Luuk 1
1
1Mɩ-na Luuk nɛ ŋmʋnsɛ teniŋ deeŋ a pɩpɩ ŋ-na mɩ nandɔŋɔ Tɩafɩlos. Nɩaa yʋga a hɛ doluŋ a ŋmʋnsɛ wɩalɩŋ kala sɩ ŋaa la sɩɩŋ lɛ. 2Ba ŋmʋnsɛ wɩalɩŋ kala nɩaa sɩ bʋla pɩla nɛ. Ba nɛ na wɩaa deemba kala a suomi bumbuŋ kala, a ma bʋl Wɩa niiŋ wɩaa a pɩpɩ nɩaa.
3Mɩ kʋhɩaŋ, mɩ pɩa na wɩaa deemba kala nɛ woruŋ, a lɩɩ ba dɩ-suomuŋ. Mɩ na dɩ ʋ ŋaa wʋzɔŋ nɛ dɩ mɩ ŋmʋnsɛ wɩalɩŋ kala sɩ vɛŋ ŋɩɩ a pɩŋ. 4Mɩ ŋmʋnsaa pɩŋ dɩ ŋ wuo jɩŋ arɩ wɩalɩŋ kala ba sɩ dagɩŋ ŋaa wʋtɩtɩɩba nɛ.
Ba bʋl Jɔɔŋ Wɩa lɩɩ-fooro lʋlʋŋ wɩaa
5Bʋa-la lɛ Hɛrɔd fa sɩ ŋaa Judiya tinteeŋ kuoro, dɩ baal kʋbala baa yɩrɛ Zɛkarɩya fa hɛ nɩmɛ a ŋaa Wɩɩsʋllɩ sɩpaalaaraa dɔŋɔ. Ba fa kɛŋ Wɩɩsʋllɩ sɩpaalaaraa kaa kpaa kpaa nɛ, Zɛkarɩya fa pɛ baal kʋbala ba sɩɩ yɩrɛ Abija nɩaa tʋɔŋ. Zɛkarɩya haala yɩrɩŋ nɛ Ɛlɩzabɛt. Ʋ ma fa ŋaa Arɔŋ doho nʋʋ nɛ. 6Zɛkarɩya arɩ ʋ haala kala fa ŋaa tʋɔpʋl tɩmma nɛ. Ba faa to Wɩa niiriŋ arɩ ʋ wʋdagaa nɛ woruŋ a bɩ wʋcheeli kala kɛnɛ. 7Ba fa bɩ bii kala lʋla, bɛɛ wɩaa Ɛlɩzabɛt fa ŋaa hapɩrɩ nɛ, ka ʋ dɩ ʋ bala Zɛkarɩya kala hɩɛsɛ.
8Ŋɩɩ nɛ Zɛkarɩya arɩ ʋ tɩntɩnnɩ dɔsʋŋ tapʋlʋŋ yi dɩ ba tɩŋ tɩntɩŋŋaa, Wɩɩsʋllɩ sɩpaalaaraa sɩ vɛnɛɛ tɩŋ. 9Ba tɩntɩŋŋaa lɛ, ba yie tɔnsɛ nɛ a lɩɩsɛ nɩɩ-la sɩ jaŋ jʋʋ Wɩa dɩɩ-bal-la a nyɩgɛ kʋsʋɔrʋsʋŋ. Ba tɔnsɛ a lɩɩsɛ Zɛkarɩya, ʋ jʋʋ Wɩa dɩɩ-bal-la. 10Ʋ sɩ jʋʋ ŋɩɩ, bʋa-la yi dɩ ʋ nyɩgɛ kʋsʋɔrʋsʋŋ, ka nɩ-daŋ-la kala hɛ Wɩa dɩɩ-bal-la kaala lɛ a chʋchʋɔlɛ Wɩa.
11Zɛkarɩya sɩ nyɩgɛ nyiniŋ ŋɩɩ, dɩ Wɩa tɩndaara kɔ ʋ teeŋ a chɩŋ koru-la sɛmɛ nadiiŋ. 12Zɛkarɩya naʋ, fawʋllʋŋ kɛnʋ ʋ chichel. 13Ŋɩɩ nɛ Wɩa tɩndaarʋ-la bʋla pʋ, “Zɛkarɩya, sɩ́ leŋe dɩ fawʋllʋŋ kɛnɩŋ. Wɩalɩŋ ŋ sɩ sʋl Wɩa chɩchɛ, ʋ joŋo pɩŋ nɛ. Ŋ haala Ɛlɩzabɛt jaŋ lʋl baal. Ŋ jaŋ hɛ ʋ yɩrɩŋ Jɔɔŋ. 14Ʋ jaŋ leŋ dɩ ŋ tʋɔŋ faasa tɔrɛ. Nɩ-daŋ ma tʋɔŋ jaŋ tɔrɛ ʋ lʋlʋŋ wɩaa. 15Ʋ jaŋ ŋaa nɩbal La Tɩɩna teeŋ. Ʋ bɩ jaŋ nyʋnyʋa sɩ-duo kala. Ba jaŋ lʋlʋ, dɩ Wɩa Dɩŋ-zɔmʋŋ hɛ ʋ lɛ woruŋ. 16Ʋ jaŋ ŋaa dɩ Iziral tɩŋŋaa yʋgɛ a bɩrɩma to ba Tɩɩna Wɩa. 17Ʋ jaŋ ŋaa Wɩa tɩntɩnnʋ a kɛŋ doluŋ arɩ Ɩlaaja fa sɩ kɛŋ doluŋ ŋɩɩ. (Ɩlaaja fa ŋaa Wɩa wʋlaabʋllʋ nɛ.) Ʋ jaŋ ŋaa dɩ biiriŋ arɩ ba nyɩmmaba kala mɩɩra sɩŋ. Ʋ jaŋ ŋaa dɩ nɩalɩŋ sɩ bɩ Wɩa niiŋ wɩaa ka to, dɩ ba bɩrɩmɛ a to tʋɔpʋl tɩŋŋaa wombiiŋ a leŋ dɩ nɩaa ŋaa siri a gbɛrɛ ba Tɩɩna.”
