Luuk 12
12
Yesu bʋla pɩ nɩaa dɩ ba sɩ́ kanfugi tɩŋŋaa nagʋ
Mat. 10.26-27
1Nɩalɩŋ fa sɩ kɔ Yesu teeŋ, ba yi nɩaa bʋɩ bʋɩ a yiyigi dɔŋɔ. Ŋɩɩ nɛ Yesu laa sɩpaaŋ a bʋla pɩ ʋ harɩ-tooroo, “Má pɔ ma tɩtɩa lɛ arɩ Farisii tɩŋŋaa. Ba ŋaa kanfugi tɩmma nɛ. Ba nagɛ sɩbʋrʋŋ nɛ. 2Wɩɩkala sɩ faa, ʋ jaŋ kʋ lɩɩ pʋlʋmʋŋ, nɩaa jaŋ nɩɩ wɩɩ-la ma sɩ ŋaa wʋfaalɩɩ. 3Wɩɩkala ma ŋ sɩ bʋla birimiŋ tʋɔŋ, ba jaŋ nɩɩʋ pʋlʋmʋŋ lɛ. Wɩɩkala ma ŋ sɩ munso bʋl a hɛ nʋʋ dɩgɩlɩŋ lɛ dɩa tʋɔŋ, ba jaŋ faasa heele bʋlʋ lusuŋ nyuŋ.”
Nɩɩ-la sɩ maga dɩ ŋ fá
Mat. 10.28-33; 12.32; 10.19-20
4Ŋɩɩ nɛ Yesu bɩra bʋl, “Mɩ nandɔnsʋŋ, mɩ jaŋ bʋla pɩma, má sɩ́ nɩalɩŋ sɩ jaŋ wuo kpʋ ma yaraa lɛ fá, aŋ bɩra bɩ jaŋ wuo ŋaama wɩɩ dɔŋ kala. 5Mɩ jaŋ dagɛma nɩɩ-la sɩ maga dɩ ma fá. Má fá Wɩa. Ʋ nɛ jaŋ wuo kpʋma aŋ bɩra kɛŋ doluŋ dɩ ʋ wuo jomma hɛ Wɩa nyiniŋ tʋɔŋ. Mɩ bʋlaa pɩma, má fɩfáʋ. 6Zaarɩ-kokobiisiŋ banɔŋ dee ba yie joŋo yallɛ kɔbʋ balɩaa? Ama Wɩa bɩ ba tʋɔŋ kʋbala ma wɩaa yʋa. 7Wɩa paala jɩŋ ma nyu-pʋnaa kala ma niiŋ nɛ. Ŋɩɩ wɩaa, má sɩ́ leŋe dɩ fawʋllʋŋ kɛmma. Ma nɛ paala kɩɩ zaarɩ-kokobiisiŋ a yʋgɛ.
8Mɩ bʋlaa pɩma, nɩɩ-la kala sɩ jaŋ wuo bʋl nɩaa tʋɔŋ arɩ ʋ ŋaa mɩ nʋʋ nɛ, mɩ-na Nuhuobiine Bie ma jaŋ bʋl ŋɩɩ a tɩgɛ ʋ lɛ Wɩa tɩndaaraa sɩpaaŋ. 9Ama nɩɩ-la kala sɩ vɩamɛ nɩaa tʋɔŋ, mɩ-na Nuhuobiine Bie ma jaŋ vɩaʋ Wɩa tɩndaaraa sɩpaaŋ. 10Nɩɩ-la kala sɩ bʋl wʋbɔŋŋɔɔ a mʋ tɩgɛ mɩ-na Nuhuobiine Bie lɛ, Wɩa jaŋ joŋo chɛʋ, ama nɩɩ-la kala sɩ tʋʋsɛ Wɩa Dɩŋ-zɔmʋŋ joŋŋoo, Wɩa bɩ jaŋ joŋo chɛ ʋ tɩɩna.
11Dɩ ba nɛ kɛmma kaa jʋʋ Wɩɩchʋɔlɛ dɩɩsɩŋ dɩ ba diima sarɩya koo dɩ ba nɛ kɛmma mʋ kuoroo arɩ kʋhɩasɩŋ teeŋ, má sɩ́ leŋe dɩ ma bɔɩsɩŋ joŋ ŋɩɩ ma sɩ jaŋ ŋaa a laa ma tɩtɩa, koo wɩɩ-na kala ma sɩ jaŋ bʋl. 12Bʋa-la tɩtɩa lɛ Wɩa Dɩŋ-zɔmʋŋ jaŋ dagɛma wɩɩ-la ma sɩ jaŋ bʋl.”
Yesu magɛ namaga a tɩgɛ bagɩ-daarɩ tʋɔ-luŋ tɩɩna lɛ
13Yesu fa sɩ bʋl wɩaa pɩpɩ nɩ-daŋ-la ŋɩɩ, baal kʋbala lɩɩ ba tʋɔŋ a bʋla pʋ, “Mɩ kʋhɩaŋ, la nyɩmma sʋba nɛ aŋ ka kɩaa. Mɩɩ sʋlʋŋ dɩ ŋ bʋla pɩ mɩ naambie dɩ ʋ leŋ dɩ la kɛŋ kɩalɩŋ kaa kpaa.”
14Ŋɩɩ nɛ Yesu bʋla pʋ, “Mɩ nandɔŋ, mɩ tɩntɩmɩɩ dee dɩ mɩ laa ma sarɩya dii pɩma koo dɩ mɩ kɛŋ ma kɩaa kaa kpaama.” 15Ŋɩɩ nɛ ʋ bɩra bʋla pɩ nɩalɩŋ, “Má fɩɛlɛ ma sɩaa a sɩ́ tʋɔ-luŋuŋ kɛŋ. Dɩ nuhuobiine nɛ kɛŋ kɩaa kɩŋkɛŋ, kɩalɩŋ bɩ jaŋ wuo leŋ dɩ ʋ kɛŋ mɩɩsɩŋ.”
