Jọn 14
14
Jizọs Ḅe Anị Ḅọrọ Mun Ḍaḅọ Ḅe Laḅịa Ateli Mị-ẹ
1Jizọs Ḅe nwọse ini ḅẹmẹ, “Ọ́ ḅụḅalaḅala nyana ma, ó kuḅie pịkị lọkọma. Ọ́ Tamụnọ Ḅe ḅereni, ọ́ pịkị Ị̀rị̀ sọ ḅereni. 2Tọn-a iḅi-a ḅie ị̀ Ḍa warị mị ḅie omi-ẹ, à mun nyọ karakarama ọ́ pịrị-ẹ mun-aḅẹ. Mịn mị mgbọkụ à ḍuko ọ́ pịrị ẹkẹ, anị nemikase ọkọ paka ẹka ọkụma. 3Se à somun nyọ karakarama ọ́ pịrị so sịkị, à vinpịkị ḅo ómine ọkị ị̀ ḅụ pịrịḅịa, mịẹse à sime anga ó simeḅịa ḅara. 4À mun-arị nyọ mị ḅe ateli mị ó nemimẹ.”
5Tọmọs ḅe nwọse ọ̀ ḅẹmẹ, “Nyanaḅọ, ị́ mun-arị nyọ mị wa nemikẹ; nde wa ineda ḅọrọ mun anịanga laḅịa ateli mị nwọ nemiḅịa ọkụ?”
6Jizọs Ḅe ọ̀ pẹkẹrẹmẹ, “Ị̀rị̀ anị ateli mị-ẹ, karakaraye mị na-ẹ, pịkị ḍumo mị na-ẹ; ị̀ ḅụ ḅọrọka se mun Ḍaḅọ Ḅe laḅịaḅọ ofori-ẹ. 7Mịọkụ ọ́ nwọ ị̀ nemisa sịkị, ọ́ pịkị ị̀ Ḍaḅe sọ nemiḅịa, se mịọkụ ọkị tọrọkọ mun ọ́ kọkọma ò nemisam, ọ́ pịkị ori ọrịsam.”
8Filip ḅe nwọse ọ̀ ḅẹmẹ, “Nyanaḅọ, Ḍaḅọ Ḅe se wa ḍie mịn mị anị wa ḅiye mamgba-ẹ.”
9Jizọs Ḅe pẹkẹrẹmẹ, “Ḅọlọ sịkị à nwọse ómine mgba na simesam anị sọnị ma ị́ pa ị̀ nemika, Filip? Ị̀ ọrị sa ḅọ goyegoye, Ḍaḅọ Ḅe ọrịsam. Nde anị ọkụma, ị́ gose nwọ ḅẹye, ‘Ḍaḅọ Ḅe se wa ḍie?’ 10Filip, ị́ ḅerenika na ị̀rị̀ à Ḍaḅọ Ḅe ḅie omi-ẹ, Ḍaḅọ Ḅe pịkị na ị̀ ḅie omi-ẹ ḅẹye mị?” Jizọs Ḅe nwọse oria ọḅụḍukoapụma ḅẹmẹ, “À kọn ọ́ pịrịsa ọkwẹịn ma, ị̀ ḅarakuḅu ọkwẹịnkẹ. Ị̀ ḅie sime Ḍaḅọ Ḅe mị oria fịrịma nwẹngịarịye-ẹ. 11Ị̀ ḅereni, à nwọ ḅẹ sịkị na, à Ḍaḅọ Ḅe ḅie omi-ẹ, Ḍaḅọ Ḅe pịkị ị̀ ḅie omi-ẹ. Anịkẹ ḅẹḅẹ, à nwẹngịarị fịrịma gose ḅereni. 12À kọkọmaye ḍuko ọ́ pịrịaḅẹ: ị̀ ḅereniḅọ goyegoye à nwẹngịarị fịrịma nwọ nwẹngịḅịa—iin, ọ̀ pịkị ḍụḅa àrị nẹngịaye sọnị nwọ nwẹngịḅịa, anịatịḅị à so Ḍaḅọ Ḅe damamun-aḅẹ. 13À pịkị ómine ị̀ya ẹrẹ ḅụ ḅọrọ se ḅiye goyegoye nwọ mịẹḅịa, mịẹse Ḍaḅọ Ḅe boma mị Tọkụ Ḅe ḅụ ḅọrọ ḅelepakaḅịa ḅara. 14Ị̀ya ẹrẹ ḅụ ó nemikase ye ḅimẹ ḅẹḅẹ, à mịẹ ọ́ pịrịḅịa.
