Lu̱ka̱ 6

Manyi I̱i̱te̱n wa Yu̱bze̱nto̱

(Ma̱te̱yo̱ 12:1-8; Marko 2:23-28)

1Owo da̱ Ye̱su̱ I̱i̱te̱n imma wa Yu̱bze̱nto̱ ma̱ne̱ne̱ cik labinu, kar demezyak ciginnek kakate ku̱du̱lta̱ o̱o̱tti̱ cik labinu u̱gge̱, anginy azzine kar kadait. 2I̱jji̱nto̱ zin olli Varacisi uggak izeto ne, “Nya niga ming ogonnu gi̱i̱ ci akaka I̱i̱te̱ne̱ wa Yu̱bze̱nto̱ ko̱?”

3O̱bo̱de̱k zin Ye̱su̱ nogo, “Ngen niga ikebit ba̱li̱ye̱ gi̱i̱ ci ogon Da̱vi̱de̱#6:3 Gi̱i̱ ci ogon Da̱vi̱de̱: Ikeb zoz ci u̱tu̱gu̱ enne Ce̱e̱ze̱ wa Ta̱mu̱ta̱dde̱no̱1 Samwel 21:1-6. ki gonoggi baling adak nogo magiz ke̱? 4I̱tto̱ enne Ce̱e̱z wa Ta̱mu̱ta̱dde̱no̱ kar kadak da̱i̱ne̱t cik aarik ol a̱li̱le̱ kizeto cik adak olli wawaco, kar enne kaanyik u̱gge̱ bu̱k gonoggi.” 5Izek zin Ye̱su̱ nogo ne, “Een Ngerrti E̱e̱to̱ Manyi I̱i̱te̱n wa Yu̱bze̱nto̱.#6:5 Manyi I̱i̱te̱n wa Yu̱bze̱nto̱: U̱du̱wa̱k Ta̱mu̱ta̱dde̱n olli Ya̱u̱do̱ ku̱zu̱tte̱ I̱i̱te̱n wa Yu̱bze̱nto̱ eci enne Eteehenya ta̱mu̱-keng ki lo̱o̱c. Zoz zin ci een Ta̱mu̱ta̱dde̱n do̱ Tehenyait ko̱ nenen necu kar kize bo̱do̱k Manyi I̱i̱te̱n wa Yu̱bze̱nto̱. I̱yo̱ko̱ zin, baling azi Ye̱su̱ ne ke̱e̱ni̱ enne Manyi I̱i̱te̱n wa Yu̱bze̱nto̱, azi keng cinne ne, ke̱e̱ni̱ enne Ta̱mu̱ta̱dde̱n ci keteheenya kaal do̱o̱k. IkebLu̱ge̱z 20:8-11.”

Angaru Ye̱su̱ e̱e̱t I̱i̱te̱ne̱ wa Yu̱bze̱nto̱

(Ma̱te̱yo̱ 12:9-14; Marko 3:1-6)

6Kar I̱i̱te̱ne̱ imma wa Yu̱bze̱nto̱, i̱tto̱ Ye̱su̱ Ce̱e̱z wa Lawinto kar zin kedemezo, ma̱i̱je̱ da̱ e̱e̱ti̱ ci ngooli a̱zzi̱ti̱ ci a̱zzo̱ aave nginati. 7Orong da̱ olli Varacisi ki de̱me̱zzo̱k wak lo̱ti̱nno̱u̱ gool ci kar kovolongte Ye̱su̱, egelemit zin nonno oroot icima okko enne angaru e̱e̱t I̱i̱te̱ne̱ wa Yu̱bze̱nto̱. 8Ma̱i̱je̱ Ye̱su̱ a̱gga̱ zoz ci i̱no̱n nege zi̱nze̱tti̱nne̱ cigge̱k veelek kar kizek e̱e̱t ci ngooli a̱zzi̱ti̱ ko̱ ne, “Tinga je̱e̱na̱ kar bil ngu̱me̱ ci ollu do̱o̱k.” Itinga zin enne je̱e̱na̱ kar kibil nginati.

9A̱nne̱k zin Ye̱su̱ nogo ne, “Ka̱jji̱nnu̱ng anna i̱ge̱ta̱, gi̱i̱ jang ci abunna I̱i̱te̱ne̱ wa Yu̱bze̱nto̱: ku̱tu̱gu̱ kaal cik abunna icima ku̱tu̱gu̱ kaal cik mu̱nye̱nu̱, ki̱ti̱ri̱z ruget icima kegerzano?”

