OHÚTU 26

Áyísīki lā ajɛ kú Ugɛ́ra

1Ɔkpɛtā nōo wɛ ɛyɛ́ɛ́yí hī ɔkpɛtā nōo ŋmó eko kú Ébrahām ā yɔ̄ ī ŋmó ajɛ ā. Anɔ́ɔ Áyísīki le tá Ugɛ́ra, ɛgiyí Abímɛ́lɛ̄ki, ɔcɛ́ kú Ufilístiya ā. 2Anɔ́ɔ Óndú ā gā ɛgiyí nū, gaá da ɔ́ kahíníī, “Ā híī nyɔ̄ Íjīpiti ŋ́. Lā ajɛ nɛ̄ n géē ka gā uwɔ ā. 3#Ohút 22.16-18Lā ajɛ ɔ́ɔmā, n géē yɔ̄ mɛ́mla uwɔ, klla géē hɔ́hā ce uwɔ. N géē je odúúdú ajɛ nyā gā uwɔ mɛ́mla ipɔ́ɔma kú uwɔ. N géē le okónu nɛ̄ n ce lɛ ádā uwɔ Ébrahām ā tū. 4N géē kpó ayááyí gā uwɔ nēe géē lɛwa bɛ̄ɛka aínyílɔ́wɔ kú ɔkpáncō ā. N géē je odúúdú ajɛ nyā lɛ ipɔ́ɔma kú uwɔ. Odúúdú aéwo géē da um ka n̄ lɛ ɔhā hɛ́ ce uwá ɛ́gɛ́nɛ̄ n hɔ́hā ce ayááyí uwɔ āa. 5N géē hɔ́hā ce uwɔ, ohígbū ka Ébrahām lɛyítáajɛ gā um klla le odúúdú aíne mɛ́mla ɔ́da kú um tū.”

6Anɔ́ɔ Áyísīki lā ajɛ kú Ugɛ́ra á. 7#Ohút 12.13; 20.2Eko nɛ̄ ācɛ abɔ́ɔ ā da ɔ́ ɔ̄kā lɛyíkwu ɔnyā nū ā, ó da uwá kóō wɛ ɔyínɛ anúɔ nɔ̄nyā nɛ. Ohígbū koó le ufi ō ka ka ɔ́ɔ wɛ ɔnyā anúɔ ā yá ohígbū koó gbɛlá ka ācɛ abɔ́ɔ géē ŋmó anúɔ kéē kwú Urebɛ́ka ú. Ohígbū ka Urebéka jɔ̄ŋcɛ́nyā nɛ̄hi klla lɔhi ōmá eyī. 8Eko nɛ̄ Áyísīki lā abɔ́ɔ yɛɛ ā, Abímɛ́lɛ̄ki, ɔcɛ́ kú Ufilítiya le eyī bū uwíndo yɔ̄ ī má ɛcɛ, anɔ́ɔ ó má Áyísīki yɔ̄ gē tɔ́ɔkɔ tá ɔnyā nū á. 9Anɔ́ɔ Abímɛ́lɛ̄ki le ɛhɔ̄ tū, lɛ Áyísīki hīgwú, anɔ́ɔ ó da ɔ́ ɔ̄kā kahíníī, “Ɔnyā uwɔ nōó wɛ á. Ɔdíyá nɛ̄ a ka ka ɔ́ɔ wɛ ɔyínɛ anúɔ nɔ̄nyā āa?” Áyísīki tóohi kahíníī, “N gbɛlá keé géē ŋmó um, ɔ́dāŋ nɛ̄ n ka koó wɛ ɔnyā um.” 10Abímɛ́lɛ̄ki da ɔ́ ɔ̄kā kahíníī, “Ɔdí nɛ̄ a yá yɔ̄ āa? Éyi kú ācɛ ɔlɛ́ um ā lɔfú gwutá mɛ́mla ɔnyā uwɔ ā glá. A kē í yɛ í cɛ̄ lɛ alɔ lɛ ɛpɔ̄bí lé.” 11Anɔ́ɔ Abímɛ́lɛ̄ki le odúúdú ācɛ ā ahɔ̄ pi kahíníī, “Ɔ̄cɛ dóódu nōo lɛ abɔ̄ kwu ɔ̄cɛ ā mɛ́mla ɔnyā nū, é géē je ɔ̄cɛ ɔ́ɔmā ŋmó.”

