Kə̀fwàʼ 1
1
1 #
Lûk 1:1-4
Am mwàʼsò kə sʉesʉ kəla mùgho fə̀ tɔm wô â ghù a Tǐofilùs, mùgho fə̀ tɔm ghəa ghəla Yɛso fə̀ ghəŋlo alenìi nughù wô, 2bùghò tɛ̀ wò tsuʼ fəla ghe mò nî kɔʼ nduw wə̄n alo kəwālā, mo daʼa kə Zuʼ tə̀ Zɔlɔ kə ŋ wən ghəəŋ tsughu ù m fùghù tsùghù dzə̀ ètsʉ̀ â tum tə wə̄n təla ù fə̀ shîaa kɔʼ. 3A m bùghò ù zuw mɛʼɛ̀ tsughu ŋgoʼ, ù ŋ kɔ̀ʼsə kɔʼ alo evʉ̄, bùghò dè wò ùghue â sə à tughu gho â ghee an ndə̀mà tə tədzǐi, gbə̀nsə kaŋlo a vʉ̀a ghee aŋ ghə̀m mə̀ ntsùʼu n te mò n chìakò, kə̀aa ndùw ghee â ghəa e fɔ̀e u Kəzə̀ zò. 4#Lûk 24:49 A m bùghò ù lǒ ghèe ghee, tsuʼ ù li wo, ù m fughu tsughu kəlâŋ â ghee enyəa e kwo ghe lô so e zəghàan Yɛ̀lusalɛ̀m, nyəa ghe doʼò tsughuu ko fughu, ghe ləmā tsughu to kə Tsele. Ù n dzɛ̀ â ghee enyəa, “Zən lò zəla ghɛ̀ zuw an dzughu zaŋā; 5#Mat 3:11; Mâk 1:8; Lûk 3:16; Dzn 1:33Dzɔ̌n fə̀ ghî ghò â mùghù ŋ Kə̀zə̀ m fughuu alo mmùghu, gha kə kôom sə̌a yo aŋghəa ghe lo kuūwn fughuu ghɛ â mùghù ŋ Kə̀zə̀ mò alo təzùʼ.”
Ghe nî kɔ̀ʼ a Yɛso alo kəwālā
6A m bùghò tsuʼ ù li wo tsətəndə̄ghā tə zûuŋ doʼò tsughu ghèe ghê Yɛso, ghe m bvʉ tsughu â wən enyəa, “Mughùbè, zən lò nəgha zəla ghù se fughuu tsəghàa ndûw fɔ̀e u te wo â Ezə̀lɛ̂ hò à?” 7Ù m bɛ̀lɛ̀ tsùghù enyəa, “À yò dzə̂ ghɛ alekele ènəghā àsùghò tì kəla Tsele ù te naŋā tsughu an daʼa kə wə̄n. 8#Mat 28:19; Mâk 16:15; Lûk 24:47, 48 Ghɛ̀ lo kuuwn kele tsughuu ùdwaʼa abugho Zùʼ è Zɔ̀lɔ lo bughò tsɛ̀ʼɛ̀ ghɛ; ghɛ̀ lo daŋso doʼō tsughu ghɛ̀ è mʉā fughuu gùw zaŋa an Yɛ̀lusalɛ̀m, an Dzùdîa e dzə̀m à Sàmalìa e dzəm, àsùghò alendùw tâa ndûw aŋ kàlà tə mbī ten tə̀ dzə̀m.” 9#Mâk 16:19; Lûk 24:50, 51 A m bùghò ù dzɛ̀ tsughu ghəa ghən gho, ghe n toʼn nùghù kɔ̀ʼ ndùw wən e dzuŋ mo tsə̀təndə̄ghā tə wə̄n tə lɛɛn ndùw nù, ù ŋ kɔ̀ʼ sàŋà nyə̀ ndùw am mbàʼ, ghe ŋ kôom yò alekòʼ wə̄n. 10Ghəa ghe naām lɛɛn kɔʼɔ̄ ndûw wala ko aŋghəa ù kɔʼɔ̄, ghe n nùghù tɛ̀fìi kɔ̀ʼ ghî à li gho a bə̀ghà ghe ti ghèe ghee à ndzʉ tə̀ fəmā to a zəŋo e eghùe. 11Ghî yi m bvʉ â ghee enyəa, “Ghî a Galèlîi ghò, ghɛ̀ sô mgbɛɛ ti enyə lɛɛn kɔʼɔ ndùw kəwala à? Yɛso wən, wəla ghe nî nughù kɔʼ fɛ aŋ ghùu ghɛ̀, nì nùghù kɔ̀ʼ ndùw â wən alo kəwālā, ù kè bɔ̌ɔm bùghòo sùghò an dziī è mɔ̀ʼɔ aŋ ghəa ghɛ̀ koʼ ù kɔʼ ndûw a te alo kəwālā.”
Tuw kə Dzudà
12A m bùghò ghe zəghàa tsughu kwâʼ u Olēvɛ̀t wò, nùghù ndùw èbàm an Yɛ̀lusalɛ̀m; kwâʼ u Olevɛ̀t ù kuʼù dòʼò tsughu ko ghèe Yɛ̀lusalɛ̀m, mò ghùw bwìi tò ebəghaa e mɔ̀ʼ (bwìi e tsuʼ u Sabàt u mɔ̀ʼ), alenùghù tsughu an Yɛ̀lusalɛ̀m ndùw tɛ̀ fughu. 13#Mat 10:2-4; Mâk 3:16-19; Lûk 6:14-16 A m bùghò ghe nyə nduw enaʼ, ghe n tsə̀ghà kɔ̀ʼ ndùw an dzughu e ndughu zəla ghe mò mughu a te an ndùghù è kɔ̀ʼɔ daŋso. Ghî ghəla ghe mò lo a fughu mò lo Pità, Dzɔ̌n, Dzɛ̂ms, Andùlù, Felêp ghèe Tɔ̀mâs, Bàtòlòmîa n lo sugho ghèe Matìo, Dzɛ̂ms, wɛ̀ ù Afìus n lo, Sǎemòn Zilɔ̀t n lo sugho, àsùghò Dzudàs, wɛ̀ ù Dzɛ̂ms. 14Ghee a dzə̀m n dzeŋe gɔ̀ɔŋ tsə̀ghà ko kaʼkəkaʼ ghèe ghê ghìzən à loʼ gho, àsùghò Mèle, tɔɔŋ zə̂ Yɛso, à waazə̂ a Yɛso ghò. 15An tsùʼu n te mò ko, ghəa ghe zûuŋ wô tsuʼ ù li wo (ghe fə̀ dzeŋe lo bɔm fə aghì à ghì ghò ghuūghûw), Pità n nùghù těe è kɔʼ, dzɛ̀ tsùghù enyəa, 16“Waazə̂ ghò, lâŋ kə Kəzə̀ kəla Zuʼ tə̀ Zɔlɔ tə tsom kɔʼ Dɛvìd enyəa ù fughuu səā wô an dzughu e wə̄n kùu ndùw Dzudàs wəla ù mò bû wô ghî ghəla ghe mò kwu Yɛso, kə ki aleluesō tsughu ughue. 17Sɛ̀ à ghee mò lo alo kəfɔ̄e kə mɔ̀ʼ, ghe m fùghù tsùghù sùghò bà kə wən am fwàʼ kən. 18#Mat 27:3-8(Dzudàs maā bəghaa e zue aŋ kua wəla ù mò kele kɔʼ am bo e wə̄n; ghəa ù bvʉ̀ sɔʼ ndûw tuw ko, bùʼù nyə̀ ndùw an nʉ̀ghà, nəghà tə wə̄n tə n tùuŋ sə̀ wò à beē tə dzə̀m. 19Ghî ghəla ghe mughu an Yɛ̀lusalɛ̀m a dzə̀m ŋ kelê ghəa a te gho, ghe n tɔŋɔ ndùw bəghaa e te zo an shwaʼ wə enaʼ u ghee enyəa à lǒ Àkɛ̀ldamà, mo e moʼò tsùghùu enyəa, Bəghaa e Təkàŋ.) 20#Sms 69:25; Sms 109:8 Zən fə̀ ènyə lǒ mbuu ghe tɔm naŋā am mwàʼsò kə tə Ndzàŋ enyəa,
‘Luʼū kə wə̄n kə̀ mughūuŋ kə doʼò tsughu kə̀ zum ko,
ghùw è tso buw alemùghùu a te.’
Àsùghò enyəa,
‘To ghùw ù nùghù mò nîi nughù kɔʼɔ̄ sughò luʼū kə wə̄n kə̀ fwaʼa ko.’
21 #
Mat 3:16; Mâk 1:9; Lûk 3:21;
Mâk 16:19; Lûk 24:51 À fi lo enyəa ghùw u mɔ̀ʼ aŋ ghì ghəla ghe mò təə̄m kaāŋ wo sɛ̀ an nə̀ghà zən e dzə̀m Mughùbè Yɛso mò tsəghànlo am bvʉ̄a e sɛ̀, 22alenìi nughù wô an tì kə̀là Dzɔ̌n mò fughuu Mùghù ŋ Kə̀zə̀ mò â ghì ghò, bùghò tɛ̀ wò an tsuʼ fəla ghe mò nî nughù kɔʼ wən a te aŋ ghùu sɛ̀, nùghù kɔ̀ʼ ndùw â wə̄n. Ghùw ù ghee u mɔ̀ʼ kì aledòʼò wô sɛ̀ à ghee tǒ ghùw wəla ù mʉā fughuu sugho gùw è Yɛso aŋ ghəa a wə̄n à zoōm wo gho alo evʉ̄.” 23Ghe n nì nàŋa sə̀ wò ghee a bə̀ghà, Dzùghùsî, tɔɔŋ Bàsabàs wəla ghe mò tsʉ̂ tsughu zən zo enyəa à lò Dzustùs, àsùghò Màtîas 24Ghe ŋ gɔ̀ɔŋ tsùghù enyəa, “Mughùbè, ghù kwò fə̂ŋ tə ghì ghə̀n à dzə̀m, děe wǒ ghùw wəla ghù shǐaa, aŋ ghì ghə̀n à bə̀ghà, 25alenìi kɔʼ bûʼ kəla Dzudàs bàʼ naŋā kɔʼ enyəa e nughù wən â luʼū to, am fwàʼ kə tsə̀təndə̄ghā kən.” 26Ghe n daŋso təm tsughuu ndzwàʼ an tuw kə ghee, ndzwàʼ m bvʉ̀ tsùghù an tuw kə Màtîas, ghe n nì təmdzəəŋ ndùw wən an tsə̀təndə̄ghā tì èghəm à ghè zò e mɔ̀ʼ.
Currently Selected:
Kə̀fwàʼ 1: agq
Highlight
Share
Copy
Want to have your highlights saved across all your devices? Sign up or sign in
