Genesis 24
24
Isaac Rebekah atherr
1Abraham artwamp-anem irrek, ampwal akngerr atnyenek. Akngeyel renh arntarnt-arek. 2Ikwer-penhan, Abraham-el warrkenh ikwerenh innga ilek, rarl ampwal ikwerenh-rnem arntarnt-arayntetyek. 3“Anew apmer Canaan-areny iney-angenh alerey atyenhek. 4Kel apmer ayengarl ilkwerrek-ampeny-arenyant anew ikwer inetyek, atyenh-rnemarl aneyel-itwek.”
5Warrkenh ikwerenhel renh ayernek, “Nthakenharl arelh ra apetyetyek ilkelhey-angenhel. Ilek-apenyarl Isaac atha thwenenty, renh ikngwetyek.”
6“Kel, menty ipmay iterrey-angenh,” Abraham-el tyernek. 7“INGKART alker-arenyel ayenh atnwenhey-alpek apmer nhenh-warl, apmer alhelenty nhenh-warl ayenh ra anthek, atyenh-rnem-akert. Nga apmer ikwer-warl alhentyan, INGKARTel angel ikwerenh thwenem, arraty-antey atnwenhetyek arelh ikwer-warl. 8Ra arlkarirrentyan menty ra aney, alerey atyenh Isaac akngeyney-angenh, ikwer-warl.” 9Warrkenh ra Abraham ikwer ilelhek, “Ayeng ngkweng awelheyel, ntwarl ayenh ilek-angkwarr-antey.”
10Ikwer-penhan warrkenh ra ampwal ilek-ilek akngerr-anem Abraham-kenh kamwerl 10-warl tywenek. Ikwer-they ra anperl-alhek apmer Syria-ampeny-warl, artwa Nahor anenh-warl. Nahor Abraham-kenh ayteyikw. 11Ra kamwerl-rnem kwaty-itwek apmer tern akwerr-ampenyek apmer ltyerreyek arrerney-alhek. Atwerrp-anem arelh-rnem tern ilkwareny-rnem kwaty-warl apetyek.
12Warrkenh ra kwenirremel irrwerl-warl-athek angkek, “Akngeyay, ngan Abraham Atyetyartarl aneyel. Ntwa ayenh arraty ila, anew atha Isaac-ek anetyek, ntwarl Abraham renh alhelek-angkwarr-antey. 13Arelh yanh-rnem kwaty-warl rlengk apetyem, 14atha renh-rnem ayernem anyentel kwaty anthetyek apek, rarl ayenh kwaty antheman athap renh iterl-aremarl, Isaac-kenh anewikw, ntwarl Atyetyart atyenh alhelek-angkwarr.”
15-16Aleyak anyent mwerr-angker innga apetyek kwaty inpetyek, ampwal kwatyek-arelh anpethel akngetyek, itnan ra Rebekah. Rebekah ra Bethuel-kenh alerikw. Bethuel ra Nahor-kenh ra Nahor-kenh alerikw, Milcah-kenh ampikw. Rebekah anper ikwer-angkwarr alhek, kwaty-anem ra inpenh kwatyek-arelh-warl. Ra apmer-warl alpetyek-anem irrek.
17Abraham-kenh warrkenhel renh ayerney-ayntek, “Kwaty atyeng antha!”
18Aleyak ra angkek, “Kel, antywa!” Ra anpeth-they renh atwarrelhilek, anterrkwemel artwa renh-anem kwaty antywetyek anthek.
19-20“Atha kamwerl-rnem-then kwaty antywetyek anthem,” aleyak ra angkenh. Aleyak ra kwaty thelhek. Ra angkepelarreng kwaty inperlenty-akngenh kamwerl-rnemek. Kel kamwerl-rnem kwaty akngerr antywek-penh. 21-22Abraham-kenh warrkenhel arelh renhant-anem arenh, ra renh aretyek, ra apek innga nhenhan. Artwa warrkenh ra atnyenek ampwal alhek-arelh anyent ampwal akwek-arelh anyent, apwert gold-penh. Ra Rebekah renh anthek. 23Warrkenh ra ayernek, “Angwenh aynengkw ngkwenhan? Warl arlpimp ngkwenhan aynteyel, anwantherr ayntetyek?”
24Aleyak ra ilek, “Artwamp atyenhan Bethuel-arl, Nahor-kenh alerikw, Milcah-kenh ampikw. 25Kel warl arrekantherr arlpimparl. Amern atherrk akngerr kamwerl-rnemek.”