16Ŋɩɩ nɛ Yesu magɛ namaga a bʋl, “Baal kʋbala nɛ fa hɛ nɩmɛ a kɛŋ kɩaa woruŋ a bil ʋ baga. Ʋ baga-la kɩaa wasɛ woruŋ. 17Ŋɩɩ nɛ ʋ bɩɩnɛ ʋ tʋɔŋ lɛ, ‘Ɛɛ nɛ mɩ jaŋ ŋaa? Mɩ bɩra bɩ leriŋ kɛnɛ dɩ mɩ tʋɔlɛ mɩ kɩaa.’ 18Ŋɩɩ nɛ ʋ bʋl, ‘Mɩ jaŋ ŋmoo mɩ virisiŋ deemba mɩ sɩ kɛnɛ a ta aŋ wasa saa kʋbalaa. Mɩ jaŋ joŋ mɩ kuori-mɩaa arɩ mɩ kɩaa kala a tʋɔlɛ nɩmɛ 19aŋ bʋla pɩ mɩ tɩtɩa, mɩ tʋɔlɛ kɩaa yʋgɛ nɛ, mɩ jaŋ dii jɩsɩ arɩ jɩsɩ. Mɩ jaŋ ta jɩa a dii kɩaa a nyʋa kɩaa arɩ tʋɔtɔrʋŋ.’ 20Ŋɩɩ nɛ Wɩa bʋla pʋ, ‘Nɩyaarɩ! Tɩtaŋɩŋ deeŋ mɩ jaŋ leŋ dɩ ŋ sʋʋ. Kɩalɩŋ saa ŋ sɩ chɛ bil ŋ tɩtɩa lɛ, kʋbɛɛ nɛ jaŋ dii?’ ” 21Ŋɩɩ nɛ Yesu bʋla pɩ nɩaa, “Nɩɩ-la kala sɩ yie chɛ kɩaa bil ʋ tɩtɩa lɛ aŋ bɩ kuoru ŋaa Wɩa teeŋ, ʋ nagɛ baala deeŋ nɛ.”
Yesu dagɛ nɩaa dɩ ba sɩ́ ba tɩtɩa walɩmʋ a tɩgɛ kʋdiilee arɩ gɛnnɩŋ wɩaa lɛ
Mat. 6.25-34
22Ŋɩɩ nɛ Yesu bʋla pɩ ʋ harɩ-tooroo, “Mɩ bʋlaa pɩma, má sɩ́ ma tɩtɩa walɩmʋ a tɩgɛ kʋdiile-la ma sɩ jaŋ dii koo gɛnnɩ-la ma sɩɩ chɛ dɩ ma laalɛ. 23Ma mɩɩsɩŋ nɛ kɩɩ kʋdiilee, ma yaraa ma kɩɩ gɛnnɩŋ. 24Má bee na diibiisiŋ, ba bɩ pɛrɛ, ba bɩ kɩaa ka tʋɔlɛ virisiŋ lɛ, ka Wɩa pɩpɩba kʋdiilee. Ma nɛ paala kɛŋ bʋbʋɔŋ a kɩɩ diibiisiŋ. 25Dɩ ma nɩɩ walɩmɛ ma tɩtɩa kɩaa deemba wɩaa, bʋa-la lɛ ma mɩɩsɩŋ sɩ jaŋ dɛrɛ, ma tʋɔŋ kʋbɛɛ nɛ jaŋ wuo kɛŋ hawa bala ma pɛ ʋ mɩɩsɩŋ lɛ? 26Dɩ ma nɛ saa bɩ hawa bala ma wuo kaa pɛ ma mɩɩsɩŋ lɛ tapʋlɩɩ-la ma sɩ jaŋ sʋʋ, bɛɛ nɛ saa tɩɩ kɩaa deemba wɩaa wʋwalɩmɛma? 27Má bee na tɩɩfɩɩlaa. Ba bɩ tɩŋ, ba bɩ gɛnnɩŋ ma yɛrɛ a lɩlaalɛ, ama ba zɔmɔ nɛ woruŋ. Kuoru Solomoŋ fa kɛŋ kɩaa nɛ woruŋ. Ama ʋ gɛnnɩŋ fa bɩ zɔmɔ magɛ tɩɩfɩɩlaa deemba. 28Wɩa nɛ yie ŋaa yaŋ nyʋ a waa a zɔŋ, ka ʋ bɩ dieni aŋ hɩhɩl. Dɩ ʋ nɛ hɩla, ba yie chol nyiniŋ hɛ ʋ dii. Dɩ Wɩa nɛ wuo ŋaa yaŋ zɔŋ ŋɩɩ, bɛɛ nɛ tɩɩ ma bɩɩnɛ arɩ ʋ bɩ jaŋ wuo pɩma kʋdiilee arɩ gɛnnɩŋ? Ma Wɩa laa diiniŋ bɩ yʋgɛ. 29Má sɩ́ leŋe dɩ kʋdiile-la ma sɩ jaŋ dii arɩ kʋ-la ma sɩ jaŋ nyʋa wɩaa chɩlma, má sɩ́ ma tɩtɩa walɩmʋ. 30Nɩalɩŋ sɩ bɩ Wɩa jɩŋ dʋnɩa deeŋ lɛ, ba nɛ yie walɩma chɩchɛ kɩaa deemba. Ma Nyɩmma jɩma arɩ maa chɛ kɩaa deemba nɛ. 31Ŋɩɩ wɩaa, má laa sɩpaaŋ a chɛ kɩalɩŋ sɩ hɛ Wɩa kuorii-la tʋɔŋ. Ʋ jaŋ joŋ kɩaa deemba kala pɛ pɩma.”
