Luk 8
8
Jizọs Ḅe Ḍukonwẹngị Eremeni Ma
1Sịkị ḅo gbọrịḅiri lasịkị Jizọs Ḅe so amama na ịwọamama na nwọ munma ḅọrọmẹ, Tamụnọ Amanyanakiri mị ḅe Iḅi Ḅẹrẹ mị nwọ ḍuko simemẹ. Oyimaịn ọḅụḍukoapụ fịnjịma Ori na mun mẹ, 2da eremeni pịkị ọkọ mịẹmẹ sitẹmẹ nyana se Ọ̀ gwọ apụ na, pịkị jịn obi ḅụ Ọ̀ gwọ apụ na, (Meri ma ini Magdalin se chịnḅọ ma), á ḅie Ọ̀ sọnọma si-a-tẹmẹ nwọ desin ḅọ ma na; 3Joana, Kuza, Hẹrọd ḅẹrẹkọn warị ḅie sime fịrịnwẹngịḅọ ḅe ta ma na, Susana ma na, pịkị tọn-a eremeni na, ini nyana aye nwọse ḅarachụa Jizọs Ḅe na Oria ọḅụḍukoapụma na pịrị apụma.
Yeḍipiḅọ Ḅe Kaḅo Mị
(Mat 13.1-9; Mak 4.1-9)
4Tomoni pa gbọrị ama ḅụ ḅọrọmun jịn ama la ḅụ wẹrị Jizọs Ḅe damaḅoaḅẹ se ḅaka tomonikpo ḅo koḅirima sịkị, Jizọs Ḅe mị kaḅo mị nwọ kọn ini pịrịmẹ:
5“Gbọrịḅọ paka oria ịpịamgba ḍipi-e mun mẹ, ori ozu mị ḅie ḍipiyemgbọlụma nwọ wasamarị sịkị, arịa ḅụ daye ateli aka ḅụ koromẹ, ini ḅụọ se àrị nangamẹ, se feni pịkị àrị gbọ fịmẹ. 6Arịa ḅụ daye ḍụparị kiri koromẹ, se ḍipiayema ḅịpị toluma sịkị àrị samịnamẹ, anịatịḅị kiri mị lọkọlọkọkẹ. 7Ḍipiyemgbọlụma ḅụ daye ịga ogboku koromẹ, àrị ḍipiaye ma na so pakamẹ, se ịgama àrị temi ḅaamẹ. 8Se da ḍipiyemgbọlụ iḅi kiri ḅụ koromẹ, se àrị sẹnịmẹ se pịkị mgbọlụ chụamẹ, mgbọlụ-a sọnọasi, gbọrị chịn gbọrị chịn ḅụ chụamẹ.”
Jizọs Ḅe anịa kuluma nwọ ḅẹmẹ, “Anịọkụma ó poki, ó ḅeri nyanamẹ ḅẹḅẹ!”
Ma Kaḅo Ma Gose Kọn Ye
(Mat 13.10-17; Mak 4.10-12)
9Oria ọḅụḍukoapụma Ò gbelamẹ na nde mị kaḅo mị fiearịye, 10Jizọs Ḅe pẹkẹrẹmẹ, “Se Tamụnọ Amanyanakiri mị ḅe ḅọịayema nemiḅịa nemi mị ini se ọ́ pịrịsam, ọkụma kiri kọn apụ mamgba anị kaḅo ḅụ-ẹ mịẹse ini ḍiki se ọrị ẹka ḅara, pịkị poki se kaịnḅo ẹka ḅara.
Jizọs Ḅe Yeḍipiḅọ Kaḅo Mị Fieye Nwọ Pufinjimẹ
(Mat 13.18-23; Mak 4.13-20)
11“Mịn anị kaḅo mị fiearịye-ẹ: ḍipiyemgbọlụ mị anị Tamụnọ ọkwẹịn mị-ẹ. 12Ateli aka ḅụ koro ayema, anị ọkwẹịn mị naa, se Oru ḅe ḅo inia kuḅiemgbọlụ ḅie ọkwẹịn ma sin ọkị apụma-ẹ mịẹse ini ḅerenika ḅụ ḍụaḅọrọma nyana ẹka ḅara. 13Ḍụparị kiri ọgọnọ koro ḍipiyemgbọlụma anị ọkwẹịn mị naa, se ḅieḅẹlẹ seni oku mị ọkị apụma-ẹ. Ọkụma anị iḅiọkụ se gbisiri inia ḅie sọ mun kuno chụakẹ; kala sịkị kẹngẹ ini nwọse anị ḅerenimẹ, se ḅịkị sikimamẹ ḍaḍiki sịkị mị ḅụ. 14Ịgama ogboku koro ḍipiyemgbọlụma anị ọkwẹịn mị naa se mị ḍumo mị ḅe ḅụḅalaḅala na, ngọma na, sẹkiri ḅe tọrụḅẹlẹma na gboloma ini temi sịkị, inia chịnmgbọlụma ḅarị kpọ se ḅịakẹ. 15Iḅi kiri ḅụ koro ḍipiyemgbọlụma, anị oku mị naa ọkị se anị ḍukoye mịẹapụma-ẹ, ini pịkị inema mun ini chịnmgbọlụ chụa sịkị lamẹ.