18Ŋɩɩ nɛ Zɛkarɩya pɩɛsɛ Wɩa tɩndaarʋ-la, “Ɛɛ nɛ mɩ jaŋ ŋaa a jɩŋ dɩ wɩalɩŋ ŋ sɩ bʋla ŋaa wʋtɩtɩɩ nɛ? Mɩ ŋaa banɩhɩaŋ nɛ, mɩ haala ma hɩɛsɛ.”
19Ŋɩɩ nɛ Wɩa tɩndaarʋ-la bʋla pʋ, “Mɩ yɩrɩŋ nɛ Gebiral a hɔŋ Wɩa sɛmɛ. Ʋ nɛ tɩmmɛ dɩ mɩ kʋ bʋl wʋzɔmʋŋ deeŋ a pɩŋ. 20Wɩalɩŋ mɩ sɩ bʋla pɩŋ jaŋ ŋaa, aŋ ka ŋ bɩ laa dii. Ŋɩɩ wɩaa ŋ bɩra bɩ wɩaa jaŋ wuo bʋl, see tapʋlɩɩ-la sɩ yie dɩ wɩaa deemba mɩ sɩ bʋla pɩŋ ŋaa.”
21Bʋa-la lɛ dɩ nɩalɩŋ ka gbɛrɛ Zɛkarɩya kaala-la tʋɔŋ, ʋ kperiba wɩɩ-la sɩ tɩɩ ʋ didieni ŋɩɩ Wɩa dɩɩ-bal-la tʋɔŋ. 22Ŋɩɩ nɛ Wɩa tɩndaarʋ-la viiri, aŋ ka Zɛkarɩya kʋ lɩɩ kaala nɩalɩŋ teeŋ. Ʋ bɩ wɩaa wuo bʋla pɩba. Ŋɩɩ nɛ ʋ kɛŋ ʋ nɩsaa a bʋl wɩaa ba teeŋ. Ʋ sɩ bɩ wɩaa wuo bʋbʋl ŋɩɩ, ba jɩŋ arɩ ʋ na wɩaa a nagɛ duosoo tʋɔŋ nɛ Wɩa dɩɩ-bal-la tʋɔŋ. 23Ŋɩɩ nɛ Zɛkarɩya tɩntɩŋŋaa tapʋlaa dɛrɛ Wɩa dɩɩ-bal-la lɛ. Ʋ mɩɩra mʋ ʋ dɩa.
24Ʋ bɩ diene, ka ʋ haala Ɛlɩzabɛt kɛŋ luoruŋ. Ʋ sɩ kɛŋ luoruŋ ŋɩɩ, ʋ bɩ dɩa lɛ lɩa chɛnsɩŋ banɔŋ. 25Ʋ bʋl, “Wɩa diene nɛ aŋ lɛɛlɛ pɛ mɩ lɛ ŋ-la. Ʋ tɔ mɩ hɩɩsɩŋ nɛ dʋnɩa lɛ.”
Ba bʋl Yesu lʋlʋŋ wɩaa
26Ɛlɩzabɛt sɩ kɛŋ luoruŋ ʋ chɛnsɩŋ balɩdʋ lɛ, Wɩa bɩra tɩŋ ʋ tɩndaara Gebiral dɩ ʋ mʋ Galilii tinteeŋ taŋ kʋbala baa yɩrɛ Nazarɛt. 27Ʋ tɩmʋ dɩ ʋ kɛŋ tɩndaarɩŋ mʋ pɩ hatolo kʋbala ha sɩ bɩ baal jɩŋ baa yɩrɛ Mɛɛrɩ. Ʋ faa chɛ dɩ ʋ jaa baal kʋbala nɛ baa yɩrɛ Josɛf. Josɛf fa ŋaa kuoro Devit doho nʋʋ nɛ.
28Ŋɩɩ nɛ Wɩa tɩndaarʋ-la kɔ ʋ teeŋ a chʋɔlʋ aŋ bʋla pʋ, “Wɩa cho ŋ wɩaa nɛ a pɛ ŋ lɛ woruŋ.” 29Mɛɛrɩ sɩ nɩɩ wɩalɩŋ Wɩa tɩndaarʋ-la sɩ bʋla pʋ, fawʋllʋŋ kɛnʋ. Ʋ kɛŋ wɩalɩŋ ʋ sɩ bʋla bʋbʋɔŋ bɩbɩɩnɛ. 30Ŋɩɩ nɛ Wɩa tɩndaarʋ-la bʋla pʋ, “Mɛɛrɩ, Wɩa cho ŋ wɩaa, sɩ́ leŋe dɩ fawʋllʋŋ kɛnɩŋ. 31Ŋ jaŋ kɛŋ luoruŋ a lʋl hambolibie, a hɛ ʋ yɩrɩŋ Yesu. 32Ʋ jaŋ ŋaa nɩbal. Ba jaŋ kɛnʋ yɩrɛ Wɩɩ-balɩŋ Bie. Wɩa jaŋ ŋaa dɩ ʋ dii kuoruŋ arɩ ʋ naabalɩma Devit fa sɩ dii kuoruŋ ŋɩɩ. 33Ʋ jaŋ dii kuoruŋ Jekɔb doho nɩaa tʋɔŋ a kaa mʋ wuu. Ʋ kuoruŋ bɩ jaŋ dɛrɛ da.” 34Ŋɩɩ nɛ Mɛɛrɩ bʋla pɩ Wɩa tɩndaarʋ-la, “Mɩ ha bɩ baal jɩŋ. Ɛɛ nɛ saa wɩɩŋ deeŋ jaŋ wuo ŋaa?” 35Ŋɩɩ nɛ Wɩa tɩndaarʋ-la bʋla pʋ, “Wɩa Dɩŋ-zɔmʋŋ jaŋ kʋ hɛ ŋ lɛ. Ŋ jaŋ kɛŋ luoruŋ Wɩa doluŋ lɛ. Ŋɩɩ wɩaa bile jaŋ ŋaa tʋɔpʋl Tɩɩna. Ba kɛnʋ yɩyɩrɛ Wɩa Bie. 36Na ŋ naambie Ɛlɩzabɛt sɩ hɩɛsa ŋɩɩ. Ba sɩ ʋ bɩ bii wuo lʋl, aŋ ka ʋ kɛŋ luoruŋ ʋ chɛnsɩŋ balɩdʋ nɛ ŋ-la. 37Wɩɩkala bɩ Wɩa wuo kperi.” 38Ŋɩɩ nɛ Mɛɛrɩ bʋla pʋ, “Mɩ ŋaa Wɩa tɩntɩnnʋ nɛ. Leŋ dɩ wɩalɩŋ ŋ sɩ bʋla pɩmɛ ŋaa.” Ŋɩɩ nɛ Wɩa tɩndaarʋ-la taʋ aŋ viiri.