Ŋɩɩ la sɩ jaŋ ŋaa a kɛŋ kɩaa Wɩa-jaŋ lɛ
Mat. 6.19-21
32Ŋɩɩ nɛ Yesu bɩra bʋl, “Ma nɩalɩŋ sɩɩ tomi, ma bɩ yʋgɛ. Má sɩ́ leŋe dɩ fawʋllʋŋ kɛmma. Ma Nyɩmma tʋɔŋ tɔrɔ nɛ dɩ ʋ joŋ ʋ kuorii-la pɩma. 33Má joŋ ma kɩaa kala yallɛ a joŋ moribie-la a pɩ summoo. Má chɛ kɩalɩŋ sɩ bɩ chei a bil ma tɩtɩa lɛ, a joŋ ma kɩaa bil Wɩa-jaŋ lɛ. Nɩmɛ ba bɩ jaŋ dɛrɛ, gaarʋ kala bɩ jaŋ wuo paaba, pʋgʋmaa ma bɩ jaŋ diiba. 34Ma tʋɔbɩɩnaa yie hɛ lee-la ma kɩaa sɩ hɛ nɛ.
35Má vɔɔ ma damɛrɩsɩŋ woruŋ a nyɩgɛ ma chaanaa, má ŋaa siri a gbɛrɛ, 36a nagɛ nɩaa sɩɩ gbɛrɛ ba kʋhɩaŋ dɩ ʋ lɩɩ hajaarɩ gbiele kɔ. Dɩ ʋ nɛ kɔ a du boro, ba guu kaa suro pʋ. 37Dɩ ba kʋhɩaŋ nɛ mɩɩra kɔ a na dɩ ba weye a ŋaa siri, ba tʋɔŋ jaŋ tɔrɛ. Wʋtɩtɩɩ, mɩ bʋlaa pɩma, ʋ jaŋ laalɛ gɛnnɩŋ aŋ leŋ dɩ ʋ tɩntɩnna-la hɔŋ, dɩ ʋ ŋaa kʋdiilee pɩba dɩ ba dii. 38Dɩ ʋ nɛ mɩɩra kɔ tɩta-siesee, koo dɩ ʋ nɛ paala kieli ŋɩɩ ma, ba tʋɔŋ jaŋ tɔrɛ woruŋ. 39Ma jɩŋ wɩɩŋ deeŋ lɛ, dɩ nʋʋ nɛ fa jɩŋ bʋa-la lɛ gaara sɩ jaŋ kʋ gaa ʋ kɩaa ʋ dɩa lɛ, ʋ fa jaŋ hɔnɔ pɔ, ʋ bɩ jaŋ sɛɩ dɩ gaara jʋʋ gaa ʋ kɩaa. 40Má ma saa ŋaa siri, bɛɛ wɩaa, mɩ-na Nuhuobiine Bie jaŋ kɔ bʋa-la lɛ ma sɩ bɩ mɩ yɩɛla.”
Nɩɩ-la sɩ ŋaa tɩntɩnnɩ-tɩtɩɩ arɩ nɩɩ-la sɩ bɩ tɩntɩnnɩ-tɩtɩɩ ŋaa
Mat. 24.45-51
41Ŋɩɩ nɛ Pɩɩta pɩɛsɛ Yesu, “La Tɩɩna, ŋ magɛ namaga deeŋ pɩpɩla nɛ koo ŋ maga pɩpɩ nʋʋkala nɛ?”
42Ŋɩɩ nɛ La Tɩɩna mɩɩra pɩɛsɛba, “Kʋbɛɛ nɛ saa ŋaa tɩntɩnnɩ-tɩtɩɩ-la sɩ jɩŋ wɩaa? Ʋ nɛ nɩɩ-la ʋ kʋhɩaŋ sɩ yie lɩɩsɛ dɩ ʋ bibeŋ ʋ dɩa, aŋ pɛ pɩpɩ ʋ tɩntɩnnɩ-dɔsʋŋ ma kʋdiilee bʋa-la sɩ magɛ lɛ. 43Dɩ tɩntɩnnʋ-la nɛ ŋaa wɩalɩŋ ʋ kʋhɩaŋ sɩ dagʋ, ʋ tʋɔŋ jaŋ tɔrɛ bʋa-la lɛ ʋ kʋhɩaŋ-la sɩ jaŋ mɩɩra kɔ. 44Wʋtɩtɩɩ mɩ bʋlaa pɩma, ʋ kʋhɩaŋ-la jaŋ joŋ ʋ kɩaa kala hɛ tɩntɩnna deeŋ nɩsɩŋ lɛ dɩ ʋ bibeŋ. 45Ama dɩ tɩntɩnnʋ-la nɛ bʋla pɩ ʋ tɩtɩa arɩ ʋ kʋhɩaŋ-la jaŋ dieni, aŋ suomo ŋmuŋmoo ʋ tɩntɩnnɩ-dɔsʋ-la, baalaa arɩ haalaa kala, aŋ faasa didii kʋdiilee a nyʋa sɩnɩŋ bubugi, 46dɩ ʋ ŋaa ŋɩɩ, ʋ bɩ siri ŋaa gbɛrɛ ʋ kʋhɩaŋ-la. Ʋ kʋhɩaŋ-la jaŋ kɔ tapʋlɩɩ-la ʋ sɩ bɩ yɩɛla. Ʋ jaŋ dɔgɩsʋ woruŋ aŋ kɛnʋ kaa mʋ hɛ lee-la nɩalɩŋ sɩ bɩ ʋ niiŋ wɩaa nɩɩ sɩ hɛ.