Fịafịa Tẹmẹ Ḅe Ḅoḅịa Nwọ Ḅẹ Yeḅereni Ḅịpị Mị Ḅe Ḅẹrẹ
15“Ómine ị̀ ḅẹlẹmamẹ ḅẹḅẹ, ómine ị̀ya olokoma kokoḅịa. 16À Ḍaḅọ Ḅe ḅara ḅiḅịa, se ò jịn Ḅarachụaḅọ nwọ seni ọ́ fịrịmaḅịa, anị ómine nasime gbasoḅịaḅọ Ḅe. 17Ori anị Fịafịa Tẹmẹ Ḅe-ẹ, anị Tamụnọ Ḅe ḅụ karakaraye mị nwọ ḍieḅelemarịḅọ Ḅe. Tomonikiri mị ineda ori ọkị-ẹkẹ, anịatịḅị anị ineda ori ọrị anịkanịka ò nemi ẹkẹ. Ọkụma ómine ò nemimẹ, anịatịḅị ori ómine na omi-ẹ pịkị ọ́mịna ḅie angamẹ.
18“À soḅịa sịkị, à papa ọ́ wẹrịso ẹkẹ; à pịkị vinpịkị ọ́ damaḅoḅịa. 19Boka kala sịkị ḅụ tomonikiri mị ḅarị ngịsị ị̀ ọrị ẹkẹ, ọkụma ómine ị̀ ọrịḅịa anịatịḅị à ḍumo waraḅẹ, ómine sọnị pịkị ḍumoḅịa. 20Anị ene mị ḅo sịkị, ó nemiḅịa na àrị ị̀ Ḍaḅe ḅie omi-ẹ, se ómine sọ pịkị ị̀ ḅie omi-ẹ, ị̀rị̀ sọnị pịkị ọ́mịna ḅie simeọkụ mị.
21“Ị̀ya olokoma ọkịḅọ goyegoye pịkị àrị ḍukoye mịẹḅọ mịẹḅọ, ori mị ị̀ ḅẹlẹmaḅọ ḅe-ẹ. Ị̀ Ḍaḅe iniḅọ ḅẹlẹmaḅịa, nwọ ị̀ ḅẹlẹmaḅọ goyegoye ị̀rị̀ sọnị iniḅọ ḅẹlẹma se ị̀ ḅụ ḍieḅelema iniḅọ pịrịḅịa.”
22Judas ḅe (Judas Ịskarịọt ḅe orikẹ) nwọ ḅẹmẹ, “Nyanaḅọ, nde anị mị ineda mịẹḅịa ọkụ na ị́ ḅụ ḍieḅelema wa pịrịḅịa, ọkụma tomonikiri mịkẹ?”
23Jizọs Ḅe ọ̀ pẹkẹrẹmẹ, “Ị̀ ḅẹlẹmaḅọ goyegoye ị̀ya ḍieye mị ḍukoye mị nwọ mịẹḅịa. Ị̀ Ḍaḅe iniḅọ ḅẹlẹmaḅịa, ị̀ Ḍaḅe na ị̀rị̀ na iniḅọ damaḅo se iniḅọ na angaḅịa. 24Ị̀ ḅẹlẹmaka ḅọ goyegoye iniḅọ ị̀ya ḍieye mị ḍukoye nwọ mịẹ ẹkẹ. Ọ́ naasa ḍieye mị ị̀yayekẹ, ọkụma Ḍaḅọ Ḅe ḅaraḅoye-ẹ, ị̀ se fịrịmaḅọ Ḅe.
