Luka 23
23
Yesu Kpa Ya Pilato
(Mateo 27:1-2, 11-14; Marko 15:1-5; Yohane 18:28-38)
1Ɩnʋ aha amʋʋ befia ɩnʋ amʋ bɔkʋsʋ kpa Yesu ya ɔmásʋ ogyipʋ Pilato. 2Bɛka asʋn dɩnka mʋsʋ bɛɛ, “Anɩlawun ánɩ́ oyin anfɩ dɛ ɔmá anfɩtɔ aha yinta. Ɔdɛ amʋ́ bla ɔbɛɛ, bʋmátra ka lampoo ha Roma owie dɛhɛn. Ɔdɛblɩ ɛ ɔbɛɛ, mʋgyi Kristo (ɔha ánɩ́ Bulu lada mʋ ofuli amʋ). Idesuna ánɩ́ owie ogyi.”
3Pilato lɛfɩtɛ Yesu ɔbɛɛ, “Fʋgyi Yudafɔ owie amʋ nɩ?”
Yesu lɛlɛ mʋ́ ɔnɔ ɔbɛɛ, “Ee, mʋ́ fablɩ a.”
4Pilato lɛbla Bulu igyi ahapʋ dɛhɛn pʋ́ ɔdɔm amʋ ɔbɛɛ, “Mmɔkʋwun tsitsa kʋkʋá oyin anfɩ labwɛ.”
5Tamɛ amʋ́ mʋ́ bʋdɛ mʋ́tɔ kotoo bɛɛ, “Ɔdɛpʋ mʋ atosunahɛ tɩ ɩtrɛ mʋ́a ɩkɔ wa Yudea ɔmá anfɩtɔ. Olefi mʋ́ asɩ tsu Galilea, alapʋ bowie nfɩ.”
Yesu Herode Ansɩtɔ Lɩɩ
6Brɛá Pilato lonu asʋn anfɩ a, ɔlɛfɩtɛ ɔbɛɛ, “Galileayin oyin anfɩ gyi?” 7Brɛá ɔlɛbɩá Yesu otsu Galilea, ɔtɩnɛá owie Herode dɛ iwie gyi a, ɔlɛha bɛkpa mʋ ya Herode. Alɩ brɛ amʋtɔ a, Herode bʋ Yerusalem wulutɔ ɩnʋ. 8Brɛá owie Herode lowun Yesu a, ansɩ lɛhɩɛ gyi mʋ. Tsufɛ olodunka ánɩ́ obówun mʋ dodoodo, mʋ ɩwɩ asʋn ánɩ́ alanu sʋ. Odekleá Yesu ɔbwɛ osuna ɩkʋ suna mʋ. 9Mʋ́ sʋ ɔlɛfɩtɛ Yesu asʋn tsɔtsɔɔtsɔ, tamɛ Yesu mɛlɛ kʋkʋ ɔnɔ. 10Bulu igyi ahapʋ dɛhɛn amʋ pʋ́ Mose mbla asunapʋ amʋ bʋlɩɩ ɩnʋ, bʋdɛkplʋn ka asʋn dɩnka mʋsʋ. 11Owie Herode mʋa mʋ ɩsa akɔpʋ amʋ ɛ bɔsʋpa mʋ, bwɛ mʋ ahinla. Bɔpʋ srɩkɩ liga kʋ wa mʋ, beyinkia mʋ ya Pilato. 12Owie Herode mʋa Pilato bemli anyawie tsu ɛkɛ amʋ. Tɛkɩ amʋ́ nsɩnɛ ɩma alɛ yaɩ.