47Tɩntɩnnʋ-la sɩ jɩŋ tɩntɩmɩɩ-la ʋ kʋhɩaŋ sɩɩ chɛ dɩ ʋ tɩŋ aŋ bɩ siri ŋaa dɩ ʋ tɩŋ tɩntɩmɩɩ-la, ʋ kʋhɩaŋ jaŋ chaasa vɩɩrʋ kɩŋkɛŋ. 48Ama tɩntɩnnʋ-la sɩ bɩ tɩntɩmɩɩ-la ʋ kʋhɩaŋ sɩɩ chɛ dɩ ʋ tɩŋ jɩŋ aŋ ŋaa wɩɩ-la sɩ maga dɩ ba vɩɩrʋ, ba jaŋ vɩɩrʋ mʋa. Dɩ ba nɛ joŋ kɩaa yʋgɛ a pɩ nʋʋ, ʋ maga dɩ ba pɩɛsa laa kɩaa yʋgɛ nɛ nɩɩ-la teeŋ. Dɩ ba joŋ kɩaa yʋgɛ woruŋ a pɩ nʋʋ dɩ ʋ beŋ, ʋ ma maga dɩ ba pɩɛsa laa kɩaa yʋgɛ woruŋ ʋ teeŋ.”
A tɩŋ Yesu wɩaa, nɩaa jaŋ pɔrɛ dɔŋɔ lɛ
Mat. 10.34-36
49Ŋɩɩ nɛ Yesu bɩra bʋl, “Mɩ kɔ dɩ mɩ ŋaa dɩ dʋnɩa dii nyiniŋ nɛ. Mɩ saa fa cho dɩ ʋ suomo a didii nɛ lɛɛlɛ. 50Mɩ jaŋ jʋʋ hɛɛŋ dɩ ʋ nagɛ ba sɩ fomi Wɩɩchʋɔlɛ lɩɩŋ. Mɩ tʋɔŋ bɩ jaŋ pɩŋ dɩ-bala see dɩ mɩ na hɛɛ-la dɛrɛ. 51Ma bɩɩna mɩ kɛŋ fɩɛlɩŋ nɛ kaa kɔ dɩ mɩ pɩ dʋnɩa? Aɩ. Mɩ paala kɔ dɩ mɩ ŋaa dɩ nɩaa pɔrɛ dɔŋɔ lɛ nɛ. 52A chɩŋ lɛɛlɛ a kaa mʋ, dɩ nɩaa banɔŋ nɛ ŋaa dɩa nɩaa, ba jaŋ pɔrɛ dɔŋɔ lɛ. Batori jaŋ yuyuo balɩa, dɩ balɩa-la ma yuyuo batori-la. 53Nyɩmmaba arɩ ba hambolibiisiŋ jaŋ pɔrɛ dɔŋɔ lɛ, a gʋraa yuo dɔŋɔ. Naamba arɩ ba toloo ma jaŋ gʋraa yuo dɔŋɔ. Bala naamba arɩ ba bii-haalaa ma jaŋ gʋraa yuo dɔŋɔ.”
Ʋ maga dɩ ma jɩŋ wɩalɩŋ sɩɩ ŋaa dʋnɩa lɛ bʋbʋɔŋ
Mat. 16.2-3
54Ŋɩɩ nɛ Yesu bʋla pɩ nɩalɩŋ, “Dɩ ma nɛ na duoŋ-bɩlɩmbaanaa dɩ ba nɛ lɩɩ wɩɩjʋʋlʋŋ a kʋʋ jɩl, ma yie bʋl dɩ duonuŋ nɩɩ chɛ dɩ ʋ nɩɩ. Ʋ sɛnɛ nɩɩ. 55Dɩ ma nɛ bɩra na peliŋ dɩ ʋ lu a lɩɩ taŋ-bʋbʋɔŋ, ma yie bʋl dɩ leriŋ jaŋ lɩŋ. Ʋ sɛnɛ lɩŋ. 56Ma kanfugi tɩŋŋaa deemba, ma yie wuo beŋ tinteeŋ arɩ wɩa-nyuŋ, a wuo dagɛ wɩɩ-la sɩ jaŋ ŋaa. Bɛɛ nɛ saa tɩɩ ma bɩ jaŋ wuo jɩŋ wɩalɩŋ sɩɩ ŋaa dʋnɩa deeŋ lɛ lɛɛlɛ?”
Wɩɩ-la sɩ maga dɩ ma ŋaa
Mat. 5.25-26
57Ŋɩɩ nɛ Yesu bɩra bʋl, “Ma sɩ jɩŋ wɩɩ-la sɩ maga dɩ ma ŋaa, bɛɛ nɛ tɩɩ ma bɩ ʋ ŋaa? 58Dɩ nʋʋ nɛ samɩŋ a kɛnɩŋ mʋmʋ sarɩya dɩ-diiliŋ, hɛ doluŋ ka dɩ ma bʋl wɩɩ-la wasɛ wombiiŋ lɛ. Dɩ ŋɩɩ dee, ʋ jaŋ lɛrɩŋ mʋ sarɩya diire teeŋ. Sarɩya diire jaŋ joŋuŋ hɛ porisiba nɩsɩŋ lɛ, dɩ ba kɛnɩŋ mʋ tɔ dɩa. 59Dɩ ba nɛ kɛnɩŋ mʋ tɔ dɩa, ŋ bɩ jaŋ wuo lɩɩ, see dɩ ŋ tiŋ chɩŋ-la kala ba sɩ kere pɩŋ.”