10Egelem zin enne nogo do̱o̱k e̱co̱de̱ e̱co̱de̱, kar zin kizek e̱e̱t neci ngooli a̱zzi̱ti̱ ko̱ ne, “Zolan a̱zzi̱t cunne.” Ozolan zin enne a̱zzi̱t cinne ka̱vvu̱ ṯop, kar zin a̱zzi̱ti̱ cinne kubunna niko. 11Abarik nege abure nong oroot kar kozozit nege do̱ ogonik wo̱ye̱ nege nya Ye̱su̱.

To̱ni̱a̱k omoto ki rama

(Ma̱te̱yo̱ 10:1-4; Marko 3:13-19)

12Okko da̱ Ye̱su̱ i̱i̱te̱n co̱de̱ biya kuk kalawo, kar ka̱ta̱ngu̱ nginati kaal ala Ta̱mu̱ta̱dde̱n. 13Baling ize looci nge̱rre̱t, utu zin enne nuyak waginnek do̱o̱k, kar zin katahala omoto ki ram kizeto to̱ni̱a̱k#6:13 To̱ni̱a̱k: E̱e̱ggi̱n ol ne̱ko̱ cik i̱tto̱n Ye̱su̱ doize cinne kar koot ke̱de̱me̱zi̱t ol zoz cinne kar bo̱do̱k kanyik nogo doiz ci otowe nege kuulo cik lo̱rye̱nta̱k kar kangaruc ol mo̱ri̱zo̱we̱ bu̱k. waginnek: 14Si̱mo̱ne̱ ci azi zar u̱gge̱ ne Peturu, gotoni Andereya, Je̱mi̱s, Jon, Vilip, Bartolomeyo,#6:14 Bartolomeyo: Een zar u̱gge̱ ciginnek ne Nathanael. IkebJon 1:45. 15Ma̱te̱yo̱, Tomas, Je̱mi̱s wa een ngerrti Alipeyo, Si̱mo̱ne̱ wa bali amarine gaala wak Romi, 16Judas ngerrti Je̱mi̱si̱#6:16 Judas ngerrti Je̱mi̱si̱: Een zar u̱gge̱ ne, Taudesio IkebMa̱te̱yo̱ 10:3; Marko 3:18. ki Judas Iskariyot ci atin okko adawa Ye̱su̱ volonga vu̱rrta̱.

Ma̱yu̱we̱ne̱t ki matiz

(Ma̱te̱yo̱ 4:23-25)

17Uluce enne uk lo̱o̱ta̱ ngatinne̱ng kar kibil ngati een buur. Aavtte da̱ to̱ni̱a̱ha̱ ciginnek cik meelek nginati ki ol cik meelek cik a̱vvu̱ lo̱o̱ce̱ ci Ju̱de̱ya̱ veelek, ki Jerusalema, ki o̱ro̱gjo̱we̱ cik Tyre ki Sidon, aavtte ti̱ti̱me̱ ci nyatapar ci a̱ddi̱ki̱re̱, 18a̱vvu̱ nege ovvo aziye zoz ci Ye̱su̱ kar bo̱do̱k abunna ming angaru enne nogo mo̱ri̱zo̱we̱. Ovvo ol wak aminye kuulo cik lo̱rye̱nta̱k ko̱ ubunntta, 19kar ol do̱o̱k koronggit ku̱u̱me̱t nonno, eci doizi iyowa ngatinne kar kangaru nogo do̱o̱k.

U̱mu̱yu̱k Ye̱su̱ nuyak ciginnek

(Ma̱te̱yo̱ 5:1-12)

20Egelem zin Ye̱su̱ nuyak ciginnek, ize ne:

“U̱mu̱yu̱kte̱u̱ niga wak amanu,

eci ba̱a̱li̱ne̱t ci Ta̱mu̱ta̱dde̱no̱ een cunno̱ng.

21U̱mu̱yu̱kte̱u̱ niga ol cik adak magiz i̱yo̱ko̱ niko,

eci ovvo atin niga anyarnu.

U̱mu̱yu̱kte̱u̱ niga ol wak a̱lu̱yyu̱ i̱yo̱ko̱ niko,

eci ovvo atin niga ararnu.

22U̱mu̱yu̱kte̱u̱ niga ming amarinnung ol,

ming aburnnung ol i̱ge̱ta̱ kar kodomtung

kar kutuburret zar cuggo̱k azi ne e̱e̱ggi̱n niga olli mu̱nye̱nu̱ zo̱ze̱ ci Ngerrti E̱e̱to̱.

23“Abunna ming atalninnu niga i̱i̱te̱ne̱ neci kar ingozit talninta, eci a̱ddi̱ki̱re̱ muci cunno̱ng ta̱mu̱-kenga. Eci bali be̱e̱ti̱gge̱k ogon a̱ri̱tto̱k niko bu̱k.