Bọlị Chuku Sime Tọnjie Mị
(Mak 4.21-25)
16“Tọnjie chụa se anị seni bọlị chuku ḅie gbin koroma anịkanịka mọnọye chuku koromaḅịa ḅọ ofori-ẹ. Anịnakaraka, ori anị seni tọnjie gbanaye ọgọnọ gbanaḅịa, mịẹse nweni anịa ḅịa ọrịḅịa ḅara ini sọ ḅoarị sịkị.
17“Ḅọị ḅụ simearịye layelaye ini anị pakụmaḅo ḅelemaḅịa, ini gbẹịn koroma yelayelaye ini pịkị anị ḍọkịpakụmaḅo se enekuḅu ḅụ koromaḅịa.
18“Anịẹrẹchị, ye poki ḅụ ómine ọ́ ḅụ ọbị; anịatịḅị ye nyanasa ḅọ goyegoye ini ḅarịma iniḅọ pịrịḅịa, ọkụma nyanaye oforiḅọ goyegoye iniḅọ nyanamẹ nwọ ḅẹ kalaye mị sọnị ini pịkị iniḅọ ḅara anị ọkịḅịa.”
Jizọs Nyengi Ma Na Oria Owuapụ Mịnapụ Ma Na
(Mat 12.46-50; Mak 3.31-35)
19Jizọs Ḅe nyengima na Oria owuapụ mịnapụma na Ọ̀ damaḅomẹ, ọkụma tomonikpo mị gose ini ineda sọmun Ọ̀ lakẹ.
20Gbọrịḅọ nwọse Jizọs Ḅe ḅẹmẹ, “Ị́ nyengi ma na ị́ya owuapụ mịnapụma na nụngọ anga chịẹsime se ị́ ọrị ḅiaḅẹ.”
21Jizọs Ḅe nwọse inimgba ḅẹmẹ, “Ị̀ nyengi ma na ị̀ya owuapụ mịnapụma na anị Tamụnọ ọkwẹịn mị naa se anị ḍukoye mịẹapụma-ẹ.”
Jizọs Ḅe Irisi Deinmamẹ
(Mat 8.23-27; Mak 4.35-41)
22Gbọrị ene Jizọs Ḅe Oria ọḅụḍukoapụma na gbọrị arụ nwọ ḅụkụlọmẹ se nwọse ini ḅẹmẹ, “Ó ye wa ḍapa mị saḅa ísí pẹkẹrẹ mị mun.” Anị ini sakị pakaye-ẹ. 23Ini ịvala chụa mun-arị sịkị, Jizọs Ḅe ḅọlọlọ mọnọmẹ. Kụrọ fọrụ fie ḍapa mị ḅie koromẹ, se mengi sakị arụ mị ḅie sọ ḅein aḅẹ, anị gose inimgba opu fa ḅie omi-ẹ. 24Ọḅụḍukoapụma Jizọs Ḅe damaḅo se Ò wo sịsẹmamẹ, se nwọ ḅẹmẹ, “Yeḍieḅọ, Yeḍieḅọ! Wa fa aḅẹ!”
Jizọs Ḅe sịsẹ ḅẹrẹtọn fọrụ mị na amburama na irisi na pịrịmẹ se àrị yawụma simemẹ seni nyọ mị opuma deinmẹ. 25Anịsịkị Ọ̀ nwọse ọḅụḍukoapụma ḅẹmẹ, “Nde ọ́mịna ḅereni mị?”
Ọkụma anị ijira se inia ḅụ saramẹ, inia ḅala pịkị famẹ, se nwọse jịnḅọ jịnḅọ ḅẹmẹ, “Ḅe ḅọrọ tụḅọ? Ọ̀ ḅẹrẹtọn fọrụ na amburama na pịrịmẹ, àrị pịkị Ọ̀ ḅịpị pokimẹ!”