Currently Selected:
Luuk 12: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
Luuk 12
12
Yesu bʋla pɩ nɩaa dɩ ba sɩ́ kanfugi tɩŋŋaa nagʋ
Mat. 10.26-27
1Nɩalɩŋ fa sɩ kɔ Yesu teeŋ, ba yi nɩaa bʋɩ bʋɩ a yiyigi dɔŋɔ. Ŋɩɩ nɛ Yesu laa sɩpaaŋ a bʋla pɩ ʋ harɩ-tooroo, “Má pɔ ma tɩtɩa lɛ arɩ Farisii tɩŋŋaa. Ba ŋaa kanfugi tɩmma nɛ. Ba nagɛ sɩbʋrʋŋ nɛ. 2Wɩɩkala sɩ faa, ʋ jaŋ kʋ lɩɩ pʋlʋmʋŋ, nɩaa jaŋ nɩɩ wɩɩ-la ma sɩ ŋaa wʋfaalɩɩ. 3Wɩɩkala ma ŋ sɩ bʋla birimiŋ tʋɔŋ, ba jaŋ nɩɩʋ pʋlʋmʋŋ lɛ. Wɩɩkala ma ŋ sɩ munso bʋl a hɛ nʋʋ dɩgɩlɩŋ lɛ dɩa tʋɔŋ, ba jaŋ faasa heele bʋlʋ lusuŋ nyuŋ.”
Nɩɩ-la sɩ maga dɩ ŋ fá
Mat. 10.28-33; 12.32; 10.19-20
4Ŋɩɩ nɛ Yesu bɩra bʋl, “Mɩ nandɔnsʋŋ, mɩ jaŋ bʋla pɩma, má sɩ́ nɩalɩŋ sɩ jaŋ wuo kpʋ ma yaraa lɛ fá, aŋ bɩra bɩ jaŋ wuo ŋaama wɩɩ dɔŋ kala. 5Mɩ jaŋ dagɛma nɩɩ-la sɩ maga dɩ ma fá. Má fá Wɩa. Ʋ nɛ jaŋ wuo kpʋma aŋ bɩra kɛŋ doluŋ dɩ ʋ wuo jomma hɛ Wɩa nyiniŋ tʋɔŋ. Mɩ bʋlaa pɩma, má fɩfáʋ. 6Zaarɩ-kokobiisiŋ banɔŋ dee ba yie joŋo yallɛ kɔbʋ balɩaa? Ama Wɩa bɩ ba tʋɔŋ kʋbala ma wɩaa yʋa. 7Wɩa paala jɩŋ ma nyu-pʋnaa kala ma niiŋ nɛ. Ŋɩɩ wɩaa, má sɩ́ leŋe dɩ fawʋllʋŋ kɛmma. Ma nɛ paala kɩɩ zaarɩ-kokobiisiŋ a yʋgɛ.
8Mɩ bʋlaa pɩma, nɩɩ-la kala sɩ jaŋ wuo bʋl nɩaa tʋɔŋ arɩ ʋ ŋaa mɩ nʋʋ nɛ, mɩ-na Nuhuobiine Bie ma jaŋ bʋl ŋɩɩ a tɩgɛ ʋ lɛ Wɩa tɩndaaraa sɩpaaŋ. 9Ama nɩɩ-la kala sɩ vɩamɛ nɩaa tʋɔŋ, mɩ-na Nuhuobiine Bie ma jaŋ vɩaʋ Wɩa tɩndaaraa sɩpaaŋ. 10Nɩɩ-la kala sɩ bʋl wʋbɔŋŋɔɔ a mʋ tɩgɛ mɩ-na Nuhuobiine Bie lɛ, Wɩa jaŋ joŋo chɛʋ, ama nɩɩ-la kala sɩ tʋʋsɛ Wɩa Dɩŋ-zɔmʋŋ joŋŋoo, Wɩa bɩ jaŋ joŋo chɛ ʋ tɩɩna.
11Dɩ ba nɛ kɛmma kaa jʋʋ Wɩɩchʋɔlɛ dɩɩsɩŋ dɩ ba diima sarɩya koo dɩ ba nɛ kɛmma mʋ kuoroo arɩ kʋhɩasɩŋ teeŋ, má sɩ́ leŋe dɩ ma bɔɩsɩŋ joŋ ŋɩɩ ma sɩ jaŋ ŋaa a laa ma tɩtɩa, koo wɩɩ-na kala ma sɩ jaŋ bʋl. 12Bʋa-la tɩtɩa lɛ Wɩa Dɩŋ-zɔmʋŋ jaŋ dagɛma wɩɩ-la ma sɩ jaŋ bʋl.”
Yesu magɛ namaga a tɩgɛ bagɩ-daarɩ tʋɔ-luŋ tɩɩna lɛ
13Yesu fa sɩ bʋl wɩaa pɩpɩ nɩ-daŋ-la ŋɩɩ, baal kʋbala lɩɩ ba tʋɔŋ a bʋla pʋ, “Mɩ kʋhɩaŋ, la nyɩmma sʋba nɛ aŋ ka kɩaa. Mɩɩ sʋlʋŋ dɩ ŋ bʋla pɩ mɩ naambie dɩ ʋ leŋ dɩ la kɛŋ kɩalɩŋ kaa kpaa.”
14Ŋɩɩ nɛ Yesu bʋla pʋ, “Mɩ nandɔŋ, mɩ tɩntɩmɩɩ dee dɩ mɩ laa ma sarɩya dii pɩma koo dɩ mɩ kɛŋ ma kɩaa kaa kpaama.” 15Ŋɩɩ nɛ ʋ bɩra bʋla pɩ nɩalɩŋ, “Má fɩɛlɛ ma sɩaa a sɩ́ tʋɔ-luŋuŋ kɛŋ. Dɩ nuhuobiine nɛ kɛŋ kɩaa kɩŋkɛŋ, kɩalɩŋ bɩ jaŋ wuo leŋ dɩ ʋ kɛŋ mɩɩsɩŋ.”
