Мәтта 4

Щерʼьбандьна Иса

(Марԛос 1:12-13; Луԛа 4:1-13)

1Һьнге Рʼӧһʼ Иса бьрә бәрʼийе, кӧ жь Мирещьн бе щерʼьбандьне. 2Әԝи чьл рʼож у чьл шәви рʼожи гьрт, пәйрʼа бьрʼчи бу. 3Йе кӧ дьщерʼьбинә незики Ԝи бу у готе: «Һәгәр Тӧ Кӧрʼе Хԝәде йи, дә бежә ван кәвьра кӧ бьбьнә нан». 4Ле Иса ле вәгәрʼанд у готе: «Ньвисар ә: ‹Инсан тʼәне бь нен нажи, ле бь һәр хәбәра кӧ жь дәве Хԝәде дәрдькʼәвә›#4:4 Ԛануна Дӧщари 8:3. ».

5Һьнге мирещьн Әԝ бьрә Бажаре Пироз, сәр бьльндщийа бане пʼарьстгәһе да сәкьнандьне 6у готә Ԝи: «Һәгәр Тӧ Кӧрʼе Хԝәде йи, дә Хԝә бавежә хԝаре, чьмки ньвисар ә: ‹Хԝәде ԝе тʼәмийа Тә бьдә мьлйакʼәтед Хԝә у ԝе Тә сәр дәсте Хԝә бьгьрьн, ԝәки ньге Тә кәвьр нәкʼәвә›#4:6 Зәбур 91:11-12. ». 7Иса готе: «Әв жи ньвисар ә: ‹Хӧдан Хԝәдейе хԝә нәщерʼьбинә›#4:7 Ԛануна Дӧщари 6:16. ».

8Һьнге мирещьн Әԝ бьр рʼакьрә сәр чʼийаки гәләки бьльнд у һʼәму пʼадшатийед дьнйайе, рʼәԝша ԝанва нишани Ԝи дан 9у готә Ԝи: «Һәгәр Тӧ дәвәрʼуйа бейи, сәре Хԝә ль бәр мьн дайни, әзе ван һʼәмуйа бьдьмә Тә». 10Һьнге Иса готе: «Дури Мьн һәрʼә, щьно! Чьмки ньвисар ә: ‹Сәре хԝә ль бәр Хӧдан Хԝәдейе хԝә дайнә у тʼәне Ԝирʼа хӧламтийе бькә!›#4:10 Ԛануна Дӧщари 6:13. »

11Ԝи чахи мирещьн Әԝ һьшт чу у ва мьлйакʼәт һатьн жерʼа бәрдәсти кьрьн.

Иса ԛәза Щәлиледа дәст бь кʼаре Хԝә дькә

(Марԛос 1:14-15; Луԛа 4:14-15)

12Гава Иса бьһист, ԝәки Йуһʼәнна һатә гьртьне, Әԝ рʼабу чу Щәлиле. 13Әԝи Ньсрәт һьшт, чу Кәфәрнаһума дәве гола Щәлиле, ль нав синоре Зәбулоне у Нәфтәлийе щи-ԝар бу. 14Әв йәк аһа бу, кӧ әԝ готьна бь заре Ишайа пʼехәмбәр бе сери:

15«Ԝәлате Зәбулоне у ԝәлате Нәфтәлийе,

ль сәр рʼийа бәрбь голе, ԝи алийе Урдӧне,

Щәлила нәщьһуйа,

16әԝ щьмәʼта кӧ нав тәʼристанийеда рʼуньштьбу,

рʼонайикә мәзьн дит

у әԝед кӧ ль ԝәлат у сийа мьрьнеда рʼуньштьбун,

рʼонайи жь ԝанарʼа дәркʼәт»#4:15-16 Ишайа 9:1-2. .

17Жь һьнгева Иса дәст бь даннасинийе кьр у гот: «Жь гӧнәкьрьне вәгәрʼьн, чьмки Пʼадшатийа Әʼзмана незик буйә».

Иса гази һәр чар мәʼсигьра дькә

(Марԛос 1:16-20; Луԛа 5:1-11)

18Чахе Иса ль дәве гола Щәлиле дьгәрʼийа, рʼасти дӧ бьра һат, Шьмһʼуне кӧ жерʼа Пәтрус дьһатә готьне у Әндраԝьсе бьре ԝи. Ԝана тʼорʼ давитә голе, чьмки мәʼсигьр бун. 19Иса ԝанарʼа гот: «Пәй Мьн ԝәрьн, Әзе ԝә бькьмә нечʼирванед мәрьва». 20Ԝана жи һәма ԝе дәме тʼорʼед хԝә һьштьн у пәй Ԝи чун.

21Гава Иса жь ԝи щийи һьнәки пешда чу, рʼасти дӧ бьред дьн жи һат, Аԛубе Зәбәди у Йуһʼәннайе бьре ԝи. Ԝана тʼәви баве хԝә, Зәбәди ԛәйькеда тʼорʼед хԝә һивез дькьрьн. Иса гази ԝан жи кьр. 22Ԝана жи һәма ԝе дәме ԛәйьк у баве хԝә һьштьн у пәй Ԝи чун.

Иса даннасин дькә, һин дькә у ԛәнщ дькә

(Луԛа 6:17-19)

23Иса ль тʼәмамийа Щәлиле дьгәрʼийа, кʼьништед ԝанда һин дькьр у Мьзгинийа Пʼадшатийе дьда у һәр щурʼә еш у нәхԝәши жи кӧ нав щьмәʼтеда һәбун ԛәнщ дькьрьн. 24Нав-дәнге Ԝи ль тʼәмамийа Сурйайе бәла бу, щьмәʼте һәр щурʼә мәрьвед нәхԝәш анинә щәм Ԝи, йед кӧ щурʼә-щурʼә еш у щәфада бун: Йед щьнакʼәти, һивкʼәти, шьлушәʼт у Әԝи әԝ һʼәму жи ԛәнщ кьрьн. 25Гәләк әʼлаләт жи жь Щәлиле, жь ԛәза Декаполисе#4:25 «Декаполис» бь зьмане йунани те фәʼмкьрьне: «Дәһә Бажар», чьмки әва ԛәза бәреда бь йәктийа дәһә бажара һатийә чекьрьн. , жь Оршәлиме, жь Щьһустане у жь ԝи алийе Урдӧнейи рʼоһьлате пәй Ԝи дьчун.

Currently Selected:

Мәтта 4: KmrNTC

Highlight

Copy