Jizọs Ḅe Sitẹmẹ Ḅie Sime Owuḅọ Gwọmẹ
(Mat 8.28-34; Mak 5.1-20)
26Jizọs Ḅe na Oria ọḅụḍukoapụma na saḅa Gẹrasa pẹkẹrẹ irima nwọ mun mẹ, Galili ḅụ wẹrị ḅo ḍapa mị ḅe saḅamanga. 27Jizọs Ḅe kiri ọgọnọ koro chịẹ anịanga, sitẹmẹ ḅie ḅụ sime gbọrị owuḅọ ama mị ḅie pakaḅo Ori na ịrịamamẹ. Ọ̀ papaḅụ sin nwẹngị ḅọlọ sịkị lasam, ọ̀ pịkị warị ḅie sime ḍụkụkẹ, ḍụẹịn ḍipi piri ḅie mị ọ̀ sịkịmamgba simearịye-ẹ. 28Ò Jizọs Ḅe ọrị sịkị, ò gelema olokumẹ, ọ̀ tọrọkọ ḅịkị koro, se gele pụkọ ḅụ owu se nwọ ḅẹmẹ, “Jizọs, Geletẹịn Tamụnọ Ḅe Tọkụ! Ị́ ị̀rị̀ na che mịẹ ḅi? Àrị ị́ tẹkẹmẹ ḅụfụka se ị̀ pịrịma!” 29Ọ̀ mịn mị nwọ ḅẹmẹ, anịatịḅị Jizọs Ḅe tọn sitẹmẹ ḅe pịrịsam na ori ò ḅie pakaso. Tọn-a sịkị anị nwọse kụrọma ori ọlọsam, ini ikoliḅọ ḅara nwọse ọ̀ wẹrịmẹ nwọ ḅẹ sọnị, ikoli se ọ̀ ḅarama na ọ̀ ḅụọma na ịkasị ḅụ, ori ikolima nwọ anyịmamẹ, se sitẹmẹ ḅe ori ọkịmun onwun ele ḅie koromamẹ.
30Jizọs Ḅe ò gbelamẹ, “Nde ị́ya ẹrẹ?”
“Ị̀ya ẹrẹ anị ‘Mbogirigiri,’” ọ̀ nwọ pẹkẹrẹmẹ, anịatịḅị tọn-a si-a-tẹmẹ ò ḅie sọmẹ. 31Si-a-tẹmẹma Jizọs Ḅe tẹkẹmẹ na Ori ini de chuku nyanaka olulu mị fịrịmama.
32Ḅaka oporopo ogbo anịnyọ na kpeki waraḅẹ, chịngị mị anga sịkị ḅụ àrị yefịaḅẹ. Si-a-tẹmẹma Jizọs Ḅe tẹkẹmẹ na Ò ḅereni àrị pịrị, àrị mun oporopoma ḅie sọ, se Ò ḅereni àrị pịrịmẹ. 33Anị si-a-tẹmẹma tomoniḅọ ḅe ḅie pakaḅo se mun oporopoma ḅie sọye-ẹ. Bebe oporopo ogbo mị mangị chịngị mị agbagba ḅụ ideri koro mun ḍapa mị ḅie simbi fịmẹ.
34Oporopoma ḍikiḍiki sime apụma pakaye mị nwọ ọrịmẹ, se mangị ama mị ḅie na pịkị ozuma ḅie na mun se ḅẹrẹ mị nwọ ḍuko wasamamẹ. 35Tomonima pakamun pakaye mị ọrị-ẹ mun mẹ. Ini Jizọs Ḅe damaḅo se si-a-tẹmẹma ḅie ḅụ wẹrị pakaḅo ḅọ ḅe ọrịmẹ. Jizọs Ḅe ḅụọ chuku kpọnjị sime, pịkị ḅụchụaye chụa waraḅẹ, tọrụ dein ḅara ḅụ ori omi-ẹ, se inimgba ḅalafamẹ. 36Anị ọrị apụma Ọ̀ mịẹse nweniḅọ ḅe gwọ ọkụ mị nwọ ḍuko tomonima pịrịmẹ. 37Anịsịkị Gẹrasa pẹkẹrẹ mị ḅụ ḅo apụ mamgba Jizọs Ḅe ḅẹmẹ, na Ò so, anịatịḅị inia ḅala opuma famẹ. Anị Jizọs Ḅe arụ mị ḅụkụlọ se soye-ẹ. 38Si-a-tẹmẹma ḅie ḅụ pakaso ḅọ ḅe Jizọs Ḅe tẹkẹmẹ, “Ye àrị ị́rị́ na so.”
Ọkụma Jizọs Ḅe nwọse ọ̀ fịrịmamẹ, 39“Vinpịkị so warị mun se Tamụnọ Ḅe mịẹ ị́ pịrịsaye mị ḍuko.”
Nweniḅọ ḅe nwẹngị bebe ama mị kelema, se Jizọs Ḅe mịẹ ọ̀ pịrịsaye mị nwọ ḍukoma ḅọrọmẹ.