16Ŋɩɩ nɛ Yesu magɛ namaga a bʋl, “Baal kʋbala nɛ fa hɛ nɩmɛ a kɛŋ kɩaa woruŋ a bil ʋ baga. Ʋ baga-la kɩaa wasɛ woruŋ. 17Ŋɩɩ nɛ ʋ bɩɩnɛ ʋ tʋɔŋ lɛ, ‘Ɛɛ nɛ mɩ jaŋ ŋaa? Mɩ bɩra bɩ leriŋ kɛnɛ dɩ mɩ tʋɔlɛ mɩ kɩaa.’ 18Ŋɩɩ nɛ ʋ bʋl, ‘Mɩ jaŋ ŋmoo mɩ virisiŋ deemba mɩ sɩ kɛnɛ a ta aŋ wasa saa kʋbalaa. Mɩ jaŋ joŋ mɩ kuori-mɩaa arɩ mɩ kɩaa kala a tʋɔlɛ nɩmɛ 19aŋ bʋla pɩ mɩ tɩtɩa, mɩ tʋɔlɛ kɩaa yʋgɛ nɛ, mɩ jaŋ dii jɩsɩ arɩ jɩsɩ. Mɩ jaŋ ta jɩa a dii kɩaa a nyʋa kɩaa arɩ tʋɔtɔrʋŋ.’ 20Ŋɩɩ nɛ Wɩa bʋla pʋ, ‘Nɩyaarɩ! Tɩtaŋɩŋ deeŋ mɩ jaŋ leŋ dɩ ŋ sʋʋ. Kɩalɩŋ saa ŋ sɩ chɛ bil ŋ tɩtɩa lɛ, kʋbɛɛ nɛ jaŋ dii?’ ” 21Ŋɩɩ nɛ Yesu bʋla pɩ nɩaa, “Nɩɩ-la kala sɩ yie chɛ kɩaa bil ʋ tɩtɩa lɛ aŋ bɩ kuoru ŋaa Wɩa teeŋ, ʋ nagɛ baala deeŋ nɛ.”
Yesu dagɛ nɩaa dɩ ba sɩ́ ba tɩtɩa walɩmʋ a tɩgɛ kʋdiilee arɩ gɛnnɩŋ wɩaa lɛ
Mat. 6.25-34
22Ŋɩɩ nɛ Yesu bʋla pɩ ʋ harɩ-tooroo, “Mɩ bʋlaa pɩma, má sɩ́ ma tɩtɩa walɩmʋ a tɩgɛ kʋdiile-la ma sɩ jaŋ dii koo gɛnnɩ-la ma sɩɩ chɛ dɩ ma laalɛ. 23Ma mɩɩsɩŋ nɛ kɩɩ kʋdiilee, ma yaraa ma kɩɩ gɛnnɩŋ. 24Má bee na diibiisiŋ, ba bɩ pɛrɛ, ba bɩ kɩaa ka tʋɔlɛ virisiŋ lɛ, ka Wɩa pɩpɩba kʋdiilee. Ma nɛ paala kɛŋ bʋbʋɔŋ a kɩɩ diibiisiŋ. 25Dɩ ma nɩɩ walɩmɛ ma tɩtɩa kɩaa deemba wɩaa, bʋa-la lɛ ma mɩɩsɩŋ sɩ jaŋ dɛrɛ, ma tʋɔŋ kʋbɛɛ nɛ jaŋ wuo kɛŋ hawa bala ma pɛ ʋ mɩɩsɩŋ lɛ? 26Dɩ ma nɛ saa bɩ hawa bala ma wuo kaa pɛ ma mɩɩsɩŋ lɛ tapʋlɩɩ-la ma sɩ jaŋ sʋʋ, bɛɛ nɛ saa tɩɩ kɩaa deemba wɩaa wʋwalɩmɛma? 27Má bee na tɩɩfɩɩlaa. Ba bɩ tɩŋ, ba bɩ gɛnnɩŋ ma yɛrɛ a lɩlaalɛ, ama ba zɔmɔ nɛ woruŋ. Kuoru Solomoŋ fa kɛŋ kɩaa nɛ woruŋ. Ama ʋ gɛnnɩŋ fa bɩ zɔmɔ magɛ tɩɩfɩɩlaa deemba. 28Wɩa nɛ yie ŋaa yaŋ nyʋ a waa a zɔŋ, ka ʋ bɩ dieni aŋ hɩhɩl. Dɩ ʋ nɛ hɩla, ba yie chol nyiniŋ hɛ ʋ dii. Dɩ Wɩa nɛ wuo ŋaa yaŋ zɔŋ ŋɩɩ, bɛɛ nɛ tɩɩ ma bɩɩnɛ arɩ ʋ bɩ jaŋ wuo pɩma kʋdiilee arɩ gɛnnɩŋ? Ma Wɩa laa diiniŋ bɩ yʋgɛ. 29Má sɩ́ leŋe dɩ kʋdiile-la ma sɩ jaŋ dii arɩ kʋ-la ma sɩ jaŋ nyʋa wɩaa chɩlma, má sɩ́ ma tɩtɩa walɩmʋ. 30Nɩalɩŋ sɩ bɩ Wɩa jɩŋ dʋnɩa deeŋ lɛ, ba nɛ yie walɩma chɩchɛ kɩaa deemba. Ma Nyɩmma jɩma arɩ maa chɛ kɩaa deemba nɛ. 31Ŋɩɩ wɩaa, má laa sɩpaaŋ a chɛ kɩalɩŋ sɩ hɛ Wɩa kuorii-la tʋɔŋ. Ʋ jaŋ joŋ kɩaa deemba kala pɛ pɩma.”