25“Mịn mị à nwọ ḍuko ọ́ pịrịsam à pa ómine na simearị sịkị. 26Ḅarachụaḅọ Ḅe, Fịafịa Tẹmẹ Ḅe, Ḍaḅọ Ḅe ị̀ya ẹrẹ ḅụ se fịrịmaḅịa ḅọ ḅe, ò yegoyegoye nwọse ó ḍieḅịa, pịkị ọ́ mịẹse à ḍuko ọ́ pịrịsaye mamgba nwọse ḅiekoromaḅịa.
27“Deinma à nwọse ọ́ pịrịmẹ, ị̀ya deinma à nwọse ọ́ pịrịmẹ. Tomonikiri mị pịrị ọkụ à nwọse anị se ọ́ pịrịkẹ. Ọ́ ḅụḅalaḅala nyana ma, ó kuḅie pịkị lọkọma, ọ́ ḅalafama. 28Ọ́ naamẹ à nwọse ọ́ ḅẹ sịkị na, ‘Àrị ó koroma soaḅẹ, ọkụma à vinpịkị ọ́ damaḅoḅịa.’ Ómine ị̀ ḅẹlẹma ọkụma, ọ́mịna ḅieḅẹlẹḅịa na à so Ḍaḅọ Ḅe damamun-aḅẹ, anịatịḅị ori opusọtẹịn ị̀ nẹngịmẹ. 29À mịọkụ mịn mị nwọ ḍuko ọ́ pịrịsam, arịmgba ma pakaka simeogbo, mịẹse anị kọkọma pakaḅịa sịkị ó ḅereniḅịa ḅara. 30Àrị ineda ómine na ọkwẹịn ḅọlọma ẹkẹ, anịatịḅị mị tomonikiri mị ḅe ḅẹrẹtọnḅọ ḅe ò ḅoaḅẹ. Ori ị̀ ḅụ kụrọ nyanakẹ, 31ọkụma tomonikiri mị nemiḅịa na à Ḍaḅọ Ḅe ḅẹlẹmamẹ anị à gose ọ̀ tọn ị̀ pịrị ḅara goyegoye nwọ mịẹarịye-ẹ.
“Ó ḅo, ye wa mịanga mị koromaso.
Currently Selected:
Jọn 14: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
Jọn 14
14
Jizọs Ḅe Anị Ḅọrọ Mun Ḍaḅọ Ḅe Laḅịa Ateli Mị-ẹ
1Jizọs Ḅe nwọse ini ḅẹmẹ, “Ọ́ ḅụḅalaḅala nyana ma, ó kuḅie pịkị lọkọma. Ọ́ Tamụnọ Ḅe ḅereni, ọ́ pịkị Ị̀rị̀ sọ ḅereni. 2Tọn-a iḅi-a ḅie ị̀ Ḍa warị mị ḅie omi-ẹ, à mun nyọ karakarama ọ́ pịrị-ẹ mun-aḅẹ. Mịn mị mgbọkụ à ḍuko ọ́ pịrị ẹkẹ, anị nemikase ọkọ paka ẹka ọkụma. 3Se à somun nyọ karakarama ọ́ pịrị so sịkị, à vinpịkị ḅo ómine ọkị ị̀ ḅụ pịrịḅịa, mịẹse à sime anga ó simeḅịa ḅara. 4À mun-arị nyọ mị ḅe ateli mị ó nemimẹ.”
5Tọmọs ḅe nwọse ọ̀ ḅẹmẹ, “Nyanaḅọ, ị́ mun-arị nyọ mị wa nemikẹ; nde wa ineda ḅọrọ mun anịanga laḅịa ateli mị nwọ nemiḅịa ọkụ?”
6Jizọs Ḅe ọ̀ pẹkẹrẹmẹ, “Ị̀rị̀ anị ateli mị-ẹ, karakaraye mị na-ẹ, pịkị ḍumo mị na-ẹ; ị̀ ḅụ ḅọrọka se mun Ḍaḅọ Ḅe laḅịaḅọ ofori-ẹ. 7Mịọkụ ọ́ nwọ ị̀ nemisa sịkị, ọ́ pịkị ị̀ Ḍaḅe sọ nemiḅịa, se mịọkụ ọkị tọrọkọ mun ọ́ kọkọma ò nemisam, ọ́ pịkị ori ọrịsam.”
