John 2

Jesus-el kwaty-penh wayn mpwareyel

1-2Arlta atherr-penh Jesus kwertengerl ikwerenh-rnem-akert alhek tawen Cana-warl, Galilee-ampeny-warl, artwethen arelh-then itengerrenty aytaretyek. Jesus-kenh amikw alhek arrpemarl. Akngerr akarrirrek amern kwenty arlkwetyek. Rernem ingkerrenhek yangkelek arrwekel-antey, amern akngerr arlkwetyek. 3Kel wayn ywerrek, arrangkw-anem. Amikw Jesus-kenh ikwer-warl angkek. “Arrangkw. Wayn ingweran ntwa iney-angenh-anteyarl.”

4Jesus ikwer-warl angkek, “Menty. Alerl-antey. Ingwer-ingerant arlta atyenhel, atha ilek-ilek mpwaretyek, rernem ayenh iterl-aretyek-anem.”

5Amikwel warrkenh-rnem ilek, “Awelhenherr-arey ampa atyenhek, rarl arrenhantherrenh ilem.”

6Ampwal apwert-penh kwatyek-arelh ilkwernem rtnenh 6 warl kwenel, ingkerrenh-antey iltya lhewelhetyek, amern arlkwey-alenty, angka Jew-rnem-kenharl arrwekel ayntenh-angkwarr. Kwatyek-arelh ilkwa 100 litres-ek-arelh. 7Jesus angkek warrkenh-rnemek, “Kwaty inpenherr-arey ampwal-rnem-warl arriwek-atwety.” Warrkenh-rnemel kwaty inpek, ampwal-rnem-warl. 8Jesus-el warrkenh-rnem ilek arrpemarl, “Kwaty akely tyampit-warl thelenherr-arey, atyetyart ikwer-warl akngemel.” Rernem Jesus ikwer awelhek. 9Kwaty ra wayn-anem irrek, Jesus-angkwarr. Warrkenh-rnem rernem tyampit akely-warl thelek-penh, rernem waynek akaltyarl. Atyetyart ra kwaty akely-penh wayn-anemarl antywek, akwerrpel. Ikwer-penh atyetyart arlkek artwa anyent ikwer itengirrey-alenty ikwer. 10Atyetyart apal angkek, “Wayn nhenhan mwerr-angkerarl. Wayn mwerr-angker nga awakelhek ingkernant ingkerrenhel antywetyekarl! Wayn apmwamwam antywey-angenh arrangkw. Wayn irrkweny antywey-angenh. Ingwer-rnemel wayn mwerr-tangkwel anthetyek, wayn akngerr rernem antywetyek. Rernem wayn mwerr ywerrelhilenty, anwantherr wayn apmwa renh anthetyek.”

11Jesus-el kwaty-penh wayn mpwarek tawen Cana-itwek apmer Galilee-ek, rlterrk ilkwakertel, kwertengerl ikwerenh-rnemel renh aretyek. Rernem Jesus renh tnakek-anem rlterrk ilkwakert. 12Arlta ikwer-penh Jesus tawen ilkwa Capernaum-warl alhek kwertengerl ikwerenh-rnem-akert. Amikw-then ayteyikw-rnem-then alhek ikwer-angkwarr. Rernem tawen Capernaum-itwek aney-alhek arlta irrpetyel.

Jesus alheyel Jew-kenh tyaty ilkwewarl

(Matthew 21:12-13; Mark 11:15-17; Luke 19:45-46)

13Arlta impen arrer-anem tyenkerr Anperarl Alhek “Passover” rernem arlkwetyek, Jesus kwertengerl ikwerenh-rnem-akert alhek Jerusalem-warl. 14Rap Jew-rnem-kenh tyaty ilkwewarl aketh-ampeny-warl alhek Ra arey-alhek rernemarl pwelek-rnem yep-yep-rnem-then thip rwelyarr-rnem-then tharlemilenh. Ra arek artwernem man-angketyarr taypel-itwek anerl-anenty, man change akngerr-akert. 15Jesus ra arek-penh, ra ikwer-rnem ahelirrek, rernemarl apmwel-areth Akngey-kenh warl-itwek tharlemilenh aker ilek-ilek. Whip ra mpwarek rwep-penh. Artwernem tyaty-they ra irrentek yep-yep-rnem-then pwelek-rnem-then, taypel-rnem akngartewemel, man-angketyarr. Man arlperrty iwek. 16Artwa thip-akert-rnemek ra arlkek, “Thip-rnem arleng akngeynenherr-arey! Nhenhan Akngey atyenh-kenh warlarl. Arrantherr store-anem arrernek apmer nhenh-itwek apmer impen Akngey-kenh!” 17Kwertengerl-rnemel awek-penh, rernem iterl-arek angka Akngey-kenh arrwekelenyarl ayntenh, “Ayeng arraty iterreyel warl ngkwenhek, warl menty artelh-aynteyek. Ayeng ahelirrek apmwel-aretharl-anem anew-anenh, angka Akngey-kenh iley-angker.”

18Jew-rnem-kenh atyetyart-rnemel Jesus arek, rarl ingkerrenh irrentek tyaty ilkwethey, rernem apetyek renh ayernemel, “Akngeyelang ngenh ilanthek, ntwa ingkerrenh tyaty ilkwethey irrentetyek? Arrangkw apek.” Rernem alakenh renh ayernek, ikwer irrpeltherremel.

19-21Jesus-el renh-rnem tyernek, “Arrantherr tyaty renh atakenty, atha angkep arrpemarl arteyenh ingwa atherr-penh.” Atyetyart-rnemel Jesus-kenh angka iterl-arey-angenh. Rernem apal angkerrenh tyatyekang angkerl-anentyek-athen. Ran ingwer-angkwarr angkek. Ran arraty ilelhey-angenh, ingwa atherr-penh ra itetherrenhey-alpeyenh, arlka mwerr-akert-anem. Atyetyart Jew-rnemel renh ilek, “Nthakenh ntwa warl renh angkep arteyenh arrpemarl ingwa atherr-penh? Warrkenh-rnem aherrety 46-ek-atwety warrkirrenh awank-akerr, tyaty nhenh artetyek!” 22Ingkartel Jesus renh itethilek-penh, kwertengerl-rnemel rernem angka arrwekeleny Akngey-kenh renh iterl-arek-anem, “Wethip ra anwekantherr awank ilelhek wenh! Inngarlap ran ilelhek angkeparl itethirreyenh!”

Jesus-el ingkerrenh iterl-areyel, rernemarl iterreyel

23Jesus ra Jerusalem-itwek-antey anenh. Amern Anperarl Alhek “Passover” tyenkerr rernem arlkwenh. Akngerrel Jesus renh arek, rernem renh tnakek-anem rlterrk ilkwakert. Rernem angka arrwekeleny-they renh iterl-arek-anem. 24-25Jesus-el arek, rernemarl renh apentenh. Rap iterremel ament angkek, “Rernemarl ayenh apenteyenh angath-antey, ikwer-penh rernem atyengety ipmelheyenh-anem.” Ra ikwer-rnem awelhey-angenh. Jesus-el arrwekel-antey renh-rnem iterl-arenh, rernemarl iterremel renh apentenh.

Currently Selected:

John 2: aly

Highlight

Copy