Mɛɛrɩ mʋ chʋɔlɛ Ɛlɩzabɛt
39Ŋɩɩ nɛ Mɛɛrɩ sii lɩma lɩma a mʋ dɩ ʋ chʋɔlɛ Ɛlɩzabɛt ʋ jaŋ lɛ. Ʋ fa hɛ Judiya tinteeŋ lɛ nɛ, lee-la peelee sɩ yʋga. 40Ʋ sɩ yi nɩmɛ, ʋ mʋ jʋʋ Zɛkarɩya dɩa a mʋ chʋɔlɛ ʋ haala Ɛlɩzabɛt. 41Ʋ laa Mɛɛrɩ chʋɔlaa. Ʋ sɩ laa ŋɩɩ, bile sɩ hɛ ʋ luoruŋ lɛ sii bɩrɩmɛ. Ŋɩɩ nɛ Wɩa Dɩŋ-zɔmʋŋ kʋ hɛ Ɛlɩzabɛt lɛ woruŋ. 42Ʋ faasa bʋla pɩ Mɛɛrɩ, “Wɩa pɛ ŋ lɛ nɛ a kɩɩ haalaa kala. Wɩa jaŋ pɛ bile ŋ sɩ jaŋ lʋl lɛ. 43Mɩ ma nɛ kʋbɛɛ, Wɩa Bie naaŋ kɔ dɩ ʋ chʋɔlɛmɛ? 44Mɩ sɩ laa ŋ chʋɔlaa ŋɩɩ, bile sɩ hɛ mɩ luoruŋ lɛ tʋɔŋ ma tɔrɛ, ʋ sii fɩfɩl. 45Ŋ ma laa dii arɩ wɩalɩŋ Wɩa sɩ bʋla pɩŋ jaŋ ŋaa wʋtɩtɩɩba. Ŋɩɩ wɩaa ŋ tʋɔŋ jaŋ tɔrɛ.”
Mɛɛrɩ dɛnnɛ Wɩa
46Ŋɩɩ nɛ Mɛɛrɩ bʋl,
“Mɩ tʋɔŋ tɔrɔ nɛ, mɩ dɩdɛnnɛ Wɩa.
47Wɩa nɛ ŋaa mɩ Laataara, ŋɩɩ nɛ tɩɩ mɩ jʋjʋɔsɛ.
48Mɩ ŋaa ʋ tɩntɩnnɩ-bii nɛ, ʋ liisi mɩ wɩaa.
A lɩɩ lɛɛlɛ a kaa mʋ, nʋʋkala jaŋ kɛmmɛ yɩyɩrɛ tʋɔtɔrɛ tɩɩna.
49Wɩa ŋaa Wɩɩ-bal nɛ a ŋaa wʋkpuŋkperisiŋ mɩ lɛ.
Ʋ nɛ tʋɔpʋl Tɩɩna.
50Ʋʋ fá nɩalɩŋ kala sɩɩ fáʋ nenige nɛ,
doho-na kala lɛ.
51Ʋ kɛŋ ʋ naduo-la kaa tɩɛnɛ
a ŋmoo babiibalaa a ŋaa ba wɩaa kala pugi.
52Ʋ kiri nɩbalaa ba kuoru kpasɩnɩŋ nyuŋ nɛ
aŋ leŋ nɩalɩŋ sɩ kɛŋ ba tɩtɩa muuri hɔŋ.
53Ʋ joŋ kʋzɔŋŋɔɔ a pɩ summoo nɛ
aŋ kiri nɩalɩŋ sɩ kɛŋ kɩaa ba kɛŋ nahɩllɩŋ mɩɩrɛ.
54Ʋ fa bil niiŋ nɛ a pɩ la naabalɩmaba
dɩ ʋ jaŋ pɛ ʋ tɩntɩnnaa Iziral tɩŋŋaa lɛ. Wɩɩ-la ʋ fa sɩ bʋla kʋ ŋaa wʋtɩtɩɩ. Ʋ pɛ ba lɛ.
55Ʋ fa fá Abɩraham nenige nɛ.
Ʋ saa jaŋ fá ʋ doho nɩaa kala ma nenige a kaa mʋ wuu.”
56Mɛɛrɩ sɩ bʋl wɩalɩŋ dɛrɛ, ʋ hɔŋ Ɛlɩzabɛt teeŋ a yi chɛnsɩŋ batori nɛ, aŋ-na mɩɩra mʋ dɩa.
Ba lʋl Jɔɔŋ, Wɩa lɩɩ-fooru-la
57Ŋɩɩ nɛ Ɛlɩzabɛt lʋlʋŋ yi. Ʋ lʋl hambolibie. 58Ʋ sɩ lʋl ŋɩɩ, ʋ pɛ-jʋʋraa arɩ ʋ naambiiriŋ nɩɩ ŋɩɩ Wɩa sɩ fá ʋ nenige. Ba tʋɔŋ kala tɔrɛ, ba jʋjʋɔsɛ.
