Genesis 29
29
Jacob alheyel apmarley-kenh apmer-warl alhek
1Jacob aleth-antey alpenh akngerrakw-antey. 2Ra ngenty-anem arey-alhek. Ngenty ra apwert-rnemel artekarl. Yep-yep akngerr rtnenherrenh, kwaty ngenty-itwel, apwertelarl artek-itwel. 3Yep-yep arntarnt-arey-angker-rnemel apwert renh arnangilek, yep-yep-rnem kwaty anthwengiley-alkenh. Kwaty yep-yep-rnemarl ayntwek-penh, rernem angkep arrpemarl marteynenh apwert ikwerel-antey.
4Jacob-el renh-rnem ayernek, “Nthenh-areny arrantherr?”
“Anantherr apmer Haran-arenyarl,” rernem ilelhek.
5Jacob-el renh-rnem ayernek, Arrantherr iterl-areyel Laban apek, Nahor-kenh arrengikw? Kel, anwantherr renh iterl-areyel, rernem renh ilek.
6Rap renh-rnem ayernek, Ilek-apenyarlap ran? Kel, ra mwerr, rernem renh ilek. Alerikw ikwerenh Rachel apetyeyel apmer nhenh-warl yep-yep-rnem-akert.
7Jacob angkek, “Itwern irrwerlel-antey, rwenp inngarl, yep-yep arlwelenhey-alpenh-arey. Kwaty renh-rnem anthwengiletyek, peleyn-warl-anem akngeynemel, atherrk-anem rernem arlkwetyek.”
8“Alerl-antey mpwelheyel ingkerrenhek, ingkerrenh-angkwarrant apwert renh ahartelheletyek, kwaty-kety.”
9Jacob ikwer-rnem-itwek angkenh-antey, altyelikw ikwerenh apetyek, aynikw-kenh yep-yep-rnem-akert. Rachel yep-yep arntarnt-arey-angker anenh. 10Renh arek, Jacob-elarl apwert renh arnangilek, yep-yep-rnemarl kwaty antywey-alkenh. Apmarlikw-kenh yep-yep-rnem anthwengilek.
11Jacob artnek, Rachel renh arrwantyek, ikwer inkwerelhemel. 12Jacob Rachel ikwer ilelhek, “Ayengan Laban-kenh ampikwarl, Rebekah-kenharl.” Rachel ra anterrek, aynikw ikwerenh iletyek. Ra aynikw ikwerenh iley-alpek.
13Laban ra angka awekarl-penh, ra anterrek Jacob ikwer-warl, renh atnyenemel arrwantyek, apmer ikwerenh-warl-anem atnwenheynek. Jacob Laban ikwer-warl ilelhek. 14Laban angkek, “Nga ampaty atyenh inngarl.” Jacob alkent anyentel Laban ikwer-itwel anek.
Jacob warrkirreyel Laban-ek
15Laban Jacob ikwer angkek, “Ngan ampaty atyenhan. Arwa nga warrkirrekerr, ilek atha ngenh antheman, ngenh kwarteweyek Nthakenh nga iterreyelan?” 16Laban-kenh alerikw-atherr anek, Leah-atherr. Ayteyikw ikwerenh Rachel. 17Leah aleyak alpwely, alkwemp-apeny, Rachel aleyak pwentyeyn innga. 18Jacob ilkelhenh Rachel-ekant. Laban ikwer-warl angkek, “Aherrety 7-pelek-atwety ayeng warrkirrem ngkweng Rachel-itwek-anem ayeng itengirrey-alenty.”
19Laban-el renh ilek, “Mwerrarl nga itengirrentyan ingwer-rnem-kety. Mwerr-ayteng atha ngenh anthetyek. Mwerr atyeng-itwel ana warrkirremel.” 20Jacob aherrety 7-pelek-atwety warrkirrek Laban-ek, Rachel renh anthey-akenh. Ra ikwer-itwel itengirrey-angenh-antey. Kel, aherrety 7-penh, Jacob ra inkwerelhek Rachel-ek. Jacob angkek Laban ikwer-warl,
21“Kel-anem anew atyeng Rachel anthanem, ayeng ikwer-itwek ayntetyek. Aherrety 7-pel ayeng warrkirrenh. Atha warrk atyenh kel ywerrelhilek.”