Jaịrọs Ḅa Ma Na Ḅara Se Jizọs Ḅe ḅụchụaye Lama Eremeniḅọ Ma Na
(Mat 9.18-26; Mak 5.21-43)
40Jizọs Ḅe vinpịkị ḍapa mị ḅụ ísí pẹkẹrẹ mị mun sịkị, tomonikpo mị iḅi ḅara nwọse Ori ọkịmẹ, anịatịḅị inimgba Ò koru simemẹ. 41Anịsịkị Jaịrọs nwọ chịn gbọrị owuḅọ ḅo lamẹ, anịnyọ sime tẹkẹwarị mị ḅie fịrịnwẹngịḅọ-ẹ. Se ò Jizọs Ḅe ḅụọ chuku ḅịkịkoro, se Ọ̀ tẹkẹmẹ na Ori ori na oria warị mun, 42anịatịḅị oria ngẹrị eremenitọkụ, oyimaịn kụra fịnjị lasa ḅọ ma fịaḅẹ.
Se Jizọs Ḅe mun-arị sịkị, tomonima Ò gboriaḅẹ angana angana ḅụ. 43Inia ogboku gbọrị eremeniḅọ omi-ẹ, pulo oyimaịn kụra fịnjị nwọse si ḅara se ḅụ ideriarị ḅọ, á nyanaye mamgba á nwọ fama ḅịrịapụ pịrịsam, ọkụma ineda á gwọ sa ḅọ ofori-ẹ. 44Á tomonikpo mị ḅie sọ Jizọs Ḅe damaḅomẹ, Oria ọḅụju ḅụ, se ḅara se Oria ḅụchụaye aka lamamẹ, se anị kirikiri á ḅụ ideri sime pulo mị dachịẹmẹ. 45Jizọs Ḅe gbelamẹ, “Tụḅọ ḅara se ị̀ lama?”
Ḅẹḅọ ḅẹḅọ anị pikimẹ, se Pita ḅe nwọ ḅẹmẹ, “Yeḍieḅọ, tomoni mamgba ị́ gbori kelema pịkị ị́ pụnụma waraḅẹ.”
46Ọkụma Jizọs Ḅe nwọ ḅẹmẹ, “Nweni ḅara se ị̀ lamamẹ, anịatịḅị ị̀ ḅụ nemimẹ, kụrọ ị̀ ḅụ pakaso sịkị.” 47Eremeniḅọ ma ọrịmẹ, na á pakasam, anị á nwẹngịḅoye-ẹ, ḅụgeregere na Jizọs Ḅe ḅụọ chuku ḅịkịkoromẹ, ḅẹḅọ ḅẹḅọ tọrụkuḅu ḅụ, á gose ḅara se Ọ̀ lamaye mị nwọ ḍuko pakụmamẹ, á ḅụ pịkị anị kirikiri iḅiọkụ mị na. 48Jizọs Ḅe nwọse á ḅẹmẹ, “Ị̀ ndụḅa ị́ya ḅereni ị́ mịẹse ị́ ḅụ iḅisam. Deinma ḅụ so.”
49Jizọs Ḅe mịn mị nwọ ḍukoarị sịkị, okunwẹngịḅọ fịrịnwẹngịḅọ ḅe warị ḅie wẹrị ḅomẹ. “Ị́ ndụḅa ma á fịsam,” ọ̀ nwọ ḍuko Jaịrọs ḅe pịrịmẹ; “ḅarị Yeḍieḅọ ḅe ḅụfụkamama.”
50Ọkụma Jizọs Ḅe anị naa sịkị Ọ̀ nwọse Jaịrọs ḅe ḅẹmẹ, “Ḅalafama, ḅereni kẹngẹ nwọ nyana, á ḅụ pịkị iḅiḅịa.”
51Ò ḅo warị mị lasịkị, Ò ḅerenikẹ gbọrịḅọ sọnị Ò ḍuko sọmun, Pita ḅe na, Jọn ḅe na, Jems ḅe na, pịkị tọkụ ma ḍaḅe na nyọngọrọma na sikima ọkụma. 52Anịnyọ simeḅọ goyegoye owu pịkị tịḅị se gbin owuaḅẹ tọkụ ma gose. Jizọs Ḅe nwọ ḅẹmẹ, “Ómine owu ma; tọkụ ma á fịkẹ, á papa mọnọaḅẹ!”
53Inimgba Ò se kpọtimẹ, anịatịḅị ini nemimẹ na á fịsam. 54Ọkụma Jizọs Ḅe gịsapụma á ḅara ọlọ, se á chịn olokumẹ, “Sịsẹ ị̀ya tọkụ!” 55Á tẹmẹ vinpịkị ḅo á ḅie sọmẹ, se anị kirikiri á sịsẹmẹ, se Jizọs Ḅe nwọse ini ḅẹmẹ na ini ye se á pịrị á fị. 56Anị á yiapụma ḅụgbiripumamẹ, ọkụma Jizọs Ḅe nwọse ini ḅẹmẹ, na pakaye mị ini ḍuko gbọrịḅọ sọnị pịrịma.
