Luka 13
13
Mlɩdamli Ɩklʋntɔ, Mɛnɩ Mlɩmóowu
1Aha amʋʋ bʋbʋ ɩnʋ alɩ brɛ amʋtɔ akʋ bɛbla Yesu bɛɛ, Pilato lamɔ Galileafɔ akʋ brɛá bʋdɛ afɔdɩɛ bɔ ha Bulu, Yerusalem Bulu ɔtswɛkpa ɩnʋ, ha obugya lada afɔdɩɛ amʋ. 2Yesu lɛfɩtɛ amʋ́ ɔbɛɛ, “Mlɩkɩ mlɩaa, Galileafɔ anfɩ bʋgyi lakpan abwɛpʋ dʋn Galileafɔ atrahɛ, sʋ bowun ɩwɩɔsɩn anfɩ odu? 3Ndɛ mlɩ bla mbɛɛ, megyi alɩ igyi! Nɩ mlɩ ɛ mlɩmɛdamli klʋntɔ a, mlɩ fɛ́ɛ́ mlówu fɛ amʋ́. 4Ntɛ aha dukwe amʋʋ abansrʋ lobwie da mɔ Siloam ɔmantiá ɩbʋ Yerusalemtɔ amʋ mɛ, mlɩkɩ mlɩaa, lakpan abwɛpʋ bʋgyi dʋn aha atrahɛá betsia Yerusalem alɩ brɛ amʋtɔ fɛ́ɛ́? 5Ndɛ mlɩ bla mbɛɛ, megyi alɩ igyi. Nɩ mlɩmɛdamli klʋntɔ a, mlɩ ɛ mlówu fɛ amʋ́.”
Pɔntɔ Máswiehɛ
6Mʋʋ ɔlɛha amʋ́ yebi ɔbɛɛ, “Oyin ɔkʋ lotswie pɔntɔ mʋ ndɔtɔ. Ɛkɛ ɔkʋ ɔlɔyɔ yɛkɩ bɛɛ, abi kʋ ɩdɩn mʋ́tɔ. Ɔlɔyɔ a, kʋkʋ mɛdɩn mʋ́tɔ. 7Ɩnɩ sʋ ɔlɛbla mʋ ɔpayin ɔbɛɛ, ‘Nfinsa nɩ, nna oyi anfɩ asɩ. Mmɔkʋwun kʋkʋʋkʋ mʋ́tɔ. Ntogyi sʋ ɩbɛ́tra lɩɩ yinta ɔsʋlʋ? Kun mʋ́ da!> 8Tamɛ ɔpayin amʋ lɛbla mʋ ɔbɛɛ, ‘Mɩ wie, fʋ mʋ́ si mʋ́ ɩtra lɩɩ ofi ɔkʋlɛ, ampulipuli mʋ́ asɩ, kpa wuna wa mʋ́ asɩ. 9Nɩ ofieba iloswie a, ɩbʋ alɛ, tamɛ nɩ imoswie a, nakun mʋ́ da.> ”
Ɔtsɩ Ɔkʋ Ɩlɔ Tsa Ɔkpʋnʋ Ɔdakɛ
10Yesu lɔyɔ ɔdɛ atɔ suna Yudafɔ ofiakpa ɔkpʋnʋ ɔdakɛ ɩkʋ. 11Ɔtsɩ ɔkʋá ɔŋɛ lalahɛ lɔwa mʋ ɩlɔ nfi dukwe nɩ, ɩlaha mʋ alaklo, ɔmɛtalɩ bwii natɩ bʋ ɩnʋ. 12Brɛá Yesu lowun mʋ a, ɔlɛtɩ mʋ bla mʋ ɔbɛɛ, “Anɩ yin, ɩwɩ ɩwa fʋ ɔnlɩn!” 13Ɩnʋ ɔlɔpʋ ɩbɩ da ɔtsɩ amʋ. Ɩnʋnʋ olotswii lɩɩ kanfʋ Bulu.
14Ofiakpa ɔhandɛ amʋ lenya ɔblɔ ánɩ́ Yesu latsa ɔha ɔkpʋnʋ ɔdakɛ. Mʋ́ sʋ ɔlɛbla aha amʋ ɔbɛɛ, “Nkensie bʋ ɩnʋ ha agyʋma yɔ. Mlɩba nkɛ amʋtɔ, abʋtsa mlɩ ɩlɔ. Megyi ɔkpʋnʋ ɔdakɛ!”
15Anɩ Wie Yesu lɛlɛ mɔ ɔnɔ ɔbɛɛ, “Apinabwɛbi abwɛpʋ! Mlɩtɔ okugyiɔkʋ tɔwɔɩ mʋ nnantswie ntɛ afrimu lɛ ɩbantɔ, pʋ amʋ́ ya ntsu onunkpa ɔkpʋnʋ ɔdakɛ. 16Mʋ́ ɩma alɛá mɩ mʋ́ nɛ́sankɩ Abraham mʋ na anfɩ Ɔbʋnsam lakɩklɩ mʋ nfi dukwe kɛkɛ anfɩ ɔkpʋnʋ ɔdakɛ?” 17Mʋ asʋn blɩhɛ anfɩ lɛha pɛlɩ lɛkɩta mʋ alupʋ amʋ. Ansɩ legyi atrahɛ amʋ fɛ́ɛ́, ofula kpɔnkpɔntɩ amʋʋ ɔdɛbwɛ amʋ sʋ.
