Lukas 10
10
Puang Isa ssua pitung pulo tau to nturu'i male mpangpeissenan Kareba Kasalamatan
10:1-12
1Mangkai joo too napilei omi Puang Isa to pitung pulo tau laen to nturu'i, nasuai male sidua-dua njoloanni lako sininna kota sola kampong to la napangngujui. 2Nakuanni, “Siririanmo to pare, apa ci'di'ra tomepare. Iamo joo peta'dai lako ampunna uma, nasua tau male mpepareanni.#10:2 Battuananna: Buda to tolino madoang mpesa'dingngi Kareba Kasalamatan, apa ci'di'ra to la mpauanni. Iamo joo peta'dai lako Puang Allataala nasua tau male mpangpeissenanni. 3Malemo kamu'! Kusua kamu' male susi bembala' mentama tangnga serigala.#10:3 Ia to serigala, olok-olok masa'ga' to tuli ngkande bembala', na wa'ding too ngkande tau. 4Danggi' mibawa sepu' ba'tu tas, ba'tu sapatu. Danggi' mimasai sipangkada-kada tau jio tangnga lalan. 5Ia ammimentama bola la mikua, ‘Dennaa upa' nabarakka'i kamu' Puang Allataala!’ 6Ia ke den tau lan joo bola ntarimai to pangbarakka'mi la torroi lan joo bola. Ia ke te'da namadoang ntarimai, ake'mo na pole pole' joo pangbarakka'mi lako kalemi. 7Ia ke ditarima kamu', danggi'mo mimellele-lele. Tarima meloi to kande naben kamu'. Nasaba' ia to tomangjama, sipato' ntarima sarona. 8Ia ke mentama kamu' kota, natarima melo kamu' tau, la mikande apa to naben kamu'. 9Pamalagahhi to tomasaki lan joo kota, mipangpeissenanni kumua, cingga'tu'mora naratu Puang Allataala mangparenta susi Raja. 10Apa ia ke mentama kamu' kota, na te'da miditarima, messun kamu' mipangpeissenanni jio bata' kumua, 11‘Moi to carepa kotami le'ke' jio ajeki' kipentambakan too, la mpangngingaran kamu' to kasalanmi. Apa la miissen kumua cingga'tu'mora naratu Puang Allataala mangparenta susi Raja!’ 12Ingaranni! Ia ke Kiama'mi lino, la'bih nasessai Puang Allataala to tau lan joo kota na ia to to-Sodom!”#10:12 Ia to-Sodom kaissenan kumua gaja gaja'. Kitai Kajajian pasala' 19.
La disessa to to-Yahudi jio tana Galilea to te'da namatappa'
10:13-16
(Matius 11:20-24)
13Mpatarruhhi kadan-Na Puang Isa nakua, “Macilaka kamu' to-Khorazim sola to-Betsaida! Buda tanda mejangngaran to mangka kupugauk jio kotami, apa te'dapa mimengkatoba'. Ia kenna la dipugauk joo tanda mejangngaran jio kota Tirus sola kota Sidon, masaimo mengkatoba' tuu lako tau jio, moi na bangsa tangngia to-Yahudi. La mangpakean kamasussan, napessamboran too au de' ulunna, sanga mpenassannii dosana. 14Ia ke Kiama'mi lino, la'bih maringngan ia sessana to to-Tirus sola to-Sidon, na ia to sessami sola ngasan. 15Na kamu' to-Kapernaum! Misangaraka la dipamatande kamu' ratu de' langi'? Te'da! Apa la dipembuangan kamu' do' ngenan kaminang majiong!” 16Nakuamo Puang Isa lako tonturu'i, “Ia to tau mpesa'dingngi kamu', padamo to Aku' napesa'dingngi. Ia to tote'da natarima kamu', padamo to Aku' te'da natarimai. Na ia to totangntarimana', padamo to Puang Allataalara, to ssuana', te'da natarimai.”
Polemi to pitung pulo tau to nasua Puang Isa
10:17-20
17Gaja rioi tuu lako pitung pulo tonturu' Puang Isa tonna polemo jio mai to nanii male sidua-dua, anna kua, “Ee Puang, ia ke mpakekan sangan-Ta' nnula'i setang, naturu'mokan!” 18Mebalimi Puang Isa nakua, “Den kukita Ballisi' polloh jao mai langi' susi palepa'. 19Pesa'dingngii! Kubenmo kamu' kuasa miwa'ding ntaloi ulah bolong, singki'-singki', na la mitaloi ngasan too to kuasanna ewalimmi Ballisi', na te'da namangpanggaukan lako kamu'. 20Moi nasusi joo, danggi' mimario nasaba' naturu'mo kamu' setang, apa la mario kamu', nasaba' diuki'mo to sangammi jao suruga.”