Currently Selected:
Luk 8: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
Luk 8
8
Jizọs Ḅe Ḍukonwẹngị Eremeni Ma
1Sịkị ḅo gbọrịḅiri lasịkị Jizọs Ḅe so amama na ịwọamama na nwọ munma ḅọrọmẹ, Tamụnọ Amanyanakiri mị ḅe Iḅi Ḅẹrẹ mị nwọ ḍuko simemẹ. Oyimaịn ọḅụḍukoapụ fịnjịma Ori na mun mẹ, 2da eremeni pịkị ọkọ mịẹmẹ sitẹmẹ nyana se Ọ̀ gwọ apụ na, pịkị jịn obi ḅụ Ọ̀ gwọ apụ na, (Meri ma ini Magdalin se chịnḅọ ma), á ḅie Ọ̀ sọnọma si-a-tẹmẹ nwọ desin ḅọ ma na; 3Joana, Kuza, Hẹrọd ḅẹrẹkọn warị ḅie sime fịrịnwẹngịḅọ ḅe ta ma na, Susana ma na, pịkị tọn-a eremeni na, ini nyana aye nwọse ḅarachụa Jizọs Ḅe na Oria ọḅụḍukoapụma na pịrị apụma.
Yeḍipiḅọ Ḅe Kaḅo Mị
(Mat 13.1-9; Mak 4.1-9)
4Tomoni pa gbọrị ama ḅụ ḅọrọmun jịn ama la ḅụ wẹrị Jizọs Ḅe damaḅoaḅẹ se ḅaka tomonikpo ḅo koḅirima sịkị, Jizọs Ḅe mị kaḅo mị nwọ kọn ini pịrịmẹ:
5“Gbọrịḅọ paka oria ịpịamgba ḍipi-e mun mẹ, ori ozu mị ḅie ḍipiyemgbọlụma nwọ wasamarị sịkị, arịa ḅụ daye ateli aka ḅụ koromẹ, ini ḅụọ se àrị nangamẹ, se feni pịkị àrị gbọ fịmẹ. 6Arịa ḅụ daye ḍụparị kiri koromẹ, se ḍipiayema ḅịpị toluma sịkị àrị samịnamẹ, anịatịḅị kiri mị lọkọlọkọkẹ. 7Ḍipiyemgbọlụma ḅụ daye ịga ogboku koromẹ, àrị ḍipiaye ma na so pakamẹ, se ịgama àrị temi ḅaamẹ. 8Se da ḍipiyemgbọlụ iḅi kiri ḅụ koromẹ, se àrị sẹnịmẹ se pịkị mgbọlụ chụamẹ, mgbọlụ-a sọnọasi, gbọrị chịn gbọrị chịn ḅụ chụamẹ.”
Jizọs Ḅe anịa kuluma nwọ ḅẹmẹ, “Anịọkụma ó poki, ó ḅeri nyanamẹ ḅẹḅẹ!”
Ma Kaḅo Ma Gose Kọn Ye
(Mat 13.10-17; Mak 4.10-12)
9Oria ọḅụḍukoapụma Ò gbelamẹ na nde mị kaḅo mị fiearịye, 10Jizọs Ḅe pẹkẹrẹmẹ, “Se Tamụnọ Amanyanakiri mị ḅe ḅọịayema nemiḅịa nemi mị ini se ọ́ pịrịsam, ọkụma kiri kọn apụ mamgba anị kaḅo ḅụ-ẹ mịẹse ini ḍiki se ọrị ẹka ḅara, pịkị poki se kaịnḅo ẹka ḅara.
Jizọs Ḅe Yeḍipiḅọ Kaḅo Mị Fieye Nwọ Pufinjimẹ
(Mat 13.18-23; Mak 4.13-20)
11“Mịn anị kaḅo mị fiearịye-ẹ: ḍipiyemgbọlụ mị anị Tamụnọ ọkwẹịn mị-ẹ. 12Ateli aka ḅụ koro ayema, anị ọkwẹịn mị naa, se Oru ḅe ḅo inia kuḅiemgbọlụ ḅie ọkwẹịn ma sin ọkị apụma-ẹ mịẹse ini ḅerenika ḅụ ḍụaḅọrọma nyana ẹka ḅara. 13Ḍụparị kiri ọgọnọ koro ḍipiyemgbọlụma anị ọkwẹịn mị naa, se ḅieḅẹlẹ seni oku mị ọkị apụma-ẹ. Ọkụma anị iḅiọkụ se gbisiri inia ḅie sọ mun kuno chụakẹ; kala sịkị kẹngẹ ini nwọse anị ḅerenimẹ, se ḅịkị sikimamẹ ḍaḍiki sịkị mị ḅụ. 14Ịgama ogboku koro ḍipiyemgbọlụma anị ọkwẹịn mị naa se mị ḍumo mị ḅe ḅụḅalaḅala na, ngọma na, sẹkiri ḅe tọrụḅẹlẹma na gboloma ini temi sịkị, inia chịnmgbọlụma ḅarị kpọ se ḅịakẹ. 15Iḅi kiri ḅụ koro ḍipiyemgbọlụma, anị oku mị naa ọkị se anị ḍukoye mịẹapụma-ẹ, ini pịkị inema mun ini chịnmgbọlụ chụa sịkị lamẹ.