59Bile sɩ yi tapʋlaa chori a magɛ dɩ ba keri ʋ peniŋ aŋ hɛ ʋ yɩrɩŋ, ba faa chɛ dɩ ba joŋ ʋ nyɩmma Zɛkarɩya yɩrɩŋ nɛ hɛ pʋ. 60Ŋɩɩ nɛ ʋ naaŋ vɩa aŋ bʋl dɩ ba hɛ Jɔɔŋ pʋ.
61Nɩhɩasɩ-la bʋla pʋ arɩ ba bɩ naambii kala kɛnɛ ʋ yɩrɩŋ dii Jɔɔŋ. 62Ŋɩɩ nɛ ba kɛŋ nɩsaa bʋl wɩaa ʋ nyɩmma teeŋ a pɩɛsʋ dɩ yɩrɩ bɛɛ nɛ ʋʋ chɛ dɩ ʋ hɛ pʋ.
63Zɛkarɩya ŋaa ba kɛŋ daa-bori-bie kaa kɔ dɩ ʋ ŋmʋnsɛ bile yɩrɩŋ a pɩba. Ba joŋo pʋ. Ʋ ŋmʋnsɛ daa-boro-la lɛ dɩ bile yɩrɩŋ nɛ Jɔɔŋ. Ba sɩ karɩma na bile yɩrɩŋ, ʋ ŋaaba wʋkpuŋkpere. 64Zɛkarɩya sɩ ŋaa ŋɩɩ dɛrɛ, ʋ niiŋ suri ʋ bɩra suomi a bʋbʋl wɩaa a dɩdɛnnɛ Wɩa.
65Nɩalɩŋ fa sɩ hɛ nɩmɛ a na wɩɩ-la sɩ ŋaa, fawʋllʋŋ kɛmba. Ba kɛŋ wɩɩ-la lɩɩ a bʋla gaarɛ Judiya tinteeŋ sɛmɛ-na kala, lee-la peelee sɩ yʋga. 66Nɩalɩŋ kala sɩ nɩɩ ŋɩɩ, ba kɛŋ wɩɩ-la bɩbɩɩnɛ ba tʋɔŋ lɛ aa bʋl, “Bie deeŋ saa jaŋ ŋaa kʋbɛɛ nɛ?” Ba na arɩ Wɩa doluŋ hɛ ʋ lɛ nɛ.
Zɛkarɩya bʋl wɩaa Wɩa Dɩŋ-zɔmʋŋ doluŋ lɛ
67Ŋɩɩ nɛ Wɩa Dɩŋ-zɔmʋŋ kʋ hɛ Zɛkarɩya lɛ ʋ bʋl wɩaa Wɩa doluŋ lɛ, ʋ sɩ,
68“Má leŋ dɩ la dɛnnɛ La Tɩɩna Iziral tɩŋŋaa Wɩa.
Ʋ kɔ dɩ ʋ pɛ ʋ nɩaa lɛ nɛ a laaba ta.
69Ʋ lɩɩsɛ nɩduo nɛ pɩla dɩ ʋ kʋ laala ta.
Ʋ lɩɩ Devit doho nɩaa tʋɔŋ nɛ.
70Faafaa kala nɛ Wɩa to ʋ wʋlaabʋllaa lɛ, a bʋla pɩla
71arɩ ʋ jaŋ laala ta la dʋndɔŋŋɔɔ
arɩ nɩalɩŋ kala sɩ bɛrɛla nɩsɩŋ lɛ.
72Ʋ bʋla arɩ ʋ jaŋ fá la doho nɩaa nenige,
a liise yi nii-zɔŋ-la ʋ sɩ bile ʋ dɩ la naabalɩmaba pɛgɛ.
73-74Ʋ fa bʋla pɩ la naabalɩma Abɩraham a ŋmɩɛsɛ
arɩ ʋ jaŋ laala ta la dʋndɔŋŋɔɔ nɩsɩŋ lɛ
a pɩla wombiiŋ dɩ la kɛŋ nyuduoŋ a tɩma pʋ.
75Ŋɩɩ lɛ nɛ la jaŋ to a ŋaa nɩa sɩ bɩ disiniŋ kɛnɛ,
a kɛŋ tʋɔpʋla ʋ teeŋ la mɩɩsɩŋ kala lɛ.”
76Zɛkarɩya sɩ bʋl wɩaa deemba dɛrɛ, ʋ bʋl wɩaa a tɩgɛ ʋ bie ma lɛ,
“Ŋ-na mɩ bii, ŋ jaŋ ŋaa Wɩɩ-balɩŋ wʋlaabʋllʋ.
Ŋ jaŋ laa La Tɩɩna-la sɩ jaŋ kɔ sɩpaaŋ
a wasɛ wombiiŋ bil ʋ lɛ.
77Ŋ jaŋ bʋla pɩ nɩalɩŋ sɩ ŋaa siri dɩ ba tou, dɩ Wɩa jaŋ joŋ ba wʋbɔŋŋɔɔ chɛba aŋ laaba ta.
78Wɩa kɛŋ zile aŋ fɩfá nɩaa nenige.
Ʋ jaŋ laala ta a leŋ dɩ la hɔŋ pʋlʋmʋŋ tʋɔŋ.
79Pʋlʋŋ-la jaŋ lɩɩ Wɩa-jaŋ a pɔsɛ hɛ nɩalɩŋ kala sɩ hɔŋ birimiŋ tʋɔŋ a faa chɛ dɩ ba sʋʋ.
Ʋ jaŋ dagɛla wombii-la sɩ kɛŋ yarɩfɩɛlaa dɩ la to.”
80Ŋɩɩ nɛ bile sii waa a hɛ yaraa a kɛŋ doluŋ arɩ wʋjɩmɩŋ. Ʋ mʋ hɛ tintee-hɩlɩŋ tʋɔŋ a mʋ yi tapʋlɩɩ-la ʋ sɩ kɛŋ ʋ tɩtɩa kaa kʋ lɩɩ dagɛ Iziral tɩŋŋaa.
