Jọn 1
1
Ḍumo Ọkwẹịn Mị
1Tomonikiri mị ma tẹmẹka sịkị ngịsị, Ọkwẹịn Ḅe Ori omi-ẹ; Ọ̀ Tamụnọ Ḅe na omi-ẹ, Tamụnọ Ḅe na Ori na pịkị gbọrịye-ẹ. 2Anịḅe sakị mị ngịsị Ọkwẹịn Ḅe Tamụnọ Ḅe na omi-ẹ. 3Ọ̀ ḅụ ḅụ Tamụnọ Ḅe ḅọrọ ye mamgba tẹmẹmẹ; tẹmẹye mamgba Ọ̀ sọka se tẹmẹ gbọrịye sọ ofori-ẹ. 4Ọkwẹịn Ḅe anị ḍumo mị ḅe chuku-ẹ, se mịn ḍumo mị enekuḅu ọkị ḅo tomoni mamgba pịrịmẹ. 5Enekuḅu mị kanakana mị ḅie ḅịapakamẹ, se kanakana mị ma ngịsị anị binmakẹ.
6Tamụnọ Ḅe oria okunwẹngịḅọ ḅe nwọ seni fịrịmamẹ, Jọn nwọ chịnḅọ ḅe, 7ḅo enekuḅu mị gbolomaye nwọ ḍuko tomoni pịrịḅịa ẹrẹchị ḅo ḅọ ḅe, mịẹse inimgba oku mị naa se ḅereniḅịa ḅara. 8Ori na ọ̀ ḅụ na enekuḅu mịkẹ; ò ḅo enekuḅu mị gbolomaye nwọ ḍuko-ẹ ḅomẹ. 9Mịn anị kọkọma enekuḅu mị-ẹ—tomonikiri mị ḅie sọ ḅo enekuḅu mị, se ḅịa tomoni mamgba ọgọnọ saramaye mị,
10Ọkwẹịn Ḅe anịsịkị mị ḅụ tomonikiri mị ḅie omi-ẹ, Tamụnọ Ḅe Ọ̀ ḅụ ḅọrọ pịkị tomonikiri mị tẹmẹmẹ nwọḅẹ sọnị tomonikiri mị Ò nemikẹ. 11Ori Oria ama nwọ ḅomẹ, ọkụma Oria ama apụma ini Ori ọkịkẹ. 12Anị simeọkụ simeọkụ sọnị, dapụ kọkọma Ori ọkị seni Ò ḅerenimẹ; ini mị Ọ̀ kụrọ se pịrịye-ẹ ḅo Tamụnọ awọ nwọ sọ. 13Tomoni yemịẹmịẹḅara ḅụ ini wẹrị ḅo Tamụnọ awọ nwọ sọkẹ, ḍaḅọ tomonikiri awọ yiyi ḅaraḅụkẹ; Tamụnọ Ḅe na mịnaḅụ na anị inia Ḍa-ẹ.
14Ọkwẹịn Ḅe ḅo tomoniḅọ sọmẹ, se ḍikiḅụgerere na kọkọmaye na Ọ̀ ḅụ ḅeinmẹ, Ọ̀ pịkị mịna ogboku mine na angamẹ. Wa Oria boma mị ọrịmẹ, Ọ̀ mịn boma mị ọkịmẹ anị Ḍaḅọ Ḅe ngẹrị Tọkụ ḅara ḅụ.
15Jọn ḅe Ò gbolomaye nwọ ḍukomẹ. Ori oloku pakụmamẹ, “Ḅe anị àrị Ò gbolomaye nwọ ḍuko ọ́ pịrị sime Ḅọ ḅe-ẹ, à mị ḅara mị nwọ ḍuko sịkị, na ‘Ori ị̀ya ọḅụju ḅoaḅẹ, ọkụma Ori opusọtẹịn ị̀ nẹngịmẹ, anịatịḅị Ọ̀ tatarị simearịogbo ini ị̀ yimẹ.’”
16Oria opu ḍikiḅụgerere ḅụ Ò mine mgba ḅẹlẹmamẹ, ḍukoma ḍukoma ḅẹlẹma Ọ̀ nwọse wa pịrịmẹ. 17Tamụnọ Ḅe Moziz ḅe ḅụ ḅọrọ Olokoma pịrịmẹ, ọkụma ḍikiḅụgerere na kọkọmaye mị na Jizọs Kraịst Ḅe ḅụ ḅọrọ ḅomẹ. 18Jịn sịkị Tamụnọ Ḅe ọrịsa ḅọ ma ofori-ẹ. Oria gbọrị Tọkụ Ḅe kẹngẹ-ẹ, anị Tamụnọ Ḅe sime ọkụ nwọ sime Ḅọ ḅe pịkị Ḍaḅọ Ḅe anga sịkị sime Ḅọ ḅe, ori mị mịẹse ini Ọ̀ nemisaye-ẹ.