Bọlị Chuku Sime Tọnjie Mị
(Mak 4.21-25)
16“Tọnjie chụa se anị seni bọlị chuku ḅie gbin koroma anịkanịka mọnọye chuku koromaḅịa ḅọ ofori-ẹ. Anịnakaraka, ori anị seni tọnjie gbanaye ọgọnọ gbanaḅịa, mịẹse nweni anịa ḅịa ọrịḅịa ḅara ini sọ ḅoarị sịkị.
17“Ḅọị ḅụ simearịye layelaye ini anị pakụmaḅo ḅelemaḅịa, ini gbẹịn koroma yelayelaye ini pịkị anị ḍọkịpakụmaḅo se enekuḅu ḅụ koromaḅịa.
18“Anịẹrẹchị, ye poki ḅụ ómine ọ́ ḅụ ọbị; anịatịḅị ye nyanasa ḅọ goyegoye ini ḅarịma iniḅọ pịrịḅịa, ọkụma nyanaye oforiḅọ goyegoye iniḅọ nyanamẹ nwọ ḅẹ kalaye mị sọnị ini pịkị iniḅọ ḅara anị ọkịḅịa.”
Jizọs Nyengi Ma Na Oria Owuapụ Mịnapụ Ma Na
(Mat 12.46-50; Mak 3.31-35)
19Jizọs Ḅe nyengima na Oria owuapụ mịnapụma na Ọ̀ damaḅomẹ, ọkụma tomonikpo mị gose ini ineda sọmun Ọ̀ lakẹ.
20Gbọrịḅọ nwọse Jizọs Ḅe ḅẹmẹ, “Ị́ nyengi ma na ị́ya owuapụ mịnapụma na nụngọ anga chịẹsime se ị́ ọrị ḅiaḅẹ.”
21Jizọs Ḅe nwọse inimgba ḅẹmẹ, “Ị̀ nyengi ma na ị̀ya owuapụ mịnapụma na anị Tamụnọ ọkwẹịn mị naa se anị ḍukoye mịẹapụma-ẹ.”
Jizọs Ḅe Irisi Deinmamẹ
(Mat 8.23-27; Mak 4.35-41)
22Gbọrị ene Jizọs Ḅe Oria ọḅụḍukoapụma na gbọrị arụ nwọ ḅụkụlọmẹ se nwọse ini ḅẹmẹ, “Ó ye wa ḍapa mị saḅa ísí pẹkẹrẹ mị mun.” Anị ini sakị pakaye-ẹ. 23Ini ịvala chụa mun-arị sịkị, Jizọs Ḅe ḅọlọlọ mọnọmẹ. Kụrọ fọrụ fie ḍapa mị ḅie koromẹ, se mengi sakị arụ mị ḅie sọ ḅein aḅẹ, anị gose inimgba opu fa ḅie omi-ẹ. 24Ọḅụḍukoapụma Jizọs Ḅe damaḅo se Ò wo sịsẹmamẹ, se nwọ ḅẹmẹ, “Yeḍieḅọ, Yeḍieḅọ! Wa fa aḅẹ!”
Jizọs Ḅe sịsẹ ḅẹrẹtọn fọrụ mị na amburama na irisi na pịrịmẹ se àrị yawụma simemẹ seni nyọ mị opuma deinmẹ. 25Anịsịkị Ọ̀ nwọse ọḅụḍukoapụma ḅẹmẹ, “Nde ọ́mịna ḅereni mị?”
Ọkụma anị ijira se inia ḅụ saramẹ, inia ḅala pịkị famẹ, se nwọse jịnḅọ jịnḅọ ḅẹmẹ, “Ḅe ḅọrọ tụḅọ? Ọ̀ ḅẹrẹtọn fọrụ na amburama na pịrịmẹ, àrị pịkị Ọ̀ ḅịpị pokimẹ!”