Currently Selected:
Luuk 1: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
Luuk 1
1
1Mɩ-na Luuk nɛ ŋmʋnsɛ teniŋ deeŋ a pɩpɩ ŋ-na mɩ nandɔŋɔ Tɩafɩlos. Nɩaa yʋga a hɛ doluŋ a ŋmʋnsɛ wɩalɩŋ kala sɩ ŋaa la sɩɩŋ lɛ. 2Ba ŋmʋnsɛ wɩalɩŋ kala nɩaa sɩ bʋla pɩla nɛ. Ba nɛ na wɩaa deemba kala a suomi bumbuŋ kala, a ma bʋl Wɩa niiŋ wɩaa a pɩpɩ nɩaa.
3Mɩ kʋhɩaŋ, mɩ pɩa na wɩaa deemba kala nɛ woruŋ, a lɩɩ ba dɩ-suomuŋ. Mɩ na dɩ ʋ ŋaa wʋzɔŋ nɛ dɩ mɩ ŋmʋnsɛ wɩalɩŋ kala sɩ vɛŋ ŋɩɩ a pɩŋ. 4Mɩ ŋmʋnsaa pɩŋ dɩ ŋ wuo jɩŋ arɩ wɩalɩŋ kala ba sɩ dagɩŋ ŋaa wʋtɩtɩɩba nɛ.
Ba bʋl Jɔɔŋ Wɩa lɩɩ-fooro lʋlʋŋ wɩaa
5Bʋa-la lɛ Hɛrɔd fa sɩ ŋaa Judiya tinteeŋ kuoro, dɩ baal kʋbala baa yɩrɛ Zɛkarɩya fa hɛ nɩmɛ a ŋaa Wɩɩsʋllɩ sɩpaalaaraa dɔŋɔ. Ba fa kɛŋ Wɩɩsʋllɩ sɩpaalaaraa kaa kpaa kpaa nɛ, Zɛkarɩya fa pɛ baal kʋbala ba sɩɩ yɩrɛ Abija nɩaa tʋɔŋ. Zɛkarɩya haala yɩrɩŋ nɛ Ɛlɩzabɛt. Ʋ ma fa ŋaa Arɔŋ doho nʋʋ nɛ. 6Zɛkarɩya arɩ ʋ haala kala fa ŋaa tʋɔpʋl tɩmma nɛ. Ba faa to Wɩa niiriŋ arɩ ʋ wʋdagaa nɛ woruŋ a bɩ wʋcheeli kala kɛnɛ. 7Ba fa bɩ bii kala lʋla, bɛɛ wɩaa Ɛlɩzabɛt fa ŋaa hapɩrɩ nɛ, ka ʋ dɩ ʋ bala Zɛkarɩya kala hɩɛsɛ.
8Ŋɩɩ nɛ Zɛkarɩya arɩ ʋ tɩntɩnnɩ dɔsʋŋ tapʋlʋŋ yi dɩ ba tɩŋ tɩntɩŋŋaa, Wɩɩsʋllɩ sɩpaalaaraa sɩ vɛnɛɛ tɩŋ. 9Ba tɩntɩŋŋaa lɛ, ba yie tɔnsɛ nɛ a lɩɩsɛ nɩɩ-la sɩ jaŋ jʋʋ Wɩa dɩɩ-bal-la a nyɩgɛ kʋsʋɔrʋsʋŋ. Ba tɔnsɛ a lɩɩsɛ Zɛkarɩya, ʋ jʋʋ Wɩa dɩɩ-bal-la. 10Ʋ sɩ jʋʋ ŋɩɩ, bʋa-la yi dɩ ʋ nyɩgɛ kʋsʋɔrʋsʋŋ, ka nɩ-daŋ-la kala hɛ Wɩa dɩɩ-bal-la kaala lɛ a chʋchʋɔlɛ Wɩa.
11Zɛkarɩya sɩ nyɩgɛ nyiniŋ ŋɩɩ, dɩ Wɩa tɩndaara kɔ ʋ teeŋ a chɩŋ koru-la sɛmɛ nadiiŋ. 12Zɛkarɩya naʋ, fawʋllʋŋ kɛnʋ ʋ chichel. 13Ŋɩɩ nɛ Wɩa tɩndaarʋ-la bʋla pʋ, “Zɛkarɩya, sɩ́ leŋe dɩ fawʋllʋŋ kɛnɩŋ. Wɩalɩŋ ŋ sɩ sʋl Wɩa chɩchɛ, ʋ joŋo pɩŋ nɛ. Ŋ haala Ɛlɩzabɛt jaŋ lʋl baal. Ŋ jaŋ hɛ ʋ yɩrɩŋ Jɔɔŋ. 14Ʋ jaŋ leŋ dɩ ŋ tʋɔŋ faasa tɔrɛ. Nɩ-daŋ ma tʋɔŋ jaŋ tɔrɛ ʋ lʋlʋŋ wɩaa. 15Ʋ jaŋ ŋaa nɩbal La Tɩɩna teeŋ. Ʋ bɩ jaŋ nyʋnyʋa sɩ-duo kala. Ba jaŋ lʋlʋ, dɩ Wɩa Dɩŋ-zɔmʋŋ hɛ ʋ lɛ woruŋ. 16Ʋ jaŋ ŋaa dɩ Iziral tɩŋŋaa yʋgɛ a bɩrɩma to ba Tɩɩna Wɩa. 17Ʋ jaŋ ŋaa Wɩa tɩntɩnnʋ a kɛŋ doluŋ arɩ Ɩlaaja fa sɩ kɛŋ doluŋ ŋɩɩ. (Ɩlaaja fa ŋaa Wɩa wʋlaabʋllʋ nɛ.) Ʋ jaŋ ŋaa dɩ biiriŋ arɩ ba nyɩmmaba kala mɩɩra sɩŋ. Ʋ jaŋ ŋaa dɩ nɩalɩŋ sɩ bɩ Wɩa niiŋ wɩaa ka to, dɩ ba bɩrɩmɛ a to tʋɔpʋl tɩŋŋaa wombiiŋ a leŋ dɩ nɩaa ŋaa siri a gbɛrɛ ba Tɩɩna.”