12Áyísīki le īkpɔ̄dɛ̄hɔ̄ nyi ajɛ abɔ́ɔ, anɔ́ɔ ó le ɛga ofɛhɔ̄ kú ɔdā nōó nyi ā cē iháyí ɔ́ɔmā, ohígbū ka Ɔwɔicō le ɔhā hɛ́ ce ɔ́. 13Anɔ́ɔ ó le gbagbénú klla le lɛ tōōtū ɔ̄ jāā gbéeko nōó le gbagbénú nɛ̄ɛ̄nɛ̄hi á.

14Ó lɛ agbénú kú ɛbɔ́ɔ́lɛ́, ígwu alɛwa mɛ́mla ācocɛ̄hɔ̄. Anɔ́ɔ ācɛ kú Ufilístiya ā gbɔɔ́ ō má ɔ̄ imálānyī á. 15Anɔ́ɔ ācɛ kú Ufilístiya ā le obugā nɛ̄ ācocɛ̄hɔ̄ kú ádā nū, Ébrahām, bu eko nōó yēeyī ā kpó gwū á. 16Anɔ́ɔ Abímɛ́lɛ̄ki da Áyísīki kahíníī, “Nyɛ̄ɛ̄ ŋmá ɛgiyí alɔ, ohígbū ka a le fíyɛ́ alɔ abɔ̄.” 17Anɔ́ɔ Áyísīki nyɛ̄ɛ̄ ŋmá abɔ́ɔ gaá le aáklɔ̄kpɛ cē kwaajɛ ɔpɛ́ kú Ugɛ́ra. Ó gaá lā abɔ́ɔ. 18Áyísīki le obugā nēé bū eko kú Ébrahām nɛ̄ ācɛ Ufilístiya kpó gwū eko nɛ̄ Ébrahām gekwú ā, kpó bu kpɔ́. Iyē nɛ̄ ádā nū tɛtɛ kpó ce aóbugā ā nɛ̄ Áyísīki kpó ce uwá dúú á. 19Ācocɛ̄hɔ̄ kú Áyísīki le obugā bū ɔpɛ̄ ā anɔ́ɔ é le éŋkpɔ̄ nɛ̄hi má ipú nū á. 20Ācogbāálá kú Ugēra ā yíkpɛ́lā tū ācogbāálá kú ɔlɛ́ Áyísīki ka éŋkpɔ̄ ā ɔ́ɔ wɛ ákú aá. Anɔ́ɔ Áyísīki kwú iyē ú cē obugā ā kahíníī, “Ɔdīkpɛ́lā.” 21Ācocɛ̄hɔ̄ kú Áyísīki le obugā ɔhá bū, é klla le ikpɛ́lā yá ce ɔ́ɔmā ā kpɔ́. Anɔ́ɔ Áyísīki klla kwú iyē ú ce ɔ́ kpɔ́ ka “Sitna,” nɛ̄ ɛyí nū wɛ “olɛlā” ā. 22Ó nyɛ̄ɛ̄ ŋmá abɔ́ɔ gaá le obugā ɔhá bū kpɔ́, amáŋ é yá ikpɛ́lā ce ɔ́ɔmā gɛ ŋ́. Anɔ́ɔ ó kwú iyē ú ce ɔ́ ka “Urēhɔ̄bɔ̄t” nɛ̄ ɛyí nū wɛ “Ɔwɔicō le ɛga yá lɛ alɔ ɛɛ́. Alɔ géē nyīla ajɛ nyā mɛ́ɛ́nɛ.”