Jizọs Ḅe Sitẹmẹ Ḅie Sime Owuḅọ Gwọmẹ
(Mat 8.28-34; Mak 5.1-20)
26Jizọs Ḅe na Oria ọḅụḍukoapụma na saḅa Gẹrasa pẹkẹrẹ irima nwọ mun mẹ, Galili ḅụ wẹrị ḅo ḍapa mị ḅe saḅamanga. 27Jizọs Ḅe kiri ọgọnọ koro chịẹ anịanga, sitẹmẹ ḅie ḅụ sime gbọrị owuḅọ ama mị ḅie pakaḅo Ori na ịrịamamẹ. Ọ̀ papaḅụ sin nwẹngị ḅọlọ sịkị lasam, ọ̀ pịkị warị ḅie sime ḍụkụkẹ, ḍụẹịn ḍipi piri ḅie mị ọ̀ sịkịmamgba simearịye-ẹ. 28Ò Jizọs Ḅe ọrị sịkị, ò gelema olokumẹ, ọ̀ tọrọkọ ḅịkị koro, se gele pụkọ ḅụ owu se nwọ ḅẹmẹ, “Jizọs, Geletẹịn Tamụnọ Ḅe Tọkụ! Ị́ ị̀rị̀ na che mịẹ ḅi? Àrị ị́ tẹkẹmẹ ḅụfụka se ị̀ pịrịma!” 29Ọ̀ mịn mị nwọ ḅẹmẹ, anịatịḅị Jizọs Ḅe tọn sitẹmẹ ḅe pịrịsam na ori ò ḅie pakaso. Tọn-a sịkị anị nwọse kụrọma ori ọlọsam, ini ikoliḅọ ḅara nwọse ọ̀ wẹrịmẹ nwọ ḅẹ sọnị, ikoli se ọ̀ ḅarama na ọ̀ ḅụọma na ịkasị ḅụ, ori ikolima nwọ anyịmamẹ, se sitẹmẹ ḅe ori ọkịmun onwun ele ḅie koromamẹ.
30Jizọs Ḅe ò gbelamẹ, “Nde ị́ya ẹrẹ?”
“Ị̀ya ẹrẹ anị ‘Mbogirigiri,’” ọ̀ nwọ pẹkẹrẹmẹ, anịatịḅị tọn-a si-a-tẹmẹ ò ḅie sọmẹ. 31Si-a-tẹmẹma Jizọs Ḅe tẹkẹmẹ na Ori ini de chuku nyanaka olulu mị fịrịmama.
32Ḅaka oporopo ogbo anịnyọ na kpeki waraḅẹ, chịngị mị anga sịkị ḅụ àrị yefịaḅẹ. Si-a-tẹmẹma Jizọs Ḅe tẹkẹmẹ na Ò ḅereni àrị pịrị, àrị mun oporopoma ḅie sọ, se Ò ḅereni àrị pịrịmẹ. 33Anị si-a-tẹmẹma tomoniḅọ ḅe ḅie pakaḅo se mun oporopoma ḅie sọye-ẹ. Bebe oporopo ogbo mị mangị chịngị mị agbagba ḅụ ideri koro mun ḍapa mị ḅie simbi fịmẹ.
34Oporopoma ḍikiḍiki sime apụma pakaye mị nwọ ọrịmẹ, se mangị ama mị ḅie na pịkị ozuma ḅie na mun se ḅẹrẹ mị nwọ ḍuko wasamamẹ. 35Tomonima pakamun pakaye mị ọrị-ẹ mun mẹ. Ini Jizọs Ḅe damaḅo se si-a-tẹmẹma ḅie ḅụ wẹrị pakaḅo ḅọ ḅe ọrịmẹ. Jizọs Ḅe ḅụọ chuku kpọnjị sime, pịkị ḅụchụaye chụa waraḅẹ, tọrụ dein ḅara ḅụ ori omi-ẹ, se inimgba ḅalafamẹ. 36Anị ọrị apụma Ọ̀ mịẹse nweniḅọ ḅe gwọ ọkụ mị nwọ ḍuko tomonima pịrịmẹ. 37Anịsịkị Gẹrasa pẹkẹrẹ mị ḅụ ḅo apụ mamgba Jizọs Ḅe ḅẹmẹ, na Ò so, anịatịḅị inia ḅala opuma famẹ. Anị Jizọs Ḅe arụ mị ḅụkụlọ se soye-ẹ. 38Si-a-tẹmẹma ḅie ḅụ pakaso ḅọ ḅe Jizọs Ḅe tẹkẹmẹ, “Ye àrị ị́rị́ na so.”
Ọkụma Jizọs Ḅe nwọse ọ̀ fịrịmamẹ, 39“Vinpịkị so warị mun se Tamụnọ Ḅe mịẹ ị́ pịrịsaye mị ḍuko.”
Nweniḅọ ḅe nwẹngị bebe ama mị kelema, se Jizọs Ḅe mịẹ ọ̀ pịrịsaye mị nwọ ḍukoma ḅọrọmẹ.