18Ŋɩɩ nɛ Zɛkarɩya pɩɛsɛ Wɩa tɩndaarʋ-la, “Ɛɛ nɛ mɩ jaŋ ŋaa a jɩŋ dɩ wɩalɩŋ ŋ sɩ bʋla ŋaa wʋtɩtɩɩ nɛ? Mɩ ŋaa banɩhɩaŋ nɛ, mɩ haala ma hɩɛsɛ.”
19Ŋɩɩ nɛ Wɩa tɩndaarʋ-la bʋla pʋ, “Mɩ yɩrɩŋ nɛ Gebiral a hɔŋ Wɩa sɛmɛ. Ʋ nɛ tɩmmɛ dɩ mɩ kʋ bʋl wʋzɔmʋŋ deeŋ a pɩŋ. 20Wɩalɩŋ mɩ sɩ bʋla pɩŋ jaŋ ŋaa, aŋ ka ŋ bɩ laa dii. Ŋɩɩ wɩaa ŋ bɩra bɩ wɩaa jaŋ wuo bʋl, see tapʋlɩɩ-la sɩ yie dɩ wɩaa deemba mɩ sɩ bʋla pɩŋ ŋaa.”
21Bʋa-la lɛ dɩ nɩalɩŋ ka gbɛrɛ Zɛkarɩya kaala-la tʋɔŋ, ʋ kperiba wɩɩ-la sɩ tɩɩ ʋ didieni ŋɩɩ Wɩa dɩɩ-bal-la tʋɔŋ. 22Ŋɩɩ nɛ Wɩa tɩndaarʋ-la viiri, aŋ ka Zɛkarɩya kʋ lɩɩ kaala nɩalɩŋ teeŋ. Ʋ bɩ wɩaa wuo bʋla pɩba. Ŋɩɩ nɛ ʋ kɛŋ ʋ nɩsaa a bʋl wɩaa ba teeŋ. Ʋ sɩ bɩ wɩaa wuo bʋbʋl ŋɩɩ, ba jɩŋ arɩ ʋ na wɩaa a nagɛ duosoo tʋɔŋ nɛ Wɩa dɩɩ-bal-la tʋɔŋ. 23Ŋɩɩ nɛ Zɛkarɩya tɩntɩŋŋaa tapʋlaa dɛrɛ Wɩa dɩɩ-bal-la lɛ. Ʋ mɩɩra mʋ ʋ dɩa.
24Ʋ bɩ diene, ka ʋ haala Ɛlɩzabɛt kɛŋ luoruŋ. Ʋ sɩ kɛŋ luoruŋ ŋɩɩ, ʋ bɩ dɩa lɛ lɩa chɛnsɩŋ banɔŋ. 25Ʋ bʋl, “Wɩa diene nɛ aŋ lɛɛlɛ pɛ mɩ lɛ ŋ-la. Ʋ tɔ mɩ hɩɩsɩŋ nɛ dʋnɩa lɛ.”
Ba bʋl Yesu lʋlʋŋ wɩaa
26Ɛlɩzabɛt sɩ kɛŋ luoruŋ ʋ chɛnsɩŋ balɩdʋ lɛ, Wɩa bɩra tɩŋ ʋ tɩndaara Gebiral dɩ ʋ mʋ Galilii tinteeŋ taŋ kʋbala baa yɩrɛ Nazarɛt. 27Ʋ tɩmʋ dɩ ʋ kɛŋ tɩndaarɩŋ mʋ pɩ hatolo kʋbala ha sɩ bɩ baal jɩŋ baa yɩrɛ Mɛɛrɩ. Ʋ faa chɛ dɩ ʋ jaa baal kʋbala nɛ baa yɩrɛ Josɛf. Josɛf fa ŋaa kuoro Devit doho nʋʋ nɛ.
28Ŋɩɩ nɛ Wɩa tɩndaarʋ-la kɔ ʋ teeŋ a chʋɔlʋ aŋ bʋla pʋ, “Wɩa cho ŋ wɩaa nɛ a pɛ ŋ lɛ woruŋ.” 29Mɛɛrɩ sɩ nɩɩ wɩalɩŋ Wɩa tɩndaarʋ-la sɩ bʋla pʋ, fawʋllʋŋ kɛnʋ. Ʋ kɛŋ wɩalɩŋ ʋ sɩ bʋla bʋbʋɔŋ bɩbɩɩnɛ. 30Ŋɩɩ nɛ Wɩa tɩndaarʋ-la bʋla pʋ, “Mɛɛrɩ, Wɩa cho ŋ wɩaa, sɩ́ leŋe dɩ fawʋllʋŋ kɛnɩŋ. 31Ŋ jaŋ kɛŋ luoruŋ a lʋl hambolibie, a hɛ ʋ yɩrɩŋ Yesu. 32Ʋ jaŋ ŋaa nɩbal. Ba jaŋ kɛnʋ yɩrɛ Wɩɩ-balɩŋ Bie. Wɩa jaŋ ŋaa dɩ ʋ dii kuoruŋ arɩ ʋ naabalɩma Devit fa sɩ dii kuoruŋ ŋɩɩ. 33Ʋ jaŋ dii kuoruŋ Jekɔb doho nɩaa tʋɔŋ a kaa mʋ wuu. Ʋ kuoruŋ bɩ jaŋ dɛrɛ da.” 34Ŋɩɩ nɛ Mɛɛrɩ bʋla pɩ Wɩa tɩndaarʋ-la, “Mɩ ha bɩ baal jɩŋ. Ɛɛ nɛ saa wɩɩŋ deeŋ jaŋ wuo ŋaa?” 35Ŋɩɩ nɛ Wɩa tɩndaarʋ-la bʋla pʋ, “Wɩa Dɩŋ-zɔmʋŋ jaŋ kʋ hɛ ŋ lɛ. Ŋ jaŋ kɛŋ luoruŋ Wɩa doluŋ lɛ. Ŋɩɩ wɩaa bile jaŋ ŋaa tʋɔpʋl Tɩɩna. Ba kɛnʋ yɩyɩrɛ Wɩa Bie. 36Na ŋ naambie Ɛlɩzabɛt sɩ hɩɛsa ŋɩɩ. Ba sɩ ʋ bɩ bii wuo lʋl, aŋ ka ʋ kɛŋ luoruŋ ʋ chɛnsɩŋ balɩdʋ nɛ ŋ-la. 37Wɩɩkala bɩ Wɩa wuo kperi.” 38Ŋɩɩ nɛ Mɛɛrɩ bʋla pʋ, “Mɩ ŋaa Wɩa tɩntɩnnʋ nɛ. Leŋ dɩ wɩalɩŋ ŋ sɩ bʋla pɩmɛ ŋaa.” Ŋɩɩ nɛ Wɩa tɩndaarʋ-la taʋ aŋ viiri.