Jọn Mengisaraḅọ Ḅe Oku Mị
(Mat 3.1-12; Mak 1.1-8; Luk 3.1-18)
19Jerusalẹm ḅie sime Ju ḅẹrẹtọn apụma na agbamịẹapụ na, Livaịapụ ma na, nwọse Jọn ḅe fịrịmamẹ se ò gbelamẹ, “Ị́rị́ tụḅọ?”
20Jọn ḅe ọ̀ pẹkẹrẹ ḍụkụkẹ nwọḅẹ yekẹ, ọkụma ò ḅelema ḍuko inia tọrụ finjimẹ, na, “Mẹsaya Ḅe ị̀rị̀kẹ.”
21Ini nwọ gbelamẹ, “Anịọkụma, Ị́rị́ tụḅọ? Ịlaịja ḅe ị́rị́?”
Jọn ḅe nwọ pẹkẹrẹmẹ, “Ẹn-ẹn, Ị̀rị̀kẹ.”
Ini nwọ gbelamẹ, “Ịkịankoroḅọ ḅe ị́rị́?”
Ọ̀ nwọ pẹkẹrẹmẹ, “Ẹn-ẹn.”
22Ini nwọ ḅẹmẹ, “Anịọkụma ḍuko wa pịrị.” “Wa Pẹkẹrẹḅịpị se mun wa fịrịma apụma pịrịḅịa ḅara. Ị́ gbolomaye ḅụ cheye ị́ nwọ ḅẹ?”
23Jọn ḅe pẹkẹrẹ ḅụ Aịzaya ịkịankoroḅọ ḅe ḍukoye mị nwọ ḍukomẹ:
“Ị̀rị̀ anị eleogbo olokuarịḅọ ḅe pụkọ mị-ẹ:
gonogono ateli mịẹ Nyanaḅọ Ḅe pịrị ọ̀ ḅọrọḅịa ḅara!”
24Farisiapụma se fịrịma okunwẹngịapụma, 25anịsịkị Jọn ḅe gbelamẹ, “Ị́rị́ nemikase Mẹsaya Ḅe kẹ anịkanịka Ịlaịja ḅe kẹ, pịkị Ịkịankoroḅọ kẹ nwọḅẹ ọkụma, nde ị́ gose mengi se nweni sararịye?”
26Jọn ḅe pẹkẹrẹmẹ, “Mengi mị à se ọ́ saraye-ẹ, ọkụma ọ́mịna ogboku ó nemika gbọrịḅọ chịẹ sime waraḅẹ. 27Ori ị̀ya ọḅụju ḅoaḅẹ, ọkụma ọ̀ ḅụọ akpakama ḍiki finma sọnị ị̀ gbẹịnkẹ.”
28Bẹtani ḅie maye mamgba pakamẹ, Jọdan Tọrụ mị ḅụ ịrụapakapaka nyọ mị anị Jọn ḅe mengi sararị nyọ mị-ẹ.
Tamụnọ Anana Tọkụ Ḅe
29Anịḅe ene ḅa Jọn ḅe, Jizọs Ḅe ọ̀ damaḅo àrị ọkụ ọrị se nwọ ḅẹmẹ, “Ḅe Tamụnọ Anana Tọkụ Ḅe-ẹ, tomonikiri mị ḅe sima dekisin Ḅọ ḅe! 30Ḅe anị à ḅẹrẹ ḅẹ Ḅọ ḅe-ẹ à nwọḅẹ sịkị na, ‘Gbọrịḅọ ị̀ya ọḅụju ḅoaḅẹ, ọkụma Ori opusọtẹịn ị̀ nẹngịmẹ, anịatịḅị Ọ̀ tatarị simearịogbo ini ị̀ yimẹ.’ 31Ò ḅo sọḅịaye à nemikẹ, ọkụma à ḅo mengi se nweni saraḅẹ mịẹse Izrẹlapụma Ò nemiḅịa ḅara.”
32Mịn anị Jọn ḅe chịẹ onye mị-ẹ: “À Tẹmẹ Ḅe ọrịmẹ, okuku ḅara nwọse soḅie koroḅo, se Oria ọgọnọ chịẹmẹ. 33À pa pịkị ma nemikẹ na Ori-ẹ, ọkụma Tamụnọ Ḅe, ị̀ fịrịma na à mengi se nweni sara nwọḅẹ Ḅọ ḅe, nwọse ị̀ ḅẹmẹ, ‘Tẹmẹ Ḅe koroḅo iniḅọ ọgọnọ chịẹḅịa ḅọ ị́ nwọ ọrịḅịa Ori mị Fịafịa Tẹmẹ Ḅe nwọse mengi se nweni saraḅịaye-ẹ.’ 34Àrị anị ọrịsam, se à ḍuko ọ́ pịrịaḅẹ na, Ori anị Tamụnọ Tọkụ Ḅe-ẹ.”
