Israelfɔ Ɩlʋ 18
18
Nana Bulu Ɔkpa lɔfʋn, Mʋ Asʋn Fɛ́ɛ́ Bʋ Mʋ́tɔ
Dawid ɩlʋ ha ɩlʋ osunapʋ. Ɩlʋá Nana Bulu osumbi Dawid lɔpʋda mʋ ɩpan brɛá ɔlɛlɛ mʋ tsu mʋ alupʋ pʋ́ Saul ɩbɩ.
1Oo Nana Bulu, mɩ ɔwʋnlɩn ɔwapʋ;
ntɛhɩɛ dwɛ fʋ.
2Fʋgyi mɩ ɩbʋ fʋahɛ, mɩ oŋainkpa kpikpli pʋ́ mɩ ɔlɛpʋ.
Mɩ Bulu, mɩ ɩbʋta ánɩ́ ntɛsrɩ tanʋ.
Mɩ ɩwɩ ɩban, mɩ ɔwʋnlɩn ánɩ́ ɔtɔhɔ mɩ nkpa pʋ́ mɩ ɔtanʋkpa kinkin.
3Ntosu kpoli Nana Bulu,
ɩkanfʋ mʋ wie.
Ɔtɔhɔ mɩ lɛ mɩ alupʋ ɩbɩtɔ.
4Lowu ɩfla lɔwa kɩta mɩ.
Ntsuá ɩbʋ ɩyɩn lɔbʋla kɩta mɩ.
5Afulitɔ ɔyɔɩ lemli mɩ,
lowu agbla lɛkɩta mɩ.
6Nosu kpoli Nana Bulu brɛá mbʋ ɩkplan anfɩtɔ.
Nɔkplʋn kpoli mɩ Bulu mbɛɛ, ɔlɛ mɩ.
Olonu mɩ isu mʋ ɔtswɛkpa ɩnʋ.
Mɩ okitikiti lɔtʋ mʋ.
Mɩ isu lowie mʋ asʋtɔ.
7Ɩnʋ ɔsʋlʋ lɛkan ɩwɩ, kpɩnkɩ.
Abʋ tsitsi ɛ lɛka ɩwɩ kpɩnkɩ,
tsufɛ ɔblɔ dɛ mʋ.
8Mʋ ɔwɔntɩtɔ ɩdɛ ogyasi,
ogya plɛnplɛn ánɩ́ mʋ́ ɔnɔ bʋ ɔnlɩn dɛdalɩ tsu mʋ́ ɔnɔtɔ.
Agyawunuá ɩdɛhɔ lɛdalɩ tsu mʋtɔ.
9Ɔlɛnɛ ɔsʋsʋ, kplɩ ba ayasɩ.
Oklun tuun bun mʋ ayabiasɩ.
10Ɔlɛdɩnka kerubsʋ, fuli ba.
Ɔlɛdɩnka afu bambisʋ ba hwim.
11Ɔlɔpʋ oklun bun ɩwɩ.
Nyankpʋ mʋ́a agyinde tuun lobomli mʋ.
12Mʋ ɩwɩ lɔwankɩ.
Nsaɩntɔ lɛkpa ogya, atsufolibi lotswie
tsu mʋ ɩwɩwankɩ amʋtɔ tsʋn agyinde amʋtɔ ba.
13Nana Bulu lɛha ɔprada lɔpʋtɩ ɔsʋsʋ.
Ɔsʋsʋʋsʋ Mʋ Wie ɔmɛ lɛlɩn.
Nsaɩntɔ lɛkpa ogya, atsufolibi lotswie.
14Ɔlɔtswɩ mʋ mbɩn da mʋ alupʋ saɩn.
Ɔlɛha nsaɩntɔ lɛkpa ogya, begyigya.
15Nana Bulu, fɔwa ɩyɩn, si ɔŋɛ da fwɩfwɩ;
ɔpʋ bʋnkpatɔ lɛya.
Ɔsʋlʋ ntswɩasɩ lɛdɩ yaya.
16Fɔtswɩ ɩbɩ tsu ɔsʋsʋ kɩta mɩ,
bɩtɩa mɩ lɛ ntsu kluklutɔ.
17Ɔlɛlɛ mɩ tsu mɩ ɔdʋkplakpatɩ ɩbɩtɔ,
lɛ mɩ alupʋ ɩbɩ,
tsufɛ bʋhɩɛ bʋdʋn mɩ.
18Bowie mɩtɔ ɛkɛá mbʋ ɩkplantɔ,
tamɛ Nana Bulu lɔbwɛ mɩ ɔma ɔlɩɩpʋ.
19Ɔlɛlɛ mɩ, pʋ mɩ ba ɔtɛɩkpa,
tsufɛ mɩ asʋn tegyi mʋ ansɩ.
20Mɩ yilebwɛ sʋ Nana Bulu legyi mɩ bʋalɛ.
Ɔlala ɩma mɩ ɩwɩ.
Mʋ́ sʋ ɔlɔpʋ yile ka mɩ ɩkɔ.
21Tsufɛ nagyi Nana Bulu asʋnsʋ.
Mmɔkʋbwɛ lakpan yinki mɩ Bulu ɔma.
22Ntegyi mʋ mblasʋ.
Mmɔkʋsi mʋ amandɩɛ tswɩ.
23Ɔlala ɩma mɩ ɩwɩ mʋ ansɩtɔ.
Ntɛkɩ mɩ ɔtsakpa, mɛnɩ mméegyi ɩpɔn.
24Mɩ yilebwɛ sʋ Nana Bulu lagyi mɩ bʋalɛ.
