İoan 4
4
Samariyalı karı
1Fariseylär işittilär, ani İisus taa çok üürenici edener hem vaatiz eder, nekadar İoan.
2Aslısı, Kendi İisus vaatiz etmärdi, ama vaatiz edärdi Onun üürenicileri.
3Açan İisus annadı bunu, braktı İudeyayı da enidän gitti Galileya erlerinä.
4Lääzımdı geçsin Samariyadan.
5Tä, İisus geler Samariyada bir kasabaya, adı Sihar, neresi yannaşık o kırlan, ani İakov verdiydi kendi ooluna İosifä.
6Orada bulunardı İakovun pınarı. İisus, dingin yoldan, oturdu pınarın yanında ölä bir altıncı#4:6 Altıncı saat – üülendä saat 12 (kimi bilgiçlerä görä saat 18). saatta.
7Geldi bir karı Samariyadan, ki su pınardan çıkarsın. «Ver Bana, su içeyim», – dedi İisus.
8Zerä Onun üürenicileri gittiydilär kasabaya imeelik almaa.
9Samariyalı karı dedi: «Sän iudeysin, nesoy bendän, samariyalı karıdan, su içmää isteersin?» İudeylär bişey paylaşmêêrlar samariyalılarlan.
10İisus cuvap etti ona: «Eer bilsän Allahın baaşışını hem Onu, Kim sendän su isteer, sän kendin istärsin Ondan su içmää, da O yaşamak suyu verir sana».
11Karı deer Ona: «Saabi, sän yok neylän çıkarasın su, pınar da derin, nesoy var kolay olsun sendä yaşamak suyu?
12Ne sän taa büüksün bizim bobadan İakovdan mı, angısından bizä kaldı bu pınar, neredän içti kendisi, oolları hem hayvannarı?»
13İisus cuvap etti: «Kim içer bu sudan, o enidän susar,
14ama kim içecek o sudan, ani Bän verecäm, diveç susuz kalmayacek. Ama su, ani ona verecäm, onda bir sızıntı olacek, da diveç yaşamaya getirecek».
15Karı dedi Ona: «Çorbacı, ver bu sudan bana, ki susamayım da gelmeyim buradan su çıkarmaa».
16«Git, çaar kocanı da gel burayı», – dedi İisus.
17Karı cuvap etti: «Yok kocam». «Dooru söledin, ani yok kocan, – dedi İisus, –
18zerä beş kocan oldu. Bu adam, kiminnän şindi yaşêêrsın, o da diil senin kocan. Bunu dooru söledin».
19Karı dedi: «Çorbacı, görerim, ani Sän bir proroksun.
20Bizim bobalar baş iilttilär bu bayır üstündä, ama siz deersiniz, ani er, neredä lääzım baş iiltmää, bulunêr İerusalimdä».
21İisus cuvap etti ona: «Karı, inan Beni, geler vakıt, açan baş iiltmeyeceniz Bobaya ne bu bayır üstündä, ne dä İerusalimdä.
22Siz baş iildersiniz neyä bilmeersiniz, biz baş iilderiz neyä bileriz, zerä kurtulmak – iudeylerdän.
23Ama geler vakıt, artık şindän sora geldi, açan hakına baş urannar baş iildeceklär Bobaya duhta hem aslılıkta, zerä butürlü baş iildenneri Boba aarêêr.
24Allah – duh. Kim baş iilder Ona, lääzım baş ursun duhta hem aslılıkta».
25Karı cuvap eder: «Bilerim, ani gelecek Messiya, Angısına dener Hristos. O, geldiynän, hepsini bizä annadacek».
26İisus dedi: «Bän, ani seninnän lafederim, Kendim Messiyayım».
27Bu vakıt geldi Onun üürenicileri. Onnar şaştılar, ani O lafeder bir karıylan. Ama birisi bilä sormadı: «Ne isteersin?» eki: «Neçin lafedersin onunnan?»
28Karı braktı su kabını, gitti kasabaya da dedi insana:
29«Gelin dä görün bir adam, angısı söledi hepsini, ne yaptım. Acaba diil mi O Hristos?»
30Onnar çıktılar kasabadan da gelärdilär İisusa.
31Bu vakıt üürenicilär yalvarardılar Ona, isin, deyip: «Üüredici, i bişey».
32Ama O dedi: «Bendä var bir imäk, ani siz bilmeersiniz».
33Üürenicilär biri-birinnän lafedärdilär: «Getirmedi mi acaba Ona birkimsey imää?»
34İisus dedi: «Benim imääm budur: yapayım Onun istediini, Kim Beni yolladı, hem işini Onun tamannayım.
35Demeersiniz mi siz, ani var taa dört ay biçmäk vakıdınadan? Ama Bän sizä deerim: ya gözlerinizi açın da bakın ekinnerä. Onnar şindän sora sarardılar biçmäk için.
36Kim biçer, hak alêr, bereket diveç yaşamak için toplêêr. Onuştan ekici hem biçici barabar sevineceklär.
37Onun için dooru o söz, ani deer: „Birisi eker, ama başkası biçer“.
38Bän yolladım sizi, biçäsiniz, neredä siz işlämediniz, ama başkası işledi, siz dä pay alêrsınız onnarın işlerindän».
39Çoyu samariyalılar bu kasabadan inandılar İisusa karının laflarından, angısı, şaatlık edip, dedi: «O söledi bana hepsini, ne yaptım».
40Onuştan, açan geldilär samariyalılar Ona da yalvardılar, kalsın onnarda, O kaldı orada iki gün.
41Sora inandılar taa çokluk Kendi İisusun laflarından.
42Onnar dedilär karıya: «Şindi inanêrız diil senin laflarından, ama kendimiz işittik hepsini da annadık, ani hakına Odur dünneyin Kurtarıcısı /Hristos/».
Öndercinin oolu saa oldu
43İki gündän sora İisus yollandı oradan da gitti Galileyaya.
44O Kendisi şaatlık etti, ani bir dä prorok diil hatırlanmış kendi duuma erindä.
45Açan geldi Galileyaya, orada Onu kablettilär, zerä onnar da yortuya gittiydilär da gördüydülär hepsini, ne O yaptı yortu vakıdı İerusalimdä. Onnar da yortuda oradaydılar.
46İisus enidän döndü geeri Galileyanın Kana küüyünä, neredä suyu çevirdiydi şaraba. Kapernaum kasabasında bir padişah izmetkerin oolu hastaydı.
47Bu izmetkär işitti, ani İisus döndü İudeyadan Galileya erlerinä. O geldi İisusa da yalvardı, gelsin da alıştırsın onun oolunu, ani ölüm döşeendeydi.
48İisus dedi: «Siz, meraklı nışannar hem şaşmaklı işlär görmeyincä, inanmêêrsınız!»
49Padişahın izmetkeri dedi: «Saabi, gel, taa ölmediynän benim uşaam».
50İisus cuvap etti: «Git, senin oolun yaşayacek». O inandı İisusun sözünü da gitti.
51Açan o taa yoldaydı, çırakları çıktılar ona karşı da söledilär, ani çocuk saa.
52O sordu onnara: «Ne vakıt ona ii oldu?». Onnar cuvap ettilär: «Dün, edinci#4:52 Edinci saat – saat 13 (kimi bilgiçlerä görä saat 19). saatta onun yangını düştü».
53Bobası annadı, ani bu oldu ozaman, açan İisus dedi ona: «Senin oolun yaşayacek». O hem onun bütün evi inandılar.
54Bu ikinci nışan, ani yaptı İisus geeri İudeyadan Galileya erlerinä döndüktän sora.
Currently Selected:
İoan 4: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