Yesu Lowu Ɩpɔn Ha
(Mateo 27:15-26; Marko 15:6-15; Yohane 18:39--19:16)
13Pilato lɛtɩ Bulu igyi ahapʋ dɛhɛn, Yudafɔ ahandɛ pʋ́ ɔmá amʋ fɛ́ɛ́ befia. 14Mʋʋ ɔlɛbla amʋ́ ɔbɛɛ, “Mlɩlɛkpa oyin anfɩ ba mɩ mlɩaa, ɔdɛ ɔmá amʋ agywɩɩn yinta. Nafɩtɛ mʋ ɔnɔtɔ asʋn mlɩ ansɩtɔ, nawun ánɩ́ asʋn amʋʋ mlɩlɛka dɩnka mʋsʋ amʋ ɩma mʋ́tɔ. 15Owie Herode ɛ lawun mʋ́ alɩ. Mʋ́ sʋ alayinkia mʋ sɩsɩ anɩ nɩ. Oyin anfɩ mɔkʋbwɛ tɔtɔá bɔ́mɔ mʋ. 16Ɩnɩ sʋ nɛ́ha bɛ́pɩtɩ mʋ atɔ, ansi mʋ ɔnatɩ.”
17-18Ɩnʋ ɔdɔm amʋ fɛ́ɛ́ bɔkplʋn blɩ bɛɛ, “Lɛ mʋ ɩnʋ, afʋsi Baraba ha anɩ!”#23:17 Mʋ́tɔ ye 17 bʋ nwʋlʋ dada amʋ akʋtɔ: Katsʋn Nkɛ kugyikʋtɔ a, ilehian ánɩ́ Pilato obési obu ɔdɩpʋ ɔkʋlɛá Yudafɔ amʋ bʋdekle ha amʋ́. 19(Baraba anfɩ da obu, tsufɛ ɔlɔkʋsʋ lɩɩ wulu amʋsʋ, ɔlɔmɔ ɔha ɛ mʋ́tɔ.)
20Pilato lekleá obési Yesu. Mʋ́ sʋ ɔlɛtra tɔɩ kpla ɔdɔm amʋ. 21Tamɛ bɔkplʋn kʋklʋkʋʋ bla mʋ bɛɛ, “Da mʋ manta oyikpalihɛsʋ! Da mʋ manta oyikpalihɛsʋ!”
22Pilato lɛbla amʋ́ otse sasɩ ɔbɛɛ, “Tsitsa mɔmʋ alabwɛ? Mmɔkʋwun tɔá alabwɛ, sʋ nɛ́ha bɔ́mɔ mʋ. Nɛ́ha abʋpɩtɩ mʋ atɔ, ɔnatɩ.”
23Tamɛ bʋbʋ mʋ́sʋ bʋdɛkplʋn kʋklʋkʋʋ bɛɛ, ɔha abʋda mʋ manta oyikpalihɛsʋ. Ɩnʋ bɔdʋn mʋ ɔnɔlɩ. 24Mʋ́ sʋ Pilato lɔbwɛ dɩnka tɔ amʋʋ bʋdedunka amʋsʋ. 25Olesi oyin amʋʋ ɔlɔkʋsʋ lɩɩ ɔmá amʋsʋ, mɔ ɔha mʋ́tɔ sʋ ɔda obu amʋ, olesi Yesu ha mʋ ɩsa akɔpʋ ɔbɛɛ, bʋbwɛ mʋ alɩá aha amʋ bʋdekle.
Yesu Da Manta Oyikpalihɛsʋ
(Mateo 27:32-44; Marko 15:21-32; Yohane 19:17-27)
26Brɛá bɛkpa Yesu bɔyɔ a, befia Kireneyin ɔkʋá bʋtɛtɩ mʋ Simon. Otsu abu asɩ. Ɩsa akɔpʋ amʋ bɛka mʋ hɩɛ bɛɛ, ɔsʋra oyikpalihɛ amʋ buo Yesu.
27Ɔdɔm bobuo Yesu. Atsɩá bʋbʋ amʋ́tɔ bʋpu amʋ́ anyɔpʋ, bʋhɩɛ bʋdesu ha Yesu. 28Yesu lɛdamli, ɔlɛbla amʋ́ ɔbɛɛ, “Yerusalemfɔ atsɩ, mlɩmásu mɩ. Mlɩsu mlɩ ɩwɩ pʋ́ mlɩ abi. 29Tsufɛ nkɛ kʋ ɩba, mlɛ́blɩ mlɩaa, ‘Bulu layula atsɩá bʋmɔkʋkwɩɩ kɩ, obi mɔkʋdɩ amʋ́ opunitɔ kɩ, obi mɔkʋnyɔpʋ amʋ́ ɛ kɩ.> 30Alɩ brɛ amʋtɔ a, aha bɛ́bla abʋ bɛɛ, ‘Mlɩbwie bun anɩsʋ. Nkuku, mlɩpula anɩ.> 31Tsufɛ nɩ bʋdɛ oyi bɔbwɛ ogya wa alɩ a, nkalɩ bɔ́bwɛ oyi wʋlɩhɛ?”#23:31 Nɩ mɩ anfɩ mɩ asʋn da ɔkpa anfɩ kʋraa bʋdɛbwɛ alɩ a, nkalɩ bɔ́bwɛ aha ánɩ́ bégyi pɔn mʋ ansɩtɔ?
