Ruz 3
3
Ruz ki Boaz ngati a̱ru̱we̱ ol labi
1I̱i̱te̱n imma a̱nne̱k Naomi alawan cinne Ruz ne, “Agano ming korongaki anna i̱nne̱t mac kar i̱nna̱ bu̱k nyak ce̱e̱z cunne do̱? 2Uwaranu ba̱li̱ye̱ i̱nna̱ labi ki ngaai wak a̱li̱ngli̱ng ma̱ne̱ ci Boazi, a̱gga̱ i̱nna̱ een enne boorit cinna. Okko enne ba̱a̱li̱n cu aave ngati a̱ru̱we̱ ol labi. 3Raane kar zin u̱vu̱d ele ju̱rru̱m maale ci ongooli laala, kar tiim ru̱u̱m cunne a̱zi̱ze̱. Kar zin bit ngati gon a̱ru̱we̱ ol labi ko̱, ma zin i̱ye̱le̱k nonno ele zee kedeca enne da̱i̱ne̱t ki udenet. 4Ming uk enne ungnyak, rota nginti adungne enne. Bit zin uppuk nonno kar li̱te̱ zoone ciginnek. Okko enne a̱du̱wa̱ki̱ gi̱i̱ ci okko atin i̱nna̱ ogoni.”
5Abarizek zin Ruzi nonno, a̱nne̱k ne, “Kogonni atin anna zoz ci a̱du̱wa̱ i̱nna̱ ko̱ do̱o̱k.” 6Uluce zin Ruzi uk ngati a̱ru̱we̱ ol labi kar ku̱tu̱gu̱ ki bali u̱du̱wa̱k i̱nyi̱k cinne nonno ku̱tu̱gu̱ ke̱.
7Baling udut Boazi da̱i̱nte̱ ki udenta, kar zin katalo, uk zin enne ungnyak ojongoz nginti alute ol labi. Otowak zin Ruzi nonno li̱i̱m. Odong zin enne ru̱u̱m ci a̱bu̱nge̱ne̱ ko̱ kar zin ki̱tto̱ ki̱li̱te̱ zoone ciginnek. 8Ma̱i̱je̱ ba̱a̱li̱n kenga, itingawe gi̱i̱ imma Boaz kar zin ku̱ku̱le̱k je̱e̱n baling okko acin ngaa ci oong zoone ciginnek.
9I̱jji̱nno̱ zin enne, “E̱e̱ni̱ i̱nna̱ ngene?”
Abarizek enne a̱nne̱k ne, “Ke̱e̱ni̱ anna Ruz du̱ca̱i̱t cunne, e̱e̱ni̱ i̱nna̱ boorit ci wo̱ye̱ avada ce̱e̱z ci gotononnu. Ku̱bu̱ngte̱ zin naga do̱o̱k ru̱u̱me̱ cunne ko̱.#3:9 Ku̱bu̱ngte̱ zin naga do̱o̱k ru̱u̱me̱ cunne ko̱: Azi keng ci zoz necu ne, ti̱ya̱ annita keere ci olli Israilo.”
10Abarizek zin Boazi nonno a̱nne̱k ne, “Anyik Manyi ka̱mu̱yu̱wi̱n, buweenyanni. Ommog bunnati cu bali i̱ye̱le̱k i̱nna̱ boor cinna̱ng arrak oowa ke̱. Iróng i̱nna̱ a̱vi̱ri̱ vu̱rrte̱ ci logoz cik e̱e̱ggi̱n i̱tto̱k icima ngaalam. 11Kar zin i̱yo̱ko̱, buweenyanni, ma o̱ngo̱o̱le̱ gi̱i̱ imma. Kogoniki atin i̱nne̱t kaal cik a̱jji̱nni̱ i̱nna̱ do̱o̱k. A̱gga̱yi̱ olli o̱rgu̱ do̱o̱k ming e̱e̱ni̱ i̱nna̱ ngaa ci abunna oroot. 12Een de̱de̱ ke̱e̱ni̱ anna boorit ci mac cunne, abarik anyak zin e̱e̱t imma ci avada wo̱ye̱ tatug cunno̱ng ojoni oroot. 13Ka̱ta̱gu̱z zin ngatu kaala looci, kokko atin ka̱jji̱nni̱ e̱e̱t ci obod ki ce̱e̱z cunno̱ng ko̱, ming elemi kar atin urumte bu̱k, abunna labak. Ma̱i̱je̱ ming utuburin, ki̱tto̱ni̱ zare cik Manyi wa aave udut, iróng anna kaburnin. I̱yo̱ko̱ koo ka̱ta̱gu̱z labak.”
14Atangu zin Ruzi zoone ciginnek kaal, kar zin kitinga ri̱ri̱wo̱na̱ ngati iróng e̱e̱ti̱ imma acine nonno, kar zin Boazi kize ne, “Ma anyike e̱e̱t imma ka̱gga̱ ming iyowa i̱nna̱ ngati a̱ru̱we̱ ol labi ko̱.”
15Kar bo̱do̱k kizek nonno ne, “Aara ru̱u̱m ci malkinto ko̱ kar zin gga̱m ke̱te̱.” Baling u̱tu̱gu̱ enne niko, u̱ddu̱te̱k zin Boazi labi wak een barley coviyac ki uduc kar ki̱ti̱ye̱k oo ci Ruzi. Kar zin Boazi ki̱mi̱re̱ kuk olo.
16Ma baling arawa enne ce̱e̱z, i̱jji̱n zin Naomi alawan, “Buweenyanni, ogon zoz neci ku̱?”
U̱du̱wa̱k zin Ruzi i̱nyi̱k kaal wak oobek Boazi nonno ke̱ do̱o̱k. 17Kar bo̱do̱k kotorek zoz ci azi ne, “Boaz ci aanya labi wak een barley ko̱, kar kize ne, ‘Iróng anna korongi i̱nne̱t mi̱re̱ rok i̱nyi̱k cunne ollin azzine.’”
18Abarizek zin Naomi nonno a̱nne̱k ne, “Abunna, buweenyanni, ke̱re̱yye̱k zee ruba i̱nna̱ zoz ci abunna. Iróng atidic Boazi aave lo̱o̱ta̱ zee kidiman enne zoz necu wazin cu!”
Currently Selected:
Ruz 3: tex
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.