Kamarioan-Na Puang Isa
10:21-24
(Matius 11:25-27, 13:16-17)
21Ia joo wattu mario tongan to Puang Isa, nasaba' nakuasaii Roh Allataala, nakua, “Oo Ambe', Puangna langi' sola lino! Mangkurru sumanga'na' lako Ambe', nasaba' ia ngasan joo tabunianan lako tomandalan pahangna sola tomacca, tapangpeissenanmo lako totangpaissen. Oo Ambe', iamo tapumasannang.” 22Nakuapa Puang Isa, “Sininna apa naben ngasanmo' Ambe'. Na te'da mesa' tau nnissenni to Anak, saliwanna Ambe'. Te'da too mesa' tau nnissenni to Ambe', saliwanna Aku' Anak, sola ia to tokupueloh kupaissenni.” 23Messailemi Puang Isa lako anak gurun-Na, napauan mesai kumua, “Masannang kamu', nasaba' mikitamo to mikitanna tee too. 24La miingaran! Buda nabi sola raja tonna anu' madoang la ngkitai to apa mikita tee too, apa te'da nakitai. Madoang too la ssa'dingngi to apa misa'ding tee too, apa te'da nasa'dingngi.”
Pangpasusian to-Samaria mamase
10:25-37
25Mangkai joo too, denmi mesa' guru agama la nnakkalanni Puang Isa, naden lalan nanii mpasalai. Malemi lako, nakua, “Oo Guru! Apara to sipato' la kupugauk, angkuampa' katuoan melo te'da cappa'na?” 26Mebalimi nakua, “Apara to diuki' lan atoranna Nabi Musa? Umbora nakua pahangmu joo?” 27Nakuamo mebali joo guru agama, “Ie'. La mpakamoja' tonganki' Puangta' Puang Allataala, situru' canning atinta', sininna kapaissenanta' na sininna kapakulleanta' ratu lako ssalainta' lino na mpakamoja' tooki' padanta' rupa tau, susi ke mpakamoja'ki' kaleta'.” 28Mebalimi nakua, “Tongan tuu pebalimmu. Pugaukmi, ammuampa' katuoan melo te'da cappa'na.”
29Apa cia'i masiri' joo guru agama, namekutana nakua, “Indara to padangku' rupa tau?” 30Mebalimi Puang Isa mpake pangpasusian nakua, “Den mesa' muane male jao mai kota Yerusalem mangnguju do' kota Yerikho. Natammuii parampo' jio tangnga lalan, narampai to pakeanna sola sininna apanna, namane' nggasa'i na ci'di'mora namate. Mangkai joo too nasalai bangmi. 31Denmi mesa' imang nnola ntuu jio. Ia tonna kitami joo todirampo', lambanni lako sambali'na mpessalai, namane' tarruh. 32Den toda to-Lewi, tomangjama lan Bola Puang Allataala, nnola ntuu jio. Ia tonna kitami joo todirampo', lamban todai lako sambali'na mpessalai, namane' tarruh. 33Apa denni to-Samaria, to mambela lalan, nnola ntuu toda jio. Ia tonna kitai joo todirampo', massemi penawanna. 34Malemi ngkandoppi'i, nabasei anggoro' to kojongna, najampii minynyak, namane' mba'ba'i. Napade'i keledainna,#10:34 keledai, susi nyarang, biasa dipake matteke' jio tana Yahudi napake tomakario-rio nabawai lako bola pangbongian, naparakai meloi. 35Masawanna joo naalanmi dua dinar,#10:35 Ia to mesa' dinar pada gaji tomangjama sangngallo nabenni to ampu bola pangbongian, napasanni nakua, ‘Parakai meloi tee tau. Ianna te'da naganna' tuu doi', ratu pole'pa' kumane' mbajahki'.’ ” 36Natampakkimi Puang Isa joo curitan-Na nakutanaii joo guru agama, “Ia ke iko, umbonnara tee tau tallu to ssangai padanna rupa tau joo todirampo'?” 37Mebalimi joo guru agama nakua, “Ia to tongkamaseii joo todirampo' anna tulungngi.” Nakuamo Puang Isa, “La mupugaukki susi joo!”
Puang Isa male lako bolana Marta sola Maryam
10:38-42
38Malemi Puang Isa mpatarruh kalingkan-Na sola anak gurun-Na, namentama mesa' kampong. Denmi baine jio disanga Marta ssuai naratu lako bolana. 39Ia joo Marta den sile'tona disanga Maryam. Ia joo Maryam cadokko bang siandah Puang Isa mpesa'dingngi pangngajah-Na. 40Apa ia joo Marta naparri-parri ntoratui. Malemi lako Puang Isa nakua, “Oo Puang, antakamma' bangra Kita' na te'da bang naparinawai Maryam mbaliina'? Ke wa'dingngi, takuanni nabalii unamo', dikka'!” 41Mebalimi Puang Isa nakua, “Ee Marta, buda bang to mupuselang sola mupikkiri'. 42Na mesa'ra ia to gaja parallu. Napileimo ia Maryam joo kaminang melo, iamo to mpesa'dingngi kadan-Na Puang Allataala, na te'damo na la dialai.”
Currently Selected:
Lukas 10: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