Jizọs Ḅe Oria Tarị Ọḅụḍukoapụ Ma
35Anịḅe ene ḅa, Jọn ḅe na oria ọḅụḍuko mama apụ na pịkị anịanga omi-ẹ, 36ò Jizọs Ḅe ọrịmẹ Ọ̀ nwẹngị ḅọrọarị sịkị. Se ọ̀ nwọ ḅẹmẹ, “Ḅe Tamụnọ Anana Tọkụ Ḅe-ẹ!”
37Mama ọḅụḍukoapụma ọ̀ mịn mị ḍuko ọkụ nwọ naase Jizọs Ḅe ḍukomẹ. 38Jizọs Ḅe vinpịkị ini ò ḍukoarị ọkụ ọrị se ini gbelamẹ, “Ó che ḍọkị-ao?”
Ini nwọse Ọ̀ pẹkẹrẹmẹ, “Nde nyọ Ị́ anga, Yeḍieḅọ?” (Mị ọkwẹịn mị fieaye, “Yeḍieḅọ.”)
39Ọ̀ nwọ pẹkẹrẹmẹ, “Ó ḅo ḍiki.” Anị ini ọ̀ ḅụ sọ ori anga nyọ mun ye-ẹ, se ene mị ḅụ kọn sịkị mị nwọse ori na simemẹ. (Anị pa inein-a so pembe ye nwọ lasam eneogboin ḅụ.)
40Jọn ḅe ḍukoye mị naase Jizọs Ḅe ḅụ sọmun mama apụma ḅie gbọrịḅọ anị Andru ḅe-ẹ, Saịmọn Pita numbireowu ḅe. 41Anịkirikiri Andru ḅe numbireowu Saịmọn ḅe ọrị se ḍuko ọ̀ pịrịmẹ, “Mẹsaya Ḅe wa Ori ọrịsam.” (Mẹsaya fiearịye anị “Kraịst.”) 42Anịsịkị mị ọ̀ Saịmọn ḅe ọkịmun Jizọs Ḅe Pịrịye-ẹ.
Jizọs Ḅe ò ḍiki se nwọ ḅẹmẹ, “Ị́ya ẹrẹ anị Saịmọn Jọn yaḅe, ọkụma ini nwọse ị́ chịnḅịa Kifas.” (Mị na Pita na gbọrịye-ẹ, anị fiearịye “Ḍụparị.”)
Jizọs Ḅe Filip Ḅe Na Natanịẹl Ḅe Na Chịnmẹ
43Anịḅe ene ḅa Jizọs Ḅe tọn pẹlẹmẹ na ọ̀ Galili munḅịa. Ò Filip ḅe ọrịmẹ se nwọse ọ̀ ḅẹmẹ, “Ị́rị́ na ḅo!” 44(Filip ḅe Bẹtsaịda ḅọ-ẹ, Andru ḅe na Pita ḅe na anga ama mị.) 45Filip ḅe Natanịẹl ḅe ọrị se ḍuko ọ̀ pịrịmẹ, “Moziz ḅe Oloko ḍiri mị ḅie Ọ̀ ḅụ ye gịẹịn, pịkị ịkịankoroapụma Ò gbolomaye gịẹịnḅọ ḅe, wa Ori ọrịsam. Ori anị Jizọs, Josẹf ya Nazarẹt ḅọ Ḅe-ẹ.”
46Natanịẹl ḅe nwọ gbelamẹ, “Nazarẹt ama mị ḅie sọnị iḅiye pakaḅo ḅe?”
Filip ḅe ọ̀ pẹkẹrẹmẹ, “Ḅo ḍiki.”
47Jizọs ḅe Natanịẹl ḅe ọ̀ damaḅoarị ọkụ nwọ ọrị sịkị, ori ò gbolomaye ḅụ nwọ ḅẹmẹ, “Ḅe kọkọma Izrẹlḅọ-ẹ; ò ḅie iruo ofori-ẹ!”
48Natanịẹl ḅe ò gbelamẹ, “Nde ị̀ nemi ọkụ?”
Jizọs Ḅe pẹkẹrẹmẹ, “Ị́ figi chịn mị chuku simearị sịkị àrị ị́ ọrịmẹ, Filip ḅe ma ị́ chịnka sịkị.”
49“Yeḍieḅọ,” Natanịẹl ḅe nwọ pẹkẹrẹmẹ, “Ị́rị́ Tamụnọ Tọkụ Ḅe-ẹ! Ị́rị́ Izrẹl Amanyanaḅọ Ḅe-ẹ!”
50Jizọs Ḅe nwọ ḅẹmẹ, “Ị́ ḅerenisa anị figi chịn mị chuku ị́ sime sịkị àrị ị́ ọrịmẹ à nwọse ị́ ḅẹye gose? Ị́ iḅiọkụ mà nẹngị aye ọrịḅịa!” 51Se ọ̀ nwọse ini ḅẹmẹ, “À kọkọmaye ḍuko ọ́ pịrịaḅẹ: ómine ọrịḅịa so mị finjiḅịa se Tamụnọ enjẹlapụ Tomoniḅọ Tọkụ Ḅe ọgọnọ iwo na ideri na ḅịa ọkụ.”
Currently Selected:
Jọn 1: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
