Yohane 2
2
Ɔkatsia Kana Wulutɔ
1Ɛkɛ sasɩ a, betsia ɔka Kana wuluá ɩbʋ Galilea ɔmátɔ. Yesu mʋ yin bʋ ɩnʋ. 2Bɛtɩ Yesu mʋa mʋ akasɩpʋ ɛ mʋ́ asɩ. 3Brɛá amʋ́ nta lɛta a, Yesu mʋ yin lɛbla mʋ ɔbɛɛ, “Bʋtra bʋma nta.”
4Yesu lɛbla mʋ ɔbɛɛ, “Amʋ́ yin, yɛ megyi mɩ asʋn igyi o! Mɩ brɛ mɔkʋnya fʋn.”
5Mʋ yin lɛbla woyi amʋtɔ asumpʋ ɔbɛɛ, “Mlɩbwɛ dɩnka asʋngyiasʋn ánɩ́ ɔbɛ́bla mlɩsʋ.”
6 Yudafɔ bʋtɔfwɩ ɩwɩ amʋ́ amandɩɛ ɔkpasʋ. Mʋ́ sʋ bɔpʋ awʋndɩ akpɔnkpɔɔnkpɔntɩ asie yaɩ woyi amʋtɔ. 7Yesu lɛbla ɩnʋ asumpʋ amʋ ɔbɛɛ, “Mlɩsa ntsu bʋla awʋndɩ amʋ fɛ́ɛ́.” Lɛlɛ bɛsa. 8Ɩnʋ ɔlɛbla amʋ́ ɔbɛɛ, “Mlɩsa ɩkʋ ya nkɛsʋ ɔkɩpʋ amʋ.” Bɛsa ya mʋ. 9Ɔlɛda mʋ́ ɔnɔ a, ɩladamli nta. Omeyin ɔtɩnɛá benya nta amʋ tsu. (Tamɛ asumpʋ amʋ mʋ́ bʋyin.) Ɩnʋ ɔlɛtɩ ɔka otsiapʋ amʋ ya ɩtsɛtɔ, 10yɛbla mʋ ɔbɛɛ, “Nta wanklaan ɔhagyiɔha tegyankpa yaɩ. Nɩ bonun mʋ́ ta asa bʋtɔpʋ mʋ́á ɩma alɛ ba. Tamɛ fʋ mʋ́ fapʋ wanklaan amʋ yaɩ bɔfʋn sei.”
11Ɩnɩgyi osuna gyankpapʋá Yesu lɔbwɛ nɩ. Ɔlɔbwɛ mʋ́ Kana ánɩ́ ɩbʋ Galilea ɔmátɔ, pʋlɛ mʋ numnyam ɔwan. Ɩlɛha mʋ akasɩpʋ bɔhɔ mʋ gyi.
12Ɩnɩ ɔma a, Yesu mʋa mʋ yin, mʋ apio pʋ́ mʋ akasɩpʋ bɔyɔ Kapernaum wulutɔ, yetsia ɩnʋ nkɛ kpalobi.
Yesu Bulu Ɔtswɛkpa Yɔ
(Mateo 21:12-13; Marko 11:15-17; Luka 19:45-46)
13Brɛá nkɛá Yudafɔ bɔ́pʋgyi Israelfɔsʋ Katsʋn Nkɛ lowie-woyi ta a, Yesu lɔdʋ yɔ Yerusalem. 14Ɔlɔyɔ Bulu ɔtswɛkpa amʋ wunsɩnɛsʋ yowun ánɩ́ aha bʋdɛ nnantswie, akufa pʋ́ alɔpɔ fɛ. Olowun akʋ ɛ bʋtsie mpʋnʋasɩ bʋdɛ kɔba tsɛ. 15Ɩnʋ ɔlɔbwɛ mplɩ, wie amʋ́tɔ, gya amʋ́a mbwɩ amʋ fɛ́ɛ́ dalɩ. Olowuwuta kɔba atsɛpʋ amʋ mpʋnʋ da, da amʋ́ kɔba saɩn. 16Mʋʋ ɔlɛbla alɔpɔ afɛpʋ amʋ ɔbɛɛ, “Mlɩlɛ amʋ́ nfɩ! Mlɩmápʋ mɩ Sɩ woyitɔ bwɛ mlɩ ibia ogyikpa.” 17Ɩnɩá ɩlɛba alɩ sʋ a, mʋ akasɩpʋ amʋ bɛkaɩn Bulu asʋn wanlɩnhɛ anfɩsʋ. “Fʋ otsiakpa amʋ asʋn ɩhɩɛ igyi mɩ asʋnbogya.”
18Yudafɔ ahandɛ amʋ bɛba Yesu wa bɛfɩtɛ mʋ bɛɛ, “Osuna mɔmʋ fɔ́bwɛ pʋsuna anɩ ánɩ́ Bulu tumitɔ fʋdɛ ɩnɩ bwɛ?”
19Yesu lɛbla amʋ́ ɔbɛɛ, “Mlɩbwie Bulu ɔtswɛkpa anfɩ, nɔ́pʋ nkɛnsa yi mʋ́.”
20Yudafɔ ahandɛ amʋ bɛbla mʋ bɛɛ, “Nfi adʋana-sie (46) kɛkɛ bɔpʋyi obu anfɩ. Mʋ́ fʋ mʋ́ fɛɛ, fɔ́pʋ nkɛnsa yi mʋ́?”
21Tamɛ mʋ nyankpʋsa-oyi ɩwɩ asʋn ɔdɛblɩ, megyi Bulu ɔtswɛkpa amʋ. 22Brɛá Bulu lɔkʋsʋa mʋ tsu afulitɔ ɔma a, mʋ akasɩpʋ amʋ bɛkaɩn ánɩ́ ɔlɛblɩ asʋn anfɩ. Mʋ́ sʋ bɔhɔ Bulu asʋn pʋ́ Yesu asʋn blɩhɛ amʋsʋ gyi.
Yesu Yin Nyankpʋsa Klʋntɔ
23Yesu lɔbwɛ osuna tsɔtsɔɔtsɔ Israelfɔsʋ Katsʋn Nkɛ amʋtɔ brɛá ɔbʋ Yerusalem, aha tsɔtsɔɔtsɔ bowun. Mʋ́ sʋ bɔhɔ mʋ gyi. 24Tamɛ Yesu mɔpʋ ansɩ dɩnka amʋ́sʋ, tsufɛ oyin alɩá amʋ́ fɛ́ɛ́ bʋgyi. 25Mehian ánɩ́ ɔhaa ɔbɛ́bla mʋ ɔha ɩwɩ asʋn, tsufɛ mʋ onuto oyin asʋn ánɩ́ ɩbʋ nyankpʋsa klʋntɔ.
Currently Selected:
Yohane 2: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