Mɛɛrɩ mʋ chʋɔlɛ Ɛlɩzabɛt
39Ŋɩɩ nɛ Mɛɛrɩ sii lɩma lɩma a mʋ dɩ ʋ chʋɔlɛ Ɛlɩzabɛt ʋ jaŋ lɛ. Ʋ fa hɛ Judiya tinteeŋ lɛ nɛ, lee-la peelee sɩ yʋga. 40Ʋ sɩ yi nɩmɛ, ʋ mʋ jʋʋ Zɛkarɩya dɩa a mʋ chʋɔlɛ ʋ haala Ɛlɩzabɛt. 41Ʋ laa Mɛɛrɩ chʋɔlaa. Ʋ sɩ laa ŋɩɩ, bile sɩ hɛ ʋ luoruŋ lɛ sii bɩrɩmɛ. Ŋɩɩ nɛ Wɩa Dɩŋ-zɔmʋŋ kʋ hɛ Ɛlɩzabɛt lɛ woruŋ. 42Ʋ faasa bʋla pɩ Mɛɛrɩ, “Wɩa pɛ ŋ lɛ nɛ a kɩɩ haalaa kala. Wɩa jaŋ pɛ bile ŋ sɩ jaŋ lʋl lɛ. 43Mɩ ma nɛ kʋbɛɛ, Wɩa Bie naaŋ kɔ dɩ ʋ chʋɔlɛmɛ? 44Mɩ sɩ laa ŋ chʋɔlaa ŋɩɩ, bile sɩ hɛ mɩ luoruŋ lɛ tʋɔŋ ma tɔrɛ, ʋ sii fɩfɩl. 45Ŋ ma laa dii arɩ wɩalɩŋ Wɩa sɩ bʋla pɩŋ jaŋ ŋaa wʋtɩtɩɩba. Ŋɩɩ wɩaa ŋ tʋɔŋ jaŋ tɔrɛ.”
Mɛɛrɩ dɛnnɛ Wɩa
46Ŋɩɩ nɛ Mɛɛrɩ bʋl,
“Mɩ tʋɔŋ tɔrɔ nɛ, mɩ dɩdɛnnɛ Wɩa.
47Wɩa nɛ ŋaa mɩ Laataara, ŋɩɩ nɛ tɩɩ mɩ jʋjʋɔsɛ.
48Mɩ ŋaa ʋ tɩntɩnnɩ-bii nɛ, ʋ liisi mɩ wɩaa.
A lɩɩ lɛɛlɛ a kaa mʋ, nʋʋkala jaŋ kɛmmɛ yɩyɩrɛ tʋɔtɔrɛ tɩɩna.
49Wɩa ŋaa Wɩɩ-bal nɛ a ŋaa wʋkpuŋkperisiŋ mɩ lɛ.
Ʋ nɛ tʋɔpʋl Tɩɩna.
50Ʋʋ fá nɩalɩŋ kala sɩɩ fáʋ nenige nɛ,
doho-na kala lɛ.
51Ʋ kɛŋ ʋ naduo-la kaa tɩɛnɛ
a ŋmoo babiibalaa a ŋaa ba wɩaa kala pugi.
52Ʋ kiri nɩbalaa ba kuoru kpasɩnɩŋ nyuŋ nɛ
aŋ leŋ nɩalɩŋ sɩ kɛŋ ba tɩtɩa muuri hɔŋ.
53Ʋ joŋ kʋzɔŋŋɔɔ a pɩ summoo nɛ
aŋ kiri nɩalɩŋ sɩ kɛŋ kɩaa ba kɛŋ nahɩllɩŋ mɩɩrɛ.
54Ʋ fa bil niiŋ nɛ a pɩ la naabalɩmaba
dɩ ʋ jaŋ pɛ ʋ tɩntɩnnaa Iziral tɩŋŋaa lɛ. Wɩɩ-la ʋ fa sɩ bʋla kʋ ŋaa wʋtɩtɩɩ. Ʋ pɛ ba lɛ.
55Ʋ fa fá Abɩraham nenige nɛ.
Ʋ saa jaŋ fá ʋ doho nɩaa kala ma nenige a kaa mʋ wuu.”
56Mɛɛrɩ sɩ bʋl wɩalɩŋ dɛrɛ, ʋ hɔŋ Ɛlɩzabɛt teeŋ a yi chɛnsɩŋ batori nɛ, aŋ-na mɩɩra mʋ dɩa.
Ba lʋl Jɔɔŋ, Wɩa lɩɩ-fooru-la
57Ŋɩɩ nɛ Ɛlɩzabɛt lʋlʋŋ yi. Ʋ lʋl hambolibie. 58Ʋ sɩ lʋl ŋɩɩ, ʋ pɛ-jʋʋraa arɩ ʋ naambiiriŋ nɩɩ ŋɩɩ Wɩa sɩ fá ʋ nenige. Ba tʋɔŋ kala tɔrɛ, ba jʋjʋɔsɛ.