24“Abarik o̱lle̱ cuggo̱k ol wak e̱e̱ggi̱n bo̱to̱ro̱,

eci niga a̱gga̱mta̱u̱ kaal cik a̱a̱nyu̱ng talninet.

25O̱lle̱ cuggo̱k ol ne̱k adaiz ol ju̱rru̱m, i̱yo̱ko̱,

ovvo atin niga owoyyu magizet.

O̱lle̱ cuggo̱k ol wak arari, i̱yo̱ko̱,

ovvo atin niga anyakku matiz ki u̱lu̱wa̱.

26O̱lle̱ cuggo̱k ol wak ozozo ol ju̱rru̱m zare cigge̱k,

ogon ba̱li̱ye̱ be̱e̱ti̱gge̱k a̱ri̱tto̱k cik volongak niko.

Irez mo̱ddo̱ cigunnek

(Ma̱te̱yo̱ 5:38-48; 7:12a)

27“Abarik anna ka̱du̱wa̱kku̱ng i̱ge̱t ol cik azikna annit ko̱: Irezit mo̱ddo̱ cuggo̱k, u̱tu̱gu̱zze̱k kaal cik abunna ol cik amarinnung, 28a̱ma̱yu̱we̱t ol wak otoryung ko̱, alayek ol wak aminyung ko̱ Ta̱mu̱ta̱dde̱n. 29Ming apani e̱e̱ti̱ vurec, anyik bo̱do̱k kapan vurec co̱de̱ ke̱ bu̱k. Ming a̱gga̱ma̱ni̱ e̱e̱ti̱ ru̱u̱m cunne ngo̱lo̱lu̱, anyik kurumek ki ru̱u̱m ci ta̱dde̱nu̱ bu̱k. 30Anyik e̱e̱t kaal cik a̱jji̱n enne ngatunne, kar ming okkoye e̱e̱ti̱ imma gi̱i̱ cunne, ma ngen obodane ngatinne. 31U̱tu̱gu̱zze̱k ol kaal cik orongnyu ol ku̱tu̱gu̱zze̱u̱ng i̱ge̱ta̱.

32“Ming irezzu niga ol wak irezung ko̱ do̱, amudannu wo̱ye̱ niga nya ci abunna? Eci ol cik mu̱nye̱nu̱ irez gonoggi wak irez nogo ki i̱yo̱ko̱. 33Ming ogonikku niga ol wak abunna ngatinno̱ng kaal cik abunna do̱, amudannu wo̱ye̱ niga nya ci abunna? Ogon zin olli mu̱nye̱nu̱ niko bu̱k. 34Ming anyikku niga kaal do̱ ol cik orongnyu niga nogo kar atin ku̱ru̱we̱t nga̱bo̱lo̱, amudannu atin niga nya? Ogon zin olli mu̱nye̱nu̱ niko, aanyik gonoggi kaal kar atin ki̱vi̱ta̱ ka̱gga̱mtta̱ nga̱bo̱lo̱. 35Abarik irezit mo̱ddo̱ cuggo̱k, u̱tu̱gu̱zze̱k nogo kaal cik abunna, aanycik nogo kaal labak ci iróng atin niga orongnyu nga̱bo̱lo̱. Kar atin Ta̱mu̱ta̱dde̱n ka̱a̱nyu̱ng kaal cik meelek, ovvo atin e̱e̱ggi̱nnu̱ dooli cik Manyi wa Ommog Veelek, eci enne een bunnatait ngati olli mu̱nye̱nu̱. 36Izet ol cik amanikku ol ki Be̱e̱ti̱nno̱ng wa aave ta̱mu̱-kenga.”

Ma ettedekku ol gerziten

(Ma̱te̱yo̱ 7:1-5)

37“Ma ettedekku ol lo̱ki̱ko̱, kar atin iróng Ta̱mu̱ta̱dde̱n ettedekkung lo̱ki̱ko̱ bu̱k. Ma a̱gga̱mnyu̱ zoz ci gerze ollu, abunna atin Ta̱mu̱ta̱dde̱n iróng a̱gga̱me̱kku̱ng zoz ci gerze. Alaltek ol kaale cik gerzek, kar atin Ta̱mu̱ta̱dde̱n kalaleung i̱ge̱t bu̱k. 38Aanycik ol kaal, kar atin kanyoziung i̱ge̱t bu̱k. Atimanai atin kaala ne̱ke̱ ju̱rru̱m, ommogonik atin ju̱rru̱m, ku̱du̱te̱ koot rok lo̱o̱c, a̱du̱to̱ni̱k atin onyoto cuggo̱k. Kar gi̱i̱ye̱ ci atimanu niga ko̱, atimanonikkung atin i̱ge̱t bu̱k.”