Ŋɩɩ la sɩ jaŋ ŋaa a kɛŋ kɩaa Wɩa-jaŋ lɛ
Mat. 6.19-21
32Ŋɩɩ nɛ Yesu bɩra bʋl, “Ma nɩalɩŋ sɩɩ tomi, ma bɩ yʋgɛ. Má sɩ́ leŋe dɩ fawʋllʋŋ kɛmma. Ma Nyɩmma tʋɔŋ tɔrɔ nɛ dɩ ʋ joŋ ʋ kuorii-la pɩma. 33Má joŋ ma kɩaa kala yallɛ a joŋ moribie-la a pɩ summoo. Má chɛ kɩalɩŋ sɩ bɩ chei a bil ma tɩtɩa lɛ, a joŋ ma kɩaa bil Wɩa-jaŋ lɛ. Nɩmɛ ba bɩ jaŋ dɛrɛ, gaarʋ kala bɩ jaŋ wuo paaba, pʋgʋmaa ma bɩ jaŋ diiba. 34Ma tʋɔbɩɩnaa yie hɛ lee-la ma kɩaa sɩ hɛ nɛ.
35Má vɔɔ ma damɛrɩsɩŋ woruŋ a nyɩgɛ ma chaanaa, má ŋaa siri a gbɛrɛ, 36a nagɛ nɩaa sɩɩ gbɛrɛ ba kʋhɩaŋ dɩ ʋ lɩɩ hajaarɩ gbiele kɔ. Dɩ ʋ nɛ kɔ a du boro, ba guu kaa suro pʋ. 37Dɩ ba kʋhɩaŋ nɛ mɩɩra kɔ a na dɩ ba weye a ŋaa siri, ba tʋɔŋ jaŋ tɔrɛ. Wʋtɩtɩɩ, mɩ bʋlaa pɩma, ʋ jaŋ laalɛ gɛnnɩŋ aŋ leŋ dɩ ʋ tɩntɩnna-la hɔŋ, dɩ ʋ ŋaa kʋdiilee pɩba dɩ ba dii. 38Dɩ ʋ nɛ mɩɩra kɔ tɩta-siesee, koo dɩ ʋ nɛ paala kieli ŋɩɩ ma, ba tʋɔŋ jaŋ tɔrɛ woruŋ. 39Ma jɩŋ wɩɩŋ deeŋ lɛ, dɩ nʋʋ nɛ fa jɩŋ bʋa-la lɛ gaara sɩ jaŋ kʋ gaa ʋ kɩaa ʋ dɩa lɛ, ʋ fa jaŋ hɔnɔ pɔ, ʋ bɩ jaŋ sɛɩ dɩ gaara jʋʋ gaa ʋ kɩaa. 40Má ma saa ŋaa siri, bɛɛ wɩaa, mɩ-na Nuhuobiine Bie jaŋ kɔ bʋa-la lɛ ma sɩ bɩ mɩ yɩɛla.”
Nɩɩ-la sɩ ŋaa tɩntɩnnɩ-tɩtɩɩ arɩ nɩɩ-la sɩ bɩ tɩntɩnnɩ-tɩtɩɩ ŋaa
Mat. 24.45-51
41Ŋɩɩ nɛ Pɩɩta pɩɛsɛ Yesu, “La Tɩɩna, ŋ magɛ namaga deeŋ pɩpɩla nɛ koo ŋ maga pɩpɩ nʋʋkala nɛ?”
42Ŋɩɩ nɛ La Tɩɩna mɩɩra pɩɛsɛba, “Kʋbɛɛ nɛ saa ŋaa tɩntɩnnɩ-tɩtɩɩ-la sɩ jɩŋ wɩaa? Ʋ nɛ nɩɩ-la ʋ kʋhɩaŋ sɩ yie lɩɩsɛ dɩ ʋ bibeŋ ʋ dɩa, aŋ pɛ pɩpɩ ʋ tɩntɩnnɩ-dɔsʋŋ ma kʋdiilee bʋa-la sɩ magɛ lɛ. 43Dɩ tɩntɩnnʋ-la nɛ ŋaa wɩalɩŋ ʋ kʋhɩaŋ sɩ dagʋ, ʋ tʋɔŋ jaŋ tɔrɛ bʋa-la lɛ ʋ kʋhɩaŋ-la sɩ jaŋ mɩɩra kɔ. 44Wʋtɩtɩɩ mɩ bʋlaa pɩma, ʋ kʋhɩaŋ-la jaŋ joŋ ʋ kɩaa kala hɛ tɩntɩnna deeŋ nɩsɩŋ lɛ dɩ ʋ bibeŋ. 45Ama dɩ tɩntɩnnʋ-la nɛ bʋla pɩ ʋ tɩtɩa arɩ ʋ kʋhɩaŋ-la jaŋ dieni, aŋ suomo ŋmuŋmoo ʋ tɩntɩnnɩ-dɔsʋ-la, baalaa arɩ haalaa kala, aŋ faasa didii kʋdiilee a nyʋa sɩnɩŋ bubugi, 46dɩ ʋ ŋaa ŋɩɩ, ʋ bɩ siri ŋaa gbɛrɛ ʋ kʋhɩaŋ-la. Ʋ kʋhɩaŋ-la jaŋ kɔ tapʋlɩɩ-la ʋ sɩ bɩ yɩɛla. Ʋ jaŋ dɔgɩsʋ woruŋ aŋ kɛnʋ kaa mʋ hɛ lee-la nɩalɩŋ sɩ bɩ ʋ niiŋ wɩaa nɩɩ sɩ hɛ.