59Bile sɩ yi tapʋlaa chori a magɛ dɩ ba keri ʋ peniŋ aŋ hɛ ʋ yɩrɩŋ, ba faa chɛ dɩ ba joŋ ʋ nyɩmma Zɛkarɩya yɩrɩŋ nɛ hɛ pʋ. 60Ŋɩɩ nɛ ʋ naaŋ vɩa aŋ bʋl dɩ ba hɛ Jɔɔŋ pʋ.
61Nɩhɩasɩ-la bʋla pʋ arɩ ba bɩ naambii kala kɛnɛ ʋ yɩrɩŋ dii Jɔɔŋ. 62Ŋɩɩ nɛ ba kɛŋ nɩsaa bʋl wɩaa ʋ nyɩmma teeŋ a pɩɛsʋ dɩ yɩrɩ bɛɛ nɛ ʋʋ chɛ dɩ ʋ hɛ pʋ.
63Zɛkarɩya ŋaa ba kɛŋ daa-bori-bie kaa kɔ dɩ ʋ ŋmʋnsɛ bile yɩrɩŋ a pɩba. Ba joŋo pʋ. Ʋ ŋmʋnsɛ daa-boro-la lɛ dɩ bile yɩrɩŋ nɛ Jɔɔŋ. Ba sɩ karɩma na bile yɩrɩŋ, ʋ ŋaaba wʋkpuŋkpere. 64Zɛkarɩya sɩ ŋaa ŋɩɩ dɛrɛ, ʋ niiŋ suri ʋ bɩra suomi a bʋbʋl wɩaa a dɩdɛnnɛ Wɩa.
65Nɩalɩŋ fa sɩ hɛ nɩmɛ a na wɩɩ-la sɩ ŋaa, fawʋllʋŋ kɛmba. Ba kɛŋ wɩɩ-la lɩɩ a bʋla gaarɛ Judiya tinteeŋ sɛmɛ-na kala, lee-la peelee sɩ yʋga. 66Nɩalɩŋ kala sɩ nɩɩ ŋɩɩ, ba kɛŋ wɩɩ-la bɩbɩɩnɛ ba tʋɔŋ lɛ aa bʋl, “Bie deeŋ saa jaŋ ŋaa kʋbɛɛ nɛ?” Ba na arɩ Wɩa doluŋ hɛ ʋ lɛ nɛ.
Zɛkarɩya bʋl wɩaa Wɩa Dɩŋ-zɔmʋŋ doluŋ lɛ
67Ŋɩɩ nɛ Wɩa Dɩŋ-zɔmʋŋ kʋ hɛ Zɛkarɩya lɛ ʋ bʋl wɩaa Wɩa doluŋ lɛ, ʋ sɩ,
68“Má leŋ dɩ la dɛnnɛ La Tɩɩna Iziral tɩŋŋaa Wɩa.
Ʋ kɔ dɩ ʋ pɛ ʋ nɩaa lɛ nɛ a laaba ta.
69Ʋ lɩɩsɛ nɩduo nɛ pɩla dɩ ʋ kʋ laala ta.
Ʋ lɩɩ Devit doho nɩaa tʋɔŋ nɛ.
70Faafaa kala nɛ Wɩa to ʋ wʋlaabʋllaa lɛ, a bʋla pɩla
71arɩ ʋ jaŋ laala ta la dʋndɔŋŋɔɔ
arɩ nɩalɩŋ kala sɩ bɛrɛla nɩsɩŋ lɛ.
72Ʋ bʋla arɩ ʋ jaŋ fá la doho nɩaa nenige,
a liise yi nii-zɔŋ-la ʋ sɩ bile ʋ dɩ la naabalɩmaba pɛgɛ.
73-74Ʋ fa bʋla pɩ la naabalɩma Abɩraham a ŋmɩɛsɛ
arɩ ʋ jaŋ laala ta la dʋndɔŋŋɔɔ nɩsɩŋ lɛ
a pɩla wombiiŋ dɩ la kɛŋ nyuduoŋ a tɩma pʋ.
75Ŋɩɩ lɛ nɛ la jaŋ to a ŋaa nɩa sɩ bɩ disiniŋ kɛnɛ,
a kɛŋ tʋɔpʋla ʋ teeŋ la mɩɩsɩŋ kala lɛ.”
76Zɛkarɩya sɩ bʋl wɩaa deemba dɛrɛ, ʋ bʋl wɩaa a tɩgɛ ʋ bie ma lɛ,
“Ŋ-na mɩ bii, ŋ jaŋ ŋaa Wɩɩ-balɩŋ wʋlaabʋllʋ.
Ŋ jaŋ laa La Tɩɩna-la sɩ jaŋ kɔ sɩpaaŋ
a wasɛ wombiiŋ bil ʋ lɛ.
77Ŋ jaŋ bʋla pɩ nɩalɩŋ sɩ ŋaa siri dɩ ba tou, dɩ Wɩa jaŋ joŋ ba wʋbɔŋŋɔɔ chɛba aŋ laaba ta.
78Wɩa kɛŋ zile aŋ fɩfá nɩaa nenige.
Ʋ jaŋ laala ta a leŋ dɩ la hɔŋ pʋlʋmʋŋ tʋɔŋ.
79Pʋlʋŋ-la jaŋ lɩɩ Wɩa-jaŋ a pɔsɛ hɛ nɩalɩŋ kala sɩ hɔŋ birimiŋ tʋɔŋ a faa chɛ dɩ ba sʋʋ.
Ʋ jaŋ dagɛla wombii-la sɩ kɛŋ yarɩfɩɛlaa dɩ la to.”
80Ŋɩɩ nɛ bile sii waa a hɛ yaraa a kɛŋ doluŋ arɩ wʋjɩmɩŋ. Ʋ mʋ hɛ tintee-hɩlɩŋ tʋɔŋ a mʋ yi tapʋlɩɩ-la ʋ sɩ kɛŋ ʋ tɩtɩa kaa kʋ lɩɩ dagɛ Iziral tɩŋŋaa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014