8Filip ḅe nwọse ọ̀ ḅẹmẹ, “Nyanaḅọ, Ḍaḅọ Ḅe se wa ḍie mịn mị anị wa ḅiye mamgba-ẹ.”
9Jizọs Ḅe pẹkẹrẹmẹ, “Ḅọlọ sịkị à nwọse ómine mgba na simesam anị sọnị ma ị́ pa ị̀ nemika, Filip? Ị̀ ọrị sa ḅọ goyegoye, Ḍaḅọ Ḅe ọrịsam. Nde anị ọkụma, ị́ gose nwọ ḅẹye, ‘Ḍaḅọ Ḅe se wa ḍie?’ 10Filip, ị́ ḅerenika na ị̀rị̀ à Ḍaḅọ Ḅe ḅie omi-ẹ, Ḍaḅọ Ḅe pịkị na ị̀ ḅie omi-ẹ ḅẹye mị?” Jizọs Ḅe nwọse oria ọḅụḍukoapụma ḅẹmẹ, “À kọn ọ́ pịrịsa ọkwẹịn ma, ị̀ ḅarakuḅu ọkwẹịnkẹ. Ị̀ ḅie sime Ḍaḅọ Ḅe mị oria fịrịma nwẹngịarịye-ẹ. 11Ị̀ ḅereni, à nwọ ḅẹ sịkị na, à Ḍaḅọ Ḅe ḅie omi-ẹ, Ḍaḅọ Ḅe pịkị ị̀ ḅie omi-ẹ. Anịkẹ ḅẹḅẹ, à nwẹngịarị fịrịma gose ḅereni. 12À kọkọmaye ḍuko ọ́ pịrịaḅẹ: ị̀ ḅereniḅọ goyegoye à nwẹngịarị fịrịma nwọ nwẹngịḅịa—iin, ọ̀ pịkị ḍụḅa àrị nẹngịaye sọnị nwọ nwẹngịḅịa, anịatịḅị à so Ḍaḅọ Ḅe damamun-aḅẹ. 13À pịkị ómine ị̀ya ẹrẹ ḅụ ḅọrọ se ḅiye goyegoye nwọ mịẹḅịa, mịẹse Ḍaḅọ Ḅe boma mị Tọkụ Ḅe ḅụ ḅọrọ ḅelepakaḅịa ḅara. 14Ị̀ya ẹrẹ ḅụ ó nemikase ye ḅimẹ ḅẹḅẹ, à mịẹ ọ́ pịrịḅịa.
Fịafịa Tẹmẹ Ḅe Ḅoḅịa Nwọ Ḅẹ Yeḅereni Ḅịpị Mị Ḅe Ḅẹrẹ
15“Ómine ị̀ ḅẹlẹmamẹ ḅẹḅẹ, ómine ị̀ya olokoma kokoḅịa. 16À Ḍaḅọ Ḅe ḅara ḅiḅịa, se ò jịn Ḅarachụaḅọ nwọ seni ọ́ fịrịmaḅịa, anị ómine nasime gbasoḅịaḅọ Ḅe. 17Ori anị Fịafịa Tẹmẹ Ḅe-ẹ, anị Tamụnọ Ḅe ḅụ karakaraye mị nwọ ḍieḅelemarịḅọ Ḅe. Tomonikiri mị ineda ori ọkị-ẹkẹ, anịatịḅị anị ineda ori ọrị anịkanịka ò nemi ẹkẹ. Ọkụma ómine ò nemimẹ, anịatịḅị ori ómine na omi-ẹ pịkị ọ́mịna ḅie angamẹ.
18“À soḅịa sịkị, à papa ọ́ wẹrịso ẹkẹ; à pịkị vinpịkị ọ́ damaḅoḅịa. 19Boka kala sịkị ḅụ tomonikiri mị ḅarị ngịsị ị̀ ọrị ẹkẹ, ọkụma ómine ị̀ ọrịḅịa anịatịḅị à ḍumo waraḅẹ, ómine sọnị pịkị ḍumoḅịa. 20Anị ene mị ḅo sịkị, ó nemiḅịa na àrị ị̀ Ḍaḅe ḅie omi-ẹ, se ómine sọ pịkị ị̀ ḅie omi-ẹ, ị̀rị̀ sọnị pịkị ọ́mịna ḅie simeọkụ mị.