22Ingwa ikwerel-antey rernem amern kwenty-anem arlkwek inkwerelhemel. Artwa ingkerrenh akarrirrek ikwer-rnem-warl. Laban akngerrek yangkelhek, amern tyenkerr arlkwetyek, Jacob Rachel-itwel itengirrek-angkwarr, amern rernem akngerr arlkwetyek inkwerelhemel ikwer-atherr. 23Ingwel, Laban-el Leah-anem Jacob renh anthek, anew ikwer anetyek. Jacob ra ikwer-itwek ayntek, Rachel-itwel-arrpantey, apal-antey. 24Laban-el arelh Zilpah renh ilanthek Leah-ek warrkirretyek.
25Ingwepenh-anem Jacob-el arek, Leah-anem ikwer-itwek ayntenh. Ra iterrek Rachel-ek-athen. Jacob-el Laban renh ayernek, “Ilekek ntwa ayenh irrtywerremel ilek, Rachel anthentyek-arrpantey! Ilekek ntwa irrtywerl-ampernek? Ntwa ayenh Leah anthek, ayengan warrkirrek Rachel-ekant.”
26Laban-el Jacob renh ilek, “Apmer anwekantherrenh-itwekan arrwekeleny-tangkwel itengirrem. Kwey arrwekeleny antheman, ingkerneny nthakenh anthey-angenh. Alakenh-anyem anwekantherrenh-angkwarran aynteyel, arrwekelenyant antheyel, ingkernenyan arrangkwarl. Wik anyentek-atwety mpwelanth Leah-atherr anetyek. Ikwer-penhan nga Rachel-itwek itengirrey-akenh, nga aherrety 7 ingwerek-atwety atyeng warrkirretyek, atharl Rachel anthek-penh, iteng-anem.” 27-30Wik anyent-penh, kwenty arlkwek-penh Laban-el alerikw ikwerenh Rachel anthek Jacob-itwek itengirretyek. Laban-el arelh Bilhah renh ilanthek, Rachel-ek warrkirretyek. Jacob Rachel-itwek innganem ayntek. Ra Rachel ikwerant inkwerelhek, Leah-angkwarran. Aherrety 7 ingwerek-atwety warrkirrek.
Jacob-kenh alerikw-rnem
31INGKARTel arek, Jacob-arl Leah-kety arlkarirrenh, ra ikwer amperrngirrek. 32Alakenh Leah-el ampa atnyenek. Rachel ampek arrangkw aleth anek. Leah-kenh awey akely ayntenh. Ra renh Reuben itnewek, alakenh angka ikwerenhel aynteyel, “INGKARTel ayenh irrkngerney anthek. Anew atyenh apek atyeng inkwerelhem.” Ra iterrek Jacob-an ikwer ilkelherl-anentyek-athen.
33Leah ra ampa ingweran atnyenek, awey akely arrpemarl. Leah angkek, “Akngeyel arek anew atyenh, rarl atyeng inkwerelhey-angenh. Alakenh-they ra ayenh awey nhanyem anthek. Rernem renh itnewek Simeon.”
34Ikwer-they ra ampa ingweran atnyenek, awey akely arrpemarl. Awey irrpety-anem ikwerenh. Ra angkek, “Ikwer-they anew atyenh inkwerelhem-anem atyeng. Awey irrpety-anem atyenh.” Ranem renh itnewek Levi.
35Ampa ingweran atnyenek, awey akely arrpemarl. Ra angkek, “Rlengk-anem atha INGKART renh tnakem.” Ranem renh itnewek Judah. Ikwer-they Leah ra ampa ingwerek arrangkw-anem anek.
Currently Selected:
Genesis 29: aly
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