47Tɩntɩnnʋ-la sɩ jɩŋ tɩntɩmɩɩ-la ʋ kʋhɩaŋ sɩɩ chɛ dɩ ʋ tɩŋ aŋ bɩ siri ŋaa dɩ ʋ tɩŋ tɩntɩmɩɩ-la, ʋ kʋhɩaŋ jaŋ chaasa vɩɩrʋ kɩŋkɛŋ. 48Ama tɩntɩnnʋ-la sɩ bɩ tɩntɩmɩɩ-la ʋ kʋhɩaŋ sɩɩ chɛ dɩ ʋ tɩŋ jɩŋ aŋ ŋaa wɩɩ-la sɩ maga dɩ ba vɩɩrʋ, ba jaŋ vɩɩrʋ mʋa. Dɩ ba nɛ joŋ kɩaa yʋgɛ a pɩ nʋʋ, ʋ maga dɩ ba pɩɛsa laa kɩaa yʋgɛ nɛ nɩɩ-la teeŋ. Dɩ ba joŋ kɩaa yʋgɛ woruŋ a pɩ nʋʋ dɩ ʋ beŋ, ʋ ma maga dɩ ba pɩɛsa laa kɩaa yʋgɛ woruŋ ʋ teeŋ.”
A tɩŋ Yesu wɩaa, nɩaa jaŋ pɔrɛ dɔŋɔ lɛ
Mat. 10.34-36
49Ŋɩɩ nɛ Yesu bɩra bʋl, “Mɩ kɔ dɩ mɩ ŋaa dɩ dʋnɩa dii nyiniŋ nɛ. Mɩ saa fa cho dɩ ʋ suomo a didii nɛ lɛɛlɛ. 50Mɩ jaŋ jʋʋ hɛɛŋ dɩ ʋ nagɛ ba sɩ fomi Wɩɩchʋɔlɛ lɩɩŋ. Mɩ tʋɔŋ bɩ jaŋ pɩŋ dɩ-bala see dɩ mɩ na hɛɛ-la dɛrɛ. 51Ma bɩɩna mɩ kɛŋ fɩɛlɩŋ nɛ kaa kɔ dɩ mɩ pɩ dʋnɩa? Aɩ. Mɩ paala kɔ dɩ mɩ ŋaa dɩ nɩaa pɔrɛ dɔŋɔ lɛ nɛ. 52A chɩŋ lɛɛlɛ a kaa mʋ, dɩ nɩaa banɔŋ nɛ ŋaa dɩa nɩaa, ba jaŋ pɔrɛ dɔŋɔ lɛ. Batori jaŋ yuyuo balɩa, dɩ balɩa-la ma yuyuo batori-la. 53Nyɩmmaba arɩ ba hambolibiisiŋ jaŋ pɔrɛ dɔŋɔ lɛ, a gʋraa yuo dɔŋɔ. Naamba arɩ ba toloo ma jaŋ gʋraa yuo dɔŋɔ. Bala naamba arɩ ba bii-haalaa ma jaŋ gʋraa yuo dɔŋɔ.”
Ʋ maga dɩ ma jɩŋ wɩalɩŋ sɩɩ ŋaa dʋnɩa lɛ bʋbʋɔŋ
Mat. 16.2-3
54Ŋɩɩ nɛ Yesu bʋla pɩ nɩalɩŋ, “Dɩ ma nɛ na duoŋ-bɩlɩmbaanaa dɩ ba nɛ lɩɩ wɩɩjʋʋlʋŋ a kʋʋ jɩl, ma yie bʋl dɩ duonuŋ nɩɩ chɛ dɩ ʋ nɩɩ. Ʋ sɛnɛ nɩɩ. 55Dɩ ma nɛ bɩra na peliŋ dɩ ʋ lu a lɩɩ taŋ-bʋbʋɔŋ, ma yie bʋl dɩ leriŋ jaŋ lɩŋ. Ʋ sɛnɛ lɩŋ. 56Ma kanfugi tɩŋŋaa deemba, ma yie wuo beŋ tinteeŋ arɩ wɩa-nyuŋ, a wuo dagɛ wɩɩ-la sɩ jaŋ ŋaa. Bɛɛ nɛ saa tɩɩ ma bɩ jaŋ wuo jɩŋ wɩalɩŋ sɩɩ ŋaa dʋnɩa deeŋ lɛ lɛɛlɛ?”
Wɩɩ-la sɩ maga dɩ ma ŋaa
Mat. 5.25-26
57Ŋɩɩ nɛ Yesu bɩra bʋl, “Ma sɩ jɩŋ wɩɩ-la sɩ maga dɩ ma ŋaa, bɛɛ nɛ tɩɩ ma bɩ ʋ ŋaa? 58Dɩ nʋʋ nɛ samɩŋ a kɛnɩŋ mʋmʋ sarɩya dɩ-diiliŋ, hɛ doluŋ ka dɩ ma bʋl wɩɩ-la wasɛ wombiiŋ lɛ. Dɩ ŋɩɩ dee, ʋ jaŋ lɛrɩŋ mʋ sarɩya diire teeŋ. Sarɩya diire jaŋ joŋuŋ hɛ porisiba nɩsɩŋ lɛ, dɩ ba kɛnɩŋ mʋ tɔ dɩa. 59Dɩ ba nɛ kɛnɩŋ mʋ tɔ dɩa, ŋ bɩ jaŋ wuo lɩɩ, see dɩ ŋ tiŋ chɩŋ-la kala ba sɩ kere pɩŋ.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014