LUCAS 17
17
Juchapi mana urmachina cashcamanta
(Mt 18.6-7,21-22; Mr 9.42)
1Jesusca paipac yachacuccunataca: «Juchapi urmaccunaca tiyangallatacmi. Shina cacpipish maijanpish juchapi urmachicca, ¡imachari tucunga! 2Huahuacuna shina ñucata criccunata maijanpish juchapi urmachictaca, cutana rumita cungapi huatashpa, jatun cuchapi shitanami ashtahuan alli canman. 3¡Allita cuidaringuichic!
Maijan canta ima mana allita ruhuacpica cunashpa rimangui. Chaita uyashpa alli tucucpica, perdonangui. 4Shuc punzhapi canchis cutin canta llaquichishpa juchallishpa, canchis cutinllatac: “Llaquirishpa, perdonai” nishpa shamucpica, perdonanguilla» nirca.
Ashtahuan crina yuyaita Jesusman mañashcamanta
5Apostolcunaca Jesustaca:
—Ñucanchicman ashtahuan crina yuyaita cuiyari— nirca.
6Shina nicpimi Apunchic Jesusca:
—Mostaza muyu shina ashallatapish crishpaca, cai jatun sicómoro yurata: “Caimanta anchuri, jatun cuchapi shayarigri” nicpica, cazunmanllami— nirca.
Shuc servic ima shina canamanta
7Shinallatac Jesusca: «¿Maijan cancuna shuc servic yapushpa, mana cashpaca michishpa cutimucpica: “Shamui, micungapac tiyari” ninguichicmanchu? 8Mana chashna ninguichicmanchu. Chaipac randica: “Utca mudarishpa, micunata ruhuashpa, ñucamanrac carai, ubiachi, quipata micunguillami, ubianguillami” ninguichicmanmi. 9Mandashcata shina ruhuacpipish, servictaca mana diosolopagui ninguichicchu. 10Chashnallatac cancunapish tucui mandashcacunata ruhuashpaca: “Ñucanchicca imata ruhuana cashcallatami ruhuashcanchic. Mana alli serviccunachu canchic” ninami canguichic» nirca.
Jesús chunga lepra ungüihuan caccunataalliyachishcamanta
11Jesús Jerusalén puebloman ricushpaca, Samaria llactahuan, Galilea llactahuan tupanacuitami rirca. 12Shuc uchilla llactaman chayacucpimi, chunga lepra ungüihuan cac runacuna tupangapac llucshishpa, Jesuspac carullapi shayarirca. 13Paicuna caparishpaca:
—¡Yachachiclla, Jesuslla, ñucanchicta llaquiyari!— nirca.
14Jesús paicunata ricushpaca:
—Richic, Israel curacunaman ricuchigrichic— nirca.
Chashna paicunaca ñanta ricushpallatacmi alli tucurca. 15Paicunapuramanta shuc runaca pai alli tucushcata ricushpaca, Diosta alli nishpa caparishpami cutimurca. 16Chashna cutimushpami, Jesuspac ñaupapi pambacaman cumurishpa diosolopagui nirca. Ashtahuanpish chai runaca, Samaria llacta runami carca.
17Jesús paita tapushpaca:
—¿Maipitac caishuc iscuncunaca? Chungatami alliyachircani. 18Cai mana Israel runami, Diosta alli ningapac cutimushca, ashtahuanpish israelcunaca mana cutimushcachu— nirca.
19Chashnami Jesusca chai runataca:
—Can crishcamantami alliyashcangui. Cunanca jatarishpa rilla— nishpa cacharca.
Dios mandanamanta tapushcamanta
(Mt 24.23-28,36-41)
20Fariseocunami ima punzha Dios mandangapac shamunamanta tapurca.
Chashna tapucpimi Jesusca:
—Dios mandangapac shamunataca, mana ricuipacllachu. 21Mana: “Caipimi, chaipimi ña mandacun” ningachu. Ashtahuanpish Diosca ñami cancunapac chaupipi mandacun— nirca.
22Jesusca paipac yachacuccunataca:
—Runa Tucungapac shamushca ñuca mandacucta ashallapish ricunata munana punzha chayamungami. Chashna munashpapish, mana ricungachu. 23Maijancunaca: “¡Cristoca caipimi! ¡Chaipimi!” ningami. Chaitaca ricungapacllapish, ama ringuichicchu. 24Chaica, Runa Tucungapac shamushca ñuca cutimuna punzhaca, relampa jaguin nishpa tucui cai pachata achicyachic shinami canga. 25Shina cashpapish cunan punzha gentecunapac piñashca, llaquichishca canaracmi cani. 26Ima shinami Noé causai punzhacunapi carca, chashnallatacmi Runa Tucungapac shamushca ñuca cutimuna punzhacunapipish canga. 27Noé jatun barcoman yaicuna punzhacamanca, gentecunaca micushpa, ubiashpa, cazarashpa, cazarachishpami causacurca. Chashna causacucpimi, yacu juizhu shamushpa, tucuita tucuchirca. 28Shinallatac Lot causai punzhacunapipish, allita micushpa, ubiashpa, catushpa, randishpa, tarpushpa, huasichishpami causacurca. 29Lot Sodoma pueblomanta llucshi punzhapica, jahua pachamanta nina, azufre tamyashpa, tucui tucuchirca. 30Chashnallatacmi Runa Tucungapac shamushca cutimuna punzhapipish canga.
31Chai punzhapi maijanpish huasi jahuapi cashpaca, imata apangapac ama ucuman yaicuchun. Maijanpish chagrapi cashpaca, huasiman ama cutichun. 32Lotpac huarmi ima tucushcataca yuyarichic. 33Maijanpish quiquin causaita llaquicca chingaringami, ashtahuanpish quiquin causaita mana llaquicca, huiñaitami causanga.
34Ñucaca ninimi: Chai tutapica shuc camapimi ishcai sueñucunga. Paicunamantaca shucca apashca, shucca saquishcami canga. 35Shinallatac ishcai huarmicunami cutacunga. Paicunamantaca shucca apashca, shucca saquishcami canga. 36Shinallatac ishcai runacunami chagrapi canga. Paicunamantaca shucca apashca, shucca saquishcami canga— nirca.
37Chashna nicpimi paicunaca:
—Apunchic Jesús, ¿maipitac chashnaca tucunga?— nirca.
Chashna nicpimi Jesusca:
—Maipimi huañushca tiyan, chaipimi ullachucunaca tandanacun— nirca.
Currently Selected:
LUCAS 17: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