26Warrkenh ra kwenirrek, Akngey-warl-athek angkemel. 27“Kel, Abraham-kenh Atyetyart, ayeng ngkweng inkwerelhem, ntwarl ayenh Abraham-kenh-rnem-warl atnwenhek, ntwarl alhelek-angkwarr.”
28Rebekah anterreynek apmer-warl ikwerenh-rnem anenh-warl, ra renh-rnem ilek. 29-30Rebekah-kenh awayikw, itnan Laban. Ra renh awek, rarl renh ingkerrenh-angkwarr ilek. Ra ampwal alhek-arelh-rnem-then, ampwal akwek-arelh-rnem-then kel arek. Laban anterrek Abraham-kenh warrkenh-warl, kamwerl-rnem-itwel rtnenh-warl, kwaty ngenty impalth-warl. 31INGKARTel ngenh mwerr-antey akngetyek apmer nhenh-warl. Akethel anwekantherrety rtney-angenh. Apmer atha ngkweng mpwarek, nga ingwel ayntetyek, kamwerl-rnem-then, ngkwenh-rnem-then.
32Abraham-kenh warrkenh alhek, Laban-angkwarr. Laban-kenh warrkenh-rnemel ampwal-rnem atwarrelhilek kamwerl-rnem-they. Kel ra atherrk-rnem kamwerl renh-rnem anthek. Kwaty-anem ikwer-rnem akngetyek warl kwen-warl Abraham-kenh warrkenh-rnemel ingka lhewelhetyek. 33Ikwer-penhan rernem amern-anem artwa renh-rnem anthek, rernem arlkwetyek. Warrkenhel ilek, “Amern arlkwey-alentyelan, angketangkwel atha ngenh ileman ilekekarl ayeng apetyek apmer nhenh-warl. Kel ilant ilekek nga apetyek,” Laban angkek.
34Warrkenh ra ilelhek, “Ayengan Abraham-kenh warrkenharl. 35INGKARTel Abraham renh aleth arntarnt-arenh, akngerr renh anthek, yep-yep-rnem-then, pwelek-rnem-then, nanikwet-rnem-then, kamwerl-rnem-then, tangkey-rnem-then, thilp-rnem-then, gold-rnem akngerr, warrkenh-rnem-then. 36Atyetyart atyenh-kenh anewikwelan ampa atnyenek ampwelant-anem. Ra awey atnyenek, Abraham-el renh anthek ampwal ilek-ilek akngerr innga. 37Atha Atyetyart atyenh ilek, ayengarl ikwer awelheyek, rarl ayenh ilek-angkwarr. Ra ayenh ilek, ‘Menty arelh Canaan-areny ikngwey-angenh alerey atyenhek. 38Atyenh-rnem-ampeny-theyant anew ikwer inetyek.’
39Atha Atyetyart renh ayernek, ‘Nthakenharl arelh atyeng-angkwarr apetyey-angenhan?’
40Atyetyart atyeng angkek, ‘Ayeng aleth Akngeyek inkwerelhemel awelheyel. Akngeyelarl angel thwenem, ra ngenh atnwenhetyek arelh ikwer-warl anew ikngwetyek alerey atyenhek. 41Rernem arelh renh ngkweng-angkwarr tyarlewey-angenhan nga menty-anem ana.’
42-43Ayeng kwaty ngenty ikwer-warl apetyek Akngey-warl-anem ayeng angkek, ‘Ngan Atyetyart ilkwa Abraham-kenh. Atyeng iylparrerna, Abraham-kenh alerikwek anew atha ikngwetyek. Arelh ra rlengk apetyem kwaty-warl, atha renh ayernem, ra ayenh kwaty ngenty itwek inpemel anthetyek, atha antywetyek. 44Rarl ayenh kwaty antywetyek anthenty, kamwerl-rnem-then, athap renh inngarl iterl-areman, ntwarl atyeng iylparrernek.’
45Atha Akngeyel ayernenhel-antey, arelh ra apetyek, kwaty inpetyek, ngenty ikwer-itwek, kwatyek-arelh anpeth-itwek akngetyenh. Ra kwatyek-arelh kwaty akngerr innga inpek, atha renh kwaty antywetyek ayernek, kwatyek-arelh-they.
46Ra kwatyek-arelh anpeth-they ayenh anthek, atha antywek. Ra kwaty inpek kamwerl-rnemek-anem, anthwengiletyek.
