Luka 20
20
İisusun zaabitlii
1Bir günü, nezaman İisus insanı Ayoz bina aulunda üüredärdi hem nasaat edärdi İi Haberi, Ona geldilär büük popazlar, bilgiçlär hem aksakallar.
2Da dedilär: «Sölä, ne zaabitliklän yapêrsın bunnarı, hem kim verdi Sana zaabitlii?»
3İisus cuvap etti onnara: «Koyacam Bän dä sizä bir soruş, cuvap ediniz Bana.
4İoanın vaatizlii göktän mi, osa insandan mı?»
5Onnar biri-birinnän lafedärdi: «Eer deyärseydik: „Göktän“, O deyecek: „Öleysä, neçin onu inanmadınız?“
6Ama deyärseydik: „İnsandan“, ozaman insan bizi öldürecek taşlan, zerä hepsi inanêr, ani İoan bir prorok».
7Onuştan cuvap ettilär: «Bilmeeriz, neredän geler İoanın vaatizlii».
8Ozaman İisus cuvap etti: «Bän dä sölämeyecäm sizä, ne zaabitliklän yapêrım bunnarı».
Fena baacılar
9Sora söledi insana bu örnää: «Bir adam koydu bir baa, verdi onu baacılara, sora uzun bir vakıda gitti başka memleketä.
10Üzüm vakıdında yolladı bir çırak baacılara, alsın payını baa berekedindän, ama baacılar düüdülär onu da boş ellän geeri yolladılar.
11Sora yolladı başka bir çıraanı. Onnar onu da düüdülär, gülmää aldılar da boş ellän geeri yolladılar.
12Yolladı üçüncü çıraanı. Onnar onu da yaraladılar hem baadan dışarı uurattılar.
13Baayın çorbacısı düşündü: „Ne yapayım? Yollayacam benim sevgili oolumu. Beki onu ikramnan kabledirlär!“
14Ama baacılar, görüp onu, annaştılar biri-birinnän, deyip: „Tä çorbacının oolu, öldürelim onu, da baa bizä kalacek“.
15Çıkarıp onu baadan bir tarafa, öldürdülär. Şindi ne yapacek baa çorbacısı bu baacılarlan?
16Gelip, telef edecek onnarı, ama baayı başka adamnara verecek». Bu lafları işidip, insan dedi: «Olmaz bu olsun!»
17İisus, bakıp uz onnarın gözlerinä, dedi: «Ozaman nasıl annamaa bu sözleri, ani yazılı: „Taş, ani ustalar sıbıttı, sonda etişti köşä taşı olsun“?
18Kim düşecek bu taş üstünä, ezilecek. Ama kimin üstünä taş düşecek, onu tuz-buz yapacek».
19Büük popazlar hem bilgiçlär baktılar hemen Onu tutsunnar, ama insandan korkardılar. Zerä annadılar, ani onnar için İisus bu örnää söledi.
Hak Kesara hem Allaha
20Onuştan başladılar İisusu kollamaa. Yolladılar ardına gözçüleri, angıları yapındılar kabaatsız, bakarak tutsunnar Onu bir laflan, ki kullanıcının daavasına hem zaabitliinä versinnär.
21Ona sordular: «Üüredici, bileriz, ani dooru lafedersin hem üüredersin, adamın üzünä bakmayarak, hakına Allahın yolunu üüredersin.
22Düşer mi, ödeyelim harç Kesara osa düşmeer mi?»
23İisus annadı onnarın şalvirliklerini, da dedi: «/Neçin Beni deneersiniz?/
24Gösterin Bana bir dinar. Kimin resimi hem adı yazılı burada?» «Kesarın», – cuvap ettilär onnar.
25Ozaman İisus dedi: «Verin Kesara, ne Kesarın, ama Allaha, ne Allahın».
26Tutamadılar Onu laflan insanın önündä da, şaşıp Onun cuvabına, sustular.
Dirilmäk için soruş
27Kimisi sadukeylerdän, kim deer, ani yok dirilmäk, yaklaşıp İisusa, sordular:
28«Üüredici, Moisey yazılarında dedi bizä: „Eer birkimsey ölärseydi uşaksız, da karısı saa kalarsaydı, onun kardaşı evlensin bu karıya da kaldırsın uşak ölmüş kardaşına tamızlık için“.
29Vardı edi kardaş. İlkinkisi evlendi da uşaksız öldü.
30Onun karısına evlendi ikinci kardaşı, /o da öldü taa olmadıynan uşaa/.
31Sora bu karıyı aldı üçüncü kardaşı. Ölä yaptı edi kardaş da uşaksız öldülär.
32Hepsindän sora öldü karı da.
33Dirilmektä angısının karısı olacek bu karı? Zerä hepsi edi kardaş ona evliydi».
34İisus cuvap etti: «Bu yaşamanın oolları hem kızları evlenerlär.
35Ama kim etişecek, pay alsın gelär ömürdän hem ölülerin dirilmesindän, evlenmeyecek.
36Artık yok nasıl ölsünnär, çünkü angillerä benzeerlär. Onnar Allahın oolları, zerä ölümdän dirileceklär.
37Ama, ani ölülär dirilecek, bunu gösterdi kendi Moisey orada, neredä laf gider yanar gümä için. Orada Saabi için deer: „Avraamın Allahı, İsaakın Allahı hem İakovun Allahı“.
38Allah – ölülerin Allahı diil, ama dirilerin, zerä Allaha hepsi insan diridir».
39Bilgiçlerdän kimisi cuvap etti: «İi söledin, Üüredici!»
40Bundan sora kimsey kıyışamardı sorsun Ona bir dä laf.
Hristos – kimin oolu?
41İisus sordu onnara: «Neçin deerlär, ani Hristos – Davidin Oolu?
42Kendi David Psalma kiyadında deer: „Saabi dedi benim Çorbacıma: Otur saa tarafımda,
43Bän koyunca Senin duşmannarını ayakların altına“.
44David adlêêr Onu „Çorbacı“, ozaman nasıl O olabilir Davidin oolu?»
45Hepsi işittilär, nicä İisus üürenicilerinä dedi:
46«Korunun bilgiçlerdän, angılar severlär gezmää uzun rubaylan hem beenerlär insan selämnesin onnarı meydannarda. Severlär oturmaa ilk skemnelerä sinagogalarda hem öndeki erlerä konak sofralarında.
47Onnar kemirerlär dulların evlerini, ama göstermäk için uzun dualar yapêrlar. Onnarın cezası çok aar olacek».
Currently Selected:
Luka 20: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