32Ɩsa akɔpʋ amʋ bɛkpa lalahɛ abwɛpʋ abanyɔ ɛ manta Yesusʋ, bɔyɔmɔ amʋ́. 33Brɛá bowie ɔtɩnɛkʋá bʋtɛtɩ ɩnʋ “Nwun Okokobi” a, bɛda Yesu manta oyikpalihɛsʋ. Bɛda amʋ́ abanyɔ amʋ ɛ manta nyikpalihɛsʋ. Ɔkʋlɛ bʋ Yesu gyɔpɩsʋ, ɔkʋlɛ ɛ bʋ mʋ bɩnasʋ. 34Ɩnʋ Yesu lɛblɩ ɔbɛɛ, “Mɩ Sɩ, sikie amʋ́, tsufɛ bʋmeyin tɔá bʋdɛbwɛ.”#23:34 Mʋ́tɔ ye 34 ɩma nwʋlʋ dada amʋ akʋtɔ.
Ɩsa akɔpʋ amʋ bɔtswɩ abi ye Yesu atadɩɛtɔ. 35Aha tsɔtsɔɔtsɔ amʋʋ bobuo amʋ́ yɔ ɩnʋ amʋ besi bʋlɩɩ ɩnʋ bʋdɛ mʋ kɩ. Yudafɔ ahandɛ amʋ bɔbwɛ mʋ ahinla bɛɛ, “Ɔlɔhɔ aha nkpa. Nɩ lɛlɛ mʋgyi Kristo (ɔha amʋʋ Bulu lada mʋ ofuli), mʋ Bulu lalɛ nɩ a, ɔhɔ mʋ ɩwɩ nkpa!”
36-37Ɩsa akɔpʋ amʋ ɛ bɔpʋ nta ɔdaɩ tin mʋ ɔnɔ, bwɛ mʋ ahinla bɛɛ, “Nɩ fʋgyi Yudafɔ owie amʋ nɩ a, lɛ fʋ ɩwɩ!”
38Bɔwanlɩn atɔ manta oyikpalihɛ amʋ awunsʋ bɛɛ, “Yudafɔ Owie amʋ nɩ.”
39Lalahɛ abwɛpʋ amʋʋ bɛda manta oyikpalihɛsʋ amʋtɔ ɔkʋlɛ lɛblɩ Yesu ɩwɩ abususʋ ɔbɛɛ, “Megyi fʋgyi Kristo amʋ nɩ? Lɛ fʋ ɩwɩ, afʋlɛ anɩ mɛɛ!”
40Tamɛ onyɔsɩ amʋ lɔwa ɩyɩn wa mʋ ɔbɛɛ, “Fʋmɛdɛ Bulu ifu nya? Fʋa mʋnyɔ fɛ́ɛ́ dɛ ɩsʋbɩtɩ kʋlɛ hɔ. 41Anɩ mʋ́ a, anɩ ɩsʋbɩtɩ ɩda ɔkpa, lakpan ánɩ́ anɩlɔbwɛ sʋ. Tamɛ oyin anfɩ mʋ́ mɔkʋbwɛ lalahɛ kʋkʋ.” 42Mʋʋ ɔlɛbla Yesu ɔbɛɛ, “Yesu, nɩ fɛba fʋ iwie ogyikpa a, kaɩn mɩsʋ!”
43Yesu lɛbla mʋ ɔbɛɛ, “Ɔnɔkwalɩ ndɛ fʋ bla. Ndɛ, mɩa fʋnyɔ abétsia Paradiso.”
Yesu Lowu
(Mateo 27:45-56; Marko 15:33-41; Yohane 19:28-30)
44-45Alɩ brɛ anfɩ ɩbɔ́bwɛ fɛ ɔpa doduanyɔ. Owi lɛta ɔsʋlʋ amʋsʋ fɛ́ɛ́ alɩɩ yɔfʋn ntʋpwɛ dɔsatɔ. Owi mɛtra lɩn ɛ. Ɩnʋ a, tati amʋʋ bɔpʋka Bulu Ɔtswɛkpa obu amʋtɔ amʋ ɩlɛbalɩ anyɔ. 46Yesu lɔkplʋn kʋklʋkʋʋ blɩ ɔbɛɛ, “Mɩ Sɩ, napʋ mɩ ɔŋɛ wa fʋ ɩbɩtɔ.” Olenya blɩ alɩ ta pɛ, ɔlɛlɛ ɔŋɛ.
47Brɛá ɩsa akɔpʋ ɔhandɛ amʋ lowun tɔá ɩlaba a, ɔlɛkanfʋ Bulu ɔbɛɛ, “Lɛlɛ, ɔha yile oyin anfɩ gyi.”
48Aha amʋʋ bʋlɩɩ ɩnʋ amʋ fɛ́ɛ́ bowun tɔá ɩlaba, bɔpʋ awɩrɛhɔ natɩ bɔyɔ woyi. 49Tamɛ amʋ́á bʋyin Yesu pʋ́ atsɩ amʋʋ bobuo mʋ tsu Galilea ɔmátɔ amʋ besi bʋlɩɩ tsutsuutsu, bʋdɛ ɩtɔá ɩdɛ mʋ́sʋ yɔ kɩ.
Yesu Pula
(Mateo 27:57-61; Marko 15:42-47; Yohane 19:38-42)
50-51Oyin ɔkʋ letsia, bʋtɛtɩ mʋ Yosef. Otsu Yuda wulu kʋá bʋtɛtɩ mʋ́ Arimateatɔ. Ɔha yile ogyi, obú ɛ bʋ mʋsʋ. Ɩbʋ mʋ́tɔá ɔbʋ ɔmá amʋtɔ asʋn agyipʋtɔ, tamɛ omotsula dɩnka amʋ́ agywɩɩn pʋ́ amʋ́ bwɛhɛ anfɩsʋ. Otsie ogyo Bulu iwiegyi amʋ. 52Oyin anfɩ lɔyɔ Pilato wa, yɔkʋlɩ mʋ ɔkpa ɔbɛɛ, osi Yesu fuli amʋ ha mʋ. Pilato lɛha mʋ ɔkpa. 53Ɩnʋ Yosef lɛyɛsɩɛɩ Yesu fuli, ɔlɔpʋ ɔhrada kɩklɩ mʋ ɩwɩ, pʋ mʋ yɛwa ɔbɔ kʋá mʋ onuto ɔlɛha bɛda bʋtatɔ ha mʋ ɩwɩ, bʋmɔkʋpula ɔhaa mʋ́tɔ kɩ. 54Ɛkɛ amʋ igyi Fieda. Ɛkɛ amʋ igyi ogya ɔdʋdakɛ. Owi inya ta pɛ, ɔkpʋnʋ ɔdakɛ amʋ ɩlafi asɩ.
55Atsɩ amʋʋ bʋbuo mʋ tsu Galilea amʋ bobuo Yosef yɛkɩ Yesu opulakpa pʋ́ alɩá ɔlɔpʋ fuli amʋ tswɩ ɔbɔ amʋtɔ. 56Beyinki yɔ woyi yɔkwɛ ohuam, ɔhɩɛn pʋ́ ofobi fanfan ánɩ́ bɔ́pʋ yɛkpa Yesu. Botsutsua abʋbwɛ ta a, owi lata, bɛda ɔkpʋnʋ ɔkpʋnʋ ɔdakɛ amʋ fɛ alɩá Mose Mbla lɛblɩ.
Currently Selected:
Luka 23: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