47-48Atha renh aynikwek ayernek, ra aynikw ikwerenh itnewek Bethuel, Nahor-kenh alerikw, Milcah-kenh ampikw. Anamerl-antey atha arrernek ampwal alhek-arelh-then ampwal akwek-arelh-then ikwer-warl. Ikwer-penhan ayeng kwenirremel Akngey-warl angkek, inkwerelhemel, rarl arraty innga atyeng arelh renh iylparrernek, Abraham-kenh alerikwek anew ikngwetyek, Abraham-kenh-rnem-itwek. 49Ila atyeng Atyetyart atyenhek, ntwarl renh arraty innga anthem. Atha apek aleyak renh akngeynetyek. Arrangkwelan aleyak ingwerek-anemarl ayeng nthwetyek alhem, anew ikngwetyek Abraham-kenh alerikwek.”
50Laban, Bethuel atherrel renh ilek, “Nhan Akngey-kenh-angkwarrarl, yanh-angkwarr anwantherr apenteman. 51Kel-anem Rebekah akngeyna-anem, atyetyart ngkwenh-kenh alerikwek anew, INGKARTelarl ngenh ilek-angkwarr.”
52Abraham-kenh warrkenh Akngey kwenirremel angkek inkwerelhemel ikwer, rarl renh arraty iylparrernekek. 53Ra arnkwernem-then thilp-rnem-then ampwal akwek-arelh-rnem-then gold-penh ingkerrenh anthek Rebekah renh. Ra ampwal mwerr-angker ingwer-rneman amikw-then awayikw-then anthek. 54Abraham-kenh warrkenh-rnem anyent-inger-antey ayntek, ikwer-itwek. Ingwepenh, Abraham-kenh warrkenhel renh-rnem ilek, “Kel, ayeng alpem-anem Atyetyart atyenh-warl.”
55Rebekah-kenh-rnem arrkngert angkek, “Alerey kwey Rebekah nhenh alerl aney anwekantherr-itwek-anem wik anyentel. Ikwer-penhant-anem ra alpeman.”
56Warrkenh angkek, “Arleng-alenty atyeng mpwarey-angenh ayeng anetyek, INGKARTel arraty innga iylparrernek-angkwarr. Ayeng kel alpem Atyetyart ikwer-warl.”
57Rernem angkek, “Ilek-apenyarl Rebekah anwantherr ayernentyan nthakenh rarl angkem?” 58Rernem renh ayernek, “Kel mwerrang artwa nhenh-angkwarr nga alpem?”. Kel Rebekah mwerr angkek artwa ikwer-angkwarr alpetyek.
59-60Rebekah renh-then arelh warrkenh-then Abraham-kenh warrkenh ikwer-angkwarr renh-atherr thwenek, alpetyek Abraham-kenh alerikw ikwer-warl. Ikwer-penhan rernem inkwerelhemel Akngey-warl angkek, “Anwantherr ngkweng Akngey-warl angkem, ngkweng-they akngerram-akngerrirretyek anyany-rnem-then, aperl-rnem-then. Akngeyel renh-rnem arntarnt-arayntem artwa ahelengkw-rnem-kety.”
61Kel Rebekah ingwer-rnem-then alpetyek-anem irrek. Rernem kamwerl-warl nganek, Abraham-kenh warrkenh-rnem-angkwarr alpek.
62Isaac ra Caanan-they antekerr-ampeny anenh. Apmer ra Beer Lahai Roi-they apetyek, apmer Canaan-they antekerr-ampenyel anenh. 63Atwerrp ra alhenh, artwernem-anem ra arnarek kamwerl-akert apey-alperl-anenty. Ra ikwer-rnem-warl-athek alhenh. 64Rebekah-el renh arnarek. Ra kamwerl-they atwarrek. 65Warrkenh renh ayernek, “Artwa angwenh apetyeyel?” Warrkenh angkek, “Atyetyart atyenh yanhan apetyeyel, Isaac-an.” Rebekah arnkwa artelhek inngerr-angkwarran, artwel arey-ayntekerr.
66Warrkenh ra ilek Isaac renh ilek-ilek-angkwarr ayntek. 67Isaac ra Rebekah renh atnwenhek kalikw kwen-warl. Ratherr itengirrek-anem. Ra ikwer inkwerelhek, amikw ikwerenharl ilwekarl-kety.
Currently Selected:
Genesis 24: aly
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
