Genese 19
19
1KE haba li angela ödru me o hnyi Sodoma hnyi sahac; ke Lota ame laba hnyi homagöuleny Sodoma: ke Lota ame ö ʼdru, me e ame tot he ka iouny mödru, ke e ame nom hnyikânâi; 2ke e ame ha, ka habe, Li than lo, wâ bi, saû ju ka hnyi hnyaban athnyabaibu, me mokut me ösûâ li cabu, ke öbu me he ka vesâ me vheno debu. Ke haingödru, ka habe, Ohe, öbmu me he ka mokut hnyi gethen eâu hnyinghet. 3Ke e ame ûjöngi ödru hwege ödru; me ödru me saû kâu, me didrö ka hnyi umen uma: ke e ame bi jeû hobi ködru, me le areto adre ca levenâ bi, ke ödru me han. 4Ke ödru tiga ca mokut, me ame igigilö uma hnen aten hnyei, wale aten Sodoma, hwân ge ta je hidröu ke ne o but ge wahingat, a tavat hia ûhedra hnyi je ke keihen hia; 5ke adre me hawo Lota me ha, ka habe, Ewa li at eja ödre o köu sahac? Hum ödru but köhmun e me ûkhanöhmunköu thö. 6Ke Lota ame didrut ködra eû hnyi hwanuma, kʼ ame hlöng hwanuma ka hnyi hoton. 7Me haingen, ka habe, Hnyat me lakeiny lö, ca ânyâ ûnyi helâe ae kong. 8Wâ bi, e hu lakuk li hlu, a ödru tiga ca tha laba me baga, hnö nya but he ka su ödru köbun, ke he thʼ öbun ka ânyâ ködru bi helâ me webun: ke ca he ka ânyâ ûnyi ae kong ka li at ang; anyin a ödre o but ka hnyi hmenon umök uma. 9Ke haingödra, ka habe, Kec dö. Ke adre me ha, ka habe, Haba at ang a o but a atkanyua, ke beweny bi he ka at owisa: ke walang ang öhmun e he ka okongu u gan hmâ hudru. Ke adre me ûlûö kâu, wale Lota, me hakekenyâ he ka kia hlingeny hwanuma. 10Ke haba li at ödru me hinöbeny jut me hûgûnö Lota ködru eiö hnyin uma, me hlöng ut hwanuma. 11Ke ödru me owadruâ but tavat hnyi hwanumen uma, tavat ae ûhnyûkong me tavat ae gan: ke adre me hûkötö but khaûteta hwanuma. 12Ke haingen li at kö Lota, ka habe, Hawa, e hu je waem eang? haba ûngom baga, me; je lakom baga, me hlu, me ânyâm tavat hia hnyi hnyei; hum ödrin but ûheny ang: 13anyin a ohmu me he ka ohia dok ang, anyin ae gan hmâ hwan anyidra tenge hnyi hnyimakö Iehova; ke a kunʼ öhmu Iehova he ka ohia e. 14Ke Lota ame didrut me ûhnenamö me laûngon, hnyat ödrin e hom lakon je hlu, me haingen, ka habe, Todrö, kec dö ge dok ang, anyin ame he Iehova ka ohia hnyei. Ke laungon ödrin e ûnykûme a gʼ ame ûhiö. 15Ke ame o thö hnyomakatu, me haba li angela Ödru me sihwegiö Lota, ka habe, Todrö hom dö âiâm, me lakom li hlu eang; wâ u nye hmunyi mokcu, at ka he ka bi hwaban ka hnyei. 16Ke e ame bec; me haba li at ödru me lelö hnyamen, me hnyamen âiân, me hnyamen lakon li hlu; anyin a Iehova ame betenge gan: me ödru me su e me ip hnyi hoton taun. 17Ke ödre hia but su ödrin, me e ame ha kâu, ka habe, Kec dö mʼ u me möt; ca hwiö bi, ke ca tot hnyi dok ae thahon hia; kec dö ka hnyi bucen, wâ u nye mokcu. 18Ke Lota ame ha ködru, ka habe, Than lö, e na ca helâe: 19me wâ ju a hia but athnyabaem wâ ibetengiö baû hnyi hnyimâkâm, ke u je hia but ogânâ ânyâm ibetengiö, wale u je omanenâ könya me me omeli nya but; ke ca khanö nya he ka kec ka hnyi bucen, wâ e nye hom tilö nya hnen kong, mʼ iny mokcu: 20wale bi eû taun ae hakekeny ka kec kâu, ke ûhnyûkong thibi: iny na kec ut kâ e, (hawa e ca ûhnyûkong e?) mʼ inye möt. 21Me e ame ha kâu, ka habe, Wâ bi oge hia but köp u hnen ûnyi ang minya, me oge me ca he ka ohia taun e u me ha. 22Logotö, kec dö kâ e, anyin ae ca khanö nya ka ânyâ ke ûnyi u ka tiga ca o e. Anyin a wale adre me hwenyi ien taun e, me Zoara. 23Ame görany dö seûnö hon hnyei ke Lota ame o thö Zoara. 24Ke Iehova ame ota we hon Sodoma me Gomora a teio me meic ûnyi hnyi drany ga Iehova; 25me e ame ohia li taun e, me dok ae thahon hia, me tavat hia adre me laba li taun e, me ta je ûnyi hia ame kû eû hnyi kânâ. 26Ke haba âiân ame hwiö hmetu, mʼ adre wia momo e me me sâlt ame tot wisa. 27Ke Aberahama ame vesâkong me he ka hnyi dok e ame labö tot hnyin hnyi hnyimakö Iehova: 28ke e ame bwele Sodoma ai me Gomoroai me hnyei hia ae thahon, me wâ, ke wâ bi ame sâ göranyai hainy hnyei helâke hainy inyâ ji.
29Ke e ka he Khong ka ohia li tauniny hnyei ae thahon, me Khong ame ûnykûmi Aberahama me kunö Lota ûnyi hnyi wanben ûohiö, hnyi ûen e ame ohia li taun ame laba hnyin Lota.
30Ke Lota ame ölö thö ûheny Zoara me laba hnyi bucen tha e me lakon li hlu; anyin a e ot ka laba e Zoara: ke e ame laba hnyi op, tha e me lakon li hlu. 31Ke haingen atö ka wakeiat, ka habe, A hingat ut cica, ke ba at ehe ang he ka hum ötu helâ me bongon hmeledrany: 32ötü ma he ka habeli cica ge waina, me ötu me he ka tha mokut më, me me hu mâtrân ûnyi ga cica. 33Ke hnyi lit eling ödru me habelen kamödru ge waina: me ame he atö me tha mokut me kamen; ke e ca khana ûen e ame mokut me tot hmetu. 34Ke nyi, haingen atö ka wakeiat, ka habe, Wâ bi, et hnyinghet oge tha mokut me cica: ötu me he ka habelen hmetu aû ge waina hnyinghet; me u me he ka tha mokut më, me me hu mâtrânitu ûnyi ga cica. 35Ke ödru me habelen kamödru ge waina hnyi lit minya eling: me wakeiat ame todrö me tha mokut më; ke e ca khana ûen e ame mokut me tot hmetu. 36Me wale e erkin dut li laku Lota hnen kamödru. 37Ke atö ame hnokoâ da, me hwenyi ien Moaba: wale kamen at Moaba ke ne o but hnyi bong ang. 38Ke wakeiat minya ame hnokoâ ke da, me hwenyi ien Ben-ami: wale kamen ta je laku Amona ke ne o but hnyi bong ang.
Currently Selected:
Genese 19: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
