəi ni. Tsuwa kəlara mdə na ku tərghəi kərari, mda ata haptə ni.” #Mat 23:12; Luk 14:11

Yesu Ku Vədzə Barka Aka Maɗankyar Na Raka Raka

(Mat 19:13-15; Mar 10:13-16)

15Vir laga mji laga akwa səntə maɗankyarər ɗa na raka raka aka Yesu kamnyar ka tsa vədza ala ɗa barka. Amma sakatə mjirthlipərni ku wuta apani, antə da mpa ala ɗa.

16Amma Yesu ku kəgatə maɗankyar ni adzə ni, ka pəla, “Zhar giri maɗankyar na raka raka ni ka da si adzə ra, giri aɗiya ngkatə ɗa wa, kamnyar kuthlikurər Hyel ni an kamnyar mji na apa maɗankyar nayeri ni. 17I akwa pəla ala giri jirkur, kəlara mdə na aɗi dlu kuthlikurər Hyel apa ɓzəngkyar na raka wa, tsa aɗi ata ləkwari cap wa.”

Mdər Gəna Na Ku Bara Mpikə Na Akur Wa

(Mat 19:16-30; Mar 10:17-31)

18Antə mdə laga na ola akwa nca mjir Yahudi yu Yesu abbər, “Maləm na pwa, man tə kəi hara kamnyar kəi wutə mpikə na akur wa ri?”

19Antə Yesu pəla alari, “Kamnyar mi tə ga akwa kəga ra abbər mdə na pwa ri? Ai mda aɗi na pwa wa, tar Hyel duku shini. 20Ga səndə tsawayeri abbər, ‘Ga aɗiya ləkə wa, ga aɗiya tsi mdə wa, ga aɗiya həl wa, ga aɗiya thlandər ata kəra mdə wa, ka gə nar olkur aka baba'nga ka mama' nga!’ ”

21Antə ɓzərdakwi ni pəla, “Ai I ku ɓəlatə shanga tsawayeri ngəni təng tə I ɓzəngkyar.”

22Sakatə Yesu ku nggatə gari ngəni, antə tsa pəla alari, “Su duku daci an mbila ala gə ka gə hara. Ɗələmta shanga su na akəla ga, ka gə hamta kwabari aka mjir bwani, antə ga ata wutə watsəɓari amtazi. Tsuwa ka gə si ka gə nu ra.” 23Amma sakatə mdə ni ku nggatə ndər ngəni, antə ɗəffari ɓzi ka duna, kamnyar tsa mdə na ka gəna hang.

24Sakatə Yesu ku wuta abbər ɗəffari ku ɓzi, antə tsa pəla, “Ata ndzi mwavər ka mji na ka gəna ləkwa kuthlikurər Hyel! 25Kamnyar ata ndzi kasəla aka dləkəmau ka tsa ləɓəla akwa gular liɓəra ta ka mdər gəna ləkwa kuthlikurər Hyel!” 26Antə mji na nggatə ndər ngəni ni pəla, “Kaha, ma apani, wan ata mzhi wutə mbantədzi ri?”

27Amma Yesu pəla, “Su na mwavər aka mda, aɗi mwavər aka Hyel wa.”

28Antə Bitrəs pəla, “Nggədza yeru ku zhar kəyayeri ar yeru ka nutə nga.”

29Antə Yesu pəla ala ɗa, “I akwa pəla ala giri jirkur, mda aɗi na ata zhar kəyirni, wala mwalankiɗa, wala maɗama'ni shili wala mwanki, wala mjir yarni, wala maɗa'ni, kamnyar kuthlikurər Hyel, 30kula tsa dlu watsəɓari hang akwa zaman ngəni wa. Tsuwa akwa duniya na ata si tsa ata wutə mpikə na akur wa.”

Yesu Ku Jaktə Gari Ata Kəra Mtərni

(Mat 20:17-19; Mar 10:32-34)

31Antə Yesu ku kəgamta mjirthlipərni na kumnya suɗə ni abwa duku, ka pəla ala ɗa, “Nggədza mburu akwa ləmta ahar Urushalima, antə shanga su tə naɓiyayeri rəbuta ata kəra Ɓzər Mda ni ata nghyaɓəladzi. 32Kamnyar mda ata sə hamta ni aka mjir Rom, ka da mnya ɗimi alari, ka taratə ni, ka tifəngkər alari mtili. 33Da ata sə dlaɓu ni ka kwandeng, ka sə tsi ni, amma akwa vir na makərkur antə tsa ata sə thlatə ka mpika.”

34Amma mjirthlipərni aɗi nggaɓəla gari tə tsa pəla ni wa. Mdə ku ɗuwamta karapur ndərayeri ni kazhar ɗa, antə da aɗi mzhi nggaɓəla su tə tsa akwa pəlari ni wa.

Yesu Ku Mbantə Mdlyang Laga Na Ana Kiɗa

(Mat 20:29-34; Mar 10:46-52)

35Sakatə Yesu ku hara kudzəhə ka Yariko, antə tsa wutə mdlyang laga andzəndzi ata mnya laku akwa kiɗa. 36Sakatə tsa nggatə dlamar mji akwa təramta, antə tsa yu mji abbər man akwa hara ri?

37Antə da pəla alari, “Yesu ar Nazareth an akwa təramta azi.”

38Antə tsa haptə kurakari akwa pəla, “Yesu, Ɓzər Dauda! Kətadzə ra!”

39Antə mji na akwa mwa akəma ni mpəmpatə ni, ka pəla alari ka tsa ndzi ɗiɗi. Amma tsa jaktə haptə kurakari ka duna ta na hwatu ka pəla, “Ɓzər Dauda! Kətadzə ra!”

40Antə Yesu thləthlatə ka pəla ka mdə səntə ni alari. Sakatə tsa ku si, antə Yesu yu ni abbər, 41“Man tə ga akwa bara kəi hara ala gə ri?” Antə mdlyang ni pəla alari, “Mthlaku, I akwa bara ka nci jaktə wutə su.”

42Antə Yesu pəla alari, “Kara wutə su! Hamta jirər nga ku mbantə nga.”

43Təkəma antə ncari ku kəlardzi, antə tsa ku nutə Yesu akwa hu Hyel. Sakatə dlamar mji wutə su ngəni, antə da hu Hyel tsuwa.

Currently Selected:

Luka 18: KNB

Highlight

Copy