39U̱du̱wa̱k zin Ye̱su̱ nogo yabzinet cu: “A̱gu̱ru̱t wo̱ye̱ e̱e̱ti̱ ci ru̱be̱ni̱ gooni ci ru̱be̱ni̱? Iróng wo̱ye̱ nege do̱o̱k a̱yu̱we̱ ovvo lo̱o̱wa̱? 40Iróng do̱le̱c ci cu̱ku̱lo̱ ommog de̱me̱zo̱i̱t cinne, ma̱i̱je̱ e̱e̱ti̱ imma ci amuda de̱mzi̱ne̱t ju̱rru̱m ogon atin enne ki de̱me̱zo̱i̱ti̱ cinne.

41“Nya ming acinni i̱nna̱ lojilingoc cidici aave e̱be̱re̱ce̱ ci gononu imma ngatu iróng i̱nna̱ edeconik keet ci a̱ddi̱ki̱re̱ aave e̱be̱re̱ce̱ cunne ko̱? 42A̱nne̱k wo̱ye̱ i̱nna̱ goonu ne, ‘Ja keelawi kaara lojilingoc ci anyai i̱nna̱ e̱be̱re̱ca̱ ko̱,’ imma ngatu i̱nna̱ anyai keet ci a̱ddi̱ki̱re̱ e̱be̱re̱ce̱ cunne ci ommog veelek, iróng wo̱ye̱ i̱nna̱ a̱a̱dda̱ bu̱k? A̱ru̱i̱ i̱nna̱ talaben. Aara arrak keet ci a̱ddi̱ki̱re̱ e̱be̱re̱ce̱ cunne, kar zin cin lojilingoc cidici e̱be̱re̱ce̱ ci gononu ju̱rru̱m.”

Keet ki o̱ya̱u̱ ciginnek

(Ma̱te̱yo̱ 7:17-20; 12:34b-35)

43“I̱llo̱i̱ keet ci abunna ci a̱bbi̱rna̱ o̱ya̱u̱ cik gerzek, icima keet ci gerze ci a̱bbi̱rna̱ o̱ya̱u̱ cik abunna. 44A̱gga̱ ol keet ngati a̱bbi̱rna̱ o̱ya̱u̱ ciginnek. Iróng ol aduca o̱ya̱u̱ cik een lobata keete ci een biila, icima ol aduca o̱ya̱u̱ cik een vi̱no̱ zara. 45Anyaha e̱e̱ti̱ ci abunna kaal cik abunna ngati adazze enne zinine cinne, kar e̱e̱ti̱ ci mu̱nye̱nu̱ anyak kaal cik mu̱nye̱nu̱ ngati adazze enne zinine cinne. Eci enne ozoz utuga kaal cik abbize zinin cinne.

Iziyyet de̱mzi̱ne̱t ci Ye̱su̱

(Ma̱te̱yo̱ 7:24-27)

46“Nya ming awuyang odohize niga a̱nne̱kka̱ng ne, ‘Manyi, Manyi,’ kar ngatu iróng ogonnu kaal cik ka̱du̱wa̱ anna ko̱? 47Ki̱ye̱le̱ku̱ng atin anna i̱ge̱t gi̱i̱ ci korongi anna ngati e̱e̱t ci a̱kku̱nna̱ka̱ annita kar kizik, kar enne ki̱li̱ngli̱nge̱ zoz neci. 48Ogon enne ki e̱e̱ti̱ ci eenyet ce̱e̱z, a̱da̱ enne lo̱o̱c kuk lo̱o̱ta̱ kar keteheenyek ce̱e̱z nginti een bee. Ming okko tawani a̱kku̱ rok ce̱e̱z, ma̱i̱je̱ ngatu iróng ce̱e̱z omoti, eci eenyce ce̱e̱z neci ju̱rru̱m. 49Ma̱i̱je̱ e̱e̱ti̱ ci aziye zoz cinanni imma ngatu iróng enne a̱li̱ngli̱nge̱, ogon enne ki e̱e̱ti̱ ci eenyet ce̱e̱z cinne lo̱o̱ta̱ iróng a̱da̱ lo̱o̱c ju̱rru̱m. Ming okko tawani a̱kku̱, a̱yu̱we̱ ce̱e̱z neci ki̱li̱be̱ kedecai.”

Currently Selected:

Lu̱ka̱ 6: tex

Highlight

Copy