23Ó ŋmá abɔ́ɔ ā, ó le yɛ tá Ubiyɛssɛ́ba. 24Óndú ā wā ɛgiyí nū otú ɔ́ɔmā gaá da ɔ́ kahíníī, “Ami wɛ Ɔwɔicō kú Ébrahām ádā uwɔ á. Ā híī yúúfi ŋ́, n yɔ̄ pī uwɔ. N géē hɔ́hā ce uwɔ klla géē kpó ayááyí gā uwɔ, ohígbū okónu nɛ̄ n ce lɛ ɔ̄cotɛ̄hɔ̄ kú um, Ébrahām, ā.” 25Áyísīki le ede ma abɔ́ɔ, le ɔkɔ gbā lɛ Ɔwɔicō klla le áklɔ̄kpɛ kú nū cē kwaajɛ abɔ́ɔ. Abɔ́ɔ ā, ācocɛ̄hɔ̄ kú Áyísīki ā klla le obugā ɔhá bū.

Okónu nɛ̄ Áyísīki ce mɛ́mla Abímɛ́lɛ̄ki ā

26 # Ohút 21.22 Abímɛ́lɛ̄ki mɛ́mla Ahúsāti, nōo wɛ ɔ̄cɛ nōo ī nwū ɔ̄ ɛlā ā, mɛ́mla Ufíkɔlu, nōo wɛ otrɛ̄yí kú aícɔ́ɔja kú ɔlɛ́ nū ā, gā ŋmá Ugéra gaá má Áyísīki. 27Anɔ́ɔ Áyísīki le ɔ̄kā da uwá kahíníī, “Ɔdíyá nɛ́ aá wā ɛgiyí um āa? Ó wɛ aá wɔ́tū um klla nū um ŋmá ɛgiyí aá ā ŋ́ nɛɛ?” 28É tóohi kahíníī, “Alɔ jé pélūū ka Óndú ā yɔ̄ mla uwɔ. Alɔ wā kú alɔ lɛ ɔkpá gwá lɛ īyī alɔ, kú ālɔ̄ lɛ ɛka gbo mla uwɔ. 29Ɛka nɛ̄ alɔ í gbo ā wɛ ka á gáā yá alɔ ɔdōbɔ̄bí dúúmā ŋ́, ɛ́gɛ́nɛ̄ alɔ í lɛ abɔ̄ kwu uwɔ, ɛ́ɛ́ nɛ̄ alɔ ī yá uwɔ ɔdā dúúmā ŋ́ mā. Alɔ kē gbonɛnɛ gā uwɔ klla cɛ̄ gā uwɔ nyɛ̄ɛ̄ ɛbɔ́. Abālɔbányā alɔ jé péee ka Óndú ā le ɔhā hɛ́ ce uwɔ.” 30Áyísīki le ucɛ yá lɛ uwá le Lé, le gwá. 31Ɔ̄cɔ̄ɔ̄cī kú ɔŋmɔ́ɔcī nū ā, é le héyī, lɛ ɔkpá gwá lɛ īyī ūwā. Áyísīki le uwá bītá, anɔ́ɔ é i pɛ́ nyɔ̄ ɔlɛ́ uwā ɛbɔ́ á. 32Ícíícɛ ɔ́ɔmā, ācocɛ̄hɔ̄ kú Áyísīki wā gaá le ɔ̄kā kú obugā nēé bu ā ka ɔ̄ kahíníī, “Alɔ le éŋkpɔ̄ nɛ̄hi má ipú obugā ā.” 33Ó kwú iyē ú ce obugā ā ka, ‘Ussɛ́ba’. Ɔwɛ ɛ́gɛ́nyā nɛ̄ igelī nēé hī ka Ubiyɛssɛ́ba a lɛ iyē nū á.

Anyā Éwɔhá kú Ísɔ

34Eko nɛ̄ Ísɔ le iháyí ofɛpa lé ā, ó gaá le anyā ɛpa kú ācɛ Uhɛ́ti lɛ. Anyā lé ka Ujúdīt, ɔyínɔ̄nyā kú Ubiyeri, mɛ́mla Ubásɛ̄māti, ɔyínɔ̄nyā kú Ɛ́lɔn. 35Anyā ā kwú pīya ɔtūnōbí lɛ Áyísīki mɛ́mla Urebéka.

Currently Selected:

OHÚTU 26: IFBCL

Highlight

Copy