21“Ị̀ya olokoma ọkịḅọ goyegoye pịkị àrị ḍukoye mịẹḅọ mịẹḅọ, ori mị ị̀ ḅẹlẹmaḅọ ḅe-ẹ. Ị̀ Ḍaḅe iniḅọ ḅẹlẹmaḅịa, nwọ ị̀ ḅẹlẹmaḅọ goyegoye ị̀rị̀ sọnị iniḅọ ḅẹlẹma se ị̀ ḅụ ḍieḅelema iniḅọ pịrịḅịa.”
22Judas ḅe (Judas Ịskarịọt ḅe orikẹ) nwọ ḅẹmẹ, “Nyanaḅọ, nde anị mị ineda mịẹḅịa ọkụ na ị́ ḅụ ḍieḅelema wa pịrịḅịa, ọkụma tomonikiri mịkẹ?”
23Jizọs Ḅe ọ̀ pẹkẹrẹmẹ, “Ị̀ ḅẹlẹmaḅọ goyegoye ị̀ya ḍieye mị ḍukoye mị nwọ mịẹḅịa. Ị̀ Ḍaḅe iniḅọ ḅẹlẹmaḅịa, ị̀ Ḍaḅe na ị̀rị̀ na iniḅọ damaḅo se iniḅọ na angaḅịa. 24Ị̀ ḅẹlẹmaka ḅọ goyegoye iniḅọ ị̀ya ḍieye mị ḍukoye nwọ mịẹ ẹkẹ. Ọ́ naasa ḍieye mị ị̀yayekẹ, ọkụma Ḍaḅọ Ḅe ḅaraḅoye-ẹ, ị̀ se fịrịmaḅọ Ḅe.
25“Mịn mị à nwọ ḍuko ọ́ pịrịsam à pa ómine na simearị sịkị. 26Ḅarachụaḅọ Ḅe, Fịafịa Tẹmẹ Ḅe, Ḍaḅọ Ḅe ị̀ya ẹrẹ ḅụ se fịrịmaḅịa ḅọ ḅe, ò yegoyegoye nwọse ó ḍieḅịa, pịkị ọ́ mịẹse à ḍuko ọ́ pịrịsaye mamgba nwọse ḅiekoromaḅịa.
27“Deinma à nwọse ọ́ pịrịmẹ, ị̀ya deinma à nwọse ọ́ pịrịmẹ. Tomonikiri mị pịrị ọkụ à nwọse anị se ọ́ pịrịkẹ. Ọ́ ḅụḅalaḅala nyana ma, ó kuḅie pịkị lọkọma, ọ́ ḅalafama. 28Ọ́ naamẹ à nwọse ọ́ ḅẹ sịkị na, ‘Àrị ó koroma soaḅẹ, ọkụma à vinpịkị ọ́ damaḅoḅịa.’ Ómine ị̀ ḅẹlẹma ọkụma, ọ́mịna ḅieḅẹlẹḅịa na à so Ḍaḅọ Ḅe damamun-aḅẹ, anịatịḅị ori opusọtẹịn ị̀ nẹngịmẹ. 29À mịọkụ mịn mị nwọ ḍuko ọ́ pịrịsam, arịmgba ma pakaka simeogbo, mịẹse anị kọkọma pakaḅịa sịkị ó ḅereniḅịa ḅara. 30Àrị ineda ómine na ọkwẹịn ḅọlọma ẹkẹ, anịatịḅị mị tomonikiri mị ḅe ḅẹrẹtọnḅọ ḅe ò ḅoaḅẹ. Ori ị̀ ḅụ kụrọ nyanakẹ, 31ọkụma tomonikiri mị nemiḅịa na à Ḍaḅọ Ḅe ḅẹlẹmamẹ anị à gose ọ̀ tọn ị̀ pịrị ḅara goyegoye nwọ mịẹarịye-ẹ.
“Ó ḅo, ye wa mịanga mị koromaso.
Currently Selected:
:
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria