Jẹnẹsis 16

Hagar kugbe Ishmael

1Vwẹ ọke nana Serai, aye rẹ Ebram na, ji vwiẹ ọmọ kẹ-ẹ. Yo vwo ọmọtẹ rẹ Ijipt ọvo ro gbe odibo kẹ rẹ odẹ rọye Hagar; 2Serai da ta kẹ Ebram, Gbe no, Ọrovwohwo kanro ovwẹ o gbi ju vwe vwiẹ ọmọ-ọ, gbe bru ọmọtẹ mẹ na ra, ọkeọvo ke Me wan oma rọye vwo ọmọ. Ebram de nyo ota ri Serai na. 3Kọye, Ebram rhe vwọ dia Kenan ikpe ihwe nure, Serai, aye rẹ Ebram na, da vwi Hagar ohwo rẹ Ijipt ọmọtẹ rọye, vwọ kẹ Ebram ọshare rọye vwọ rọvwọ. 4O de bru Hagar ra, ọ da mrevun, rọ vwọ mrevun nure na, ko nẹ onini rọye na Serai saka. 5Serai da ta kẹ Ebram, Jẹn oruchọ ri mi ruru dia uyovwi wẹn; Me da vwẹ ọmọtẹ mẹ vwọ kẹ wẹ vwọ rọvwọ, rọ rhe vwọ mrẹ nẹ ọye mrevun na, ko ni vwe saka. Gbe jẹ Ọrovwohwo brorhiẹ mẹ vẹ ọwẹn, 6Ẹkẹvuọvo Ebram da ta kẹ Serai, Nighe, ogangan rẹ ọmọtẹ wẹn o rhe we, vwo ru obo ri je we. Etiyin Serai da djoma kpahọ, ọ da djẹ nẹ obọ rọye.

7Amakashe rẹ Ọrovwohwo da mrẹ vwẹ asan ogbugbu rẹ ame vwẹ evun rẹ aghwa, ogbugbu rọ orhoma rẹ idjerhe re de kpo Shur na. 8O da tanẹ, Hagar, ọmọtẹ ri Serai, tivọ wo nurhe ki tivọ wọ je ra? Ọ da tanẹ, Me djẹ nẹ obọ rẹ onini mẹ Serai 9Amakashe rẹ Ọrovwohwo na da ta kẹ, Rhivwi bru onini wẹn, ru wọ vwẹ oma kpotọ kẹ. 10Amakashe rẹ Ọrovwohwo na da je ta kẹ, Mi che ru uvwiẹ wẹn buebu gangan re de je se kere. 11Amakashe rẹ Ọrovwohwo na da ta kẹ, Nighere, wọ mrevun, ku wo vwiẹ ọmọshare, gbe se odẹ rọye Ishmael, fikiridie Ọrovwohwo nyo oja wẹn re. 12Ọ cha họhọ ekẹtẹkẹtẹ rọ djoma, rẹ obọ rọye mu kohwo kohwo rẹ obọ ri kohwo kohwo ji mu rhe, vwẹ irharo rẹ imoni rọye o de yenre akpọ rọye. 13Kọye o de se asan rẹ Ọrovwohwo da ta ota kẹ na, Wẹ Ọghẹnẹ rọ mrorẹ, kidie ọ tare nẹ, Ke Me ghene mrẹ Ọghẹnẹ, Me mrẹrẹ nu Me da je rhọ? 14Fiki rẹ ọtiọye na e de se orhare na Beer-lahai-roi, ọ ughwru ri Kadẹsh vi Bẹrẹd.

15Hagar de vwiẹ ọmọshare kẹ Ebram, Ebram de se odẹ rẹ ọmọ na ri Hagar vwiẹ kẹ na Ishmael. 16Ebram da dia ikpe ujọne gbẹ esan vwẹ ọke ri Hagar vwo vwiẹ Ishmael kẹ Ebram.

Currently Selected:

Jẹnẹsis 16: UBV77

Highlight

Copy