Kananet 7

Tawan

1U̱du̱wa̱k zin Manyi Nowa, izek ne, “Oot i̱nna̱ ki ollunne do̱o̱k i̱ba̱ ecito, ma̱rri̱t kicina anna e̱e̱ni̱ i̱nna̱ e̱e̱t ci abunna bu̱u̱le̱ cu oroot. 2Dima elegje turgerem cik a̱zi̱ze̱ agano ming apahek Manyi, cik macik ki cik nga̱a̱ye̱k, ki elegje cik ngoronyik#7:2 Ngoronya: A̱du̱wa̱k lo̱ti̱nno̱k cik Musesi olli Ya̱u̱do̱, azi ne, anyak elegje u̱gge̱ cik iróng een da̱i̱ne̱t, eci nege e̱e̱ggi̱n ngoronye. Iróng wo̱ye̱ nege apak kize wawac. IkebLeviticus 11:1-32. ko̱ rama rama cik nga̱a̱ye̱k ki cik macik. 3Kar zin bo̱do̱k dima iballi rama lak turgerem, cik macik ki cik nga̱a̱ye̱k. Tu̱gu̱ niko kar atin iballi bu̱k kabaito todowai. 4Izeto zar i̱i̱nya̱ cik anyigzai turgerem niko kar atin anna kanyik ta̱mu̱ kiṯil wazinnok ki ba̱a̱li̱nno̱k moten we̱c kar kiditai kaala ne̱k balik keenycak anna lo̱o̱c ko̱.”

5Izik zin Nowa zoz ci Manyi, u̱tu̱gu̱ zin kaal balik i̱lo̱ti̱k enne nonno ke̱ do̱o̱k.

6Izeto da̱ e̱rki̱to̱wa̱ cik Nowa obet torkonom (600) baling a̱bu̱ng tawani lo̱o̱c ke̱. 7I̱tto̱zzo̱ Nowa ki ngaa wainne ki logoz waginnek ki ngaai wagge̱k i̱bo̱ kar ki̱vi̱re̱t tawan. 8Anyaktta elegje cik nga̱a̱ye̱k ki cik macik rama rama wak a̱zi̱ze̱ ki cik ngoronyik, iballi ki ngazengaze bu̱k, 9i̱vi̱tta̱k zin nege Nowa kar ki̱tto̱zo̱ i̱bo̱ ki bali ming a̱du̱wa̱k Ta̱mu̱ta̱dde̱n nonno ke̱.

10Ma baling utubte i̱i̱nya̱ balik een turgerem a̱du̱wa̱ Manyi ke̱, i̱ri̱yya̱ zin tawani.

11Ma̱i̱je̱ i̱i̱te̱ne̱ wa een omoto ki turgerem nye̱lo̱we̱ wa een e̱rki̱ta̱ rama, izeto da̱ Nowa e̱rki̱to̱wa̱ obet torkonom (600), baling abbize tawani lo̱o̱c. 12Aṯile ta̱mu̱ a̱ddu̱ta̱i̱ maama wazinnok moten we̱c ki ba̱a̱li̱nno̱k moten we̱c.

13Ma̱i̱je̱ i̱i̱te̱n neci i̱tto̱zzo̱ Nowa ki logoz waginnek Shem ki Ham ki Japheth ki ngaa wainne ki ngaai cik logoz ne̱k e̱e̱ggi̱n i̱i̱yo̱ ko̱ do̱o̱k i̱bo̱. 14O̱o̱tte̱ i̱ba̱ bu̱k elegje cik zarak cik macik ki cik nga̱a̱ye̱k, ki cik o̱rgu̱, ngazengaze do̱o̱k ki iballi veelek, ki kaal wak a̱ku̱l bu̱k. 15I̱vi̱tta̱k zin elegje ne̱k aruge lo̱o̱ta̱ do̱o̱k Nowa kar ki̱tto̱zzo̱ i̱bo̱ rama rama ci nga̱a̱ye̱ ki ci maci. 16E̱e̱ggi̱n elegje cik i̱i̱zo̱ ko̱ cik macik ki cik nga̱a̱ye̱k kaale cik aruge ko̱ do̱o̱k, ki baling oobek Ta̱mu̱ta̱dde̱n Nowa ke̱. Unyugek zin Manyi nogo i̱bo̱ ecito.

17Itil zin ta̱mu̱ i̱i̱nya̱ moten we̱c, ma̱i̱je̱ tawani otorye zee katakuza lo̱o̱c do̱o̱k, kodongek i̱bo̱ ta̱dde̱n. 18Otorye maama bak odong i̱bo̱ katavane maame ta̱dde̱na̱. 19A̱ri̱yo̱ni̱k maama lo̱o̱c zee ku̱bu̱ng biyen wak u̱u̱ntti̱k lo̱o̱ta̱ ko̱ do̱o̱k. 20Otorye maama ku̱bu̱nge̱t biyen kize ucca u̱u̱nze̱ta̱ do̱ caazzok moten ram ki u̱gge̱ bu̱k. 21Iditai kaala wak da̱ aruge lo̱o̱ta̱ ne veelek, iballi, kaal wak kabal ki wak zarak, ngazengaze ki ol cik diirik bu̱k. 22A̱da̱i̱to̱ kaala ne̱k aruge lo̱o̱ta̱ ko̱ do̱o̱k ne lai, 23e̱e̱t ci diiri ki elegje, ngazengaze ki iballi ne̱k a̱ku̱l ta̱mu̱-kenga ko̱ do̱o̱k. Ovvo cik anyigzai, Nowa ki ollinne ki kaal balik aavtte ki nonno i̱ba̱ ke̱ do̱.

24Atangwei tawani lo̱o̱c i̱i̱nya̱ cik een o̱bo̱n co̱de̱ ki moten tu̱r (150).

Currently Selected:

Kananet 7: tex

Highlight

Copy