Takyi-akpin Ibi Yebi
(Mateo 13:31-32; Marko 4:30-32)
18Ɩnʋ Yesu lɛfɩtɛ ɔbɛɛ, “Ntɔ Bulu iwiegyi amʋ lɛlɩan? Ntɛ ntɔ nɔ́pʋkapʋ mʋ́? 19Igyi fɛ takyi-akpin ibi, oyin ɔkʋ lodu wa mʋ ndɔtɔ. Ɩlɛdan mli oyi yile, mbubwi bʋtogyonka mʋ́ abambitɔ.”
Bodobodotu-afa Yebi
(Mateo 13:33)
20Yesu lɛtra blɩ ɔbɛɛ, “Ntɔ mpʋkapʋ Bulu iwiegyi amʋ? 21Igyi fɛ Bodobodotu-afa ánɩ́ ɔtsɩ ɔkʋ lɔpʋtsɩa bodobodo nfuo kɛntɛ kʋlɛ, ɩlɛha mʋ́ ilotu.”
Obu-ɔnɔ Kplanhɛ
(Mateo 7:13-14, 21-23)
22Brɛá Yesu ɔyɔ Yerusalem a, ɔlɔtsʋn nkudasɩ pʋ́ awulusʋ. Ɔna ɔdɛ amʋ́ atɔ suna. 23Ɔha ɔkʋ lɛfɩtɛ mʋ ɔbɛɛ, “Owie, aha kpalobi kʋ obénya nkpa?”
Yesu lɛbla aha amʋ ɔbɛɛ, 24“Mlɩbɔ mbɔdɩ amlɩtsʋn obu-ɔnɔ kplanhɛ amʋtɔ. Tsufɛ aha tsɔtsɔɔtsɔ bɔ́bɔ mbɔdɩá bɔ́tsʋn wie ɩnʋ, tamɛ bʋmɛ́ɛtalɩ. 25Tamɛ nɩ woyi mʋ wie ɔkʋsʋ fin obu amʋ, mlɛba bɛlɩɩ klʋn ɔma, da klʋn amʋsʋ mlɩaa, ‘Owie, finki ha anɩ!> a, ɔbɛ́bla mlɩ ɔbɛɛ, ‘Mmeyin mlɩ. Mmeyin ɔtɩnɛá mlotsu.> 26Ɩnʋ mlɛ́blɩ mlɩaa, ‘Anɩa fʋnyɔ letsia gyi atɔ, nun nta. Fetsia suna atɔ anɩ dɩnsʋ!> 27Tamɛ ɔbɛ́lɛ mʋ́ ɔnɔ ɔbɛɛ, ‘Mmeyin mlɩ. Mmeyin ɔtɩnɛá mlotsu. Mlɩnatɩ tɛɩ mɩsʋ, mlɩ lalahɛ abwɛpʋ fɛ́ɛ́!> 28Nɩ mlowun Abraham, Isakɩ, Yakob pʋ́ Bulu ɔnɔsʋ atɔɩpʋ amʋ fɛ́ɛ́ bʋbʋ Bulu iwie ogyikpa, tamɛ bʋmɛha mlɩ mʋ́ ɔkpa amlɩwie ɩnʋ a, ɩnʋ mlósu kpisi nɩ. 29Aha bótsu owi ɔdalɩkpa pʋ́ owi ɔkplɩwiekpa, bɩnasʋ mʋ́a gyɔpɩsʋ ba betsia atɔ ogyikpa Bulu iwiegyi amʋtɔ. 30Ɔnɔkwalɩ, amapʋ akʋ bémli agyankpapʋ; agyankpapʋ akʋ ɛ bémli amapʋ.”
Yesu Losu Ha Yerusalem
(Mateo 23:37-39)
31Ɩnʋ Farisifɔ akʋ bɛba Yesu wa bɛbla mʋ bɛɛ, “Dalɩ Galilea ɔmátɔ nfɩ, tsufɛ ɔmásʋ ogyipʋ Herode dekleá ɔbɔ́mɔ fʋ.”
32Yesu lɛbla amʋ́ ɔbɛɛ, “Mlɩyɛbla ɔkpataku amʋ mlɩaa, ‘Négya ɔŋɛ lalahɛ lɛ ahatɔ, tsa aha ɩlɔ ndɛ, gya lɛ ɔkɛ, mɔ mʋ́ ɔnɔ klaɩ.> 33Tamɛ ilehian ánɩ́ nɔ́yɔ mɩ ɔnatɩ amʋsʋ ndɛ, ɔkɛ mʋ́a klaɩ. Tsufɛ ɔkpa ma ɩnʋá bɔ́mɔ Bulu ɔnɔsʋ ɔtɔɩpʋ ɔkʋkʋ ɔtɩnɛtɩnɛ, dʋn Yerusalem!
34“Oo Yerusalemfɔ, Yerusalemfɔ! Mlɩtɔmɔ Bulu ɔnɔsʋ atɔɩpʋ, da abiá Bulu lawa sɩsɩ mlɩ abwi mɔ nɩ. Ntekleá nóbun mlɩ abisʋ bregyibrɛ, fɛ alɩá batɛ tobun mʋ abisʋ; tamɛ mlɩtamaha mɩ ɔkpa. 35Mlɩkɩ, Bulu obési mlɩ ɔtswɛkpa tswɩ mlɩ. Ndɛ mlɩ bla mbɛɛ, mlɩmɛ́ɛtra wun mɩ ɛkɛkɛɛkɛ, yɔfʋn ɛkɛá mlɛ́blɩ mlɩaa, ‘Bulu oyula ɔha amʋʋ ɔba mʋ ɩdatɔ> amʋ.”
Currently Selected:
Luka 13: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