Jaịrọs Ḅa Ma Na Ḅara Se Jizọs Ḅe ḅụchụaye Lama Eremeniḅọ Ma Na
(Mat 9.18-26; Mak 5.21-43)
40Jizọs Ḅe vinpịkị ḍapa mị ḅụ ísí pẹkẹrẹ mị mun sịkị, tomonikpo mị iḅi ḅara nwọse Ori ọkịmẹ, anịatịḅị inimgba Ò koru simemẹ. 41Anịsịkị Jaịrọs nwọ chịn gbọrị owuḅọ ḅo lamẹ, anịnyọ sime tẹkẹwarị mị ḅie fịrịnwẹngịḅọ-ẹ. Se ò Jizọs Ḅe ḅụọ chuku ḅịkịkoro, se Ọ̀ tẹkẹmẹ na Ori ori na oria warị mun, 42anịatịḅị oria ngẹrị eremenitọkụ, oyimaịn kụra fịnjị lasa ḅọ ma fịaḅẹ.
Se Jizọs Ḅe mun-arị sịkị, tomonima Ò gboriaḅẹ angana angana ḅụ. 43Inia ogboku gbọrị eremeniḅọ omi-ẹ, pulo oyimaịn kụra fịnjị nwọse si ḅara se ḅụ ideriarị ḅọ, á nyanaye mamgba á nwọ fama ḅịrịapụ pịrịsam, ọkụma ineda á gwọ sa ḅọ ofori-ẹ. 44Á tomonikpo mị ḅie sọ Jizọs Ḅe damaḅomẹ, Oria ọḅụju ḅụ, se ḅara se Oria ḅụchụaye aka lamamẹ, se anị kirikiri á ḅụ ideri sime pulo mị dachịẹmẹ. 45Jizọs Ḅe gbelamẹ, “Tụḅọ ḅara se ị̀ lama?”
Ḅẹḅọ ḅẹḅọ anị pikimẹ, se Pita ḅe nwọ ḅẹmẹ, “Yeḍieḅọ, tomoni mamgba ị́ gbori kelema pịkị ị́ pụnụma waraḅẹ.”
46Ọkụma Jizọs Ḅe nwọ ḅẹmẹ, “Nweni ḅara se ị̀ lamamẹ, anịatịḅị ị̀ ḅụ nemimẹ, kụrọ ị̀ ḅụ pakaso sịkị.” 47Eremeniḅọ ma ọrịmẹ, na á pakasam, anị á nwẹngịḅoye-ẹ, ḅụgeregere na Jizọs Ḅe ḅụọ chuku ḅịkịkoromẹ, ḅẹḅọ ḅẹḅọ tọrụkuḅu ḅụ, á gose ḅara se Ọ̀ lamaye mị nwọ ḍuko pakụmamẹ, á ḅụ pịkị anị kirikiri iḅiọkụ mị na. 48Jizọs Ḅe nwọse á ḅẹmẹ, “Ị̀ ndụḅa ị́ya ḅereni ị́ mịẹse ị́ ḅụ iḅisam. Deinma ḅụ so.”
49Jizọs Ḅe mịn mị nwọ ḍukoarị sịkị, okunwẹngịḅọ fịrịnwẹngịḅọ ḅe warị ḅie wẹrị ḅomẹ. “Ị́ ndụḅa ma á fịsam,” ọ̀ nwọ ḍuko Jaịrọs ḅe pịrịmẹ; “ḅarị Yeḍieḅọ ḅe ḅụfụkamama.”
50Ọkụma Jizọs Ḅe anị naa sịkị Ọ̀ nwọse Jaịrọs ḅe ḅẹmẹ, “Ḅalafama, ḅereni kẹngẹ nwọ nyana, á ḅụ pịkị iḅiḅịa.”
51Ò ḅo warị mị lasịkị, Ò ḅerenikẹ gbọrịḅọ sọnị Ò ḍuko sọmun, Pita ḅe na, Jọn ḅe na, Jems ḅe na, pịkị tọkụ ma ḍaḅe na nyọngọrọma na sikima ọkụma. 52Anịnyọ simeḅọ goyegoye owu pịkị tịḅị se gbin owuaḅẹ tọkụ ma gose. Jizọs Ḅe nwọ ḅẹmẹ, “Ómine owu ma; tọkụ ma á fịkẹ, á papa mọnọaḅẹ!”
53Inimgba Ò se kpọtimẹ, anịatịḅị ini nemimẹ na á fịsam. 54Ọkụma Jizọs Ḅe gịsapụma á ḅara ọlọ, se á chịn olokumẹ, “Sịsẹ ị̀ya tọkụ!” 55Á tẹmẹ vinpịkị ḅo á ḅie sọmẹ, se anị kirikiri á sịsẹmẹ, se Jizọs Ḅe nwọse ini ḅẹmẹ na ini ye se á pịrị á fị. 56Anị á yiapụma ḅụgbiripumamẹ, ọkụma Jizọs Ḅe nwọse ini ḅẹmẹ, na pakaye mị ini ḍuko gbọrịḅọ sọnị pịrịma.
Currently Selected:
:
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria