Jọn 3

Jizọs Ḅe Na Nikodimọs Ḅe Na

1Juapụ gbọrị tịḅịnịḅọ omi-ẹ oria ẹrẹ anị Nikodimọs, ori Farisiapụma ḅie gbọrịḅọ-ẹ. 2Gbọrị ene ḍin ḅụ ò Jizọs Ḅe damamun se nwọ seni Ọ̀ ḅẹmẹ, “Yeḍieḅọ, wa nemimẹ na ị́rị́ Tamụnọ Ḅe se fịrịma Yeḍieḅọ-ẹ. Ị́ nwẹngịarị ḅụgbiripuma fịrịma ineda nwọ nwẹngịḅịa ḅọ ofori-ẹ Tamụnọ Ḅe iniḅọ na simeka simeogbo.”

3Jizọs Ḅe pẹkẹrẹmẹ, “Kọkọmaye mị à nwọ ḍuko ị́ pịrịaḅẹ: ineda Tamụnọ Amanyanakiri mị ọrịḅịa ḅọ ofori-ẹ, ini kpoto iniḅọ yika simeogbo.”

4Nikodimọs ḅe gbelamẹ, “Nde sẹnịsaḅọ ini ineda kpoto nwọ yiḅịa ọkụ? Ọ̀ ḅarị ineda mun nyọngọrọma furo ḅie sọ se árị maịn karama ò yi ẹka sịkị!”

5Jizọs Ḅe pẹkẹrẹmẹ, “Kọkọmaye mị à nwọ ḍuko ị́ pịrịaḅẹ, na gbọrịḅọ sọnị ineda Tamụnọ Amanyanakiri mị ḅie sọ ẹkẹ, ini mengi na Tẹmẹ Ḅe na ḅụ iniḅọ yika simeogbo. 6Tomoniḅọ mị ojumịnị ḅụ ini iniḅọ yisam, ọkụma Tẹmẹ ḅụ ini pịkị iniḅọ yiḅịa. 7Anị ị́ ḅụ gbiripumama na à nwọse ị́ ḅẹmẹ na ini kpoto ị́ yiḅịa. 8Fọrụ mị anị fie anịa ḅụḅẹlẹ anga nwọ damẹ, anị ḅe fie mị ị́ naamẹ, ọkụma anị wẹrịḅo nyọ na anị mun-arị nyọ na ị́ nemikẹ. Anị gbọrị ḅara mị anị sime Tẹmẹ ḅụ yiḅọ goyegoye pịrị ọkụ-ẹ.”

9“Nde mịn mị ineda mịẹḅịa ọkụ?” Nikodimọs ḅe nwọ gbelamẹ.

10Jizọs Ḅe pẹkẹrẹmẹ, “Ị́rị́ Izrẹl ḅie opu yeḍieḅọ-ẹ, se mịn mị ị́ nemika? 11À kọkọmaye ḍuko ị́ pịrịaḅẹ: wa nemiye wa nwọ ḍukomẹ, pịkị ọrịsaye nwọ ḍukomẹ, anị sọnị ọ́mịna ḅụ gbọrịḅọ sọnị oku mị nwọ ọkịkẹ. 12Ị́ ị̀ ḅerenikẹ à mị sẹkiri mị ḅe aye nwọ ḍuko ị́ pịrị sịkị; nde ị́ wẹrị ị̀ ḅereniḅịa ọkụ, à nemikase soḅie aye nwọ ḍuko ị́ pịrị ọkụma? 13Iwo soḅie munsa gbọrịḅọ sọ ma ofori-ẹ, soḅie koroḅo Tomoniḅọ Tọkụ Ḅe sikima ọkụma.”

14Eleogbo Moziz ḅe chịn ọgọnọ alapẹlẹka se mịẹ oruwu ḅe dekichịẹma ḅara mị, anị gbọrị ḅara anị ini seni Tomoniḅọ Tọkụ Ḅe dekichịẹmaḅịa ọkụ-ẹ, 15mịẹse ò ḅereniḅọ goyegoye sime gbaso ḍumo nwọ nyanaḅịa ḅara. 16Anịatịḅị Tamụnọ Ḅe tomonikiri mị ḅẹlẹma so ọkụma, ori oria gbọrị Tọkụ Ḅe se fịrịmamẹ, mịẹse ò ḅereniḅọ goyegoye fị ẹka ḅara, ọkụma sime gbaso ḍumo nwọ nyanaḅịa ọkụ. 17Anịatịḅị Tamụnọ Ḅe oria Tọkụ Ḅe se tomonikiri mị fịrịmamẹ na Ò ḅo ḅẹrẹpẹlẹḅọ sọ-ẹ, ọkụma Ò ḅo anị ḍụaḅọrọmaḅọ nwọ sọ-ẹ.

18Tọkụ Ḅe ḅereniḅọ goyegoye ini ḅẹrẹpẹlẹ iniḅọ pịrị ẹkẹ, ọkụma Ò ḅerenikaḅọ goyegoye ini ḅẹrẹpẹlẹ iniḅọ pịrị ḅọrọsam, anịatịḅị ọ̀ Tamụnọ ngẹrị Tọkụ Ḅe nwọ ḅerenikẹ. 19Mị ḅẹrẹpẹlẹ fịrị mị nwẹngị ọkụ-ẹ: enekuḅu mị tomonikiri mị ḅie ḅomẹ, ọkụma tomoni kanakana mị re nwọ ḅẹlẹmatẹịn enekuḅu mị nẹngịmẹ, anịatịḅị inia mịẹmịẹaye ma siaye-ẹ. 20Siaye mịẹḅọ goyegoye taraka se enekuḅu mị wẹrịmamẹ, se enekuḅu mị nwọ damaḅo ẹkẹ, anịatịḅị ò ḅi ẹkẹ oria si mịẹmịẹaye ma ḅelepaka. 21Ọkụma kọkọmaye mị nwọ mịẹarịḅọ goyegoye enekuḅu mị ḅie sọ ḅomẹ, mịẹse enekuḅu mị ḍiepakụmaḅịa ḅara na Tamụnọ Ḅe ḅịpị poki ḅụ anị ori oria fịrị nwọ nwẹngịye-ẹ.

Jizọs Ḅe Na Jọn Ḅe Na

22Mịn mị ḅọrọ sịkị Jizọs Ḅe na Oria ọḅụḍukoapụma na so Judia pẹkẹrẹ mun mẹ, ori anịanga kele ini na simemẹ se mengi se ini saramẹ. 23Jọn ḅe sọnị Aịnọn mị ḅie mengisara simemẹ, Salim na kpeki nyọ ḅụ, anịatịḅị mengi opuma anịnyọ ḅakamẹ. Tomoni ọ̀ damamun se ò mengi se ini saramẹ. 24(Anị ma ini Jọn ḅe se ikoli ḅie chuka sịkị-ẹ.)

25Jọn ọḅụḍukoapụma ḅie dapụ gbọrị Juḅọ na piki-a simemẹ, Tamụnọ nemi ḅụ mengi se ḅụ mịẹfịafịama na gbolomaye ḅụ. 26Anị ini Jọn ḅe damamun se nwọse ọ̀ ḅẹye-ẹ na, “Yeḍieḅọ, ị́ se ḅiekoromaka ịrụapakapaka pẹkẹrẹ Jọdan ḅụ ị́rị́ na simeḅọ ḅe ị́ ọ̀ ḅụ iḅi ḅẹrẹ nwọ ḍuko simeḅọ ḅe? Mịọkụ ori sọnị ò mengi se nweni saraḅẹ, nwenimgba ọ̀ damamun-aḅẹ!”

27Jọn ḅe pẹkẹrẹmẹ, “Tomoniḅọ nyanaḅịaye ofori-ẹ, anị Tamụnọ Ḅe ḅara ḅoka simeogbo. 28Ómine na mịnaḅụ na ị̀ya onyechịẹapụ-ẹ na à nwọ ḅẹmẹ na, ‘Ị̀rị̀ Mẹsaya ḅekẹ, ọkụma ini ị̀ seni ọ̀ tọrọkọ pẹlẹma fịrịmamẹ.’ 29Eremeniḅọ ma nyanaḅọ ḅe anị ereyaḅọ ḅe-ẹ; ereyaḅọ ikiaḅọ ḅe ò kpekima chịẹmẹ, se ḅeri se pokimẹ, ò ḅie pịkị ḅẹlẹmẹ ori ereyaḅọ ḅe pụkọ nwọ na sịkị. Mịn ḅara mị, mị ị̀ya ḅieḅẹlẹ mị wẹrị kara ọkụ mị-ẹ. 30Ori ḅo yesọtẹịnḅịa, anịsịkị ị̀rị̀ à ḅarị opuma yesọ ẹkẹ.”

Soḅie Ḅo Ḅọḅe

31Ọgọnọju ḅụ ḅo Ḅọḅe Ori opusọtẹịn nweni mamgba nẹngịmẹ. Sẹkiri ḅụ ḅo Ḅọḅe ò sime sẹkiri mị pịrịmẹ, pịkị sẹkiri ḅe-a ḅẹrẹ nwọ ḍukoḅịa, ọkụma soḅie ḅo ḅọ ḅe ò nwenimgba nẹngịmẹ. 32Ori ọrịsaye na ọ̀ naasaye na mị ò ḍukoye, ọkụma oria oku ọkịḅo ofori-ẹ. 33Ọkụma oria oku ọkịḅọ goyegoye anị mị ḅụ ḅọrọ ḍiepakụmamẹ na Tamụnọ Ḅe kọkọmaye ḍukomẹ. 34Tamụnọ Ḅe seni fịrịmaḅọ ḅe Tamụnọ Ḅe ọkwẹịnma nwọ ḍukomẹ, anịatịḅị Tamụnọ Ḅe ọ̀ Tẹmẹ Ḅe se ọ̀ pịrị ḅeinmamẹ. 35Ḍaḅọ Ḅe oria Tọkụ Ḅe ḅẹlẹmamẹ, se yelayelaye nwọse Oria kụrọ ḅụ wẹrịsam. 36Tọkụ Ḅe ḅereniḅọ goyegoye simegbaso ḍumo nyanamẹ; Tọkụ Ḅe ḍukoye mịẹkaḅọ goyegoye ngịsị ḍumo nyana ẹkẹ, ọkụma Tamụnọ ịganị iniḅọ ọgọnọ gbana gbasoḅịa.

Currently Selected:

Jọn 3: OBTP

Highlight

Copy