Ɔlala ɩma mɩ ɩwɩ.
Mʋ́ sʋ alapʋ yile ka mɩ ɩkɔ.
25Fʋtegyi ɔnɔkwalɩ ha ɔnɔkwalɩpʋ.
Fʋma ɔlala ha ɔha ánɩ́ ɔlala ma mʋ ɩwɩ.
26Fʋtɛlɛ fʋ ɩklʋntɔ wankɩhɛ suna ɔha ánɩ́ mʋ ɩklʋntɔ lɔwankɩ.
Fʋyin alɩá fʋtɔpʋkpa ɔha ánɩ́ mʋ ɔkpa lɔnɔ.
27Tsufɛ fʋtɔhɔ ɩwɩasɩ abapʋ nkpa,
tamɛ fʋtɛba ɩwɩ atsupʋ asɩ.
28Lɛlɛ, fʋtɛha mɩ ɔkandɩɛ tɔwankɩ.
Nana Bulu, mɩ Bulu, fʋtɛha mɩ oklun temli wankɩ.
29Fʋ sʋ ntɛtalɩ gyi adʋnsʋ.
Ɩna fʋ sʋ ntɛtalɩ fuli nyankɩ abuntisʋ bwie awulu.
30Bulu mʋ́ a, mʋ ɔkpa lɔfʋn.
Tɔá ɔlɛhɩɛ fɛ́ɛ́ bʋ mʋ́tɔ.
Otegyi ɩban wa ɔhagyiɔha ánɩ́ ɔtɛsrɩ tanʋ mʋ.
31Tsufɛ Nana Bulu ɔma a, Bulu ɔmɔmʋ bʋ ɩnʋ?
Bulu ɔma a, bʋta mɔmʋ bʋ ɩnʋ?
32Mʋtɔwa mɩ ɔwʋnlɩn,
ɔtɛha ɔkpatɔ tolwii ha mɩ pisii.
33Mʋlɔwa mɩ ayabi ɔwʋnlɩn fɛ nani,
pʋ mɩ lɩɩ ɔfʋakpa.
34Mʋtosuna mɩ ɩbɩ ɩsa kɔ,
ntɛtalɩ nɛ kɔɔbrɩ ɩta.
35Oo Nana Bulu, fʋlegyi ɩban wa mɩ,
hɔ mɩ nkpa.
Fʋ gyɔpɩ ɩbɩ lɛkɩta mɩ lɩɩ.
Fʋlaba ɩwɩasɩ, ha mɩ nabwɛ ɔha kpɔnkpɔntɩ.
36Fɔtɔ ɔkpa ha mɩ,
mɩ otebi mɔtswɩ tsɛlɛ.
37Nɛdɩnka mɩ alupʋsʋ yɛkɩta amʋ́.
Mmeyinki ɔma yɛfʋn brɛá bɛta fɛ́ɛ́.
38Nobwie amʋ́ bun mɩ ayabiasɩ,
bʋmɛtalɩ tra kʋsʋ.
39Tsufɛ fɔwa mɩ ɔwʋnlɩn ha ɩsakɔ.
Fɛba mɩ adʋn asɩ, pʋ amʋ́ wa mɩ asɩ.
40Fɛha mɩ alupʋ bɛsanki amʋ́ yama srɩ.
Nɔmɔ aha ánɩ́ bʋdɛ mɩ ɩsa kɔ.
41Bosu kpoli, tamɛ ɔhɔpʋ ɔkʋkʋ má ɩnʋ.
Bosu kpoli Nana Bulu ɛ, tamɛ ɔmɛkpla amʋ́.
42Nɔkwɛ amʋ́ pukupuku, fɛ otutu afu ansɩtɔ.
Nɛtsɛɩ amʋ́ wʋlɩ, fɛ dɩnsʋ ipi.
43Adʋn bɔkʋsʋ mɩsʋ, fɔhɔ mɩ lɛ amʋ́ ɩbɩ.
Fɛyaɩ mɩ ɔmá-ɔmá ɔkpapʋ.
Aha ánɩ́ mmeyin kʋraa bosum mɩ.
44Afɔɔ bɔwɔ awunu mɩ ansɩtɔ.
Benya nu mɩ ɔmɛ pɛ bagyi mʋ́sʋ.
45Atɛtɔ lowu amʋ́,
bʋdɛkpɩnkɩ kpakpakpakpa wɔ dalɩ amʋ́ oŋainkpa.
46Nana Bulu tsie nkpa!
Bʋkanfʋ mɩ bʋta.
Bʋtsu mɩ nkpa ɔhɔpʋ Bulu fʋa.
47Bulu tɛka mɩ alupʋ ɩkɔ.
Ɔtɛba ɔmá-ɔmá asɩ, pʋ amʋ́ wa mɩ asɩ.
48Mʋtɛlɛ mɩ lɛ mɩ alupʋ ɩbɩ.
Fotsu mɩ fʋa dʋn amʋ́;
fɛlɛ mɩ lɛ awuntɔlɩnpʋ ɩbɩ.
49Oo Nana Bulu, ɩnɩ sʋ nɛ́kanfʋ fʋ ɔmá-ɔmá ansɩtɔ.
Nɔ́wa ɩlʋ kanfʋ fʋ ɩda.
50Fʋtɛha fʋ owie ɩsʋgyi akpɔnkpɔntɩ.
Fʋtɛlɛ fʋ ɔdwɛá ɩma ɔka suna mɩ Dawid ánɩ́ fada ofuli
mʋa mʋ abi-aná brɛ fɛ́ɛ́.
Currently Selected:
Israelfɔ Ɩlʋ 18: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation